الاثنين، 28 سبتمبر، 2009

موقوفة للتدوير



الي ان يشاء الله و يبقي في حاجة تنفع تتقال


هعمل اعادة تدوير للدنيا و ما فيها


هحاول أربي بذرة طيبة وسط ذكريات و تجارب سيئة كتير

لو فلحت التجربة و البذرة أنبتت نبتة طيبة 

هفرجكم صــورتـها



لو ماتت ..

خلاص  

قدر  

.  


الخميس، 10 سبتمبر، 2009

ما أحلي الجماعة - سنة فاتت

سبحان الله العظيم
مرت علي الموضوع سنة هجرية 
ولقيتني لازم تاني اشكره لانه اهداني معني عظيم جداااااا
رجعتله وتراويحه 
ورجعت للموضوع 
و لقيتني حالي هو حالي مختلفش للاحسن وانما للاسوء فالله اعلم بي وبه 
بس لله الحمد علي كل قضائه 
و حبيت اعيده في الليلة الطيبة دي 
لعل الله ينظر لنا فيها نظرة رضا فيمتلئ كتابنا بالخير 
و يؤتينا اياه بيميننا مسرورين فرحين بما آتانا من فضله .. 
اللهم لك الحمد كما ينبغي لجلال وجهك وعظيم سلطانك 
ولك الحمد حتي ترضي
 ولك الحمد بعد الرضا 
اللهم اعفو عنا

----
اهي اتختمت بخير 
لقيت صلاة التهجد بدأت في الكعبة 
اللهم تقبل منهم ومنا ومن المسلمين اجمعين
طاعة جميلة اوووووي
اللهم لا تحرمنا منها ابدا ما احييتنا 

*****************************************************************

ما احلي الجماعة

22 سبتمبر، 2008


سبحان من ادخلني مدونة الاستاذ\ احمد كمال
 "رحايا العمر" اخر ما كتب بعنوان تراويح 

بجد رسم صورة رائعة وجميلة اووووووووووي 

بارك الله فيه وفتح عليه وعلي المسلمين اجمعين 

عيشتني احساس جميل اوي .. صحيح صلاة الجماعة من احلي ما يجتمع عليه المسلمين 

يحزني انه احساس بعيشه مرة واحدة.. بس بالنسبة لي غصب عني 

انما غيري و بالتحديد الرجال دا فرض عليهم يعيشوا الاحساس دا 5 مرات يوميا 

مش متخيلة حد في ايده نعمة زي دي ويسيبها 

صلاة الجماعة دي بجد نعمة سبحان من بيجمع عباده 5 مرات في اليوم 

الاحساس ان كتفك في كتف حد تاني واقف في صف واحد معاك لا تفرق انت مين ولا هو مين ولا عمرك و لا اي حاجة في الدنيا 

يكفي رب العالمين انك تكون مسبغ الوضوء متجه للقبلة خاشع القلب طالب عفو الله وان يتقبل منك 

ينادي منادي ان حي علي الصلاة حي علي الفلاح فيهب العبد ليلبي نداء الرحمن 

ما احلي الصلاة خلف امام تحسبه علي خير .. ويا سلام باه لما تكون صلاة جهرية خلف امام انعم الله عليه بحسن التلاوة 

والله نعمة مش حاسين بيها .. 

مش عارفة بس الاحساس في المكان نفسه مختلف .. يعني حتي لو بنصلي جماعة في مكان تاني مش مسجد .. الاحساس داخل المسجد مختلف حقيقي وصدق الله العظيم في قوله " في بيوت أذن الله أن ترفع ويذكر فيها اسمه يسبح له فيها بالغدو والآصال " 


فعلا نعمة ربنا يديمها علينا 

كمان احساس بالامان داخل المسجد .. تنسي همومك و تعبك و تحس بالامان و تبقي في وسط 100 واحد و حاسس انك لوحدك بس وحدة مختلفة .. تبقي واقف معاهم في الصف و حاسس انك الوحيد اللي واقف بين يدي الله .. مش بتفكر اللي جنبك بيقول ايه لربنا .. كل همك تقوله اللي جواك .. تدعوه بما يجول في خاطرك .. مش عارفة اوصفه .. ممكن تحس وانت في وسط كل الناس دي انك واقف لوحدك قدام الكعبة .. ممكن في الدعاء كل الناس بتقول آمين متسمعش غير صوتك انت .. تحس انك لوحدك اللي بتدعي الله مع انك عارف ان عدد الذاكرين لله الداعين له في اللحظة دي كتير اوي لا يعلم عددهم الا الله سبحانه وتعالي

احساس مش هينفع يتوصف او مش هينفع مني لاني مش عارفة اقول اللي حساه 

ربنا يديمها نعمة و يتقبل يارب 

ساعات بيكون في حد جنبك بيدعو الله وتحسه ملهوف اوي علي استجابة الدعاء من حرارة دعائه ولا تملك ساعتها غير انك تغير الدعاء بدل ما تدعي باللي كنت ناوي عليه تلاقي نفسك بدون وعي بتدعي ربنا انه يستجيب لدعاء اللي بيدعوه جنبك .. حصلتلي كتير بلاقي حاجة وقفتني و الجمت لساني عن اي دعاء عايزة ادعيه و الاقي نفسي بقول يارب تقبل منها دعائها و استجب لتوسلاتها .. ساعات اقول يمكن هي احوج مني بالدعاء و يمكن لو دعيت لها باجابة الدعوة ربنا يكرمني باجابة دعائي .. مرة حتي قولت مش يمكن دي تعتبر تفريج كرب عن مسلم .. في حد محتاج الدعاء ولو دعيت ان ربنا يستجيب لدعاءه مش يمكن اكون بكده فرجت عنه حاجة هو عايزها من ربنا .. الله اعلم ان كنت صح ف دا ولا لا بس انا وقتها اخدتها كده 

الموضوع طيب اوي و جميل بجد .. ياريتني كنت بقدر اعبر بالكلام عن الاحساس اللي حساه .. بس الحمد لله رب العالمين .. المهم ربنا يتقبل 
___________________
بقالي ساعتين مش عارفة اكتب كلمتين علي بعض :( 
كل شوية حد يدخلي يشتكيلي من حاجة :( 
الناس هنا كلهم النهاردة كل واحد حد عامل فيه حاجة تضايقه .. الله يهدي 

ساعات تبقي جواك هموم كتيرة ومش عايز تسمع حد ولا تتكلم مع حد بس لو فكرت للحظة هتلاقي ان يمكن ربنا بعتلك الحد دا علشان يقولك انت مش لوحدك الي فيك هموم .. زيك زي باقي البشر .. بيشوفوا الحلو والمر .. 

الله يعافينا والمسلمين من كل سوء و يتقبل منا دعائنا وصالح اعمالنا
____________________

اللهم اصلح لنا فساد قلوبنا 
اللهم انا طرقنا بابك فلا تردنا خائبين 
لكل منا سؤال و مسألة 

اللهم يا سميع يا مجيب اجب دعوانا 
اللهم انك عفو كريم تحب العفو فاعفو عنا والمسلمين 

الأحد، 6 سبتمبر، 2009

هي و "هو"




بسم الله الرحمن الرحيم
" وقل للمؤمنات يغضضن من ابصارهن ويحفظن فروجهن ولا يبدين زينتهن الا ما ظهر منها وليضربن بخمرهن على جيوبهن ولايبدين زينتهن الا لبعولتهن او آبائهن اوآباء بعولتهن او ابنائهن او آبناء بعولتهن او اخوانهن او بني اخوانهن او بني اخواتهن او نسائهن او ما ملكت ايمانهن او التابعين غير اولي الاربة من الرجال او الطفل الذين لم يظهروا على عورات النساء ولا يضربن برجلهن ليعلم ما يخفين من زينتهن وتوبوا الى الله جميعا ايها المؤمنون لعلكم تفلحون "
(آية 31 من سورة النور)

الامر اللي في الاية دي موجه للمؤمنات

سبحان الله ربنا خص به المؤمنات لعلمه سبحانه ان اللي هتطيعه و تنفذه اوامره لابد تكون مؤمنة مش مجرد مسلمة ولو انها لو كانت مسلمة له فعلا اكيد هتبقي مؤمنة

ياخدنا الكلام دا لمين هي المؤمنة ؟

مين من نساء المسلمات تقدر تقول علي نفسها انها مؤمنة ؟

مين عنداها الجرأة انها تزكي نفسها امام خالقها؟

من هي المؤمنة ؟

ذكر الله في القرآن الكريم العديد من الصفات التي خص الله بها ذكر المؤمنات ومش دا اللي عايزة اقول عليه

الأيه السابق ذكرها دي المفروض انها تفرض الحجاب علي المرأة المسلمة او بمعني ادق علي الفتاة البالغة .. أيا كان سنها ايه وقت بلوغها !!

مش هتكلم اصلا عن اللي ميتقالش عليها محجبة في الزمن دا و اللي لابسه قطعة من القماش مغطية جزء من شعرها مع تعرية الجزء الاكبر من الرقبة والاذن و ما يليهما !!

انا هتكلم علي اللي محجبة
اللي كاشفة وجهها وكف ايدها و مغطية ما دون ذلك بثياب فضفاضة لا تصف ولا تشف
وعن اللي منتقبة و مغطية كل حاجة فيها عدا عينها سعيا لانها تكون بتعلي مرتبتها بادائها طاعة افضل

هتكلم عن نفسي بس علشان يكفيني ذنوبي اللي ربنا وحده اعلم بيها
افتكرت بما اننا في رمضان اني اتحجبت فيه من سنين طويلة اوي رقم كبير بس كان في مارس اول رمضان

حاسة اني في مصيبة قدام ربنا

الحجاب بيغطينا ولا احنا اللي بنغطي عليه؟

رغم السنوات الطويلة اوي دي يمكن لو اخلصت مع نفسي قدام ربنا ويمكن لو اتطلعت علي صحائفي مكونش نلت حظا من اداء الطاعة دي الا يوم او حتي أقل الا برحمة الله

شغلاني النقطة اوي

يمكن من اللي بشوفه


انا متأكده عن نفسي اني برحمة ربنا بس ممكن يقبل اوقات من الطاعة دي 
و اني موصلتش لدرجة اني احسب نفسي علي خير عند الله 
بس بنتوسل لله لعله يقبلنا علي عيوبنا ويبدل سيئاتنا حسنات


ايه الحكمة من تغطية الشعر ان مكانش ستر باقي الجسد قبل تغطية الشعر؟

ليه لما انوي اعمل طاعة لربنا معملهاش بما يرضي الله و ابقي بكمل بيها طاعاتي يمكن تبقي هي دي اللي فيهم ؟

ليه معرفش اصون لساني عن الغيبة والنميمة وعن اذية مشاعر الاخرين قدامهم و من وراهم ؟

ليه اللي ظاهرها بيقول انها بتسعي لنيل درجة اعلي عند الله بيكون تصرفاتها مؤذية لغيرها؟

ليه مش نضاف؟

من النضافة ...
 مبقيناش نضاف لا من برة ولا من جوة 


ليه دايما دايما بنسيب للأخر غير المسلم مساحة براح جداااااااا يلاقي عندنا اللي ينتقدنا فيه ويعيب علينا تصرفاتنا

ليه محدش بيراعي مشاعر غيره ؟

هي مش هي هي اللي بتحاول القرب ل "هو" سبحانه وتعالي ؟

مش هي نفسها اللي لسانها بينطق بالتسبيح و التهليل و بتطلب الخير دايما؟

ليه هي دي متدورش علي هي زي ما "هو" سبحانه عايزها ووصفها ؟

عن نفسي غلبت في نفسي بس مش كل الناس زيي 

الناس الكويسين كتير أكيد .. بس مين هي اللي يقصدها وتنطبق عليها الصفات بدون ما صفة تقع ولا تتبدل ؟؟؟

كل ابن آدم خطاء 
اه
بس لو مش هي هيكون فيها كل الصفات دي علشان تستحق لقب مؤمنة 
مين اللي فازت بيه؟
في زمن فات ؟
ولا في زمن جاي؟

الله اعلم

**********

جايز امبارح مكنتش مركزة
بس المعني اللي قصدته يشبه قول رسول الله صلي الله عليه وسلم في الصيام
"من لم يدع قول الزور والعمل به فليس لله حاجة أن يدع طعامه وشرابه" رواه البخاري والترمذي وأبو داود وابن ماجه وأحمد


زيها بالظبط كده في رأيي واعتقد والله اعلي واعلم اني مش غلطانة 
ان اللي متعرفش تحافظ علي فرض ما بتعمله و تعمله بما يرضي الله يبقي قلته احسن  !! او علي الاقل متعملوش الا وهي في نيتها محاولة الالتزام به

هتخنق نفسها ليه و تغطي شعرها وهي محققتش اي التزام ناحية الغطاء دا؟

مهو بقي غطاء فعلا

تخيلنا ان بيه هتبقي متصانة 
واللي حصل انها اهانته هي شر اهانة

وبسببها اللي ميسواش عاب فيه

ويبقي السؤال
 ...


يا تري يا ربي قبلت كام لحظة من سنين العمر اللي عدت هدر؟؟؟





اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع