الأحد، 28 سبتمبر، 2008

خليك بأه حبة

خلاص كده

هتمشي ؟

هتسيبنا ؟

هتشفعلنا ؟

هترجع ؟

هنعيشك ؟

هنستناك

هنشتاقلك

هتوحشنا

هنحنلك

يااااااااااااه مش تستني معانا حبة كمان

هو كل حاجة حلوة بتخلص بسرعة كده

ملحقتش طيب

يادوب لسه هعمل حاجة


انت علي طول كده


بتيجي علشان تمشي


خليك شوية

بنحبك وهنفضل نحبك


اللهم تسلمه منا


اللهم أعده علينا اعواما عديدة

اللهم إنا نشهدك أنا نحبه و نستشفعه ليشفع لنا عندك

يا حبيب غالي علي قلوبنا

ارجعلنا بأطيب الاوقات

وما احلاها لحظات

عساك من عودة يا شهر العفو والرحمة والمغفرة

هتوحشنا اوووووووي

السبت، 27 سبتمبر، 2008

لعلها هي

لعلها ليلة القدر

ابتدي اليوم بألم شديد من الليلة اللي قبلها بس مع الألم والدموع بيتولد الدعاء يعني من اول لحظة في اليوم فيه دعاء وطلع النهار بنفس الاحساس

هو احساس ان اليوم دا مختلف

يوم الجمعة يعني سورة الكهف يعني احساس بالهدوء والسكينة

يوم الجمعة يعني ساعة اجابة وانا مشتاقة للحظة اجابة للدعاء

هو يوم اراد الله يكون بيتسلم فيه صلاة لدعاء لقرآن والعكس

اخر ساعة في يوم الجمعة كانت جميلة حتي لو مكانتش هي دي ساعة الاجابة بس عدت جميلة و هادية

دعاء الصائم عند فطره سبقه دعاء و تلاه دعاء وفي ما بينهما دعاء يا رب

صلاة العشاء هادية و جميلة

بعدها صلاة القيام بردة هادية و طيبة

بعد الصلاة كانت مفاجأة لما الامام قال مفيش ملتقي الفكر النهاردة :(

هنعمل خاتمة قرآن .....

احتست انا :(

طب اعمل ايه دلوقتي الساعه مجاتش 9 و مش هروح انا خليني قاعدة شوية ... المشكلة ان الخاتمة للرجال بس :(

بس علشان اليوم مينفعش الا انه يكون زي ما ربنا اراده من اوله .. يشاء الله الودود اننا نشارك في الخاتمة :)

احلي ساعتين تقريبا .. لا دي اطيب حاجة في اليوم كله .. هي فيها احساس كده مختلف

خصوصا لما ختمنا القرآن مع بعض بقراءة الجزء ال30 مع بعض

كان في حوالي 7 سيدات

عشت احساس حلو اوي بس ملحقتش اقعد لحد الدعاء

يا دوب خلصنا والامام ابتدي الدعاء و كان في حلين اما اني اقعد اسمع الدعاء وف يالحالة دي ادور علي حتة ابات فيها :( علشان الوقت اتاخر
يا اما اقوم بكرامتي واستعد لاني اسمع كلمتين علشان اتاخرت بس قضاء اخف من اخر :)

بس ربنا كريم والله عدت علي خير الحمد لله ( نوعا ما يعني )

أمنت علي دعاء سيف وأمن هو علي دعائي وكلنا رجاء وامل في الاستجابة مع يقين في عفو الله الكريم العفو

قبل الفجر السماء كانت صافية و فيها سحاب شكله جميل والجو كان حلو اوي

هو احساس انها كانت ليلة القدر والله تعالي اعلي واعلم

لعلها هي ولعل الله استجاب دعاء الملايين بالعفو

ربنا يتقبل

يا رب

الخميس، 25 سبتمبر، 2008

الله يعافي

اللهم حرم اجسادنا علي النار
اللهم حرم اجساد امهاتنا علي النار
اللهم حرم اجساد آبائناعلي النار

اللهم حرم اجساد امهاتنا علي النار .. قالها الامام في دعاء القنوت كان نفسي امي تكون قدامي ساعتها اوطي علي رجلها ابوسها .. دا اللي خطر علي بالي ساعتها في لحظتها قولت ابوس رجلها وايديها واقولها ربنا يديكي الصحة والعافية ويوسع عليكي رزقك يارب( الموضوع لم يخلو من الدموع من مجرد الفكرة دي .. والله بحبها الست دي :)

:) لي اغراض مش اد كده يعني في الموضوع دا بس بطريق غير مباشر يعني :) اصلها لما ربنا بيوسع عليها رزقها بتيجي تديني منه بالغصب مهما قولتلها الحمد لله معايا فلوس او مش محتجاها والله بتوصل لانها تحلف عليا وتقولي هزعل منك متبقيش غلسة :(
وللحق قبل العمرة المرة دي سابتلي مبلغ محترم لاجل ستر ربنا انها سابته والا مكنتش عارفة هيحصل ايه ... الحمد لله ربنا يباركلها في صحتها و عافيتها ويزدها يارب

بعد الصلاة في حد من وزارة الاوقاف كان بيتكلم في ملتقي الفكر النهاردة بس بصراحة الموضوع كان لطيف
كلامه عملي علامة استفهام كبيرة اوي انا كنت اخدت بالي منها من فترة بس عملت عبيطة علشان تقريبا الاجابة تايهه وانا حيلي مهدود مفياش نفس افكر فيها ...

بغض النظر عن وجود شيعه كتير دلوقتي في مصر و فئات تانية مليش دعوة بيهم

انا عندي مشكلة في حاجة تانية

ماشي كتير الكلام عن الاخوان و الكلام متضارب هنا و هناك و الله اعلم بالنوايا

بس اللي كان عمالي علامة استفهام كبيرة ايه حكاية انت سني ولا سلفي ولا سلفي جهادي ولا اخواني ولا ايه

اعوذ بالله

وانا ازاي ابقي مسلم ان مكنتش سني علي سنة الهادي صلي الله عليه وسلم
ازاي يعني اقف واقول لا انا مش سني انا سلفي مثلا بغض النظر عن معتقداتهم و افكارهم

مش دي قضيتي

ليه فجاة ظهر الكلام عن انا سني وانت سلفي

لا مصليش في المسجد دا اصلهم هنا سنيين و انا بصلي مع الجهادي ولا الاخوان

ودول بينقدوا دول والعكس

الخطيب كان بيتكلم عن الفتنة ولمصلحة مين يفتن المسلمين من جواهم .. مش فتنة النظر لمرأة ولا حفظ الامانات ولا حاجة من المشهورات دي

لا دي فتنة زي السوس بتنخر في الاساسات من غير ما يتحس بيها

من يومين كان في واحد بردة من الاوقاف بيتكلم عن العلمانين دلوقتي ( هو اتكلم عن ان دول الاعلاميين والمثقفين اللي طالعين يقولوا نفصل الدولة عن الدين ) و علاقة العلمانيين و رجال الدين .. علي راي الراجل جديدة رجال الدين مش بتتقال عندنا .. احنا عندنا علماء الدين ماشي ..

بتاع النهاردة كان بيقول انهم حاليا بيدوروا يعملوا قانون جديد يكلم المصري كمصري .. بيدوروا يفصلوا الدين .. يبقي الكلام المصري مصري وبس .. قال واحد من المثقفين في الندوة اللي حضرها دي ( والعهدة علي الراوي ) انه اوروبا لما ادت ظهرها للكنيسة تقدمت . يعني ادوا ظهوركم للمسجد علشان تتقدموا ..

فكرني الكلام دا بكلام كاتبة احدي المدونات اللي معترضة علي الحجاب واللحية و تستهزأ بحديث رسول الله عن الذبابة و غيرها حاجات كتيرة .. أسال الله العافية
بداية سورة البقرة ربنا وصف المؤمنين بايه " ألم .. ذلك الكتاب لا ريب فيه هدي للمتقين.. الذين يؤمنون بالغيب .." صدق الله العظيم
لازم أومن بالغيب وأومن ان كتاب الله ميتقالش عليه ثابت والعالم والعلم متغير .. النص ثابت في كلامه ولكنه مناسب لكل حادثة وكل موقف وكل زمن وكل مكان

انا ولا حاجة في علم الناس .. ولا حاجة فعلا .. معنديش لا علم ولا حجة ولا اي حاجة .. بس انا أؤمن بالله و أؤمن بالغيب و أؤمن بانه ما ينطق عن الهوي صلي الله عليه وسلم .. لو دورت علي حاجة عقلانية علي كل حاجة يبقي ابسط حاجة انا برفع ابهامي ليه في التشهد ؟؟ ليه بقول السلام عليك ايها النبي مثلا ؟؟ ليه بركع وليه بسجد ؟؟ لو فتحت باب ليه واقنعني بالعقل وربي ما هنخلص و هبقي زي اللي بيدور علي ازاي يمسك الهوا بايديه.. الله يعافينا

انا برطمت كتير في حاجات منفصلة متصلة بس الكلام عن الفتنة دا اصبح امر واقع دلوقتي ميقدرش حد يقول انها مش موجودة .. لا موجودة و بتزيد .. لما اسمع من واحد في برنامج ديني المفروض انه الناس بتحسبه علي خير وبتثق في رايه واساله ليه الست المنقبة في المسجد قالتلي لازم شراب اسود في رجلك والعباية الشيفون جلد النمر متنفعش .. مينفعش ارد عليها وهي جاية تستشيرني واقولها رد عبارة عن تهكم علي المنقبة دي .. دا بدل ما احاول اقرب ما بين المسلمين واقولها لعلها تقصد الخير ليكي .. بدل ما اسالها كان لبسك دا ضيق ولا ملفت للنظر .. بدل حاجات كتيرة اوي ( ومازلت مصرة اني ولا حاجة في المواضيع دي ومسواش حاجة جنب اهل العلم )

هي دي كده متبقاش بعمل فتنه .. لما اقول كل واحدة منقبة وحشة وكل محجبة غبية (علي اعتبار انها لما تعري راسها الذكاء هينطلق )وكل ملتحي فاسد .. وكل سني كذا وكل اخواني كذا و ووووو

هستفيد ايه ؟؟ هو انا علشان ارضي العبد اخالف ضميري قدام ربنا ؟؟ اللي حطك في مكان يخلي الناس تسالك في امور دينها و دنيتها يخليك لازم تكون اد المسئولية دي ..

رغيت و طولت وكلها افكار من هنا وهناك بس عاملة زي الدبانة اللي بتزن في راسي ..

إلا هو صح اني اقول اني اتقبل ان الاخر يدين نفسه بأي انتماء ديني ايا كان حتي لو كان فيه شرك بالله ؟؟ سؤال محتاجة عليه اجابة اصلي اليومين اللي فاتوا بالصدفة دخلت مدونتين تلاتة كده لخبطولي دماغي ( دماغي مش قلبي .. انا استفتي قلبي والله وكيلي)

الاثنين، 22 سبتمبر، 2008

ما احلي الجماعة

سبحان من ادخلني مدونة الاستاذ\ احمد كمال "رحايا العمر" اخر ما كتب بعنوان تراويح

بجد رسم صورة رائعة وجميلة اووووووووووي

بارك الله فيه وفتح عليه وعلي المسلمين اجمعين

عيشتني احساس جميل اوي .. صحيح صلاة الجماعة من احلي ما يجتمع عليه المسلمين

يحزني انه احساس بعيشه مرة واحدة.. بس بالنسبة لي غصب عني

انما غيري و بالتحديد الرجال دا فرض عليهم يعيشوا الاحساس دا 5 مرات يوميا

مش متخيلة حد في ايده نعمة زي دي ويسيبها

صلاة الجماعة دي بجد نعمة سبحان من بيجمع عباده 5 مرات في اليوم

الاحساس ان كتفك في كتف حد تاني واقف في صف واحد معاك لا تفرق انت مين ولا هو مين ولا عمرك و لا اي حاجة في الدنيا

يكفي رب العالمين انك تكون مسبغ الوضوء متجه للقبلة خاشع القلب طالب عفو الله وان يتقبل منك

ينادي منادي ان حي علي الصلاة حي علي الفلاح فيهب العبد ليلبي نداء الرحمن

ما احلي الصلاة خلف امام تحسبه علي خير .. ويا سلام باه لما تكون صلاة جهرية خلف امام انعم الله عليه بحسن التلاوة

والله نعمة مش حاسين بيها ..

مش عارفة بس الاحساس في المكان نفسه مختلف .. يعني حتي لو بنصلي جماعة في مكان تاني مش مسجد .. الاحساس داخل المسجد مختلف حقيقي وصدق الله العظيم في قوله " في بيوت أذن الله أن ترفع ويذكر فيها اسمه يسبح له فيها بالغدو والآصال "


فعلا نعمة ربنا يديمها علينا

كمان احساس بالامان داخل المسجد .. تنسي همومك و تعبك و تحس بالامان و تبقي في وسط 100 واحد و حاسس انك لوحدك بس وحدة مختلفة .. تبقي واقف معاهم في الصف و حاسس انك الوحيد اللي واقف بين يدي الله .. مش بتفكر اللي جنبك بيقول ايه لربنا .. كل همك تقوله اللي جواك .. تدعوه بما يجول في خاطرك .. مش عارفة اوصفه .. ممكن تحس وانت في وسط كل الناس دي انك واقف لوحدك قدام الكعبة .. ممكن في الدعاء كل الناس بتقول آمين متسمعش غير صوتك انت .. تحس انك لوحدك اللي بتدعي الله مع انك عارف ان عدد الذاكرين لله الداعين له في اللحظة دي كتير اوي لا يعلم عددهم الا الله سبحانه وتعالي

احساس مش هينفع يتوصف او مش هينفع مني لاني مش عارفة اقول اللي حساه

ربنا يديمها نعمة و يتقبل يارب

ساعات بيكون في حد جنبك بيدعو الله وتحسه ملهوف اوي علي استجابة الدعاء من حرارة دعائه ولا تملك ساعتها غير انك تغير الدعاء بدل ما تدعي باللي كنت ناوي عليه تلاقي نفسك بدون وعي بتدعي ربنا انه يستجيب لدعاء اللي بيدعوه جنبك .. حصلتلي كتير بلاقي حاجة وقفتني و الجمت لساني عن اي دعاء عايزة ادعيه و الاقي نفسي بقول يارب تقبل منها دعائها و استجب لتوسلاتها .. ساعات اقول يمكن هي احوج مني بالدعاء و يمكن لو دعيت لها باجابة الدعوة ربنا يكرمني باجابة دعائي .. مرة حتي قولت مش يمكن دي تعتبر تفريج كرب عن مسلم .. في حد محتاج الدعاء ولو دعيت ان ربنا يستجيب لدعاءه مش يمكن اكون بكده فرجت عنه حاجة هو عايزها من ربنا .. الله اعلم ان كنت صح ف دا ولا لا بس انا وقتها اخدتها كده

الموضوع طيب اوي و جميل بجد .. ياريتني كنت بقدر اعبر بالكلام عن الاحساس اللي حساه .. بس الحمد لله رب العالمين .. المهم ربنا يتقبل
___________________
بقالي ساعتين مش عارفة اكتب كلمتين علي بعض :(
كل شوية حد يدخلي يشتكيلي من حاجة :(
الناس هنا كلهم النهاردة كل واحد حد عامل فيه حاجة تضايقه .. الله يهدي

ساعات تبقي جواك هموم كتيرة ومش عايز تسمع حد ولا تتكلم مع حد بس لو فكرت للحظة هتلاقي ان يمكن ربنا بعتلك الحد دا علشان يقولك انت مش لوحدك الي فيك هموم .. زيك زي باقي البشر .. بيشوفوا الحلو والمر ..

الله يعافينا والمسلمين من كل سوء و يتقبل منا دعائنا وصالح اعمالنا
____________________

اللهم اصلح لنا فساد قلوبنا
اللهم انا طرقنا بابك فلا تردنا خائبين
لكل منا سؤال و مسألة

اللهم يا سميع يا مجيب اجب دعوانا
اللهم انك عفو كريم تحب العفو فاعفو عنا والمسلمين

الأحد، 14 سبتمبر، 2008

تخريفة وختامها دعاء اتمناه

قبل رمضان بيومين دورت في المسجد علي كلمة " الله " اللي كانت في الحيطة و صورتها ملقيتهاش ولقيت الحيطة مشققة مكانها ولحد امبارح كنت قاعدة بدور عليها وانا شايفة الحيطة كلها قدامي اتغيرت حاولت افهم اي حاجة من الجديد الي علي الحيطة بس حسيت ان ربنا مش عايزني اعرف

ضايقتني الحكاية دي اوي وقعدت افتكر نفسي هو انا حالي بقي من حال الحيطة دي كده اه صحيح حالي ملخبط دي حقيقة و الدنيا ملخبطة معايا في كذا حاجة وقت واحد و ساعات في حاجات مش بقدر حتي افكر فيها واقول معلش اهي كنت بعملها لسبب ربنا وحده يعلم ولو جت دلوقتي و قلبت بسوء عليا اهو ربنا عالم هي كانت ايه و شايف دلوقتي حصل ايه

الحمد لله رب العالمين

الحمد لله رب العالمين لما بتلخبط من ناحية ربنا بيكون فارجها من ناحية تانية والحمد لله كل قضائه خير و سبحانه وتعالي حنين علينا لما بتضيق علينا بيبعتلنا حاجة او حد يطبطب علينا

اغلب الظن اني ممكن اكون برتكب حاجة خطأ وانا في المسجد بس بيتهيألي خطأ عن خطأ بيفرق يعني الي افهمه انه مينفعش نتكلم والامام بيتكلم طالما بيقول كلام طيب و ممكن نستفيد منه ولا علي الاقل بلاش اشتت اللي قاعد بيسمعه

انا مش عارفة بيحصل دا عند الرجال ولا لا بس السيدات في منهم بيكونوا فوضاويات بطريقة لا تحتمل بجد .. ووقعتها سودة اللي تفكر مجرد تفكير في نصيحة حد وخصوصا لو ست كبيرة .. بيعملوا عليها تكتلات ..

ههههههه اظرف حاجة ان في ناس بتحتل اماكن في مواقع غريبة ولو حد تاني استجري و قرب من المكان دا بتبقي بردة وقعته سودة و سبحان الله هي بيكون عندها مبرر ليه مثلا قاعدة بالكرسي في المكان وسط اللي بيركعوا ويسجدوا وليه مش مع باقي السيدات اللي قاعدين علي الكراسي ورا .. ولو واحدة تانية في موقع اخر فكرت تقعد بالكرسي قدام يقوموا عليها كلهم .. مع انهم اساسا ملهمش فيها لا ناقة ولا جمل و قاعدين ورا و ملهمش اي علاقة باللي بيسجدوا قدام و لا يعنيهم ضيق المكان قدام من وسعه ..بس هي اثبات تواجد والسلام .. صوت ولازم يطلع .. الله الهادي

دي تخريفة صيام كده ملهاش اي علاقة باي حاجة بس بفضي حاجة من جوايا علشان اسيب مكان للاهم

اللهم اني اعوذ بك من عين لا تدمع واعوذ بك من قلب لا يخشع واعوذ بك من عمل لا يرفع واعوذ من دعوة لا يستجاب لها

الدعاء دا بيتهيالي مفيش حد في أمة سيدنا محمد صلي الله عليه وسلم احوج الي اجابته مني الاربعة محتجالهم و بدور عليهم و أسال الله ان انولهم جميعا عاجلا غير آجلا

يااااااااااااااا رب

الأربعاء، 10 سبتمبر، 2008

وحشتيني يا امي


واحد ننام ونقوم و ماما تيجي ان شاء الله


يارب عقبال ما اقولها لما سيف ربنا يكرمه ويعافيه ويرجعلي بالسلامة


ياااااااااااااااااااااااااااااااااااااااااااااااااااااااااااا رب

الأربعاء، 3 سبتمبر، 2008

يرحمنا الله

الناس ليه الرحمة منزوعه من قلوبهم و ليه لو شفت واحد بيموت في الشارع اكبر حاجة ممكن تعملها انك تتصعبن عليه و تسيبه و تمشي

العيد الصغير اللي فات كنت مع ابويا وامي راحين لخالتي واحنا قدام مسرح البالون ما بين النفق و مطلع كوبري 15 مايو عربيات ماشية بسرعه و فجاة اللي قدامي وقف فجاة و كنت هخبط فيه بس الله ستر .. الاول مفهمتش في ايه بس سمعت فرملة جامدة
لقيت امي بتقول لا حول ولا قوة الا بالله الظاهر في حد اتخبط

للحظة سكت انا و متحركتش لقيت ابويا بيزعقلي ويقولي امشي من هنا .. طب في ايه افهم طيب حصل ايه لمين لسه بعدي العربية اللي قدامي
لقيت بنت مرمية علي الناحية اليمين قرب الكوبري و الناس وقفوا حوليها و في نص الشارع اسورة بلاستيك مكسورة و قرب النفق الناحية التانية بنت تانية مرمية في الشارع بردة قدام عربية تاكسي

انا لله وانا اليه راجعون معرفش حصل ايه اكتر من كده لان دا كان اخر حاجة شفتها علشان ابويا فضل يزعقلي علشان امشي ( بحجة مش هناقشها علشان مبقتش تفرق خلاص )

مفيش دقيقتين وصلت عند خالتي و طلعت في البلكونة قعدت ابص علي الشارع الكبير من الدور العالي

عربيات كتيرة اوي رايحة جاية و ناس كتيرة بتعدي و الجنينة اللي في نص الشارع مليانة اطفال و شباب بيفرحوا بالعيد

لو كنت انا مكان البنت حد كان هيسال فيا؟؟؟
ياتري جرالها ايه؟؟؟؟؟؟؟؟؟؟

قبل ما اشوفها مرمية قدام العربية شفت الاسورة المكسورة و حسيت قلبي وجعني و اتصدمت و اتلهيت للحظات مش عارفة افكر ف ايه ولا ليه

هو مش اخويا دا انا اتربيت معاه و فرحت و حزنت معاه .. اكلت معاه من نفس الطبق و شربت وراه من نفس الكوباية .. هيكونوا احسن من مين يعني لما البشرية نفسها ابتدت بقابيل و قتله لاخوه غيرة و حسد .. لو كان في فلوس وقتها كان طمع فيها زي ما بيطمع فيها الاخوات دلوقتي

ليه الجحود دا و ليه قسوة القلب متمكنة من الانسان .. لما قابيل قال لاخوه " لأقتلنك " طب ليه ؟؟؟؟؟

لو الانسان الاصل فيه الشر كده و حب الذات وبس .. مين هيرحم مين غير الله .. يعني اكيد ربنا الرحمن الرحيم خلقنا و احنا جوانا ولو ذرة واحدة من مكونات بني البشر ممكن نعتبرها فيها جينات رحمة .. بس تاهت راحت فين .. وانا اللي كنت عبيطة و عماله اقول هو الايام دي بس اللي الناس مبقتش رحيمة بجد وساعات حتي الاب مش بيرحم ابنه والاخ مش بيرحم اخوه .. بس طلعت عبيطة دي من اول ما الدنيا اتخلقت .. ابتدت بالدم قاله هقتلك و قتله .. و للحظة اللي احنا فيها دي في كام قابيل بيعمل ايه في كام هابيل و علشان ايه علشان الدنيا اللي متستهلش اي حاجة اصلا ..

ملوش جيوب الكفن

لا حول ولا قوة الا بالله .. قلوب جاحدة و نفوس مريضة لا طمر فيها خير ولا احسان

الله يلطف

عارفة ان الكلام اكيد ملوش علاقة ببعضه

قبل المغرب امبارح كان في سؤال هيجنني وواجعني اوي .. ليييييييييييه ؟؟

بليل لما شفت عمرو خالد في قصص القرآن .. لقيت ربنا بعتلي اللي بيقولي ليه بيعملوا كده .. علشان هو دا حال الدنيا من يومها

اعتبروها تخاريف صائم بينزف من جحود اخوه الانسان

اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع