الأحد، 31 مايو، 2009

بالله .. يتقال عليه ايه الراجل دا؟؟!!!





"الاقليات الاسلامية في الدول الاوروبية  "تتقوقع" وعجزت عن التفاعل والتعايش مع المجتمع الاوروبي
ومن ذاب فيها زال"


" ان المرأة المسلمة اذا احست حرجا في التعايش مع هذا المجتمع ،تلبس برنيطة و لا ترتدي الحجاب الاسلامي ..مهو الغرض من الحجاب هو ستر الشعر .. فيتحقق الغرض بدون ما تثير حساسيات بيها وبين المجتمع الذي تعيش فيه "

"المهاجرين من الرجال.. يواجهون المشكلة الجنسية .. لا يمكنهم الزواج من عشيرتهم ولا جنسهم بسبب القوانين..وفي حالة لجوئهم لزواج اوروبي .. المرأة تضع يدها علي نصف الاملاك في حالة الطلاق .. 

الحل : النكاح محدد المدة .. 

يقيم علاقة شرعية ..

زواج فيه كل مقومات الزواج باستثناء شرط تحديد المدة .. 

اذا نجحت استمروا..

 اذا فشلت ينفصلوا اصدقاء.."



من راجع الكتاب الصادر 1994 .. من مدينة دسوق اشتراه احد الاشخاص بس بعد طباعته ب 10 سنوات في عام 2004 

ذهب لقسم الشرطة يقدم بلاغ لان الكتاب فيه خرافات و اساءة للعقيدة .. 

المجمع عادة لا يتقصي الكتب المخالفة ..

 اذا وصله الكتاب بطريقة او اخري يتعين عليه ابداء رأيه .. 

لما وصله الكتاب (المذيع :جسم الجريمة ) قرر المراجع انه به ما يخالف العقيدة الاسلامية و لا ينصح بنشره .. 

وكان قد نشر منذ 10 سنوات .. 


كان الغرض من الكتاب .. طالما سعيتم بمزاجكم للدول الاوروبية .. 

كونوا مواطنين صالحين بس بمقوماتكم الاسلامية ...  

علشان يكون في اقليات اسلامية قوية لما يندمجوا مع شعوب الدول دي !!!!!! 

 المذيع : اهدر تعبك فيه علشان قضية الحجاب والزواج؟؟ !! " ( ويتعجب المذيع )


" الخمر .. 

المذيع :المفروض يتجنبها في هذه المجتمعات دي

البيرة مخففة .. 

وفي من الفقهاء في مصر من لا يري انها خمر..


يعني طالب وزميلته في الجامعة عاملين حفلة و طلبوه يرقص معاها .. 

يرقص معاها .. 
هيجرا ايه يعني معملش معصية .. 
مكفرش بربنا .. 
دي حاجات صغيرة يعني ميتمش التركيز عليها .. 

علشان يتعايش في هذا المجتمع " ( ويضحك هو والمذيع)

" الاسلام خط الدفاع الاخير في مواجهة الاذابة .. 

المسلم يقف ازاي امام القوي الحالية (امريكا والدول الاوروبية ) ..
 هما نجحوا في انهم يذيبوا و يلغوا خصائص الامة والدولة والقومية  فينا و حتي اللغة وهي العامل الفارق..

 فالصورة غلبت علي اللغة ( السينما) فالناس اصبحوا يتأثرون بالصورة . . 

فعلا هذه القوي تتمكن من انها تذيب مقومات وخصائص اي دولة الا الاسلام 

لانه متمكن في النفوس وليس فيه ضعف..

 لا خرافات ولا كهانوت و كنيسة اللي خلت العناصر النابهه تنفرمن الاديان .. 
لذلك فهو الخط الاخير في مواجهة الاذابة .. 

بقدر ما نحسن فهمنا للاسلام بقدر ما نستطيع المقاومة ..

 المهم نفهم الاسلام فهما سليما ..

 يمكن مش هنقدر نفوقهم في هذه المجالات .. 

ولكن لا نتأثر بها .. 

تقدر تجر الحصان انما متقدرش تجبر الحصان انه يشرب .. 

يجب ان يكون في حصانة دون التأثر بهذه القوي الغلااابة ..  

حين تنهمر علينا السلع منهم بالاستيراد .. 

الشعب يجب ان يرفض.. 

ومثال علي دا :ليدي (...) طالبت الملك بمطالب الشعب لديه ..و لكي يستجيب الملك لمطالبها خيرها بانها يجب ان تسير عارية في كل الشوارع البلد ليستجيب لطلبها .. فسارت عارية حتي تحقق مطالب الشعب.. فالشعب قفل كل الشبابيك و لا يوجد فرد واحد في الشارع فسارت كانها في الحمام الخاص بها .. " !!!!!!!!!!!!!!!!!!!!!!!!!!!!

"نظرية المؤامرة : التفرقة علي اساس تسارع القوي .. الدولة الجديدة الشابة تؤثر علي الدولة الشائخة المعتمدة علي الطبقية .. في تصادم القوي .. ليس مؤامرة .. احنا ضعاف داخليا .. مسئولية فشل الدولة الاسلامية حاليا داخلنا نحن "

المذيع عايز يطبع منه طبعات اخري جديدة .. علشان الناس تستفيد ..

=============================================

الكلام اللي فوق دا بالنص كلام جمال البنا في برنامج دين ودنيا اليوم .. كنت بكتب وراه وهو بيتكلم علشان الواحد يفكر في كلامه يمكن ظالمينه !!! 

الكلام دا المفروض مناقشة عن كتاب كتبه هو وصادره مجمع البحوث الاسلامية ( مصادفة ) بعد 10 سنوات لمجرد ان واحد راح قسم الشرطة وبلغهم ان الكتاب فيه مغالطات تمس العقيدة الاسلامية و قسم الشرطة حول الموضوع للمجمع !!

اتكعبلت فيه بالصدفة وانا بقلب قلت اشوف حاجة اسمعها وانا بشتغل .. لقيته قلت كويسة فاضيالك باه اشوف بيهرتل في ايه المرة دي ..


الراجل دا مش هيتهد ؟؟؟؟؟؟؟؟ الله يهديه 

يعني الواحد يقول ربنا يهديه كفاية انه وصل للسن دا- ارذل العمر- مش يتقي الله في اللي بينقله للناس .. مرة سجاير لا تفطر ومرة قبلات مصرح بيها .. وغيرها كتير .. الله يهديه وايانا للحق.

انا معاه في اننا ضعفنا نفسنا بنفسنا .. بس طريقته هو لكي نصبح اقوياء هتحولنا لنموذج قوي زيهم اه 

بس مسخ منهم  لا محصلين المسلم الصحيح علي الدين الحق ولا محصلين اللي مبيهموش الا مصلحته بغض النظر عن الوسيلة !!






اللهم لا تسلط علينا بذنوبنا من لا يخافك فينا ولا يرحمنا  يا رب




الخميس، 28 مايو، 2009

تقييم لابد منه









السلام عليكم ورحمة الله وبركاته


زي مهو باين كده من العنوان  .. انا حابة اعمل تقييم لاول سنة تدوين .. مع ملاحظة ان الغالبية العظمي من التدوينات المنشورة خاصة بشخصي انا وحياتي وان كان في بعض التدوينات كان نفسي اكون بعمل فيها حاجة لوجه الله اقول فيها علي حاجات واجبة علينا انما تاهت مننا في زحمة الدنيا واللي بيشوفه كل واحد في حياته 

انا والدنيا معتقدش ان الموضوعات دي فرقت مع حد الا انه ممكن يفكر انه في ناس مبتلاه غيره - علي اختلاف انواع و شدة الابتلائات - وان في صنف من البشر زيي كده بكل عيوبي و متناقضاتي !!


علشان مبقاش بقول حاجة مش بعملها .. انا امبارح قولت لاحد المدونين في جملة " احنا هنروح واللي باقي ما سطرت ايدينا في صحائفنا" وعلشان من باب اولي اقول لنفسي قبل ما انصح غيري والا ابقي منافقة وانا مش عايزة اكون كده..  انا كتبت حاجات كتيرة كمسودات فيها غضب ساعات و فيها ضعف كتير و فيها حتي سخرية ولو انها مش كتيرة ولم انشر اي منها للسبب دا .. حققت الغرض اني كتبت وفي نفس الوقت حاولت امسك نفسي ازود في ذنوبي بدون داعي..


انا بشوف في عداد الزائرين بلاد كتيرة مختلفة .. في اللي بعرف هما مين لو علق او حتي لو معلقش وفي اللي اعتقد بيدخل يقرأ بدون ما يسيب تعليق..  بس المرة دي عايزة اللي يدخل يحققلي طلبي اللي هقوله كمان شوية 

(( رجاء خاص - ان امكن ))


عندي كام سؤال بالنسبة لي مهمين و شغالين بالي من فترة .. واعتقد جه وقتهم .. 

1-  لأي مدي ممكن يتدخل التدوين في الحياة ؟؟ بمعني انا بدوّن ، بفضفض كتير جدا و كتير جدا جدا جدا بكره اني اظهرت ضعفي في الازمات اللي مرت بيا السنة اللي فاتت للناس و انها متاحة قدام الكل و علي الرغم من اني متأكده اني لم اذكر حاجة اخجل من ذكرها قدام اي حد الا الضعف البشري - ان كنت ممكن اسميه كده            
  (( صح ولا غلط ))

2- لأي مدي ممكن اتدخل برأيي في تدوينة غيري؟؟ بمعني اني بتعامل اكتر باحساسي ناحية اللي بقرأه .. في مدونين و مدونات بحس كلامهم قريب لي مش مزعج حتي وان اختلفنا في الرأي .. يمكن اقدر اقول رايي مرة و مرات كتيرة لا .. في اختلافات في الرأي بتفسد للود قضية .. بتحصل و حصلت معايا في اكتر من حادثة          
   (( صح ولا غلط ))

3- من منطلق قول البعض .. لو مش عاجبك الكلام متجيش هنا تاني .. مش هقول من رأي منكم منكرا فليغيره .. بس يعني طالما الكلام اتنشر قدام الكل يبقي الأخر يتقبل الرأي والرأي الأخر  حتي وان لم يكن علي هواه  .. مش موضوع ان عجبك الكلام اقراه معجبكش متورنيش وشك هنا !!   طيب ما تقفلوها علي اعضاء بعينهم  طالما رأي الأخر مش مقبول ..                         
   ((صح ولا غلط ))





نيجي باه للأسئلة المتعلقة بالمدونة  دي وتحديدا في المواضيع اللي فيها علم ينفع (اي حاجة غير شخصية ولاني معتقدش في اي فائدة عائدة علي اي حد من اللي بكتبه عن حياتي ) 

بس للحق يعني .. انا المستفيد الوحيد في الموضوعات الشخصية لاني بسمع كلام طيب من ناس محترمة احسبها علي خير ولا ازكي علي الله احد .. يعني في اللي منهم بيشاركني بكلمة او بطبطبة ولا نصيحة ... واكيد فرقوا معايا كتير جدا جدا جدا


اه منك يا دنيا

تحتوي علي بعض الموضوعات المنقولة - تم ذكر انها منقوله 
تحتوي علي سلسلة من 6 تدوينات تحت عنوان بفكرني - محاولة لجمع سنن صحيحة تايه مننا في زحمة الدنيا .. في سابعة في السكة بس هتتوقف علي رد الفعل علي التدوينة دي
تحتوي علي بعض التدوينات كتبت كرد فعل لتدوينات مدونين اخرين سواء مدح او ذم
تحتوي علي نقد بعض الظواهر في المجتمع من وجهة نظر شخصية بحته 
تحتوي علي بعض ذكريات وأمال وآلام واحلام ورجاء ودعاء و فرح وحزن و نجاح وفشل و غيرها كتير في صورة تدوينات اعتبرها شخصية و لا اعتقد انها افادت حد

((   المحتوي الاخير دا طاغي علي معظم تدوينات مدونة "اه منك يا دنيا"  ))

السؤال المهم :

هل حصل ان حد انتفع باي حاجة مذكورة في المدونة دي ؟؟

هل المدونة دي في رايك شاهد لي ولا شاهد علي ؟؟  

هل بتحكم علي الموضوع بصورة منفصلة عن باقي موضوعات المدونة ولا بتربط علي المواضيع علي اعتبار ان الكاتب واحد -هي هي نفس الدماغ اللي بتكتب ؟؟


كل الهدف من الكلام دا كله اعرف انا صح ولا غلط !!


لوفي نصيحة أيا كانت بخصوص ايه عند حد لي .. احب اسمعها من منطلق ( رحم الله امرء اهدي الي عيوبي) وهي كتيرة اوي انا عارفة .. الله يعافيني ويكفيني شر نفسي

اي حد من الزائرين الكرام هيتفضل يجاوبني علي اي حاجة ذكرتها في التدوينة دي هيكون خدمني خدمة كبيرة اوي و ساعدني في حاجة  محتاجة احط ايدي عليها واعرفها..

ومش هزعل حتي لو انتهي الامر لقفل المدونة ولو انها عزيزة عليا اوي .. بكل حلوها ومرها .. فرحها و ألمها - ساعتها هرحمكم مني وهبقي اشوفها انا لوحدي :) :)

السلام عليكم ورحمة الله وبركاته




الأربعاء، 20 مايو، 2009

مشروع العمر لرحايا العمر .. فيني منه؟!!








زي عادته المهندس احمد كمال صاحب رحايا العمر .. في
مشروع العمر ..

زي ما احد معلقيه قاله .. هو فعلا بيحط قدامنا الاسئلة اللي مش عايزين نشوفها ولا نحب نتسألها :(

مع الاسف مشفتش تدوينته الاخيرة الا اليوم .. مع انها تزامنت مع يوم مولدي وكأنها نصيحة طيبة وتذكرة لطيفة .

زي ما بيقول المهندس احمد كمال .. مواضيعه بتكتمل فعلا بالتعليقات .. عن نفسي تعليقات قرائه بالنسبة لي جزء لا يتنفصل عن الموضوع نفسه..

الواحد ملوش لازمة كده اوي :(

عندي مشوار بقاله اكتر من سنة ولا سنة ونص متأجل علشان محرجة اروحه مع اني كنت بلاقي فيه حاجة مكنتش بلاقيها برة في الدنيا الواسعة .. بس احساسي اني يمكن وجودي ميكونش مرغوب فيه .. يمكن مانعني.. و يمكن لما غبت اسبوع والتاني وشهر والتاني بقيت بخجل دلوقتي اني اروح بعد المدة دي :( مع ان اللي في المكان وحشوني و نفسي اشوفهم .. لما كنت بروح هناك كنت بحس اني ليه لازمه في الدنيا و بعمل حاجة تنفع .. والله كانت ايام جميلة .. سنين جميلة في فترات الدراسة .. ضيعتها مني بغباء وعذري الوحيد (( الاحراج ))

حاجات كتيرة اوي بتضيع زي دا كده علشان ببقي محرجة اعملها او محرجة من رد فعل الاخر .. هيقبلها ولا لا .. و افضل اقدم خطوة و أخر وراها خطوات لورا لحد ما الاقي نفسي معملتش حاجة و فات وقت الفعل و مبقاش للتفكير في الموضوع دا اي لازمة !! بردة غباوة

بزعل اوي لما اتجبر اني اعمل حاجة او اتفاجأ اني مجبرة اعمل حاجة واني اتغشيت لاني لما وافقت في الاول مكانتش الحاجة دي مفروضة عليا .. زي الرسالة الكابوس اللي معملتهاش لحد النهاردة :(

لما اعمل اعلان عن فتح باب الدراسة في مجال معين .. محدد لناس بعينها .. مينفعش يدخله اي حد ..

اللي يروحه لازم يكون عايز دي بالذات و فاهم فيها .. مهياش مجرد كلمتين بيتقالوا و يروحوا و يمتحنوا و ينجحوا وخلاص .. علي الاقل المفروض كان الوضع يكون كده .. بس طبعا فلتت منهم .. بالرغم من انهم حاولوا يعملوها صح بس زي العادة .. دخل الحشو واللت والعجن و الكلام اللي ملوش اي لازمة لانك لما تكون تاخد خبرات ناس بتشتغل بايدها في مجال معين .. مينفعش تجيب واحد مدفون في وسط كتب .. مهما بلغ علمه بردة غير اللي شغال بايده .. واحد شاف و جرب .. فشل ونجح .. شاف ثمره تعبه بتكبر و تتحقق .. غير اللي بيقرأ في كتب و مراجع عن نظريات و قوالب ثابته لمجرد انه يرتقي في وظيفته و يكسب قروش زيادة ...
معرفناش نهرب من الروتين الجامعي .. لازم دكتور واتنين وتلاتة و اربعة اكاديميين .. يقعدوا يسمعوا منك بانبهار وكل واحد يقولك " ايه دا هو في كده ؟؟ هو دا بيحصل في مصر؟؟ "
مين فينا اللي بيعلم التاني !! ..

مرة دكتور فعلا محترم جدا ربنا يباركله .. قالنا بكل حماس .. عايز تتعلم اياك تروح لدكتور اكاديمي قاعد علي مكتب .. روح اتعلم الحاجة من اللي ايده فيها .. كان يجي يقولنا انا اللي بتعلم منكم .. خدوا مني كلام العلم النظري و ادولي انا الدنيا بتعمل ايه في العلم دا و بتوديه فين علي ايديكم.. كان اكثرهم صدقا معانا ومع نفسه ..

افتكرت اللي حب يجمع كل علوم الارض وبقي ياخد حتة من هنا وحتة من هناك و بعد عمره ما قرب ينتهي اكتشف انه ملحقش يعرف حاجة عن اي حاجة !! لو كان ركز حماسه دا في حاجة واحدة كان قدر يوصل لحاجة ..

ولما اتفرضنا علي المجلس الاعلي للجامعات علشان يوافق علي منح درجة اكاديمية للماجيستر دا .. بص للمواد اللي مفيهاش ولا مادة ((حسب الملف المقدم )) يتقال عليها مادة اصلا .. هي مجموعة خبرات من ارض الواقع العملي .. و هيدرسها اهل الخبرة .. تعدي من تحت ايديهم يعني ؟؟؟؟؟؟؟؟؟؟؟؟؟ يسيبوا الناس تتعلم في سلام من غير ما يحشروا حاجة تعكنن علينا ؟؟؟

طبعا لا يجوز .. وبالامر وبالاجبار .. لازم تكون في ورقة بحثية .. يا اخوانا دي ناس متنفعش تعمل ابحاث علميه .. لا دا هدفهم ولا يعرفوا يكونوا باحثين اصلا !!!

طبعا ودن من طين وودن من عجين

كانوا اللي معايا بيتضايقوا مني اوي علشان بحضر المحاضرات كلها.. مكانش لاني اكثر جدية منهم ولا حتي علشان عايزة اتفوق عليهم .. ولو انهم كانوا فاكرين كده .. بس انا جاتلي في وقت وحش اوي من حياتي .. ظلم من كل حتة برة و جوة و بما اني اصلا اشتغلت بالاجبار و كنت بعمل اللي عليا و زيادة بس علشان انول السلام برة و جوة .. النهار يطلع استني الليل علشان يجي النهار اللي بعده علشان يقصر العمر اد ما ربنا كاتبه بس يقصر ويخلص
كنت بعمل كده علشان اعتبرتها امانة .. المكان اللي بشتغل فيه قدمهالي وكان لي اني اوافق او ارفض .. بس لو كنت رفضت كان هيبقي موقفي وحش اوي قدام نفسي .. و كمان جاتلي في لحظة فاصله و كانت طوق نجاة من الله بعد ايام كتيرة بقوله يارب خلصني من مشكلة اني اشتغل في بنك - وانت تعلم اني لا املك من امري شيء .. بس ربنا دايما كريم .. فمكانش في بديل قدامي الا اني احاول احافظ علي الامانة دي .. وربنا اداني فيها كتير اوي اوي اوي

المهم يعني رسيت علي اني مفروض عليا اعمل بحث علمي غصبن عن عيني .. و من يومها لحد النهاردة مش قادرة ابلعها و فعلا لما قلت عليه كابوس هو بالنسبة لي كده .. الدكتور بتاعي زهق من اني مبسالش و لما اتكسرت من جوايا قلت الحمد لله هترحم بحجة طويلة شوية شهر ولا شهرين .. مش عارفة اعمل فيها ايه بالمصيبة دي .. مش عايزة اعملها .. غير موضوع انها مكانتش في الاتفاق من الاول اصلا و انها فرض من المجلس الاعلي للجامعات و غير انها من غيرها تعبي سنتين و نص يضيع هدر ... احساسي اني هتعب في حاجة هتترمي في اي درج ولا علي رف في اي حتة خانقني ..

لو هكتب علي حاجة بعرف فيها و بعملها و عندي فيها خبرة تأهلني ان اكتب فيها وافيد غيري كنت اعملها فورا و بمنتهي الحب والراحة النفسية .. بس هما مش عايزين كده كمان

انا مالي انا و مال البحث العلمي .. مهو ليه ناسه اللي بتكون مستمتعه جدا بيه وهي بتعمله و عايشه فيه .. مالي انا

و كمان لا مادة علمية لحد قبل منا و لا اصلا هي حاجة موجودة معروفة .. هي لحد كونها حاجات عملية لاكساب خبرات مختلفة عن عملية معينة بشكل متخصص تبقي حاجة كويسة جدا جدا جدا ومفيدة و زي الفل

انما اخترعلها انا مادة علمية موثقة و من مراجع معروفة و اقعد اجمع لها كلام من كل حتة ........ ضرب من ضروب المستحيل .. جايز انا متحاملة لاني رافضة ليها .. بس لحد دلوقتي اللي شفته حصيلته صفر .. مش علشان مفيش عليها مادة علمية عربي .. كمان ملهاش مقابل اجنبي متخصص بالشكل دا .. او جايز فيه بس ملقيتش انا .. لقيت حاجات صناعية متنفعش تتاخد بشكل تطبيقي حتي لو اعدنا صياغتها .. والدكتور مصر علي الموضوع دا و كل اما اقوله موضوع زفت يقولي عيب لما انتي اللي تقولي كده .. مغرقني فيها و يرجع يقولي الناس خلصت ابحاثها وانتي لسه :(
مش عايز يقتنع ان مينفعش تدار العملية دي بشكل علمي بحت و يتحطله قواعد جامدة .. لانها كل يوم مش زي التاني وحتي لو ينفع انا مبفهمش فيها .. رحم الله امرء عرف قدر نفسه .. اقوله مبفهمش فيها .. يقولي ازاي دا انتي الاولي عليهم عيب تقولي كده ..



اقوله ايه بالله !!!


هو في مشكلة لما الواحد يكون بيعمل حاجة بما يرضي الله و بيعملها كويس نوعا ما و ميكونش بيبص علي اللي اكبر منها لانه متأكد انه مينفعش ياخد اللي اكبر منها .. مش علي اده و لا يعرف يمشي فيها .. قلة حيلة دي ولا عدم طموح و ينفع وابقي كده صح؟؟
يعني يكون بيتوسع افقيا مش رأسيا .. زيادة بس في نفس الحتة من اللي اعلي منها !!

و دا كمان احطه في قائمتي للفشل؟؟ ولا ممكن ينفع يكون صح ؟؟

بيتهيألي زي حلم كل البنات .. بيت صغير وزوج طيب .. طفل وطفلة .. يعرفوا يربوهم و ينفعوا بيهم دينهم ودنيتهم .. حلم عادي و صغير مفيهوش حاجة صعبة .. كل الناس بتحققه بسهوله .. ولو انه مش سهل .. بس ساعات الحاجات السهلة اوي اوي بتكون اصعب منها مفيش !!

لما كانت حامل في سليم .. كنت بقعد عندهم كتير ولحد مااتولد رحت قعدت معاهم اول اسبوعين تلاتة وكنت حاساه ابني انا .. لحد ما جت لحظة فوقت منها انه له ام واب واني مجرد عمته واكتشفت اني ممكن اكون بضايقها .. توالت فترات قرب وبعد طويل وقرب قليل وبعد اطول ولحد النهاردة نفس المشكلة .. هو بيجيلي علشان اعمله اللي هما مش موافقين عليه او مش فاضيين يعملوه معاه .. كتير ببقي نفسه اعمل له الحاجة دي بس بقوله لما مامي توافق عليها الاول علشان هي بتحبك اكتر و تعرف ايه الصح ليك اكتر مني .. بقولها من ورا قلبي وغصب عني بس مش شايفة حاجة تانية اقدر اعملها غير كده .. حتي لو كان بيزعلنا احنا الاتنين ..

ابدا باه .. الحلم الصغير دا مش بسيط .. و مش قليل و لا سهل يتنفذ

هو في حقيقته حلم كبير اوي وبيكبر كل لحظة ابطاله بيكبروا و بيشبك حلمي فحلمه فحلم اللي لسه في علم الغيب :)

ينفع دا مشروع العمر ؟؟ ولا انا كل افكاري و اعمالي لا ترقي لانها تكون حاجة كده ؟!!

الله اعلم
--------------



اذا حد ليه باي صورة في موضوع التأمين العام .. في المعهد المصري للتأمين عامل اعلان عن "الدبلومة في التأمين" .. اذا كان يهم حد يعرف عنها او يملي استمارتها .. هي شكلها كويسة ومعتمدة من معهد التأمين بلندن .. لو حد مهتم او يعرف حد يهتم بيها!!

الأحد، 10 مايو، 2009

كفانا الله الشر

المية في الدنيا .. نعمة 
انك تلاقي مية للشرب حلوة ونضيفة.. نعمة 
انك تكون قادر تجيب لنفسك كوباية مية .. نعمة
انك تكون قادر تمسك كوباية المية .. نعمة 
انك تكون قادر تبلع المية .. نعمة
انك تكون قادر تخرج المية .. نعمة

ممكن نتحرم من نعمة من النعم دي .. فندرك انها كانت نعمة .. نسينا نفتكر نحمد ربنا عليها 

وزي ما بيقولوا محدش يعرف قيمة الحاجة الا لما بتروح منه 
او يمكن يحس بيها لما يشوف غيره بيتمناها ومش لاقيها 

ويقاس علي كده  .. نعم لا تعد ولا تحصي

جربت يعني ايه يبقي نفسي اشرب ميه ومش قادرة اجيب لنفسي كوباية مية ... 

فادركت بالتجربة قيمة النعمة 

ودي ابسط حاجة 

شوية الاسابيع اللي فاتت دي شفت فيها شوية حاجات .. الحمد لله علي نعم ربنا

فيها الانسان اللي بيقدر ظروف غيره .. و لو له حق بيحاول يستني عليه شوية
فيها الانسان اللي ميعرفش يعذر ولا يقدر ولا يقبل و له حقه .. مش مشكلته و اتسببتلي الحكاية دي في مشاكل كتيرة 

الاحساس انك صعبان علي حد دا بجد مؤلم اكتر من ألم الجسد بكتير اوي 
الاحساس انك مستني حد علشان يعملك حاجة انت محتاجها لانك مش قادر تعملها بردة مؤلم اوي 
الاحساس انك لازم تقبل اللي يجود به الاخرين عليك حلوه ومره لانك معندكش بديل تاني في الوقت الحالي وحش اوي

الاحتياج للمال والعوزة و الدين .. ربنا يكفينا شرهم جميعا .. سيئ و في نظري بيكون مهين اوي وتقيل علي صاحبه قبل ما يكون علي الطرف الاخر 

وزيهم الاحتياج لمساعدة من اقل مساعدة لاكبرها.. تقيل و بيكسر وحتي لو من حد بيعملهالك عن طيب خاطر

ربنا ما يحوج اي حد لأي حد يا رب لا قريب ولا غريب

لا ماديا و لا نفسيا ولا جسديا ولا اي حوجة من اي نوع لأي حد من خلق الله

الحمد لله رب العالمين علي ما رزقنا من خير وله الحمد علي كل قضائه

مش نجيلكم في حاجة وحشة يا رب ابدا :)

-----------------

علي جنب كده 

مش هو ربنا حنين علينا ؟
 امال الناس بتجيب قسوة القلب دي منين ان كان الخالق سبحانه وتعالي عفو وكريم و ودود ؟؟!!
اللي اعرفه ان الله القهار المنتقم الجبار .. بس علي الظالم والمفتري و المتجبر
البشر جابوا السواد دا منين ؟؟

كفانا الله شرهم 


**************


تحديث عجيب حبة 
----------------- 

في حد بيدخل من تايوان حسب بتاع الزوار ما بيسجل البلد و بيسيب تعليقات في مواضيع قديمة .. الفجر جالي يجي 53 ايميل بسببه ولما جيت اترجم الكلام اللي مكتوب طلع عبارات عجيبة مفهمتش منها حاجة حسب ترجمة جوجل .. بس شفت انه علق بردة غير معرف في مدونات تانية 

لو حد عنده فكرة دا ايه .. هاكر يعني ولا غلاسة ولا تفسيرها ايه 

يا ريت حد يفهمني لو يعرف 

وجزاكم الله خيرا و ربنا يهدي :)

الأحد، 3 مايو، 2009

بفكرني سادس - أعزكم الله -

المرة دي بفكرني بحاجة محرجة حبتين  بس ان شاء الله تتذكر بكل ادب و حياء ان شاء الله :)

هي في حاجة كنت بفكر اكتبها بس نظرا لانها محرجة بالنسبة لي 
ففكرت اخلي الموضوع كله 

علي آداب قضاء الحاجة 

غير ازاي تدخل الخلاء و تقول ايه لما تخرج   اللي الناس كلها تقريبا عارفاها حتي لو قالتها باستهزاء ..

 انك تدخل الخلاء -حفظكم الله - مقدما القدم اليسري علي اليمني
و قول "اعوذ بالله من الخبث والخبائث" 
و عند الخروج " غفرانك.. الحمد لله الذي اذهب عني الاذي وعافاني " وتقديم القدم اليمني علي اليسري في الخروج ودول اللي معروفين .. حتي وان نسيهم البعض 


بالدعبسة كده شوية لقيت الموضوع اكبر من اللي كنت عايزه افكر بيه !!
المهم

آداب قضاء الحاجة انفرد لها ابواب مخصصة لها في كتب الفقة

الاول .. لازم نتفق ان الموضوع دا نعمة وفضل من الله للتخلص من الحاجات الضارة اللي بتتواجد في اجسامنا
ثانيا .. الواضح كده في السنة ان رسول الله صلي الله عليه وسلم كان يحمد الله عند خروجه من الخلاء علي النعمة اللي ربنا انعم بيها عليه وهي قضاء الحاجة ..

في حديث عن السيدة عائشة رضي الله عنها انها كانت تستحي من الله عند دخولها الخلاء فتغطي رأسها

وفي كلام كتير اتقال علي اد ايه دي نعمة كبيرة غافلين عن حمد ربنا عليها

بالراحة كده من الاول وعلي استحياء ان شاء الله :)

الاول نستأذن ونتأكد ان مفيش حد موجود و الكلام دا يتم بهدوء و بالراحة علشان لو في حد موجود لا ينزعج او يتخض
تاني حاجة نفتكر اننا داخلين هننعم بنعمه اتحرم منها ناس كتيرة .. الله يعافينا واياهم يارب

الدخول كما هو معروف بتقديم القدم اليسري علي اليمني

الدعاء قبل الدخول: يقول: (بسم الله. اللهم إني أعوذ بك من الخُبْث والخبائث [النسائي]. أي أتحصن وأعتصم بالله من ذكور الشياطين وإناثهم.



وقبل الدخول يجب التأكد من عدم وجود اي حاجة معانا ذكر اسم الله عليها او تكون قرآن .. بس  في اللي قال 

  (الا لو كنت لا تأمن عليها لو سيبتها بالخارج )( والله تعالي اعلي واعلم) ..

وقد كان للنبي صلى الله عليه وسلم خاتم منقوش فيه: محمد رسول الله.. وكان إذا دخل الخلاء وضع خاتمه. [أبوداود].

بعد الدخول .. لازم تتم السترة .. يعني لازم ميكونش المكان حد ممكن يتطلع عليك منه .. 

التستر دا باه فيه قول ومهم جدااااااا  لهواة تحت الكوبري

قال الرسول صلى الله عليه وسلم: (اتقوا اللَّعَّانين). قالوا: وما اللعانان يا رسول الله؟ قال: (الذي يتخلَّى (يقضي حاجته) في طريق الناس أو في ظلهم [م].

فعن جابر -رضي الله عنه- قال: خرجنا مع النبي صلى الله عليه وسلم في سفر، وكان رسول الله صلى الله عليه وسلم لا يأتي البَرَازَ (مكان قضاء الحاجة) حتى يتغيب (يختفي) فلا يرَى. [ابن ماجه].

ومَرَّ صلى الله عليه وسلم على قبرين فقال: (إنهما ليعذبان، وما يعذبان في كبير: أما أحدهما فكان لا يستتر من بوله، وأما الآخر فكان يمشي بالنميمة) "متفق عليه"

بعد التستر ..

قضاء الحاجة له شروط

 عدم التبول في مهب الريح: لئلا ترتد إليه النجاسة.
عدم التبول في الماء الراكد: فقد نهى رسول الله صلى الله عليه وسلم عن البول في الماء الراكد. [النسائي].


عدم التبول في جحر: خشية أن تصيبه حشرة أو أذى



الجلوس عند التبول: الجلوس أثناء التبول أفضل من الوقوف حتى لا يعود رذاذ البول عليه، فتصيبه النجاسة، فإن تأكد من عدم رجوعه عليه يمكن له أن يبول واقفًا.





عن عائشة رضي الله عنها انها قالت: من حدّثكم أن رسول الله بال قائما فلا تصدّقوه رواه الترمذي.



وهناك رخصة في البول قائما لضرورة أو عذر أو مرض.




عن حذيفة أن رسول الله بال قائما فأتيته بوضوء فتوضأ ومسح على خفيه متفق عليه.



عن ابن عمر ما قال: كان رسول الله إذا أراد حاجة لا يرفع ثوبه حتى يدنو من الأرض . رواه أبو داود

وعن عائشة ا أن النبي قال: من أتى الغائط فليستتررواه أبو داود.

عن ابن عمر ما قال: مرّ رجل بالنبي وهو يبوّل فسلم عليه فلم يرد عليه رواه مسلم
و بعد قضاء الحاجة بيجي الاستنجاء


علي ان يتم باليد اليسري دون اليمني و مش هكتر كلام هجيب الاحاديث بدون تعليق 


الاستنجاء: وهو تنظيف محل البول أو البراز بالماء أو الحجارة، 
وقد مدح الله -سبحانه- الصحابة -رضوان الله عليهم- لاستنجائهم بالماء، فقال تعالى: {فيه رجال يحبون أن يتطهروا والله يحب المطهرين} [التوبة: 108].

الاستجمار: وهو استخدام ثلاثة أحجار في إزالة النجاسة، وذلك عند عدم وجود الماء، ويمكن استخدام المناديل الورقية، أو ما يحل محلها.

استخدام اليد اليسرى: قال صلى الله عليه وسلم: (إذا بال أحدكم فلا يأخذنَّ ذكره بيمينه، ولا يستنجى بيمينه [متفق عليه].
وعن أبي هريرة قال: قال رسول الله : استنزهوا من البول فإن عامة عذاب القبر منه رواه الدارقطني.


يكون غسل النجاسة أو مسحها ثلاث مرات أو وترا بعد الثلاث بحسب ما تدعو إليه حاجة التطهير ، لما جاء عَنْ عَائِشَةَ أَنَّ النَّبِيَّ صَلَّى اللَّهُ عَلَيْهِ وَسَلَّمَ كَانَ يَغْسِلُ مَقْعَدَتَهُ ثَلاثًا قَالَ ابْنُ عُمَرَ فَعَلْنَاهُ فَوَجَدْنَاهُ دَوَاءً وَطُهُورًا . رواه ابن ماجة 350 وهو في صحيح الجامع 4993 ، ولما رواه أبو هُرَيْرََةُ رضي الله عنه عن النَّبِيِّ صَلَّى اللَّهُ عَلَيْهِ وَسَلَّمَ قَالَ إِذَا اسْتَجْمَرَ أَحَدُكُمْ فَلْيَسْتَجْمِرْ وِتْرًا . " رواه الإمام أحمد وحسنه في صحيح الجامع 375 
الدعاء عند الخروج: فقد كان النبي صلى الله عليه وسلم إذا خرج من الغائط قال: (غفرانك) [أبوداود]. وكان يقول: (الحمد لله الذي أذهب عني الأذى وعافاني) [ابن ماجه].

الوضوء: كان بلال بن رباح -رضي الله عنه- يتوضأ بعد أن يقضي حاجته ويصلي، فقال له النبي صلى الله عليه وسلم: (يا بلال، حدثني بأرجى عمل عملتَه في الإسلام، فإني سمعت دَفَّ نعليك بين يدي في الجنة (أي: اذكر لي أفضل عمل عملتهَ؛ لأنني سمعت صوت أقدامك في الجنة في رؤيا رأيتها بالأمس). قال بلال: ما عملت عملا أرجى عندي من أني لم أتطهر طهورًا في ساعة من ليل أو نهار إلا صليتُ بذلك الطهور ما كُتِبَ لي أن أصلي. [متفق عليه].


--------- 
معلش نشر قبل ما يكمل
______________________________________________________________


*تحــــديـث*


ردا علي سؤال جنون عاقل : ازاي السيدة عائشة رضي الله عنها قالت : من حدّثكم أن رسول الله بال قائما فلا تصدّقوه رواه الترمذي. 
وان " عن حذيفة أن رسول الله بال قائما فأتيته بوضوء فتوضأ ومسح على خفيه متفق عليه".؟؟ اللي ذكر في التدوينة !!

فرحت جدا بالسؤال لان الحديث دا هو اصل كتابتي للموضوع دا و كنت محرجة اكتبه لوحده بس الحمد لله ان هدانا لهذا وما كنا لنهتدي لولا ان هدانا الله :)

يقول سيد سابق رحمه الله في المجلد الأول "قضاء الحاجة" المسألة 10 و الصفحة 31 ما نصه :

أن لا يبول قائما , لمنافاته الوقار و محاسن العادات و لأنه قد يتطاير عليه رشاشه , فاذا أمن من الرشاش جاز. قالت عائشة رضي الله عنها : " من حدثكم أن رسول الله صلى الله عليه و سلم , بال قائما فلا تصدقوه , ما كان يبول الا جالسا " رواه الخمسة الا أبو داود . قال الترمذي : " هو أحسن شيء في هذا الباب و أصح " انتهى . و كلام عائشة مبني على ما علمت , فلا ينافي ما روي عن حذيفة رضي الله عنه : " أن النبي صلى الله عليه و سلم , انتهى الى سباطة قوم فبال قائما فتنحيت فقال : " أدنه " , فدنوت حتى قمت عند عقبيه فتوضأ و مسح على خفيه " رواه الجماعة , قال النووي : البول جالسا أحب الي , و قائما مباح , وكل ذلك ثابت عن رسول الله صلىالله عليه و سلم .
----
ثبت أن النبي _صلى الله عليه وسلم_ مرّ بسباطة قوم فبال واقفاً ونص الحديث: " عَنْ حُذَيْفَةَ قَالَ أَتَى النَّبِىُّ - صلى الله عليه وسلم - سُبَاطَةَ قَوْمٍ فَبَالَ قَائِمًا ، ثُمَّ دَعَا بِمَاءٍ ، فَجِئْتُهُ بِمَاءٍ فَتَوَضَّأَ ". رواه البخاري 

ولذا فالراجح جواز التبول واقفاً للحاجة، 

ويكره إذا لم توجد حاجة، 

ولكن يشترط أن يأمن وقوع النجاسة،
وألا يكون فيه كشف للعورة، 
وسبب النص عليه هنا؛ لأن التبول واقفاً مظنة لذلك.

ومن هنا فالذي يظهر لنا  ان عدم جواز التبول في الدورات المعدة للتبول واقفاً لما يلي:

1  – قرب بعضهم من بعض، حتى أنه يؤدي إلى رؤية العورات.
2  - عدم الأمن من النجاسة، وهذا ظاهر.
3  – عدم التحقق من الطهارة بعد التبول.
4 – ما فيه من التشبه، حيث إنها من مراحيض الكفار الذين لا تهمهم الطهارة ولا يتورعون من النجاسة. 
والله أعلم.
فتاوى اللجنة الدائمة 5/88




وعلي فكرة في كلام مخالف للكلام دا كتير في كتب الشيعة والمواقع الالكترونية الخاصة بهم .. 
فمن يرغب في البحث،، عليه التأكد من مصادر البحث :) 


اللهم بلغت اللهم فأشهد


اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع