زكاة واجب ادائها

انا قلت اني لي وجهة نظر ما في موضوع العلم اللي بنتعلمه

واحدة واحدة وعلي اد فهمي وعلي اد عقلي ما موديني ..

انا بزكي عن مالي زي ما ربنا امرني باني بطلع منه نسبة معينة زكاة ان مر عليها الحول ..

و بزكي عن جسمي لما بصلي الضحي كل يوم ..

باقي فيا حاجة مش بدفع زكاة فيها ..

عقلي ..

مهو اكيد مش فاضي اوي يعني و مهما كان درجة علمي ايه او اللي اتعلمته وصلني لحد فين .. بردة في حاجة اتعلمتها في حياتي و في حاجة استفدت منها ..

لحد كده كويس :)

و علي فكرة لو انا بردة متعملتش في مدارس ولا جامعات و امية و جاهلة .. بردة اتعلمت حاجة في الدنيا دي ..

علي اد فهمي كده ..

انا بتعلم ليه؟؟؟

بتعلم علي استفيد و اتنور و استوعب الدنيا من حوليا ووووووو

كل الحاجات اللي ممكن اعددها من هنا الي ما لا نهاية كفوائد من التعليم علي راسي و مش هقدر اجادل فيها .. ماشي ...هيحصلي كل دا .. كويس ...و ماله... و ميضرش .....بالعكس يفيد...

بس هيوصلني اني بردة بتكلم علي نفسي .. انا اللي مستفيدة و بس.. اه عملي بيعود بالنفع علي غيري بس في الدرجة الاولي انا صاحبة الاستفادة الاولي ..

حاجة كمان .. انا اتعلمت اد ايه من عمري و اتعلمت ايه و استفدت من ايه فيه و راكنة ايه جوايا مستفدتش بيه؟؟؟

اتعلمت طول عمري من اول ما اتولدت .. اتعلمت اكل و اشرب و البس و امشي ..

شوية و اتعملت اقرا و اكتب والعب و انزل و اطلع و اروح و اجي و احتك بالناس وووو و .......

ملايين الاشياء اللي منها حاجات حتي مش بنحط في بالنا اننا اتعلمناها ..

دا طبعا غير العلم الرسمي .. في المدرسة و الجامعه و ان كان في بعد كده ..

اشتغلت .. كويس نعمة من عند ربنا .. بستخدم ايه باه في المرحلة الاخيرة دي من اللي اتعلمته سنين عمري كلها ؟؟

نقول 30 ولا 40 % دا قمة التفاؤل في الحسبة دي .. النسبة دي هي اللي بستعملها في الشغل و الحياة عموما في ال24 ساعة من اليوم في المرحلة العمرية اللي عايشاها دلوقتي..

كل الرغي اللي فوق دا علشان اوصل للشوية اللي مدفونين جوانا اللي عفا عليهم التراب و اتنسوا من قلة استخدامهم ..

نحن نتبع سنة المصطفي صلي الله عليه وسلم .. مظبوط؟ .. طيب هو قال ان اذا مات ابن ادم انقطع عمله الا من ثلاث ، منهم الصدقة الجارية و علم ينتفع به ..

الصدقة الجارية .. علم ينتفع به

عندي وجهة نظر تجمع الاتنين مع بعضهم في خطوة واحدة و مرتبطة بالرغي اللي قلته

ايه اللي ممكن يجرا في الدنيا لو انا قابلت ولد صغير بيضرب قطة في الشارع مثلا .. و بالحسني كده فهمته ان كده حرام و انها حيوان بيحس و يتألم زيك و ما الي ذلك من نصائح .. و يشاء الله ان الولد يدخل الكلام قلبه و عقله و يفتكره و يطبقه في حياته ولو صادف موقف زي موقفه دا ينصحه نفس النصيحة و هكذا

انا في ظني اني عملت حسنة و الحسنة تناقلها واحد ومن واحد لواحد .. و الدال علي الخير كفاعله .. و علمت انسان حاجة و العلم دا لم يقف عنده انما علمه لحد تاني و هكذا..

بالظبط دا اللي عايزة اوصله .. احنا اتعلمنا حاجات كتيرة اوي و مبقيناش بنستعمل منها حاجات كتيرة وفي غيرنا ممكن نساعده و نعمله اللي اتعملناه .. ليها طريقين

اما اعمله علي اعتبار اني لست بحابس علم و اني زكيت عن العلم اللي اتعملته في حياتي و بعمله لحد تاني علشان يستفيد منه و هو يعلمه لغيره من بعدي ( و دي بتحصل مع الاب و الام لما بيعلموا اولادهم كمثال )

بس الاولي اشوف اللي محتاج العلم دا فعلا .. لو علم من علوم الدنيا يدرس في مكان ما .. ليه مشوفش حد من الطلبة فيه لو محتاج مساعدتي .. ليه معملهاش لوجه الله اني بساعد انسان محتاج مساعدة و في نفس الوقت تعتبر صدقة جارية و كمان زكاة بوفيها عن العلم اللي اتعملته ولم يتوقف عند حدودي فقط.. الحد دا ممكن يبقي قريب ولا صديق و لا زميل .. دا حتي اللي بتعمله حاجة اتعملتها في الشغل بيتهيالي لو احتسبت عند الله انك بتتصدق بالعلم دا و بتساعد اخوك و حاجات كتيرة اوي ممكن تحتسبها لما تعمل الموضوع دا .. تخيل الثواب جايلك من مجرد كلمة قلتها لحد بس احتسبت عند الله نية طيبة :)

الطريق التاني و بجد احلي حاجة ممكن تعملها و تستفيد من ثوابها ان شاء الله ... المؤسسات الاجتماعية و دور التربية و ملاجيء الايتام والاسرة الفقيرة و المتوسطة .. كل دول فيهم اولاد في سن التعليم .. ممكن يجرا ايه في حياتك لو ساعه واحدة في الاسبوع رحت ذاكرت لحد محتاج علمك دا او علمته حاجة او حتي نصحته نصيحة و تكون محتسب عند الله اجرك عليها

انا مش بقول كلام و خلاص علي فكرة .. الكلام دا في شباب كتيرة بينفذه بالفعل .. بس ناس كتيرة اوي لسه محتاجة .. والمشكلة احنا اللي مش فاهمين اننا محتاجينلهم .. اداء زكاة عن العلم دي ليها اثر في النفس ميقدرش يحس بيه الا اللي بيعملها و جربها..

انا بس حبيت اقول حاجة جوايا و الله اعلم بالنوايا

واتمني اكون عرفت اوصل الفكرة :)