الأربعاء، 30 يوليو، 2008

مين عايز مين !!

The greatest danger of all is to allow new walls to divide us from one another. The walls between the Countries with the most and those with the least cannot stand. The walls between races and tribes; natives and immigrants; Christian and Muslim and Jew cannot stand. These now are the walls we must tear down. Now is the time to build new bridges across the globe.
.
Barack Obama, democratic party candidate for the presidency of the United States, from his speech of July 24 in Berlin
.
عجبتني اوي المقولة دي لما تمعنت النظر في معناها .. الله اعلم بنية قائلها بس افتكرت ان اصلا دا هدف المسلم و غايته في الدنيا .. يتواصل مع الاخر .. يقرب مش يبعد .. يشيد مش يهد .. يصل مش يقطع .. يبني و يعلي بدل ما يحقر و يدني .. يحسن الظن و يعمل علي اثباته من جانبه .. يكون خير رسول لدينه ..
.
و صدق رسول الله صلي الله عليه و سلم حين قال " لا فرق بين عربي أو اعجمي الا بالتقوي "
(( من قتل نفسا بغير نفس أو فساد في الأرض فكأنما قتل الناس جميعا , ومن احياها فكأنما أحيا الناس جميعا ))
((المسلم أخو المسلم , لا يظلمه ولا يسلمه * , من كان في حاجة اخيه كان الله في حاجته , ومن فرج عن مسلم كربة فرج الله عنه بها كربة من كرب يوم القيامة , ومن ستر مسلما ستره الله يوم القيامة )) متفق عليه
(( من رد عن عرض أخيه , رد الله عن وجهه النار يوم القيامة )) رواه الترمزي
.
مش دي كلها وغيرها كتير اوي احاديث شريفة هدفها القرب من بعض .. نخاف علي بعض و نحاجي علي بعض ..
دلوقتي الجار بيقفل الباب في وشه جاره .. الاخ بيخسر اخوه علشان حجات كلها زائلة .. الحقد والغش والنفاق بقت حاجات عادية ما بين الناس .. كل واحد قاعد جنب اخوه و عينه في اللي معاه مش بيبص علي حاله و يصلحه حتي.. لا عامل مصلح بس برة كل ما يخصه ..
.
سبحان الله علي اد ما ادانا ربنا نعم و تلاقي اللي بيرمي الاكل اكوام بعد ما يخلص ( علشان اصلا مش هيقدر ياكل اكتر من اللي يملي معدته اللي هي نفس معدة اخوة.. نفس المقاس ) هتلاقي اللي بيدور في اللي اترمي دا علشان يطلع منه وجبة طعام ليه و لولاده
.
اللي مبقاش بينفع عندك .. في غيرك بيدور عليه و مناسب ليه جدا .. بس تفتكر هتعرف تلاقيه ؟
.
كلنا بنتكلم لغه واحدة و حتي ما بين البلد الواحدة و حتي بين الشارع الواحد والعمارة الواحدة و الشقة الواحدة حتي .. هتلاقي اللي عايز كل حاجة ليه و مش مهم التاني محتاج ولا لا ..
.
أوباما كان بيتكلم علي Danger خطر مزعوم بيفرق بين الناس و بيحط حواجز و بيقيم جدران بين الناس وبعضها .. بيفرقهم و يصنفهم و يبعدهم .. بعض النظر عن الخطر دا مين و مين السبب فيه و مين اصلا اللي من مصلحته يفضل موجود و يا حبذا لو تضاعف اضعافا مضاعفة ..
.
كل الكلام دا معروف مش محتاج كلامي الي قلته فوق اصلا.. الكلمة اللي لازم نتعلمها ( ولو انها اصلا المفروض انها من اساس عقيدتنا ) كلمة جسر .. رابط .. واصل .. علي فرض اني هديت الحيطة اللي بيني و بينك .. هوصلك ازاي ؟؟ حتي لو بنتكلم لغه واحدة .. بمكن منعرفش نفهم بعض و علشان نتعلم دا محتاجين وقت .. بس قبل كل دا لازم اصلا نبقي عايزين بعض ..
.
بيتهيالي مشكلتنا كعرب متوقفة علي اخر جملة دي .. لازم نبقي اصلا عايزين بعض .. اتنين واقفين كل واحد في جانب .. سكتهم واحدة بس مصرين كل واحد يمشي لوحدة علي رصيف غير التاني .. مش هيموتوا لو اتقابلوا في النص .. ولا هيقلوا .. بالعكس دول هيزيدوا .. بدل الواحد هيبقوا اتنين و بدل الاتنين يبقوا كتير .. بس لازم ابقي عايزاك علشان اعرف افكر ازاي اوصلك ..

الأحد، 27 يوليو، 2008

كلمتين وبس :)


جالي الدعاء دا اول ما فتحت الصبح :) استبشرت خير بيه بس كنت عايزة اجيب سنده للدقة( و مسحته علشان فشلت الاقي ما يثبت صحته) - بس ربنا بعتلي اللي يدلني علي حديث قريب للمعني :


سئل رسول الله صلى الله عليه وسلم أي الأعمال أفضل قال إدخالك السرور على مؤمن أشبعت جوعته أو كسوت عورته أو قضيت له حاجته
الراوي: عمر بن الخطاب - خلاصة الدرجة: [ لا يتطرق إليه احتمال التحسين] - المحدث: المنذري - المصدر: الترغيب والترهيب - الصفحة أو الرقم: 2/93

ولما جيت اعمل بحث عليه علشان اجيب اصله واشوف مكتوب عليه ايه اول ما لقيت .. لقيت جزء من كتاب احياء علوم الدين للامام الغزالي و لما قرأت الباب حبيت نتشارك فيه لان الكلام اللي قريته بجد طيب جداااااا ..


ونقلت منه الدعاء دا ..


"وكان من دعاء علي بن الحسين رضي الله عنهما‏.‏
اللهم إني أعوذ بك أن تحسن في لامعة العيون علانيتي وتقبح لك فيما أخلو سريرتي محافظاً على رياء الناس من نفسي مضيعاً لما أنت مطلع عليه مني أبدي للناس أحسن أمري وأفضي إليك بأسوأ عملي تقرباً إلى الناس بحسناتي وفراراً منهم إليك بسيآتي فيحل بي مقتك ويجب علي غضبك أعذني من ذلك يا رب العالمين‏"

اللهم اعذنا منه جميعا :(

و اكتشفت دي كمان .. و بصراحة اول مرة اعرفها و حسيت بضيق من نفسي علشان ممكن اقولها بهزار مع حد دخل و مسلمش مثلا بس مكنتش اعرف انها مكروهه:(

"ويكره أن يقول ابتداء: عليك السلام، فإنه قاله رجل لرسول الله صلى الله عليه وسلم فقال عليه السلام: " إن عليك السلام تحية الموتى " قالها ثلاثاً،ثم قال: " إذا لقي أحدكم أخاه فليقل: السلام عليكم ورحمة الله " ...

هتلاقوا التفصيل في اللينك دا .. فيه كلام جميل جداا عن الاخوة و ازاي تتعامل مع اخوك في الاسلام و تكسب وده و تحافظ علي الود دا و حجات كتيرة اوي بيتهيالي كتير منها غايب عن كتير مننا :( مع الاسف طبعا وانا اولهم ..


احلي حاجة باه حكاية المصافحة دي .. يا ريت باه الستات و البنات يقتنعوا بيها بدل القبلات اللي عمال علي بطال .. كانوا اتنين و بعدين بقول تلاتة و ساعات اربعه و تقولي تلاتة علشان علي السنة ... ببقي هتجنن ساعتها ايه لازمتها يعني مهياش من علامات الود للدرجة بدليل زي ما بيقولوا اللي في القلب في القلب علشان ممكن واحدة مش طايقاني و تفضل تقبلني ال 3 مرات و انا حاسة باللي جواها .. طب ليه الغلب دا يعني :(

و ادي الحديث لعل و عسي ... المصااااااااااااااااااااااافحة فقط لا و ليها ثواب كمان :) الا عند السفر يعني :)

"وعن البراء بن عازب رضي الله عنه: أنه سلم على رسول الله صلى الله عليه وسلم وهو يتوضأ فلم يرد عليه حتى فرغ من وضوئه فرد عليه ومد يده إليه فصافحه فقال: يا رسول الله ما كنت أرى هذا إلا من أخلاق الأعاجم؟ فقال رسول الله صلى الله عليه وسلم: " إن المسلمين إذا التقيا فتصافحا تحاتت ذنوبهما " ، وعن النبي صلى الله عليه وسلم قال: " إذا مر الرجل بالقوم فسلم عليهم فردوا عليه كان له عليهم فضل درجة لأنه ذكرهم السلام وإن لم يردوا عليه رد عليه ملأ خير منهم وأطيب. أو قال: وأفضل " ، والانحناء عند السلام منهي عنه. قال أنس رضي الله عنه: قلنا يا رسول الله أينحني بعضنا لبعض؟ قال: " لا " قال: فيقبل بعضنا بعضاً؟ قال: " لا " قال: فيصافح بعضنا بعضاً؟ قال: " نعم " ، والالتزام والتقبيل قد ورد به الخبر عند القدوم من السفر، وقال أبو ذر رضي الله عنه: ما لقيته صلى الله عليه وسلم إلا صافحني، وطلبني يوماً فلم أكن في البيت فلما أخبرت جئت وهو على سرير فالتزمني فكانت أجود وأجود. "

و اذا لقيت حاجة تانية تنفعنا هضيفها :)
وشكرا للاستاذ Saudi Romantic ان سمح لي بالاحتفاظ بالصور الخاصة بالحرم النبوي :)
جزاك الله خيرا :)
اللهم ارزقنا زيارته يااااااارب :)





الجمعة، 25 يوليو، 2008

سترك من الفضايح يارب :)


تم بحمد الله تعالي ملء استمارة تسجيل عنوان رسالة الماجستير ......
-
ايديكم معانا باه :(
-
يارب بس يوفقوا عليه :(
-

الله المستعان
-
يااااااااااااااااااااااااااااااااااااااااااااااااااااااااا رب
-
استرها و عديها علي خير ياااااااا رب :)
-
العنوان ايه باه :) بس من غير تريقة :)
-
القدرة التنافسية للحاصلات البستانية و دور الادارة اللوجستية في تحقيقها
( دراسة حالة علي محصول الفراولة )
-
منين و ازاي و امتي و مليون سؤال ولا اعرفلهم اجابة ... اتدبسنا واللي كان كان
-
حل من اتنين ... اعمل عبيطة.. و يبقوا سنتين و دي التالتة طاروا في الهوا :(
-
يا اما احط لساني داخل فمي في سكون ولا انطق و لا انبس ببنت شفتي :( ولا اقول آآآآه حتي و اشوف حل للتدبيسة دي باه :(
-
انا بقول تدبيسة علشان مكانش دا الاتفاق :(
-
انا دخلت الماجستير علي اساس هندرس المواد دي كلها و النجاح فيها بيخلينا نحصل علي الدرجة :(
-
الله يسامحهم باه غيروا كلامهم في النص وقالوا لازم رسالة :(
-
مع انها نهايتها معروفة .... الله يسامحهم :(
-
هتتحط علي رف اي مكتبه ولا هتترمي في درج و خلاص ولا كان في حد طلع عينه و عين اللي يعرفهم معاه فيها :(
-
وحسبي الله ونعم الوكيل :)
-
هونها يااااااااااا رب .. والهمني الصبر ..
-
ودلني يا اللهي اعمل ايه في الورطة دي و احلها ازاااااااااااااااااااااااااااااي :(
-
-
-
اللي هيعرف يساعد يشمر و يجي يشيل معانا :))


الأحد، 20 يوليو، 2008

ربـــي

يارب ما عصيتك استخفافاً بك ولا استهواناً

عميت كل عين لا تراك عليها رقيباً

صمتت اذناً لا تظن إنك فوقها سميعاً

غرتنى الدنيا ولى تزينت

وضعفت نفسى وسولت

غرنى سترك المرخى

فعصيتك بجهلى

فالآن من من عذابك ينقذنى ؟

وبحبل من اعتصم إن قطعت حبلك عنى

وااااااااه من الوقوف بين يديك غداً

يا قبيح فعلى ....... ويا عظيم جرمى

اللهم يا قدوس طهر قلبي ..

يا ربي ذنوبي كثيرة .. أبي ظهري ان يحملها ..

حاولت ان ارميها جانبا باستغفاري عنها ..

يا ربي ما زلت اذكرها .. ألم تغفرها لي!!

ألم اكن صادقة في التوبه ؟!!

حسبت اني صادقة مخلصة في التوبة ..

أبوء لك بذنبي .. أغفرت لي يا ربي ؟؟

اللهم اني اعوذ بك من شر قلبي ..

يا ربي ان كان قلبي يحمل ما يغضبك..

اللهم فانزع ما فيه الا حبك ..

رب إني ظلمت نفسي فأغفر لي .. فإنه لا يغفر الذنوب الا انت ..

السبت، 19 يوليو، 2008

روح و روح

ساعات تحس بحد اوووي لدرجة وانتو بينكو مسافات طوييييلة اوي تحس بوجعه من غير ما يقول اه ..
مرة من 7 سنين و شوية كنت برة البيت في شركة مع ناس كتير و كنا مشغولين بنعمل حاجة و فجاة بالصدفة لقيت السلسلة اللي لابساها مقطوعة من النص و يادوب ماسكة في رقبتي هتقع ..
انا قلبي وقع في رجلي و الي طالع عليا امي جرالها حاجة و فضلت اعيط كتير اوي .. حسيت امي جرالها حاجة ايه هي معرفش بس كنت مصدقة احساسي دا و مش عارفة منين ولا ليه ولا اي تفسير ليه اكتر من اني متاكده منه اوووووي ..
ايه حكاية السلسلة دي باه ...
كان فيها دلاليه كانت ماما اديتهالي لما نجحت في الثانوية العامة و كانت الماظ من القديم يعني ورث من جدة امي لامها لامي ورسيت لي :( ماما عندها اختها كانت حلق وضاع فردة منه فماما عملتها دلالية و اخدت هي الحلق الصغير و ادتني الدلالية :( كانت عزيزة عليها اوي علشان امي بتحب جدا جداااااااااااو كانت جدتي متوفيه بقالها فترة قريبة و يعز علي امي تفرط ف اي حاجة من بتاعت جدتي الله يرحمها :(
اليوم كان عادي جدا لحد ما اكتشفت ان السلسلة اتقطعت فجاة و ملقيتش الدلاية:( مكانش هاممني انها الماظ بقدر ما همني الفكرة اللي سيطرت عليا وهي ان امي حصلها حاجة اكيد :(
وقتها مكانش مع امي موبيل وانا عارفة انها في الشغل يومها فمكنتش هعرف اوصلها :(
لما روحت بليل دخلت البيت بقولها ماما انتي كويسة :( قالتلي الحمد لله قدر الله وما شاء فعل :( قلتلها حصل ايه يا ماما انا مش عايزاكي تزعلي مني علشان السلسلة اتقطعت و الدلالية ضاعت بس والله انا محستش باللي حصل دا بس حسيتك فيكي حاجة و خفت اسال عليكي :(
ماما فضلت بصالي و مكانتش بتتكلم لمدة ثواني :( قالتلي في ايه يا بنتي فهميني :( انهرت واعدت اعيط و حكيتلها اللي حصل :( لقيت الدموع في عنيها و قالتلي اسمعي اللي حصل وقت الظهر وقت ما بتقولي عرفتي موضوع السلسلة:(
كانت راكبة تاكسي رايحة لخالتي و في شارع النيل عند العجوزة علي النيل ,, اتوبيس زنق علي التاكسي و الاتوبيس كان ماشي بسرعه اوي دخل في الرصيف و لولا ستر ربنا كان وقع في النيل بعد ما خبط التاكسي وامي اتخبطت وهي قاعدة في التاكسي من ورا :(
لقيتها بتقولي ستر ربنا انقذنا من كارثة يومها و ان العربية متقلبتش كانت حادثة جامدة :( الحمد لله رب العالمين ان نجاها .. ربنا يحميها يارب ويخليها لينا ..
مش بس الحكاية دي اللي حصلت لي عن حاجة مرتبطة بحد .. حصلتلي كتييير اوي ..
خصوصا مع الناس اللي بحبها اوي .. قلبي بيكون متعلق بيهم و بحس بيهم لو بينا بلاد ..
معلش مناسبة الرغي دا ان ربنا عرفني حاجة علي حد شاغل قلبي و عقلي من غير ما اعرفها من الحد دا .. مكانتش حاجة تفرح بس عرفتني اني صادقة في احساسي ناحية الحد دا واني صح بحبه اووووووووووووي..
ربنا يحميه يارب ويخليه ليا و يرجعه بالسلامة ..
قولوا امين باه علشان يستاهل الدعوة دي اوووووووي :)

الخميس، 17 يوليو، 2008

اغلي امنية اتمنتها .. لسه وقتها مجاش

من 3 سنين في نص شهر ابريل .... رجعت ماما من الشغل في يوم وقالتلي عندها في الشغل فتحوا باب حجز لعمرة في شهر يونيو و كانت هتطير من الفرحة يومها :) علشان بقالها فترة مراحتش و كان نفسها تروح وكمان علشان العمرة دي كانت بالتقسيط المريح جدااااااااا.. انا طبعا سمعت الكلام و اتكتمت ولا فتحت بقي :( علشان عارفة اللي فيها و عارفة اني مش مسموحلي اروح علشان معنديش محرم :(


تاني يوم كانت ماما اخدت المقدم و راحت تشوف ايه اللي مطلوب من تجديد الباسبور و التطعيم و كل حاجة محتاجينها عملتها بسرعه جدااا علشان كانت يا حبيبتي فرحانة اوي انها هتروح بعد غيبة :)

انا زي ما كنت اتكتمت و مقدرتش انطق بحاجة .. هي طبعا كانت عارفة اني هموت واروح هنا :( بعدها بكام يوم قالتلي انها سالت عندها في الشغل ان كان ينفع اروح معاها ولالا .. في اللي قالها اه وفي اللي قالها لا ... قالت مش هنخسر حاجة .. كانها شالت من علي قلبي هموم الدنيا كلها .. فرحت اووووووووووووي وبقيت مش عارفة اعمل ايه ولا ايه .. اصلا هي قالتلي الكلام دا الظهر في التليفون ... قالتلي روحي جيبي استمارة علشان تعملي الباسبور .. بعت الساعي جابلي 2 من مكتب البريد تحت المكتب و مليتها و سالت عرفت ان في امكانية اني اروح المجمع اقدم الورق واجي اخد الباسبور تاني يوم .. نزلت وانا مروحة رحت المجمع و قدمت الورق و قالي تعالي بكرة خديه .. وانا راجعه عديت علي المصور واتصورت بخلفيه بيضا .. و روحت البيت وانا عايزة اسابق الزمن و بتمني افتح عنيا واغمضها الاقي ماما بتقولي خلاص هتيجي معايا :)

تاني يوم عملت فيلم استاذنت من مديري بعد عذاااااااااااب و بعد تقرير مفصل الساعتين اللي هنزلهم دول هروح فين و مع مين و هعمل ايه و ليه :( المهم نزلت رحت المجمع استلمت الباسبور .. لا يا ربي انا اتصورت يومها و تاني يوم رحت عملت الباسبور :( معلش كده التسلسل المنطقي :) معلش باه..

المهم جبت الباسبور و رحت اتطعمت في مكتب الصحة و جبت الوصل و اديت كل دا لماما .. فات يوم واتنين و تلاتة و اسبوع .. ها يا ماما في اخبار .. اصل الراجل مش لاقياه ... اصلهم قالوا ينفع الصحبة الصالحة .. اصل اصبري علشان متستعجليش علي رزقك:(

المهم فات وقت حسيت بمرور الوقت دا بالضيق من جوايا و مكنتش مبسوطة :( وفي واحدة زميلتي في الشغل لما عرفت اني بعمل الباسبور وقتها و بظبط الحاجات دي .. وف وشي كده جت قالتلي انتي طبعا مش هتطلعي .. مينفعش :(( وانا بتوجع من اللي بيقفل الحاجة في وشي كده .. يا ستي حتي لو دا حقيقي هيجرالك ايه يعني لو قلتي ان شاء الله تطلعي و ربنا ينولك اللي بتتمنيه :(

المهم اني فقدت الامل و قلت قدر الله وما شاء فعل و قعدت ايام كتيرة اعيط و اقوله يا ربي لو مش عايزني انا مش عارفة انا عملت ايه وحش اوي كده علشان تردني:( ولو وحشة اوي كده انت بتقبل اللي بيجيلك و عايز رضاك ونفسه ينوله :((

المهم امي كتمت علي الموضوع و مبقتش تتكلم قدامي في الموضوع دا و كل اما بسالها بتقولي اهو ان شاء الله تتحل..

لحد ما جت في مرة سمعتها بتكلم حد في التليفون و بتقول ان المسئول عندها في الشغل بعت لشركة السياحة الباسبورتات كلها ماعدا بتاعي :( فهمت اللي فيها و سكت متكلمتش خصوصا و انا سامعه بتقول انا عارفة انها نفسها تروح بس انا مش عارفة اعملها ايه بس:( صعبت عليا امي انها محتارة و انا مكنتش عايزة انكد عليها فرحتها .. انعزلت شوية كده و مبقتش بفتح الموضوع دا

مرة روحت ملقيتش ماما في البيت و استغربت انا برجع متاخر و ماما بالكتير بتكون 4 في البيت .. راحت فين .. رجعت بليل افتكرتها كانت عند اخويا مسالتهاش علي حاجة بس سمعاها بتقول رحت السفارة .. وانا كنت قررت اقفل الموضوع دا علشان منكدش عليها .. و كتمت الالم جوايا ومحدش كان يعرف حاجة عني زعلي دا ..

وجه الميعاد اللي هتسافر فيه امي .. رحت وصلتها مع اخويا و انا راجعه اتفتحت في العياط طول السكة و كان ابن اخويا عنده كام شهر و انا كان المفروض هقضي المدة دي عندهم .. بس اخدت يومين اجازة و رحت لبنت خالي اسكندرية ... لما رحت هناك لقيتها بتقولي انتي متعرفيش امك عملت ايه علشان تروحي .. وكانت مسافرة زعلانة علشان حاسة انك جواكي زعلانة و نفسك تروحي :(

حكيتلي كان ايه حكاية السفارة دي .. اتاري امي الله يكرمها يارب دنيا و اخرة ,, راحت سفارة السعودية ويا حبيبتي حاولت تقابل اي حد هناك وتحاول تحل المشكلة دي و تلاقي حل علشان اسافر معاها .. ولما غلبت و ملقيتش في فايدة .. قامت كتبت جواب كبير للملك فهد الله يرحمه و بعتت واحد من عندها في الشغل يبعت الجواب دا تلغرافيا باسم الملك فهد ... والله ما عارفة اقول احساسي ساعتها .... علي طيبتها و حنيتها و لا علي انها حاولت علي اد ما هي قادرة و هي عارفة انها سكة مسدودة و انه مينفعش .. ربنا يجازيها عني خيرا يارب :)

انا بحكي و دموعي نازلة حاسة اني عايشة الموقف دا زي ما هو دلوقتي :( يلا الحمد لله علي كل حال .. سافرت ماما و رجعت بالسلامة الحمد لله .. بعدها وقعت انا في مشكلة كبيرة في الفترة دي و لمدة شهور ..

جينا للسنة اللي بعدها .. معرفتش تسافر وقتها علشان كانت تعبانة :( السنة اللي فاتت باه حصلت حاجة تانية ...

انا في يوم في شهر 7 اللي فات .. صحيت من النوم علي حلم شفته .. حلمت اني في مكان واسع انا و ماما واقفه قدامي وانا قاعدة و الارض لونها ابيض وانا من جواايا حاسة ان دي عمرة و ماما واقفه قدامي وبقولها روحي انتي انا دايخة و برفع صباعي وبلفه كده علي اني داخية .. صحيت من النوم قلت ربنا يجعله خير ان شاء الله ..

علي المغرب لقيت ماما واقفة قدام باب الاوضة عندي بتقولي .. انا مش عايزاكي تزعلي .. بس عملوا عمرة عندنا في اول رمضان ان شاء الله و انا قدمت من يومين .. مكنتش عارفة اقولك ازاي علشان عارفة انك هتزعلي ... انا بلمت و حسيت بالدنيا بتلف بيا .. منطقتش حرف واحد .. اصابتني صدمة اسكتتني ... قالت بعدهم كلمتين وانا ساكته بردة و سابتني و مشيت .. يمكن تكون فهمت اني زعلانة علشان كده مقلتلهاش حاجة ..

لما مشيت ماما اترميت علي السرير و قعدت اعيط بحرقة اوي وانا بقولها انتي مقلتليش يا ماما بس ربنا قالي .. ومليش فيها نصيب ... امر ربنا كده .. ومقدرش اقول الا الحمد لله .. مقدرتش اقولها علي الرؤية دي و لا نطقت لحد الا بعد فترة .. بنت خالي بتكلمني في التليفون لما نزلت مصر اجازة .. بتقولي طنط ان شاء الله لما هتروح هتدعيلك تروحي المرة الجاية معاها ان شاء الله .. قلتلها لسه ربنا مش رايدهالي ... انا خبطت علي الباب كتير ولسه ربنا مش رايد انه يفتحلي .. الحمد لله علي كل حال ..

نسيت اقول ان ما بين ما قالتلي علي العمرة دي و بين مكالمة بنت خالي دي .. اكتر من حد قالي ممكن نحاول نشوف حد اسمه قريب من اسمك و تطلعي .. قلتلهم يعني اروح اغسل ذنوبي بذنب؟؟ و رفضت الفكرة وانا من جوايا بتقطع و ربنا يعلم بحالي.. الحمد لله رب العالمين


وسافرت ماما الحمد لله رمضان اللي فات .. و رجعت بالسلامة و انبسطت جدااااا الحمد لله :) ربنا يتقبل منها صالح اعمالها يارب .. طبعا دعتلي اروح معاها المرة الجاية :)

اااااااااااااه وادي المرة الجاية جت خلاص ... من يومين راحت امي تدفع فلوس العمرة بتاعت رمضان اللي جاي ان شاء الله .. ربنا يقويها يارب ويديها الصحة و العافيه و يتقبل منها صالح اعمالها ياااااااااااااارب ويزيدها ..

محدش يسالني عن اللي عايزاه دلوقتي .. انا بسمع الكلام في الموضوع دا لو هي بتحكي لحد وانا من جوايا حاسة اني بموت من جوايا .. استغفر الله العظيم .. مرات كتيرة بكلم ربنا بقوله ياربي انت تعلم انا نفسي اروح ليه و تعلم ما في نفسي و ان كنت اذنبت ذنوب وحشة اوي كده تحجب استجابة دعائي .. دلني اعمل ايه علشان ترضي عليا ..............

الحمد لله علي كل حال ..

يارب تروحي يا امي و ترجعي بالسلامة

بس السلام امانة لرسول الله :'(

الأربعاء، 16 يوليو، 2008

اول حب ف حياتي:)

كنت ناوية احكيها دي اول ما كتبت المدونة او بالتحديد بعد ما حكيت حكاية الكتكوت :( بس اصلي كنت سمعت تريقة كده من ناس بحبها :) بس مش مشكلة يعني التقيل ورا اما نشوف دي هيعملوا فيا ايه فيها :) مش بتأثر انا بالحاجات دي :))

انا فاكرة اليوم دا كويس اوي كنت حوالي 7 سنين يومها ابويا كان مسافر برة والمفروض كان السفر دا كام سنة .. كان بقاله شهرين برة مثلا .. مش فاكرة دي:)

المهم رحت لماما باه قلتلها عايزة اجيب ارنب .. كنت ف تانية ابتدائي وقتها .. قالتلي ليه ومش ليه و عياط و محايلة و زن .. قالتلي ومين هينضفله و ياكله وووو .. المهم قللتلها انا هعمل كل حاجة و مش عايزة حد يساعدني وانا هتصرف .. وبما ان امي حبيبتي حنينة و قلبها ابيض و طيبة و بتقتنع بكلمتين كده :) قالتلي طيب

اخدت كيس الفلوس ( كان وقتها مفيش لا محفظة و لا غيره ولا كان حيلتي فلوس من اساسه:) ) المهم كان في زمان قريب من البيت محل فيه واحدة ست بتبيع فراخ و حمام و ارانب ..

رحتلها قلتلها عايزة ارنب .. قالتلي اد اهي قلتلها مش عارفة انا عايزة ارنب شكله حلو :) واديتها 3 جنية و ربع يومها و اديتلي ارنب جميييييييييييييييييييييييييييييييييييييييييييييييييييييييييييييييييييل اووووووووووووووي لونه ابيض و عيونه لونها عسلي و كان زي القمر :) حطيتهولي في كيس لونه اصفر .. وانا اصلا جبانة موووووووووت ولحد النهاردة بخاف من اي حاجة بتتحرك و بلاقي قلبي وجع في رجلي حتي الدبانة بكرههاا علشان بتتحرك :(

المهم اخدته و طلعت البيت .. ماما بتقولي هتحطيه فين دا باه و كده .. المهم انا بلمت و لقيتها جابت كرتونة كبيرة بتاعت تليفزيون و قالتلي دا في البلكونة و انتي اللي هتنضفي مكانه .. قلتلها عنيا بس المهم انه جه:)

من لحظتها وانا وقعت في غرامه ... حبيته اووووووووووي و بقي هو صديقي الوحيد :) كنت بروح المدرسة الصبح علي عيني طبعا مش عايزة اسيبه .. كنت بنزل من البيت بعد ما الباس بتاع المدرسة يجي :) علشان مضيعش اي لحظة بعيدة عنه .. انا اصلا مكنتش بمسكه بايدي .. بس بقعد اتفرج عليه بالساعات .. وهو بياكل و هو نايم في الكورنر وهو ممدد نفسه كده .. احلي منظر في الدنيا .. كان حبيبي اوي ..


كنت ارجع من المدرسة وهو في البلكونة في الصندوق الاقيه ممدد تحت سرير اخويا (نسيت اقول انه قعد يقرقض في الكرتونة من جنب ورا كده مكانش باين لحد ما عمل فتحة و بقي يخرج .. ارجع الاقيه في البلكونة بيتمشي:) و لما بسيب الشيش متشنكل برجع الاقيه ممدد تحت سرير اخويا بما انه الاقرب للبلكونة :) ) طبعا مفيش داعي اقول ومش محتاجة نباهه ان ماما و اخويا اللي كانوا بينضفوا مكانه :)) انا كل اللي عليا اني اجيبله الخس والجزر :) واقعد امسكله الاكل و هو ياكل من ايدي .. كانت اسعد ايام حياتي والارنب دا اغلي اغلي اغلي حاجة حصلتلي ف حياتي لسنين طويلة يمكن عمري كله لحد دلوقتي .. ( بس طبعا في كام حاجة في النص يعني نعم ربنا كتيرة عليا الحمد لله )

قضيت احلي شهرين في حياتي معاه .. و كانت وقعته كاروهات اللي يجي و يحاول يمسكه من ودااااااااااااااااااااااااااااانه :(( كنت بفضل اعيط لما بتفلق من العياط عليه .. بقوله هو انت ترضي يعني حد يشيلك من ودانك ويعذبك كده:( ترضي حد يعمل فيك كده :( لو ترضي لنفسك ابقي ارضاها للارنب انما انا لا :(( ... وحشني اووووووووووووي ..

لحد ما ابويا رجع من السفر فجاة و الشغل اللي كان فيه دا خلص فجاة:(( و انتهت احلامي مع الارنب و اتدمرت :(( بابا اصدر فرمان مفيش الكلام دا والارنب لازم يمشي
ااااااااااااااه نسيت اقولكم

قبل ما بابا يرجع باسبوع ماما قالتلي ان الارنب دا ولد و انه المفروض يتجوز :) وانا كنت عبيطة باه ومسالتش اساسا لما جبته دا ولد ولا بنت .. رحت تااااااااااااااني للست بتاعت الفراخ قلتلها عايزة ارنبه .. وانا مكنتش مبسوطة بصراحة يعني مكنتش عايزة حد يشاركني في الارنب بتاعي :( بس اديتلي حاجة مأرأرة كده صغنننه اوي
ارنبة صغيرة كده اوي و عنيها لونها احمر .. انا اعتبرتها شريرة يومها و من يومها مكنتش بحبها معرفش ليه او عادية بالنسبة لي يعني مش مميزة .. يلا ما علينا ...

المهم بابا قال الحاجات دي متقعدش في البيت:(( وانا مش مهم ..

اخدهم حد قريبنا :( مرتاحوش عنده وانا كنت هموووووووووت ساعتها :( خلعوا قلبي وروحي مني واخدوهم ومحدش فكر في حالي وقتها :( كنا في رمضان ... بعد كام يوم قرروا يودوهم عند الشغالة اللي عند جدتي .. كانوا عايشين وعندهم شوية انواع مختلفة من الحيوانات معيز و بط و وز و حمام ( قلت عليه انا لما حكيت علي الكتكوت الله يرحمه:( ) و عندهم ارانب :(

انا حزنت حزن كبير اوي وقتها بس قلت علي الاقل هروح لجدتي اشوفه من البلكونة وهو بيلعب تحت :( لقيت ماما بعدها بيومين بتقولي الارنب بتاعك عياااااااااااااااااااااااااااان :(( قعدت اعيط عليه وانا بقولها طيب ماله اعمله ايه علشان يخف مين اللي زعله ومين اللي عياه :((

المهم وقتها فهمت ان بطنه وجعاه حتي فاكرة يومها دخلت المطبخ لقيت الحاجة اللي لونها مووف دي موجودة والشغاله ايدها فيها من اللون دا ... ماما قالتلي ان دا دوا و هي حطته علي بطن الارنب علشان يخف:(

تاني يوم قالولي لا لازم يتدبح والا هيموت :(( هو كده كده هيموت ولازم منسيبهوش يتعذب اكتر من كده :(( مفيش داعي باه لوصف حالتي وقتها ........... وجعوني كلهم اووووووووووي دبحوه و اكلوووووووووه وقدامي :((

انا سنين لحد يمكن من سنتين كل اما اشوف صورة قرب شبهه بعيط و بفتكره و كان زمان كل اللي بيحبني يجيبلي ارنب لعبه و كل الناس عارفة اني بحب ارنب:) يمكن من سنتين تخطيت الحزن دا شوية و بقيت بس بفتكره بالخير و مش بعيط عليه ... وفي اللي بيعترض عليا لما بقول الله يرحمه:( ربنا يرحمه ويرحمنا و يرحم المسلمين اجمعين

كنت مرة سمعت زمان مش فاكرة فين ولا قريتها مش فاكرة .. ان الانسان بيكون بيحب حيوان معين و بيكون فيه صفات قريبه منه

من كام سنة اتكررت قدامي نفس المعلومة مع كام مثال من ضمنهم الارنب :( قالوا انه جبان و خواف واللي بيحبه بيكون بيهرب و بيخاف و بيجري من المواجهه :( بس انا مش كده و بحب الارنب :( الله اعلم مدي صحتها و مدي انطباق الكلام دا عليا بس انا مش جبانة ولا بخاف من المواجهه .. بالعكس ساعات بروحلها انا قبل ما بتجيلي ولو اني بحاول اتجنب ان يكون في مشكلة اساسا علشان يجي وراها مواجهه..

الله المستعان والحمد لله علي كل حال

الثلاثاء، 15 يوليو، 2008

حل الواجب ..

أذكر أسم من طلب منك حل هذا الواجب.
أذكر القوانين المتعلقه بهذا الواجب.عباره عن اسئلة هذا الواجب المكتوبه باللون الأحمر , خمسة قوانين تحدث عن ستة اسرار قد لا يكتشفها من يقابلك لأول مره.
حول هذا الواجب الي ستة مدونين وأذكر أسماءهم مع روابط مدوناتهم
اتمني اكون فهمت شرحك صح :)
من طلب مني حل هذا الواجب : الاستاذ : احمد ahmed_k
غالبا الواجب اني اجيب عن الاتي :-
اذكر 6 اسرار قد لا يكتشفها من يقابلك لاول مرة !!
دي شغلانة بس بما انك حددت حجات في مقابلة يعني هحاول اجاوب والله المستعان
1- لاول وهلة اللي يشوفني يفتكرني هادية .. بس انا برج الثور يعني هادية اوك شوية نوعا ما بس شوية صغيرين يعني مش دايما و خصوصا لو في مكان معرفش اللي فيه مش هتكلم خالص بس لحد ما حد يستفزني :)
هتلاقي الثور اشتغل معايا ... عندي في الشغل واحدة زميلتي مرة واقفة مع واحد زميلنا ,, بيقولها علي دي هادية و عمري ما سمعتلها صوت دايما في حالها و شغلها... قالتله هي هادية و لطيفة وكل حاجة بس لحد ما حاجة تعصبها ساعتها مش بتشوف قدامها و لما بتتزرزر بتهب في اللي عملها حاجة ... اه انا كده مهو يعني الشغل شغل اسيب حد يبوظلي شغلي يعني ولا ابقي غلطانة يعني ... وبعدين مش بحب حد يستفزني عمدا ..
2- تاني حاجة اني عيلة جدااااااااااا و بحب الاطفال اووووي و عندي استعداد لتقبل اي تصرف مفاجيء من اي حد منهم مهما كانت درجته ايه و بعرف اتعامل معاهم كويس الحمد لله الي حد ما ... بس لو الطفل دا عندي زي الباشا سليم ابن اخويا ابو 4 سنين دا .. بيبقي عند بعند باه .. علي راي ابوه لما بيقوله ملقيتش حاجة عدله تاخدها من عمتك الا عندها يعني :) تخيل باه لما حد عمره 28 يعند مع حد عمره 4 سنين .. بس بردة هو حبيبي و نور عيني ..بس هو دمااااااااغ والللي اعند منه كمان الباشا سيف الصغير 2 سنة .. دا باه مفيش فرصة اعند معاه علشان معندوش تفاهم بيتصرف لوحده يعني ... بلاش فضايح باه :)
3- اني بتكلم بصوت عالي .. بكلم نفسي يعني :) بس اللي يعرفني اخد علي كده خلاص .. حتي عندي في الشغل ساعات حد يبقي معدي قدام المكتب ووقف بالصدفة يقولي بتكلميني ممكن مردش لاني اساسا ببقي مشغولة بعمل حاجة .. بس لو انتبهت لانه بيكلمني بقوله لا انا بكلم نفسي :) طب اعمل ايه طيب بسلي روحي ما انا ببقي قاعدة لوحدي طول اليوم .. بفتكر مع نفسي عليا ايه و خلصت ايه وايه فاضل:) مش جنان والله انا لحد دلوقتي عاقلة شوية لسه :)
4- اني بحب اهلي جداااااااا مهما بان عليا اني مش كده او اني بحب ابعد وابقي لوحدي بس انا بحبهم اوي و بيبقي نفسهم اعملهم اي حاجة علشان يكونوا سعدا .. لا مش بس اهلي .. اي حد بحبه قريب او غريب .. علي فكرة كمان كلمة بحب حد دي مش لازم حب حب من بتاع الافلام .. انا بقولها علي اي حد برتاحله او شايفاه كويس .. اصلي معنديش رمادي :) الالوان ف عنيا يا ابيض يا اسود ... اللي في النص دا مش بشوفه.
5- عبيطة و بعيط من اقل حاجة .. لو مفرحة او مبكية .. طالما اتاثرت بيها .. دا حتي ساعات لو شفت حد بيعيط بعيط علي عياطه :( دا ساعات ابقي مروحة من الشغل .. تعدي جنبي عربية اسعاف ادعي للمريض فيها :( ولا تعدي عربية فيها عريس وعروسة تلاقيني بدعيلهم ربنا يباركلهم :) مش عارفة بس انا بفرح لفرحة الناس اوي وبزعل لما حد بيكون زعلان :( سليم ابن اخويا العادي انه بيندهلي باسمي يعني الاول كان ملخبط بس طبعا دلوقتي بيقوله عادي واضح الحمد لله بس من كام شهر كده كانت ماماته بتعلمه كل حد يقربله ايه ... كله كوم و يوم ما بتقوله عليا هي تقربلك ايه .. قالها عمتي .. انا سمعت عمتي دي و حسيت قلبي اتنفبض من حلاوة الكلمة اللي طالعه منه .. طبعا دموعي نزلت انهارا و سيولا :) بس فرحت بيها اوووي
6- بحاول ادور علي اسرار بس صعبة اوي بجد دي اصل تقريبا مش بخبي حاجة تتسمي سر يعني :)
اه افتكرت حاجة .. مش بحب حد يتدخل في خصوصياتي او احس ان حد عايز يعرف حاجة انا مش عايزة اعرفهاله .. مش بحب التطفل :) انا طبيعي بقول كل حاجة .. يعني الحاجة اللي انا مش بقولها ابقي مش عايزة اقولها و مبحبش الزن والالحاح علشان دي من الحاجات اللي بتخليني ابقي مستفزة من الشخص اللي بيعمل كده و ساعات بعمل عكس الحاجة اللي هو عايزها من استفزازي منه بعند معاه .. العند دا حاجة سخيفة جدا انا عارفة بس اعمل ايه باه .. قدررررر :)
اظن اني كده عملت الواجب نوعا ما .. او اتمني اكون فهمت صح
وياريت تعفيني من عملية التحويل دي لاني اساسا معرفش 6 مدونين اصلا .. انا بالكتير بدخل علي مدونتين تلاتة بالكتير الللي بيعجبني اللي بيدون فيهم .. انما لو دخلت اي مكان تاني بيكون تصفح مش اكتر ..
اتمني مكونش لخبطت ف حاجة :)

فكرة ورا فكرة

امبارح بالصدفة شفت كلمتين كده عن الام احرجوني بصراحة

مش علشان انا بعمل حاجة وحشة مع امي بس علشان ..........كده يعني مش عارفة باه ... اهو حسيت اني وحشة و خلاص:(

فكرت اكلمها بس قلت هتقولي مش بعادة يعني ويمكن تقلق .. وانا امي بتتخض بسرعه فقلت بلاش.. بس كنت عايزة اكلمها بردة :(

مفيش ساعه لقيتها هي بتتكلم تقولي علي حاجة وانا هتروح معايا مشوار كنت رايحاه

المهم يشاء ربنا اننا نروح و انها تقضي ساعتين و هي مبسوطة و في الاخر واحنا راجعين بليل لقيتها بتقولي ربنا يخليكي ويديكي الصحة ... حسيت بجد مفيش حاجة ممكن تعوض قدام الكلمتين دول .. انا حاولت اعمل اللي اقدر عليه في الوقت دا علشان تقضيهم وهي مبسوطة ..

هي هي نفس المشكلة او الماساه بتاعت اني مش بعرف اقول لحد اني بحبه :(

والله انا بحب امي دي جدا بس مش عارفة اوصل لحل في اني اعرف اعبر قولا عن الموضوع دا .. فعليا انا نوعا ما راضية شوية .. صحيح طبعا مقصرة في معظم الاوقات بس بحاول اعوض علي اد ما بقدر بس قولا دي باه ماساه :( لا هي ولا غيرها بصراحة :(

ساعات بتمني كان خالي الله يرحمه يكون لسه عايش علشان اقوله اني بحبه اوي .. كان نفسي يعرف اني بحبه .. بس ساعات بقول لنفسي غالبا هو عارف علشان انا بحلم بيه علي فترات و بفرح اوي لما بشوفه في الحلم علشان بحسها بشرة خير من ربنا لاني احسبه علي خير الله يرحمه ويجعل الفردوس الاعلي سكنه بجوار المصطفي صلي الله عليه وسلم :)

عندي ناس طيبين اوي توفاهم الله و سابونا في الدنيا دي واللي باقيين فيها كتير منهم مش طيبين :( انا عارفها انها ارادة ربنا و دا قضائه بس لما بفتكر اني كان لازم اتصرف معاهم تصرفات احسن من اللي كنت بعملها و اودهم اكتر من كده بكتير اوي علي اد ما عرفت اني بحبهم اضعاف ما كنت فاكره:(

بردة دي كمان اكيد ليها حكمة .. اللي فكرني بدا زيارة عملتها امبارح لبيت حد عزيز عليا .. و حال البيت و الام والاب فيه و حاله لما توفاهم الله و سابوا ولادهم .. البيت كانه مهجور كل واحد ف حاله.. كل حاجة مختلفة في البيت مع انه هو هو نفس البيت متغيرتش فيه حاجة ابدا اقصد في مظهره .. بس الروح اللي فيه راحت و النور اتطفي و كانه مهجور مع انه فيه ناس عايشين هناك بس مهجور فعلا ..
الاسوء باه فعلا لما يكون البيت دا مكانش بيخلو من البشر داخلين خارجين وفجاة لما الاب والام مبقوش موجودين .. راحوا وراح معاهم الناس ... ولا كأن في ناس كانوا بيجوا في المكان دا.. حتي اقرب البشر الاخوات من الناحيتين بعدوا ولا كان ليهم اخوات كانوا عايشين هنا وليهم لحم ودم لسه موجودين ف نفس المكان اللي ياما جمعهم سوا و شاف فرحهم و دايما كان فرح ... انا قلت الطيبين كتير منهم راحوا وبيروحوا ورا بعضهم:(

اللهم يرحم امواتنا واموات المسلمين ..

مش قصدي انكد علي روحي او علي اللي هيقرا الكلام بس انا افتكرت حاجة جرت حاجة تانية .. معلش باه :)

وعلي الرغم من كل دا فرحانة علشان بردة في ناس كويسة لسه في الحياة:) مع ندرتهم بس في ناس لسه كويسة .... لا و الاحلي كمان ان في ناس نادرة الوجود في الدنيا :) ربنا يخليهم ليه ياااااااااااااااااااااااااااااااااااااااااااااااااااااااارب وميحرمنيش منهم :)

ربنا يديمها نعمه يارب ويديم علينا رضاه :) ويخليلنا الناس اللي بنحبها ويقدرنا اننا نعرفهم اد ايه احنا بنحبهم :)

الأحد، 13 يوليو، 2008

من زرع حصد

بمناسبة تدبيسي في الزراعة

انا علي فكرة كنت بتريق مع امي :( اكمنها مهندسة زراعية و كنت بقول لامي ( بهزار طبعا هي علي راسي ) دي كلية فلاحة .. المهم انا قلت قبل كده اني لبست في الشغل في شركة زراعية لا و كمان بقالي سنتين ودخلت ف التالتة اهو وبعمل ماجستير في الزراعة او تحديدا يعني في لوجستيات تصدير الحاصلات الزراعية و دي حدوتة كبيرة كده ملهاش لازمة دلوقتي ( مش طالبة افتكر و انكد علي روحي و خصوصا اني قربت اخلص الدراسة و المفروض اكون شغالة ف الرسالة من 6 شهور وانا لحد دلوقتي ولا عملت الطلب بتاع العنوان والموافقة عليه اصلا ... بلاش السيرة الغم دي باه:( خلينا في العنوان )

من ساعة ما ابتديت اكبر كده و اعي الحياة من حوليا و بقيت ما بقيت يعني اللي هو انا دلوقتي وانا كان من زرع حصد دا جملة بتتقال في الفيلم ولا في كتاب القراءة في ابتدائي و خلاص

بس من قريب يعني سنتين ولا تلاتة كده ابتديت احس بيها بشكل تاني خالص .. مش فاكرة السبب ايه بس كان لازم الاقي حل لحالي و الاقي مبرر لحاجات كتيرة بتحصل حوليا .. و مش بتفلسف ولا بخترع

انا لقيت الجملة دي ادق حاجة في الدنيا تصف الواقع المرير .. حقيقي من زرع حصد

بس المصيبة نفسها هي البذرة اللي حطها في الارض........

اللي بيزرع خير اكيد اكيد مش هيحصد الا الخير و اللي بيزرع شر اكيد مش هيلاقي الا الشر

بس تصدقوا ان ساعات الارض مش بتفهم البذرة صح.. يعني زي ما تقولوا كده لو حطيت بذرة علشان تطلع خوخ مثلا و لما كبرت الشجرة لقيتها طارحة ليمون حامض

بقول كده لسبب ..

ممكن اب و ام يحطوا البذرة في الارض صح .. بس مع الوقت و شوية عوامل طبيعيه خارجية كده بتعدي علي الارض دي هتلاقي البذرة دي اتحولت بقدرة قادر لحاجة تانية .. مش بيقولوا يخلق من ظهر العالم فاسد و من ظهر الفاسد عالم..

دا العادي يعني اللي بيحصل .. مش شرط كل اللي يزرعه الاهل في الابناء بيطرح فيهم .. او ساعات بيكون كامن لحد ما تيجي حاجة تخليه يطلع برة ..

المصيبة باه في اللي بيشذ عن القاعدة دي ... اللي يكون عارف البذرة بتاعته اصلها ايه و عارف ان البذرة دي متراعيه ازاي و مر عليها ايه من العوامل الخارجية و يبقي هو عايز يشذ لوحده بعيد عن الارض دي ..

ساعات بقعد اتامل الجملة دي ........ من زرع حصد ... لو حد زرع قسوة في قلب حد ايه اللي في الدنيا ممكن يحول القسوة دي لحنية و حب؟؟ ( بعيدا عن محاولة ايجادها علشان خاطر ربنا وبس) يعني منين تتجاب الحنية ان كان اللي اتزرع كله قسوة و جفاف؟؟

الكلام هرب مني علي فكرة انا كنت بحاول اتكلم ف حاجة في بالي بس دلوقتي مش عارفة اترجمها لحروف ..

اعرف اكس من الناس مش بلاقيله جوايا الا ذكريات مؤلمة او حاجات تضايق و مازالت يعني الحد دا مازال متواجد بنفس الصورة هي هي ان مكانتش بتزداد سوء

ساعات اقول يمكن ابتلاء وملهاش حل غير اني استحمل واحتسب اجري علي الله يمكن يجي يوم و ربنا يأذن بحل من عنده .. ساعات بفكر اثور و احاول اوقف المأساة دي والاقيلها حل نهائي مهما كانت النتائج بس برجع و اقول الابتلاء علي قدر الاحتمال و يمكن لو مكانتش الحاجة دي هي الي وحشة ف حياتي يمكن كان ربنا بعتلي حاجة اسوء من كده .. يعني احمدي ربنا انها جاية علي اد كده و اهي الدنيا ماشية كده و لا كده و مش هتقف عليا ان كنت فرحانة ولا زعلانة .. و ساعات باه ولاد الحلال بيسخوها من برة .. بس اهو ربنا بيسترها قبل ما تهور واعمل حاجة مش المفروض تتعمل .. هما شايفينها سلبية ( الكلمة دي عاملة زي الحبل اللي بيخنق فيا شوية شوية و زي ما يكون حد ماسك طرف الحبل دا و مصر يضيق الحبل حولين رقبتي كل شوية:( ) مش لازم علشان ابقي ايجابية اتصرف تصرف مش المفروض اعمله .. انا علي الرغم من اني كتير بحس اني مخنوقة من التصرفات دي و ببقي مش طايقة نفسي و نفسي اعمل اي حاجة تخلصني من المشكلة دي مهما كانت العواقب ايه بس برجع واقول اكيد ربنا هيفرجها و تتحل بدون الحاجة لحل بمشكلة بمشكلة اكبر منها ..

وبالرغم من الكلام دا مش عاجبني تصرفي بردة مش علشان بيتقال عليا سلبية او حتي علشان المشكلة دي اللي ملهاش حل علي الاقل لحد دلوقتي ... المشكلة اني مش عارفة الاقيلها حل غير المثل اللي بيقول شيل دا من دا يرتاح دا عن دا .. بس مع الاسف مش نافع المثل دا في الوقت الحاضر.. بس مسيرة يحصل ( بحاول اتخذ احتياطي انه ممكن يحصل في اي وقت ويمكن دا موترني معظم الوقت علشان مش عايزاه يحصل بس عارفة انه هيجي عليا وقت في يوم ما في سنة ما واعمله وربنا يسترها من عواقب المشكلة دي)

انا عارفة اني برغي حولين المشكلة يمكن مش عارفة اقول هي ايه المشكلة اساسا ,, انا عارفاها بس طرحها في حد ذاته غباوة مني ,,

طب والله في نماذج زي الفل :) فكرتوني ببنت خالي الله يرحمه يارب و يحسن اليه .. انا كنت بحبه اوي و زاد الحب في اواخر حياته الله يغفر له و ينعمه في جنات النعيم .. بنت خالي دي علشان الارض بتاعتها طيبة و اللي كان بيراعي البذرة كان بيتقي الله في زرعته .. طلعت كده .. تقولك انا ابر اهلي فرد فرد حتي اللي يعتبر بعيد بس كفاية ان ابويا كان بيحب فلان علشان احبه .. كفاية ان امي كانت علي علاقة بالحاجة فلانة علشان افتكرها بالدعاء والزيارة .. الله يباركلها يارب دنيا و اخرة

عارفة ان الخير موجود و الناس الطيبة موجودة و لله الحمد بس بردة ملقيتش حل لمشكلتي ... ا ه نسيت اقول ان الحل المؤقت او هو مش حل يعني هو التطور الطبيعي للحال اني اصبحت بتجنب الشخص دا لدرجة لو بيتكلم معايا مش بقدر ابص في عنيه و يمكن حتي بطلت ابصله اصلا .. مش كره والله بالعكس انا صعبان عليا الشخص دا جدا و بتمني من ربنا احساسي بيه يبقي غير كده بس فشلت والله وحاولت كتير و بحاول بس اي محاولة للقرب بيجي وراها بعد اسوء من اللي قبله..

شوية كلام لا ليه علاقة ببعضه ولا يهم حد اساسا ولا انا ارتحت لما كتبته:( بس انا نفسي الناس تخاف علي زرعتها و تعرف ان الزرعه دي بتحس بكل حاجة بالفرح والحزن باللي مهتم من اللي مهملها باللي عايزها من اللي مش عايزها .. دي الزرع في الحقيقة ما بالك باه باللي بيزرع في انسان سواء قريب او غريب..

في ناس تقابلهم مرة واحدة في حياتك او مرات قليلة بس يسيبوا جواك حجات تفضل معاك العمر كله سواء حلوة او وحشة الاتنين وارد حدوثهم و بيسيبوا اثر جوا الانسان مهما حاول يبعدهم يمكن ينزلوا في بئر التفاعلات جوه عقولنا و يبقي مجرد ذكري بس موجودة يعني لو نكشت عليها شوية هتطلع تاني ..

ربنا يلطف بينا .. انا عن نفسي مش عايزة اسيب حاجة عند حد الا لو كانت حاجة كويسة ولو اني اشك ان يطلع مني حاجة زي دي .. يبقي علي الاقل ادعي ربنا مسيبش حاجة وحشة ف قلب حد:(

الله المستعان كفاية كلام فاضي لحد كده.

الأربعاء، 9 يوليو، 2008

يــــــــــــــــــــــــــــــــــــــــــــــــا رب

يــــــــــــــــــــــا رب
يــــــــــــــــــــــا رب
يــــــــــــــــــــــا رب
يــــــــــــــــــــــا رب
يــــــــــــــــــــــا رب
يــــــــــــــــــــــا رب

يارب يارب انا مليش غيرك ومحدش يعرف اللي بيا الا انت
ان كان خير فهو منك يا كريم وان كان شر فمن نفسي انا عارفة

يااااااااارب اجبر بخاطري المرة دي كمان

ساعات بتحصل حاجة صعبة علي نفسي لما تحصل وعارفة ان الثواب الصبر علي المصيبة ف اولها ,,, قعدت اقول الحمد لله كتير و قلت يااااااااااارب كتير اوي .. انا مش معترضة علي اللي هيحصل بس مش قادرة اقول اني راضية بستغفر ربنا وبقول ياااااااارب خليني راضية انا عارفة والله ان كل اللي بيحصلنا دا فيه خير حتي لو مش عارفين ولا شايفين السبب فيه .. غصب عني مش قادرة اوصل للرضا دا

كان نفسي لما يحصلي حاجة اعتبرها محصلتش واقول الحمد لله عن حق و من جوايا ساكت ومحسش باي الم ... بس لقيت نفسي بقولها بقلبي و بلساني الحمد لله وبردة جوايا ألم مع كل دا ..

مش ألم علشان معترضة ومش عاجبني اللي حاصل .. بس انا عارفة اني شوية و هعرف اسيطر علي الموقف و هجبر نفسي ترضي عاجبها ولا مش عاجبها هترضي علشان دا احسن حاجة ممكن تحصل وطالما ربنا اذن بيها تحصل تبقي هي كده كويسة ولازم اصدق دا واقتنع بيه ومش مسمعش مني ولا نفس تاني:(

الثلاثاء، 8 يوليو، 2008

الرفـــــــــــق

انا مكناش ف نيتي اي كلام خصوصا الايام دي .. بس بالصدفة كنت بدور علي حديث علشان اجيبه صح لقيت حديث تاني اول مرة بصراحة اقرأه ........

عن عائشة رضي الله عنها قالت: قال رسول الله صلى الله عليه وآله وسلم:
” إنّ اللّهَ رَفيق يُحبّ الرفقَ ويُعطي على الرفق ما لا يُعطي عَلى العُنف وما لا يُعطي على سواهُ ” .
(رواه مسلم)


حديث : "إن الرفقَ لا يكونُ في شيء إلاّ زانه ، ولا ينزع من شيء إلاّ شانه" رواه مسلم عن إبن عباس رضي الله عنهما

انا هنقل الكلام اللي كان مكتوب و بعدين هعلق تعليق صغير..

"إن الترفق بالناس من حسن الخلق وهو مما حث عليه رسول الله صلى الله عليه وآله وسلم ، فما كان الرفق في شيء إلاّ زانه وما كان العنف في شيء إلاّ شانه ..وكان رسول الله صلى الله عليه وآله وسلم سهلا إذا باع سهلا إذا اشترى ..
ولماذا يسلك الإنسان العنف إذا كان باب الرفق مفتوحا إلاّ إذا كان المرء معجبا بنفسه مزدريا لغيره وهذا ما لا يحبه الله ، أو إذا كان يظن أن من يقابله لا ينفع معه الرفق. ولكن هذا أيضا لا يجوز إلاّ عن تجربة أو بينة . أما إذا اتُّخِذ العنف منهجا فهذا ما ينهى عنه رسول الله صلى الله عليه وآله وسلم في هذا الحديث.
والرفق يكون في كل شيء. فالمشي على الأرض هونا دون عجب أو تكبر هو رفق ، وإطعام الحيوان رفق ، ومعاملة الناس يجب أن تكون برفق ، والدعوة في سبيل الله تكون برفق ، فربّ عدو لدود ورث العداوة عن غيره يقلبه الرفق صديقا حميما . قال الله تعالى: ” ولا تَستوي الحَسَنَةُ ولا السيئةُ ادفَع بالّتي هيَ أحسَنُ فإذا الّذي بينَكَ وبينَهُ عداوة كأنَّهُ ولي حَميم ”

من الرفق بالناس أن تؤدي حق المحتاج من ذوي القربى أو الجيران أو من تعرف حاجته قبل أن يسألك . ومن الرفق عدم الإلحاح مع الناس في كل شيء كعدم المماطلة في قَضاء الدين أو البيع والشراء عموما إلاّ إذا كان المرء فقيرا ، فإن مطل الغني ظلم..ومن الرفق قضاء الدين قبل أن يسأل عنه صاحبه .......... ( المصدر: http://www.al-mishkat.com/istiqama/istiqama6.htm )

التعليق :

الكلام دا كله فكرني باني كتير بكون مش كده :( مع الاسف .. جايز مش بعرف اتناقش كويس مع حد مع اني بكون علي حق و متاكده و عندي الدليل بس اللي قدامي لو بيهاجم انا مش بعرف ادافع:( وبسكت ..

امبارح كنت ف مناقشة مع اكس من الناس .. بيتكلموا عن العمرة و حد قال انه هيعمل عمره لاحد ابنائه اللي مش عارف يسافر يعملها .. انا اللي اعرفه انه مينفعش تتعمل لحد عايش و كمان قادر صحيا و ماديا بس في ظروف تمنعه من انه يعملها .. هو ربنا عايز كده .. لو عايز الانسان دا يجيله اكيد هيجيبله ولو عايز يأجل الزيارة دي يبقي الحمد لله علي كل حال..
المهم باه لسه هقول الكلمتين دول لقيت الحد دا بيقولي اسكتي انتي .. لاتنفع وكانت بشدة :( و عدي باقي اليوم علي حاجات كتيرة بالشكل دا.. انا سكت بس علشان خاطر ربنا و مش عايزة ادخل ف جدال مع حد مش بيقبل كلمة من حد ( يمكن اكون سلبية بس في ناس الكلام معاهم مش بينفع طالما هما صوتهم عالي علي طول :( )

انا نفسي ساعات ببقي عنيفة ف ردي :( مع اني حقيقي بحاول اسيطر علي الجزء دا و لا انفعل من اقل حاجة كده :( و كتير بفضل اقول ف نفسي اهدي واسكتي مش مستاهله اصلها و ساعات استغفر ربنا او اشغل تفكيري باي حاجة تانية علشان مطلعش رد فعل غبي و ارجع اقول يا ريتني ما قلت كده :( كتير بنجح بس في اوقات بتفلت مني :(

الكلام دا مش مع الناس عموما .. مع اشخاص معينة بعينها هي اللي بيحصلي معاهم كده .. انما ف العادي بيتهيالي بتعامل برفق خصوصا ان مفيش حاجة تدعو اني اتعامل بغير كده مع الناس .. بس مكنتش اعرف اني ممكن أؤجر علي الرفق دا .. من باب اولي دلوقتي اشوفلي حل مع الناس التانية دي علشان كده بيتهيالي هاخد ذنب لو شفت الحديث و مجاهدتش نفسي علشان ابطل استفز بسرعه من الناس دي .. بس انا والله باخد بعضي و ببعد عن المكان دا لو عرفت او مش برد او باشغل روحي باي حاجة تانية .. ساعات بنجح ف صرف تفكيري عن اني ارد و ساعات لا... وحتي لو رديت مش برد بحاجة وحشة بقدر مهو الرد نفسه طريقته فيها عنف دا اللي خلاني اقف عند الحديث دا بالذات :(

يلا ربنا يعافينا جميعا و يرزقنا حسن الخلق ..


الأحد، 6 يوليو، 2008

اقولك بحبك ازاي :(

بحبك بس مش عارفة اقولك بحبك

مش علشان مش عايزة بس مش عارفة اقولك بحبك

ساعات كتير بحب حد ومش ببقي عارفة اقوله اني بحبه حجات بتمنعني حتي ساعات مش حجات جوايا زي العادة ..

مثال لو واحدة بحبها و انا متاكدة من جواايا اني بحبها و بعزها كتير .. بقول هيجرا ايه لو رحت قولتلها اني بحبها و ببقي عاقدة النية و عازمة اني اروح اقولها باللي ف قلبي ناحيتها .. مش عارفة دا بختي ولا ايه بس ف 90% من الحالات بلاقي نفسي ف موقف تاني مختلف تماما

يعني اجي لسه هتكلم الاقي اني اساسا سايبه مشكلة و المفروض دلوقتي بدل ما اقول اللي كنت جايه اقوله الاقي نفسي مضطرة ادافع عن نفسي يا اما انفي اتهام يا اوضح موقف... وهكذا

مش علشان انا ملاك و مش بغلط وهما ظالمني بس يمكن مش عارفة اتفهم ..!!!

الله اعلم ..
كتير بشوف نفسي وحشة اوي و مينفعش حد يحبني و بستغرب لما الاقي حد بيعبر عن اني غاليه عنده او عندها !! مهياش تقليل مني بقدر ما هو اني عارفة اني مستاهلش الحكاية دي و محدش يقولي ليه ... كلنا بنغلط ماشي بس انا الغلطة عندي الصغيرة بتفضل تعذب فيا كتير وضميري بيفضل يأنب فيا كتير اوي بحد ما احس انها عدت يا اما اتصلحت يا اما جت حاجة غطت عليها :(

بس بردة نرجع لمشكلة اني مش بعرف اقول للي بحبه اني بحبه :( تقصير مني يمكن .. كتير كسوف .. ساعات خوف من رد الفعل .. بس الاكيد انه مش احساس بالضعف لو قلته علشان محدش يقولي خايفة تبقي ضعيفة:(
بتبقي جوايا و عايزة اقولها والاقي سبب ورا سبب بيمنعوني:(

و ساعات مع حد تاني تلاقيني بقولها بمنتهي السهولة بدون كل اللي قلت عليه فوق دا .... غريبة انا عارفة

زمان كنت بقول انا بكتب احسن ما بتكلم يعني بالكتابة يمكن اعبر عن اللي مش عارفة انطقه

بس من قريب اكتشفت اني بالكتابة ساعات مش بعرف اقول اللي حساه اد لو سكت :( ساعات السكوت بيكون ابلغ رد ... او يمكن غلطانة بردة الله اعلم :(

اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع