فيلم محبش اشوفه

بالصدفة دخلت احدي المدونات لاجد احد البوستات عن احد افلام هذا الصيف..

الفيلم انا شفته علي النت مرة و نص .. شفته اول مرة وكنت عيانة مش مركزة و قرفت منه جدا و شفته النص مرة التانية دي علشان قلت جايز غبية و مفهمتش الكلام الفظيع اللي بيتقال عليه دا .. قرفت اكتر و مكملتش ..

انا عايزة افهم يعني هستفيد ايه انا وانا بروج لحاجة اصلا حرام .. وعلي لسان البطل لما قال اصحابي بعدوا عني و مش بيرضوا حتي ادفع تمن كوباية الشاي لحد فيهم علشان بيقولوا فلوسي حرام.. بيقولها عادي جدا ولا كانها فيها حاجة .. اصل دي مش حد بيشتغل في مكان فيه شك ان ايراده مش حلال صافي .. دا واحد بيشتغل في صالة قمار .. انهي عقلية دي اللي هتعمل عبيطة و تقول الفلوس فيها حلال .. بأمارة ايه يعني ..

بجد حاجة استفزازية .. انا استفدت ايه دلوقتي .. انا بتكلم وانا واعية للموقف مش مجرد متعصبة و لا منغلقة ولا بقول اي كلام .. انا دراسة دراما و ادب و عارفة كويس اللي بتكلم عليه .. هو الفن و الافلام دي مش هدفها عكس صورة عن الواقع و الارتقاء و السمو بالنفس البشرية .. حل المشاكل المعاصرة و استحضار الماضي للمعاشهوش .. و حجات كتيرة كلها حلوة .. مشفتش مرة حاجة من القصص ولا الروايات العالمية منفصله عن البلد اللي حصلت فيها زي ما بيحصل عندنا ..

مين الناس دي.. لو موجودين في وسطنا فهما قلة .. المنحرفين كتير اه بس قلة في وسط الناس اللي اكتر منهم .. انا هستفيد ايه لما اوري الشاب اللي ميعرفش صالة القمار دي ازاي بيلعبوه و يتفرج علي انواع الالعاب و اشكالها .. كام واحد وزه شيطانه ووسوس له انه يروح يشوفها علي حقيقتها هتطلع عاملة ازاي... ذنبهم في رقبة مين .. صناع الفن ؟؟

لما درست قصة دكتور فاوست اللي باع نفسه للشيطان و مضي بالدم علي عهد انه عبد له و هينفذله كل طلباته مكانتش القصة بتبين التفاصيل المقرفة دي .. مهي دي القصة اللي بتمحكوا فيها .. وان البطل في الفيلم دا باع نفسه للشيطان زي دكتور فاوست ..

علي راي اللي قال .. ودا اسمه فن يا رااااجل :(

حاولت ادور علي حاجة واحدة مفيدة ممكن يطلع بيها اي حد من الفيلم بلاش انا علشان انا معقدة و دماغي وحشة و مش بفهم في الحاجات دي .. اي بني ادم كبير و عاقل و بيفهم ... ممكن يطلع بايه بالله عليكم؟؟؟؟؟؟؟؟؟؟

انا عمري ما فكرت اكتب علي فيلم بس المدح والتعظيم اللي قريته في البوست اللي اتكلمت عليه بدون ذكر اسماء بجد مستفز لدرجة كبيرة اوي .. انهي عقول تقبل ان يتم اللعب عليها بالاسلوب دا .. و في الاخر يقولوا دا عن الدنيا و الحياة واللي فيها .. هي الدنيا تستاهل تتذم صحيح بس مش لدرجة اني افصلها صالة قمار علشان اجيب البشر اللي فيها و اصنفهم

ولا حول ولا قوة الا بالله