الثلاثاء، 27 مايو، 2008

دعــــــــــاء استوقفني

" ‏اللهم اني اشهدك اني قد سامحت جميع المسلمين والمسلمات الاحياء منهم والاموات. ‏اللهم إني قد غفرت مابيني وبين الناس فاغفر مابيني وبينك"


استوقفني الدعاء دا فلقيت جوايا كلام كتير عليه حبيت اخرجه بالكتابه عن معذرة الناس و مسامحتهم مهما بلغ جرمهم


الاول ندور جوايا علي مين مش بحبه علشان نناقش حكاية السماح دي


بعيدا عن اللون البني اللي بكرهه يعني:)


عدي عليا بشر كتير ف حياتي ولو اني زي ما قلت بعيدة عن الناس بصورة او باخري .. بس بردة يعني سواء في سنوات الدراسة او في سنوات الشغل اكيد يعني اتعاملت و مازلت بتعامل مع نوعيات مختلفة من البشر علي كافة المستويات


سبحان الله الكلام دا فكرني بحاجات عجيبة مرت بيا ف حياتي ... اديني بفتكر تراكمات حاجات كتيرة ادت لكلام اللي قلته ف اول مشاركة كتبتها هنا ألا وهي البعد عن الناس


من غير ما اخرج برة الموضوع الرئيسي بتاع السماح و مين اللي مش بحبه ... علي الرغم اني شفت وحش من ناس كنت فاكراها كويسة اوي يعني هي بينت روحها كويسة ,, اديني بدور جوايا علي حد بكرهه مش لاقيه :( مش علشان محدش عمل فيا حاجة وحشة .. لا في كتير بس يمكن بمرور الوقت الواحد بينسي و بتبقي ذكري بحاول ادفنها جوايا اوي و ذكري علي ذكري في بئر ذكرياتي بتتوه من زحمة الذكريات ...


مش عارفة دا من قبيل المسامحة ولا دا عبط ولا ايه بس


فكرتوني بحاجات بايخة اوي شفتها و استغبيت فيها نفسي اوي ساعات الواحد مش بيعرف ينظر للامور نظرة موضوعيه الا لو بعد عن الموضوع


بس فكرة المسامحة دي حد ذاتها جديرة بالاهتمام والله .. بالنسبة لي لسبب مهم جدا اولا علشان اقتناع بان مفيش بني ادم هيغادر الدنيا الا و حق اخيه البني ادم عليه خلصان


مش قالوا داين تدان

وربنا يمهل ولا يهمل


انا هفضل شايله هم اني متضايقة من الشخص دا ليه !!!


( ولو ان في احيانا يبقي في اكس من الناس قدامك مش قابله كده بدون سبب يعني بس بيتهيالي مش ذنبي لما بلاقي حد قدامي مش نازلي من زور برغم اني يمكن معرفهوش او اعرفه و اتعاملت معاه وبردة مش بحبه و مش بينزلي من زور )


اما اللي بيضايقني مهو ادينا متفقين اهو ربنا موجود و" ان ربك لبالمرصاد " يعني حقي هيخلص منه هيخلص ان آجلا او عاجلا ولو اني يعني مش مستفيدة حاجة لو حد أذاني يعني واتردتله الاذية دي ... اللهم لا شماته ... يعني مش هفرح لو شفت حد بيتوجع وجع اتوجعته علشان ذوقت الوجع دا فمش هيسعدني انه يذوق من نفس اللي ذقته


مش بحب الانتقام ف رايي مش جايب همه مهو انا اتضايقت و اللي حصل حصل هستفيد ايه يعني بيه ... يتوجع اللي وجعني بردة مش هيعوضني دا عن وجعني ... هرجع تاني واقول اهو انا دماغي كده :) و عجباني بردة شوية يعني مش كتير.. حبة كده :)


يبقي بيتهيالي كده ابقي مسامحه.. بس والله مش تفضل مني علي اللي أاذاني انما هو اني علي يقين ان ربنا عدل ودا يجرنا لفكرة تانية مؤمنة بيها جدا


دلوقتي الله من اسمائه العدل وهو عدل في خلقه .. اكيد والله اعلم انا مش هفرح اكتر منك و لا هبكي اكتر منك ولا هحزن اكتر منك يعني كلنا زي بعض في الفرح و الحزن


يمكن في ناس الفرحة متجمعه لهم مع بعضها يشوفوها كلها في فترة معينة من حياتهم و في ناس الحزن متجمع عندهم بردة يشوفوه في فترة معينة من حياتهم و في اللي الفرح والحزن ممزوج مع بعضه ومتوزع علي حياته كلها


يبقي النتيجة اني انا وانت وهو وهي سواسية مهما كنا ايه وولاد مين و بنكسب اد ايه و بنعيش فين وازاي و مهما اختلفت ظروفنا


الفرق الوحيد في درجة الرضا والقناعه بان كل افعال ربنا فينا خير


وصدق الحبيب المصطفي عندما قال: " عجبا لأمر المؤمن إن أمره كله خير وليس ذاك لأحد إلا للمؤمن إن أصابته سراء شكر فكان خيرا له وإن أصابته ضراء صبر فكان خيرا له "


ومين مننا يعني مش عايز يكون المؤمن دا و لا مين مش عايز يبلغ حتي مرحلة قريبه من المؤمن دا علشان دي درجة عالية اوي واكيد مش اي حد يصنف فيها


" اللهم اجعلنا من عبادك المؤمنين المخلصين "


الجزء التاني باه من الدعاء ... مش عارفة دلوقتي هل يحق لي ان اقول اني قد غفرت لفلان فعله ؟؟

ان الله هو الغفار و هو غافر الذنب .. هل يجوز اقول اني غفرت او لم اغفر


بيتهيالي انا ادني بكتييييييييييييير اوي من اني افكر اقول كلمة زي دي حتي لو كانت يجاز ان تقال من انسان مسلم علي اخوه المسلم والله سبحانه اعلي واعلم


دوشتكم تاني بس فكرة و جت علي بالي :) استحملونا و الاجر والثواب علي الله :)


الاثنين، 26 مايو، 2008

سبحان الله :)





انا حابة احكيلكم حكاية الصورة اللي حطاها مع اسمي :)


معلش رغي برغي باه بس اسمعوها ولا اقروها مني بالمرة :) كي تتضح الرؤية يعني


من الاول خالص باه الحكاية دي

في رمضان اللي فات في مسجد


في ليلة من ليالي رمضان وفي صلاة التراويح

كنت بصلي يومها في الصف الاول و السيدات المصلي بتاعهم مش كبير اوي يعني لو في الصف الاول يبقي حيطة في وشهم بتفصلهم عن الرجال

والحيطة ملونة نصها اللي فوق كله ابيض و من تحت لونها رمادي


كنت قايمة من السجود و لما سلمت وانا قاعدة في وضع التشهد ببص علي الحيطة لقيت رسمة علي الحيطة
اعدت اجيبها يمين شمال ( اصلي بحب اعمل الحكاية دي بحس كل حاجة مهما كان شكلها لو شفتها من زاوية تاني اكيد هطلع منها بشكل وبعمل الحركة دي حتي ساعات لو نقطة مية وقعت علي ورقة بتعمل شكل بفضل وراها لحد ما ارتاح علي انها عمل شكل معين وفهمته :) معلش انا دماغي كده و عاجباني :$ )

المهم لما عملت كده كانت في وضع اول صورة دي اللي بالجنب
سبحان الله العلي العظيم

لقيت لفظ الجلاله ( الله ) لو دققتوا هتلاقوها مكتوبة حتي برسمة الشدة اللي فوق اللام و كمان كانها تحتها خط

يااااااااااااااااااااااااااه علي الفرحة اللي فرحتها يومها بقيت فرحانة اوي بيها هي كانت صغيرة اوي صورتها و عدلتها ووريتها للي كانت جنبي و حسيت انها حاجة من ربنا فبقول لو كنت بعمل وحش انهي انذار من ربنا انه متطلع و بيقولي عيب كده:( ولو بعمل حاجة كويسة اهو ربنا بيديني حاجة تفرحني
اكمن الناس كل يوم بتصلي هناك و محدش اخد باله منها

مش عارفة هيبقي التعليق ايه بس مقدرش اقول الا سبحان الله :)

علي فكرة في من الحجات دي كذا حاجة بتحصل انا عارفة

كان في عندنا في البيت بردة لما المية بتخلي البياض يطق في الحيطة بيعمل اشكال

كان عندنا في مكان امي بتصلي فيه الفجر في رمضان بالذات كان في وضع ما بتقعد في جزء متداري من الحيطة مكتوب كلمة الله بس بشكل تاني ... سبحانك يا ربي

و جنبها بعد مدة ظهرت كلمة محمد

الكلام دا من سنين كتير :( مكنتش واعيه للموقف يعني والا كنت صورتها :( يلا قدر الله وما شاء فعل
وفي حجات تانية بس كفاية عليكم دول :)

ربنا يرزقنا واياكم رضاه

اللهم يا جابر المنكسرين اجبر كسري

السلام عليكم

كان بودي احكي ف حدوتة تانية بس سمعت انا تريقة علي الكتكوت :(
هتخليني أأجل الحدوتة التانية لحد ما انسي:)

والله فكرة حلوة جــــــــــــــــــــــداااا

هي لسه وليدة اللحظة دي بس حلوة و ان شاء الله تبقي كويسة
هي حلوة علي الاقل بالنسبة لي

خاطرة او تجربة كده مع اسم الله الجبار

الاول اجيب المعني و بعدها اقولكم حكايتي مع الاسم ايه

اجاب الشيخ صالح بن عثيمين عن معني اسم الله الجبار بالتالي:-
الجبار له ثلاث معان:
الأول: جبر القوة، فهو – سبحانه وتعالى- الجبار الذي يقهر الجبابرة ويغلبهم بجبروته وعظمته، فكل جبار وإن عظم فهو تحت قهر الله – عز وجل- وجبروته وفي يده وقبضته.
الثاني: جبر الرحمة، فإنه سبحانه يجبر الضعيف بالغنى والقوة، ويجبر الكسير بالسلامة، ويجبر المنكسرة قلوبهم بإزالة كسرها، وإحلال الفرج والطمأنينة فيها، وما يحصل لهم من الثواب والعاقبة الحميدة إذا صبروا على ذلك من أجله.
الثالث: جبر العلو فإنه سبحانه فوق خلقه عال عليهم، وهو مع علوه عليهم قريب منهم يسمع أقوالهم، ويرى أفعالهم، ويعلم ما توسوس به نفوسهم.

انا باه حكايتي مع المعني التاني دا
ولو قعدت اكتب واكتب واكتب عمري ما هعرف اوصف حلاوة اسم الله الجبار و فضله عليا بحق الاسم دا

نبتديها من الاول خالص .. من حوالي 3 ولا 4 سنين مرة في رمضان في برنامج كنوز علي قناة اقرا كان عمرو خالد بيتكلم عن اسم الله الجبار .. سبحان من نزل السكينة علي قلبي بالاسم دا مع ان المتعارف عليه يعني اكتر المعني الاول و مش ناس كتيرة تعرف المعني التاني دا
المهم عمرو خالد يومها قال كلمة دخلت قلبي و عقلي وملت عليا كل وجداني :" الله جبار يجبر المنكسرين و يقصم الظالمين " يعني لازم الظالم يقصمه الله حتي يرد ويجبر كسر المنكسرين

سبحانك يا جبار ما اعظمك

المهم من لحظتها دي طلعت بدعاء لم يفارقني في اي لحظة انكسار و دايما دايما بقوله و بقوله لاي حد اعرفه لاني علي يقين اووي انها دعوة لا ترد باذن الله والله والله عن تجارب كتيرة مش تجربة واحدة

<<<< اللهم يا جابر المنكسرين .. اللهم اجبر كسري ... اللهم اجبرني يا جبار >>>>

حتي وانا بكتبه دلوقتي يعلم ربنا احساسي بالدعاء دا ايه و بكرم ربي الكريم عليا بفضله و استجابته للدعاء دا

سبحانك يا جبار ما في مرة دعوت الله بهذا الدعاء في وقت ضيق و ضلمة بالنسبة لي و كنت مظلومة الا و ربنا بعتلي اللي يمسح دمعتي و يطيب بخاطري و كتيييييييييييير اوي بحس ربنا بيطبطب عليا بحاجة بتحصلي استجابة للدعاء دا

بحسها وبعرفها علشان عارفة ان الله سميع مجيب يجيب دعوة الداعي اذا دعاه و انا وقتها بكون بدعيه باسم عظيم و بساله جبر كسري
يااااااااااااااااااااااااه والله اد ايه استجابة الدعاء ليها حلاوة

الحمد لله رب العالمين

حواديتي مع اسم الله الجبار لا تعد كتيييييييير اوي اوي اوي سبحانك يا ربي

مش عايزة اطول عليكم بس من كترهم مش عارفة احكيلكم انهي فيهم

طيب اقروا مني دي و احكموا انتو :)

بلاش حاجة شخصية اوي يعني خليها شوية علي المستوي العملي

من سنتين كده في شغلي كنت في ضيقة و احساس بالظلم فظييع واستمريت في الحكاية دي يجي شهرين كنت وقتها ابتديت اول تيرم في الماجستير و بطبيعه الحال يعني انا علمي في الدراسة دي قليل جداااااااااا انا خريجة ألسن - قسم انجليزي وبعمل ماجستير في الزراعة :) حتي الخبرة اللي اخدتها من شغلي في جزء معين من الدراسة انما بدرس حجات تقريبا كلها معرفش عنها اي حاجة وخصوصا كمان اني كنت ادبي ... المهم علشان مطولش عليكم عدت فترة ال 3 شهور الاولي و امتحنت الميد تيرم و طلعت نتيجته ومن بعدها جاتلي فترة الضيق اللي بحكي عليها دي و استمرت لمدة ال 3 شهور لحد ما جه وقت امتحان الفاينل و امتحنت و كنا داخلين علي رمضان وقتها من سنتين

وكنت باستمرار بدعي ربنا ان كان لي حق انا مظلومة فيه يردلي حقي او يرضيني انا راضية باي حاجة ربنا يعملها ومش هعترض لاني حاسة ان محدش بياخد اكتر من اللي مكتوبله وان كل افعال ربنا فينا خير لو مكانتش خير لي هتبقي خير لحد تاني

المهم يشاء ربنا ان النتيجة تطلع والاقي اني طلعت الاولي علي ناس دا شغلهم و خبرتهم فيها قوية اوي ما شاء الله عليهم يوم ما كلمني الدكتور علشان يقولي مبروك حسيت كان نسمة هوا باردة عدت علي قلبي و مكنتش مصدقة علشان مش فعلي دا ... دا فضل ربنا ومشيئته مش عملي فعلا ... انا مكنتش مصدقة بس افتكرت الدعاء و حسيت ان ربنا بيطبطب عليا وبيقولي ان كان ليكي حق ف حتة تانية خدي دا انا جبرت بخاطرك في الحاجة دي ودي كبيرة اوي ... ( مش عايزين نق ولا حسد هه علشان الموقف دا اتكرر بفضل الله ومنه وكرمه :) قولوا ما شاء الله لا قوة الا بالله )

المهم من الحكاية دي دخلت علي حكاية تانية فيها جبر خاطر من الله الجبار بردة بس حاسة اني دوشتكم يمكن احكيلها مرة تانية :)

كفاية كده المرة دي بس عايزة اقول كلمة اخيرة

لو يوم حسيت انك محتاجله روحله مع اننا محتاجينله دايما دايما بس في اوقات بنكون احساسنا بالاحتياج لله اكبر

اوعي تتردد انك تلجأ لله الواحد الاحد الجبار :)

الله يجبر بخاطركم جميعا و بخاطر المسلمين في كل مكان :)

الأحد، 25 مايو، 2008

افتكرت ذكريات طفولة انا والكتكوت

انا عارفة اني بقول كلام فاضي لحد دلوقتي

بس والله افتكرت حاجة حلوة

تجربة عملتها انا واخويا زمان

كان في علي شباك الحمام في بيت جدتي وهو من البيوت بتاعت زمان اللي يرمح فيها الخيل دي

المهم كان في علي الشباك حمامة و جوزها بيعملوا عشة علي السور بتاعه و بتبيض دايما بيضتين و دايما بيقع واحدة تحت تتكسر
يعني انا شفت من الحمامة دي الله يرحمها اكيد ماتت يعني شفت منها اجيال والله كانت ايام جميلة من بعيد لبعيد اكمني بخاف من اي حاجة بتتحرك :)


المهم مرة طقت في دماغي اعمل حاجة انا واخويا
جبنا بيضة عادية من التلاجة و كانت الام بعيدة عن البيضة اللي راقدة عليها
حطينا البيضة دي جنب دي

رجعت الام ورقدت عليها عادي بيتهيالي مكانتش معترضة يعني اكمنها بيضة كبيرة و مش بتاعتها


بس قلب الام باه تقولوا ايه

هيييييييييه


المهم بعد كام يوم
البيضة ابتدت تبقي هشة واتقشرت منها حتة
كان وقتها الاب هو اللي راقد علي البيضة مش الام

شوية وشوية لقيت كائن حي جوة البيضة

تخيلوا قعدت جنبهم اتفرج

هما الحمامة الاب والام كانوا عارفيني يعني مش بيعترضوا علي قربي منهم يعني واني بتفرج عليهم ... هتقولوا عليا عيلة مش مشكلة يعني مجاتش علي دي هتسمعوا مني العجب بس اصبروا

المهم

طلع من البيضة كتكوت سبحان من ان اراد شيئا ان يقول له كن فبيكون

من بيضة في الرف في التلاجة كانت ممكن تبقي فطار اي حد من العيلة لكائن حي بامر الله ... سبحانك يا اللهي

اللي حضر فقس البيضة دي الاب

هو اللي عرف الكتكوت و حبه اوي كان كتكوت لونه اصفر و جمييييل و سبحان الله القوي

اد ايه كان صغيف و كاشش ف نفسه كده و سبحان الله زي ما تقولوا ربنا نزل حبه ف قلب الحمامة الاب

المهم شوية و جت الحمام الام

طبعاهي متعرفش مين الكائن الغريب دا
الاول كانت مش عايزاه
و من بعيد وقفت تبصله و تكلم جوزها

اكيد بتقوله مين دا ولاابن مين دا اللي لقيته ف بيتنا

كانت بنتهم فقست باه وقتها بردة و طلعت زغلولة صغنونة

طبعا عارفين يعني ان الحمام بياكل ولاده في بقهم اقصد منقارهم يعني:)

يعني الام او الاب يجيبوا الاكل و الصغنن بيفتح بقه و الاكل بيدخله فيه

انما الكتكوت بتاعي بيعرف ياكل لوحده
فضل الاب و الام سبحان الله محتارين عايزين ياكلوه وهو صعيف كده

يجوا جنبه علشان يفتح بقه مش بيفتحه

:( كان صعبان عليا مهو لازم ياكل يعني

نعمل ايه نعمل ايه

المهم ماما قالتلي طيب هنسلق بيضة و نحطله الصفار ياكل منه

تاني يوم الكتكوت كان بانله منظر كده كان اصفر جميييييييييييييييييييل حلو حلاوة بجد سبحان من صوره

اخده اخويا لما الاب والام طاروا

و حطينا قدامه صفار البيضة المسلوقة
قعد ينقر فيهم شوية

و قعد يمشي شوية كان جميل بجد اوي

و كنت فرحانة بيه فرحة ما بعدها فرحة سبحانك ياربي

بس قدر الله وما شاء فعل

اخويا رجعه جنب الحمامة الصغيرة :(

تاني يوم كان وقع من فوق الظاهر قام مشي ولا ايه معرفش باه :'(

الله يرحمه:(

كل نفس ذائقة الموت صدقت يا ربي


مش عارفة حبيت احكيها يارب مكونش تقلت عليكم :)

أه منك يا دنيا

بسم الله الرحمن الرحيم

والله ما انا عارفة ابتدي منين ولا اقول ايه

بس وحشني جدا اني اكتب حاجة
انا من سنين بشارك في منتديات و كنت عضو فعال ف كتير منهم بس اصابني العطب باين ولا ايه

يلا مش مشكلة اهي الدنيا كل يوم بحال
لا كل يوم ايه دي كل لحظة بحال

استنوا افكر اكتب في ايه ولا ايه
انا في دماغي حجات كتيرة اوي نفسي اتكلم فيها حتي مع نفسي


واه من نفسي دي

ياربي مش عارفة ليه مش بحبها

حاولت بجد احبها و كتير بحاول اعملها حجات تقربني منها بس مش بفلح بفشل فشل ذرييييييييييييع كل مرة

ساعات اقولها لو مشيتي كويسة و بقيتي حلوة كده و هعملك حاجة بتحبيها بس هي بردة مش بتريحني

يعني بقول كلام فاضي انا عارفة

بس مؤقتا يعني لحد ما اجمع علشان انا نفسي مش عارفة في ايه

معلش اصلي لسه خارجة من امتحانات عجيبة في ظروف اعجب منها مفيش

مرة زمان من سنين قررت فجاة كده اني عايزة اعيش من غير الناس و بعيد عنهم

و عجبتني الحكاية دي و بدأت في تنفيذها علشان جت اوي علي هوايا وسمعت كلامي و بعدت اوي حتي عن كل الناس

لقيت السلوي في الدخول علي الانترنت

يومي كله مش بنطق فيه 10 ولا 20 جملة بالعافية ان مكانش اقل
ولا حد بيسمعلي صوت

وهما فاكرين دا هدوء مع اني مش هادية ولا حاجة
بس كله جوه

لما بثور بثور جوايا بصرخ جوايا بزعق جوايا بعيط جوايا بس دي بتطلع برة غصب عني يعني

ساعات بحسني مجنونة
لو حد شافني يقول العقل والهدوء بس فينه دا كله مش جوايا

اللي جوايا ولا حد يعرف هو ايه اصلا مهما كانت درجة قرابته

بس ساعات يعني ناس بتقرب مني وبتعلق بيها بتعرف شوية عني

ايه الهبل اللي بكتبه دا والله ما انا عارفة

بس غالبا شوية و همسحه علشان هو تخاريف واحدة بقالي كتير مكتبتش و لا اتكلمت

يلا استحملوني المرة دي بس اخر مرة اهبل كده

هركز في موضوع مفيد ان شاء الله ولو حتي علي المستوي الشخصي

اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع