الثلاثاء، 27 نوفمبر 2012

العدل مرفوع ... حتي حين!


ما بين ليلة والتانية يتقلب حال من حال لحال!!

كنت معزومة رابع يوم العيد علي خطوبة ولد اعرفه 
العزومة جتلي قبل العيد باسبوعين تقريبا 
و كنت فرحانة بيه جدا لاني بحبه اوي وهو ابن حلال ويستاهل كل خير .. طايش حبتين بس غلبان جدا و الدنيا قسيت عليه كفاية .. يكفيه انه لا اب ولا ام ولا اهل يركن عليهم في حاله .. المهم 

يشاء ربنا اني امرض من اول يوم عيد و لمدة طويلة مخرجتش من البيت و حتي مكنتش اقدر اكلمه اعتذرله اني مش هقدر احضر الخطوبة رغم ان مكانه مش بعيد و اني كنت فرحناله جدا

وانشغاله ورا انشغاله (حلوة ومرة) مكلمتوش ولا عرفت اخباره لحد امبارح بليل 

كلمني و قالي انه من قبل العيد و لحد امبارح بس مكانش يقدر يتصل بيا ولا باي حد تاني لانه كان محبوس!!

انا بساله كليتك اخبارها ايه ؟

سمعني غلط وافتكر بسال علي خطيبته فقالي محصلتش الخطوبة اصلا و ابتدي يحكي حكايته

قبل العيد بكام يوم ولاد في الشارع اتخانقوا مع ناس علي قهوة قريبة من مكان سكنهم .. و الظاهر كان معاهم مطاوي .. بس محدش اتعور ولا حتي اتضرب في الخناقة كانت كلام وبس .. جت "الحكومة" زي ما وصفها هو (الداخلية البلطجية بوصفي انا)

جت الحكومة لمت الولاد كلهم اللي في الشارع و طلعت فوق في مكان سكنهم لمت كل الولاد اللي فيه بردة و منهم اللي كان نايم واللي كان بيذاكر ومنهم القصر اللي لسه في مدرسة اعدادي

لموهم و رموهم في الحبس .. اتصلوا بمدير السكن دا قالوله اللي حصل قالهم طيب هبعتلكم محامي و لما كلم الظابط في التليفون وقتها قاله لا دول بس هيستنوا للصبح و يخرجوا .. و التاني صدق و قفل تليفونه و نام و في ولاد  ( مسئولين منه قانونا ) بايتين في الحجز لمجرد الداخلية البلطجية حابة تعمل منظر في المنطقة

ليه عايزة تعمل منظر؟؟

لان الكلام دا كان بعد ما اتخانقوا مع الباعة الجائلين في ميدان الجيزة و قتلوا واحد منهم "21 سنة" الله يرحمه .. و ظابط اتضرب و "هيبة الشرطة" اتهزت في المنطقة

فقرروا يرجعوها انهم يلموا اكبر كم من الشباب في المنطقة في الخناقة دي .. وحصل

المحضر اتكتب علي انهم اعتدوا علي السلطات و انهم اتسببوا في ارهاب مواطنين و حيازة اسلحة و تهم حلوة من بتوع الايام دي .. 

الجميل كمان .. انهم خلوا اللي علي القهوة (الطرف التاني في الخناقة ) .. يشهدوا علي العيال كلهم ان كلهم كان معاهم سلاح و هددوهم .. حتي اللي كان نايم في سريره - روحه كان طايره هناك باين .. حتي القاصر !!

و اتحبسوا العيال كلهم اكتر من شهر و اخلي سبيل كام واحد منهم امبارح و لسه في محبوسين علي اعتبار ان الحكم في القضية يوم 1/5/2013 يعني كمان 6 شهور!!

الحكاية مش مستغرباها .. دا طبعهم و "هيبتهم"

بس اللي عز عليا الولد وهو بيقولي " مش زعلان اني اتحبست .. عادي.. زعلان اني مظلوم والله وملقيتش حد يقف جنبي يقول الحق اني مكنتش هناك اصلا"

 اكيد ملقيتش رد ..

والا كنت هقوله معلش يا ابني علشان يمكن تكون ذنوبنا اكتر من الناس اللي قبلنا فاترفع عنا العدل بذنوبنا!!!

اقوله ايه دا وبقاله 18 سنة بيتمرمط من "الحكومة" اللي في اي مكان تاني علي الكرة الارضية المفروض تكون سنده و ظهره بدل ما تبقي دايما سبب في التنغيص عليه!!

اضطريت اقوله معلش في زيك الوفات مرميين في السجون في كل المحافظات ولا حد عارف عايشين ولا اتاخدوا من بيوتهم اتقتلوا .. و في غيرك كتير ماتوا اتاخدوا من الشارع او من بيوتهم  كبار و صغيرين ولا حد عارف لهم طريق 

الظلم ساد و سود عيشتنا

قادر ربنا يرفع عنا البلاء و يجيرنا في مصيبنا  و يقصم الظالمين جميعا

الأحد، 18 نوفمبر 2012


ولسه الموت له شوق في اختبار صبرنا علي الابتلاء

اللهم إنا نسألك الرضا بعد القضاء والصبر علي البلاء 

الاثنين، 12 نوفمبر 2012

العدل

وقعت في هوة سحيقة ما بين ايماني بمعتقد وجود عدل علي الأرض وما بين الظلم المستشري بين جنباتها

البشوات بيقولوا عليها مثالية .. ازاي البحث عن العدل في الارض والمطالبة بيه بقت مثالية تسخروا منها؟

اكيد ربنا مخلقش الارض ورفع عنها العدل .. اكيد موجود في صور ما باشكال ما حتي لو مشفنهاش 

بس والنبي متقوليش انه مش موجود .. انا معتقدة فيه حتي لو معيشتوش او مشفتوش في اللي حوليا 

اكيد علشان ربنا العدل .. هينزل علي الارض اشكال من صفاته سبحانه 

اكيد بشكل ما في ولو اجزاء بسيطة مشتقة من العدل زي ما في لسه شوية رحمة فاضلين 

اينعم بتتضاءل فعلا بين البشر بس محدش يستجري يقول ان مفيش رحمة في الارض 

يمكن اللي اقصده عدل البشر مع البشر .. بس دا كمان مش شاكه فيه بنسبة ما 

لسه في ناس شوية حاسة انها علي الاقل ظالمة غيرها ( اعتقد )

اكيد والله لسه في احساس بان وجود العدل دا مش وهم ولا تطلع للمثالية 

"اعدلوا هو اقرب للتقوي"

وليسقط الظالمون في قعر الجحيم

الأحد، 11 نوفمبر 2012

دعاء جديد



اللهم لا تشغل عقلى بما يقلقه

ولا تشغل قلبى بمن لا يرحمه

ولا تشغل وقتى بما يغضبك ولا ينفع

الخميس، 18 أكتوبر 2012

هي .. وانا


مرات الظابط عايزة توصل لرئيس الجمهورية تشتكيله انها زعلانة علي حال البلد 
علشان المحلات رافضة تقفل 10
علشان الناس صوتها عالي في الشارع
علشان الظابط بقي ممكن يتقاله لا
وعلشان المليونيات اللي هي مش عارفة الناس بتنزل فيها ليه
وعلشان الزبالة اللي مرمية قرب بيتها 
وعلشان خايفة علي جوزها الظابط وابنها الظابط
وعلشان شايفة هيبة الشرطة اهم من لقمة العيش 
وعلشان شايفة الشعب دا بهايم لازم الكرباج يمشيهم


منتظر مني اشوف لها وسيلة اتصال بمرسي 
معرفتش ارد اقول ايه 
قلتلها انتي زعلانة ليه؟
جوزك معاكي و ابنك في حضنك و قاعدة في بيتك معززة مكرمة 
حياتك لا زادت ولا قلت من سنتين اللي بتشتكي منهم 
لا نقصتي ولا زيدتي


قالت زعلانة علي البلد 

اضطريت اقولها ملعونة دي ارض بتاكل عيالها 

لما يبقي اللي نايم في حضن مراته وولاده وهو قاتل و بسببه ام واب وزوجة و عيال ضاع منهم معيلهم و ضناهم بسبب انه حيوان وقتلهم .. لما يتعدم و ياخد جزاءه هتفرحي
لما يبقي الحرامي يقوم من مكتبه و يدخل يبارك برجله السجن مكانه الطبيعي وسط زمايله  هتفرحي
لما تبطلي تقولي علي الشعب دا بهايم لازم الكرباج يمشيهم هتفرحي لانه هتشوفي فيهم اللي حفر في الصخر علشان يلاقي لقمة عيشه و من كتر حفره طلعله ضوافر يحمي بيها اللقمة دي مش لانها قوته لكن عشان عياله اللي وراه ميموتوش من الجوع 
لما تحسوا كمجتمع معاه سلطة ان العسكري اللي بيشيلك الشنطة دا مكانه مش تحت خدمة مرات الظابط لانه مش سخرة و بني ادم مش ألة
لما الناس اللي مسحولة و عايشة في المجاري العفنة يقولوا لا .. اللي قالوا لا بدالهم ماتوا خلاص و هما معملوش حاجة .. لما دول ينطقوا يقولوا لا بصوت عالي وياخدوا حقهم 

لما نبقي وطن بحق وفيه قانون و عدل

هي زعلانة علي البلد .. بس انا من البلد

نشنتي علي الحد الغلط تشكيله زعلك من قطيع البهائم للاسف .. سوري

الثلاثاء، 9 أكتوبر 2012

100 مسا ونهار :(


100 مسا ونهار ....
هي هي
 مصر مبارك
مصر مرسي
الا ما في مواطن مصري من المسحولين ورا لقمة العيش حس بفرق واحد ولو في حقه في المعاملة الآدمية
الداخلية هي هي بلطجية
المرور زفت و قطران
التموين بقي فوق طاقة الطبقة المتوسطة حتي!! و لا عزاء لكل الشرائح اللي قبلها .. معلش مش معتبرينكم من المواطنين الصالحين اللي ليهم حقوق في البلد دي
الصحة زفت و تجيب المرض و الاطباء حقهم في اضرابهم مشروع و ليهم الف حق وحق والمريض بيدخل بمرض بيطلع عايز عزل صحي من كتر الاوبئة اللي بتجيله دا لو طلع اصلا

النبي ترزقنا بشوية انسانية و كرامة و حبة ذمة و ضمير
 لاجل النبي في البلد دي يا رب

الخميس، 27 سبتمبر 2012

سور الأهلي :(




                                  إقتــــــــلني 
                                 عمر قتـــلي 
                                  مــا هيعيـد
                                 دولتــك تاني


                                
                                   البقاء لله

                                 معني الحياة 
                                   هــــــــــو 
                           إنك تدي للحياة معني


                       رحمة الله علي شهدائنا الأبرار

الأربعاء، 26 سبتمبر 2012

يسقط مبارك :(


دي في ظهر منزل كوبري اكتوبر 
أمام اتحاد الكورة (معقل حبة فاسدين تقال)

 مكتوبة جديـــــــــــد!!!

شكلنا كده هنفضل متمسكين ب "يسقط مبارك"

حتي أخر العمر 

يسقط كل مبارك

الثلاثاء، 25 سبتمبر 2012

حنين


المدونة دي من 2008 !!
الايام بتجري بسرعة كده ليه

جه علي بالي مدونين ومدونات كتير اوي ..
كنت بحبهم وبحترمهم كبار وصغيرين :) 

دعيتلهم سرا 
و بشكرهم علنا ( بالنية يعني )

بس بدون تحديد لان كتير منهم ميعرفوش اساسا اني اعرفهم :)

المهم تكون الناس كلها دايما بخير

الاثنين، 24 سبتمبر 2012

تعليق جديد متأخر جداااا


بقالي كتير فعلا بشوف ان في ناس بتيجي من مدونة بهائي مصري و مش عارفة الاقي رابط لانهم بيوصلوا لتدوينتين كنت كتبتهم في 2009 عن تجربة خاصة لي و تعليق خاص بردة علي حاجة من وجهة نظري وقتها

ولسه حالا مكتشفة الرابط فين

ولما قرأت الرابط و عرفت منين جه و سبب الاستهزاء وتفهمت الموقف ..

حقه بصراحة ولا انكر عليه حقه .. 
حقه يزعل من طريقتي 

و حقي ازعل من طريقته 

المفيد ان كل واحد عمل دا في مكانه .. هو اشار للمدونة قولا و فعلا بدون ما يكتب الرابط ..  كتر خيره

كنت اتمني لو اكتشفت الرابط دا وقتها علشان اقوله اني وقتها اتصدمت في وجود واقع معلن زي دا و انا كبيرة كده و معنديش عنه فكرة  زي صدمات كتيرة متتالية حصلتلي و اتصدمتها لاني مكنتش اعرف ان في حاجة زي دي في الدنيا ... رد فعل طبيعي يعني 

عقيدتك انت حر فيها ما لم تؤذي غيرك

من الحاجات اللي غيرتها فيا  الثورة دي اني بقيت بقبل اللي مختلف معايا اشد الاختلاف لانه مش هو عدوي الي ان يأخد مكان عدوي و يحاربني بالدين .. 

والي ان يجي في المربع دا ..

 فهو شريك في الوطن وبس!!

هو تعليق وقف في زوري سواء شافه او مشافهوش .. 

((كل اللي فوق دا مش مناقشة ولا قبول بمعتقد حد .. دا مجرد تعليق علي اسلوبين لشخصين معجبهمش اسلوب بعضهم))

الأحد، 23 سبتمبر 2012

انــــــا سطـــــــرين - رائعة .. أسفلت





"أنا ستيكر ملزوق عليه "مين المقصود
أنا عين بتشوف، أنا لسان بيقول
أنا ميكرفون يعلى بيه صوتك
أنا سماعة تلغي بيها سكوتك
أنا فكرتي عايشة و إسمي اتنسى
أنا ضربة و جلدة و جسمي اتهرى
أنا وش بيضحك غلاف كتاب
أنا لسة كاتب لبكرة جواب
أنا وسط البلد أنا قلبي اتولد
أنا قلة عدد على كوبري الأسد
أنا خفة دم باسم يوسف
أنا صورة جدي على فلوسي
أنا السلمية بمفرداتها
والحرية بمنشوراتها
مش محتاجني عشان تعبر
أنا اللي اتقال بس إنت أكتر

انا سطرين بتقراهم كدا على الصبح
يسيبوا جوا منك شئ
بقابلك ع الحيطان صدفه
ف كل مكان و اي طريق
انا الصوت اللي قال تغير
انا رأيك انا فكرك انا التعبير
انا روح راحت علشانك
انا صوت واصل لمكانك
انا عين بتشوف الظلم و ساكته بقالها كتير
حواليك دايما تلمحني
مش شرط انك تعرفني
انا ايد بتساعدك توصل .. علشان احلامك تكمل
انا سكه هاتخدك ناحية نور و محبه و خير

أنا اللي ماكنش ليا وجود و ظهرت
أنا علم بلدي في ايدين صحاب الأرض
أنا صوت عود مش مبسوط
أنا بيت شعر مش موجود
أنا مزيكة سكوت
أنا صندوق "نعم" و "لا" للتعديلات
أنا دمعة كل أم ابنها مات
أنا صوت تشجيع خارج من الإستاد
أنا بوستر مترشح للانتخابات
"أنا تصريح على "كلنا خالد سعيد
"أنا المظاهرة اللي قالت "الشعب يريد
أنا مانشت إتكتب بالبنط العريض
خرطوش، رصاص مش هيفيد
أنا "أسفلت " على تيشيرت إنت لابسه
أنا كلام إنت كاتبه، قول اللي حاسه
"أنا يافطة عليها "الشعب اختارك
"أنا محطة "الشهدا" بدل "مبارك

Translated lyrics:

I'm a sticker that says, "Who's the Target?"
I'm the eye that sees; I'm the tongue that speaks
I'm the microphone that makes your voice heard
I'm the speaker that cancels out your silence
My idea is alive but my name is forgotten
I'm a hit, a lash; my body had enough 
I'm a smiling face; I'm a book cover
I'm still "writing a letter for tomorrow"
I'm Downtown; my heart is born
I'm the group of people (trapped) on the "lion's bridge"
I'm Bassem Youssef's sense of humor
I'm my ancestor's picture on our currency 
I'm all the words that are encompassed by peacefulness
I'm the brochures of freedom
You don't need me to express...
I'm all that's been said, but you are more!

I'm two lines you read in the morning
They leave something inside of you
I see you by coincidence (in the writing and drawings) on the wall 
In every place or in any way
I'm the voice that called for change
I'm your opinion, I'm your thoughts, I am expression

I'm the soul that died for you
I'm the voice that reaches you
I'm the eye that has seen injustice and has stayed silent for so long
You always notice me around you
It doesn't matter if you recognize me
I'm the hand that helps you accomplish your dreams
I'm the road which leads you to light, love and goodness 

I'm the one who had no presence and appeared
I'm the flag of my country in the hands of her countrymen
I'm the unhappy sound of the Oud
I'm a missing line of poetry
I'm the music of silence
I'm the voting box for constitutional amendments
I'm the tear of every mother who lost a child
I'm the sound of cheers coming from the stadium
I'm a candidacy poster for the elections
I'm the statement s written on "We are all Khalid Saeed"
I'm the protest that said "The people want...."
I'm a newspaper headline written in bold
Bird-shots, bullets, won't have an effect
I'm "Asfalt" on the t-shirt that you're wearing
I'm the words that you've written; say what you feel
I'm the banner that says, "The people chose you"
I'm the metro station
"The martyrs" which replaced "Mubarak"

الاثنين، 28 مايو 2012

سمعت في إذاعة القرآن الكريم ..


عن أبي هريرة رضي الله عنه عن رسول الله صلى الله عليه وسلم قال :" لولا بنو إسرائيـل لم يخبث الطعام ولم يخنـز اللحم ولولا حواء لم تخن أنثى زوجها الدهر"


سمعت الحديث دا و شرح ليه من دكتور رئيس قسم الحديث في كلية الأزهر بالأمس في إذاعة القرآن الكريم قبل أذان العشاء و طول ما هو بيشرح وانا  بقنع نفسي لا مش صح لا مش صح و دورت لقيته صحيح و في صحيح البخاري مسلم و تفسير الحديث ليس بقسوة المعني الأول المستخلص عند سماعه لأول مرة .. بس مازال مر .. صدق رسول الله صلي الله عليه وسلم فهو لا ينطق عن الهوي .. بس مازال بيوجع اوي .. كفانا الله شر الخيانة في أي حاجة وكل حاجة .. 


اللي يخون الأمانة و يكذب 
اللي يخون الأمانة و يضحك علي حد 
اللي يخون الأمانة و يغوي حد
اللي يخون الأمانة و يحرض علي معصية 
اللي يخون الأمانة ...


اللهم أغفر لنا ذنوبنا فإنا مقرون بالذنب وأنت أعلم به منا 


اللهم لا تغفر لمن عصاك متكبرا وهو يعلم وانت ان شئت هديته


نسأل الله العفو والعافية 

الأحد، 13 مايو 2012

غريبة ..



بما انها دنيا وغريبة 

اعترف و بخجل

ان جو المدونات وحشني 

بردة العشرة متهونش

ومن فات قديمه

تويتر خفيف واحيانا لطيف بس مش بنفس جو التدوينات و الكلام فيها


واحتار فعلا في سؤال جوهري 

"هي الناس اللي بتبان في العداد انها عدت علي المدونة الخايبة دي عدت ليه؟؟؟" والسؤال نفسه سألته علي تويتر علي الرغم من احساسي انه سؤال في منتهي قلة الذوق بس "المتابعين" متابعين علي ايه!!

شكرا لكل المدونين والمدونات اللي حسيت بافتقادهم و افتقاد روحهم بين حروفهم 


الأربعاء، 9 مايو 2012

دنيا للكل وعلي الكل

زمان ..
كان بيتضحك عليا لوحدي 
فبزعل لوحدي

..

حاليا ..
 البلد كلها بيتضحك عليها
فبتزعل مع بعضها 

-------
ويتبقي ان في حد بيضحك علي حد
و بيعيش بضمير بلاستيك
معدوم الدم والاحساس


كلنا في الهم واحد 


الأربعاء، 18 أبريل 2012

مصر باختصار ... بقلم / محمد فتحي

الأم التى تُدخِل ابنتها الصغيرة فى حضنها رغم أنها ضربتها للتو، سائق التاكسى الأبيض الذى يظل مترددا فى تشغيل العداد ولا يفعل إلا بعد أن تغلق الباب خوفا من أن يدخل بيته مليم حرام، الشاب الذى يحلم بالسفر ليترك البلد التى تأكل ولادها لكنه يتشاجر مع أى شخص يشتمها أو يهينها أيًّا كان بمبدأ (أدعى على بلدى واكره اللى يقول آمين)، الزفة الحلوة عند (فسقية) أى ميدان وتجمع الشارع للتصفيق ومجاملات الكلاكسات والزغاريط من البلكونات، الأمى الغلبان الذى يمسح الزجاج بورق الجرايد لكنه يستغفر الله إذا اشتبه فى آية قرآنية مكتوبة فيظل نادمًا حتى بعد أن يحرقها، فرامل السيارة وتشغيل الانتظار احتراما لعجوز فى سن الآباء والأجداد أو سيدة حامل تعبر بصعوبة، الشباب الذى يتظاهر ضد الداخلية ثم يذهب فى رمضان لتوزيع الإفطار على عساكر المرور الغلابة، هتاف «سلمية» أمام ضرب الغاز والخرطوش، ابنك وهو يبتسم ويعملّك باى باى وهو يدخل المدرسة، وخناقتك معه لأنه يأكل اللانشون حاف، اعتيادك على خناقة الباقى مع تباع الميكروباص، هتافك «يسقط يسقط حكم العسكر» واستعدادك للموت فى سبيل الوطن وإنت جندى فى الجيش لو حدثت حرب فى التوِّ واللحظة، حرصك على صلاة الجمعة أو قداس الأحد حتى لو مابتصلِّيش أصلا، نفخك فى أى مصيبة وأنت تؤكد بإيمان حقيقى: الحمد لله عَ اللى يجيبه ربنا. مصر رغم كل شىء.. فيها حاجة حلوة.


----------------------

محمد فتحي .. جريدة التحرير 18/4/2012 

.......


نلعن ابوها بشكل يومي ..
و لا تهون علينا
ولا يهونوا أهلها ولا ترابها
وبتوحشنا طيبتها لما بتقسي علينا 
بتاكل عيالها و عيالها روحهم فيها

حفظك الله يا مصر

ويسقط حكم العسكر والجلابية وكل السفلة بتوع العباية اللي بكباسين

الاثنين، 9 أبريل 2012

ما حدث لأبوح وزوجته طلوع الروح وابنه مندوح .. بقلم / صلاح متولي



حدثت هذه الحكاية فى بلد يشبه كل بلاد العالم الثالث، حيث كان يعيش قرداتى اسمه أبوح.. يعيش مع زوجته طلوع الروح.. وابنه مندوح.. وقرده العجوز سنكوح.. وفى يوم من الأيام.. وكان البلد يمر بظروف انتخابات رئاسية.. وقف القرد سنكوح فى وسط ساحة أحد الموالد وأخذ يهز شخاليل الرق الذى فى يده، وأبوح يدق على طبلته ليُلفتا نظر الجمهور الذى تحلق حولهما.. ثم كف أبوح عن العزف وبدأ يقدم نفسه للجمهور:
هنا أبوح.. سيداتى آنساتى سادة يا كرام.. قبل كلامى بابعت سلامى سلام سلام.. استلموا وامضوا عالاستلام.. يا أغلى ناس فى الدنيا ديّا.. إنتو اللى ليّا.. بعد التحية.. أحب أعرفكو بنفسى على ذات نفسى بنفسى.. أنا أبوح.. مشخصاتى وأدباتى وقرداتى ومفلسفاتى ومغنواتى.. ويا دنيا ودّى ويا فن هاتى.. ياما هاتيت.. حتى استويت.. ضيعت نص سنان حالاتى ونحاس مراتى فى المهاتية.. والدنيا ديّا زى ما هىّ.. بنطلّع منها الضحكة بطلوع الروح.. والفرحة بطلوع الروح.. واللقمة بطلوع الروح.. هنا أبوح.. على فكرة.. طلوع الروح ده اسم مراتى.. أنا أبوح، ومراتى طلوع الروح، وابنى مندوح.. مش جهل منى.. بس موظفة السجل كتبته فى شهادة الميلاد كده.. على قد تعليمها.. ولما سألتها إنتى معاكى شهادة إيه يا أبله؟ بصّت لى شزرا، وقالت لى بصوت مسرسع.. دابلوووون.. قلت لها، لأ، طالما دابلوووون يبقى مندوووح.. وعليّا الطلاق ما أنا مغيَّره.. هيعيش مندوح ويموت مندوح.. إذا كان أبوه اسمه أبوح وأمه طلوع الروح.. يجعل كلامنا خفيف عليها وخفيف عليكم وخفيف عليّا.. ده أنا ناوى أفرفش.. وناوى أخربش.. ناوى أضحك عللى بيكم وناوى أضحك عللى بيّا.. ضحكى من شر البلية.. يجعل كلامنا خفيف على كل المحارم والمحاكم والقوانين الكتيرة.. هنا أبوح.. وأبوح اسمى.. جاى من البوح ومن الإباحة همزة تحت الألف عشان تفرق كتير.. جاى أقدم ليكم فن.. على قدى.. وعلى الدنيا اللى أعرفها وعلى الناس اللى أعرفها وعلى الكام كلمة فى بقى وعلى قد ما عرفت أنقى، وتكالى على البوح بالفن.. هنا أبوح.. فنان صعلوك متجول.. متزوج وأعول مندوح.. وأمه طلوع الروح، وقردى العجوز سنكوح.

يسمع أبوح صوت زوجته تناديه:
- أبوووووووح.
- مش قلت لكم بتييجى عالسيرة!! عايزه إيه يا طلوع؟ أنا مش منبه عليكى ماتجيليش مكان أكل عيشى.
- أكل عيشك هيتقطع خلاص يا أبوح.
- مين اللى هيقطعه؟
- خلاص هيمنعوا الفن يا أبوح.. وهيلغوا الموالد أساسا.
- همّ مين دول؟
- الحكومة.. لازم تمنعهم يا أبوح.
- وهامنعهم إزّاى إنشاء الله؟
- ترشح نفسك للرياسة، وتبقى رئيس عليهم، وتشد ودانهم وتقول لهم عيب كده.
- ضحك الجمهور والقرد سنكوح، فقال أبوح لطلوع الروح: كده ضحّكتى الناس والقرد علينا.. عايزانى أرشح نفسى للرياسة.
- ما كل من هب ودب رشح نفسه للرياسة، وكلهم ماينفعوش.
- كلهم ما ينفعوش وأنا اللى هانفع؟
- إنت الوحيد اللى تنفع يا أبوح.
- إشمعنى؟
- لأنك قُرداتى.. والبلد محتاجة حد يقدر يلعِّب القرود.. يا إما هليبسوه الصديرى زى سنكوح.
- وإنتى عايزانى أبقى رئيس جمهورية ليه؟
- عشان أبقى السيدة الأولى يا أبوح.
واستمرت التمثيلية المتفق عليها بين أبوح وطلوع الروح والقرد سنكوح، حتى نهايتها، دون أن يكتشف الجمهور أنها تمثيلية إلا فى نهايتها، فصفقوا إعجابا ووضعوا ما فيه النصيب فى الطبق الذى يدور به سنكوح على الجمهور، وذهب كل إلى حال سبيله، ونام الناس وسهر أبوح مع القرد سنكوح، يبثه أشجانه كعادته: ليه يا سنكوح التمثيلية ماتبقاش حقيقة.. وأبقى رئيس جمهورية بجد؟ دى عايزة معجزة.. وعصر المعجزات خلص خلاص.

فوجئ أبوح بالقرد يتكلم ويقول له:
- مين قال لك إنه خلص؟!
- غشى على أبوح ساعة، ثم رش القرد على وجهه الماء وأيقظه، فغشى عليه من جديد بعدما عرف أنه لم يكن يحلم، ثم استيقظ وبدأ يستوعب الموضوع على مهل، وبدأ يستمع إلى القرد الذى أخبره بسره وبأنه يتكلم ويفهم كل ما يقال حوله، كما أخبره سنكوح بأنه يشعر بقرب النهاية، وأنه سيموت، ويريد أن يكافئ أبوح، لأنه كان طيبا وكريما معه، فلم يُهنه أو يضربه أو حتى ينهره، وكان يطعمه من طعامه ويسقيه من شرابه، ولذلك فهو يعلن لأبوح أنه سيجعل منه الرئيس القادم، بشرط أن لا تكون طلوع الروح السيدة الأولى، لأنها طلّعت روحه، فيوافق أبوح على الشرط ويبيع زوجته، ويعد القرد بأنه سيطلقها فورا بمجرد أن يصبح رئيس جمهورية، ويسأل القرد عن كيف سيجعل منه رئيس جمهورية؟ فيقول له القرد إنه يعرف ما يريده الناس.. ويخبره القرد بأن كل ما عليه أن يفعله هو أن يصحبه معه وهو ذاهب ليسحب أوراق الترشح، وعندما تسأله الفضائيات لماذا قرر الترشح؟ أن يشير إلىّ ويقول لهم: اسألوا القرد.

وبالفعل نفذ أبوح ما قاله القرد بالحرف، وجاءت الفضائيات المتربصة بالمترشحين، ووجدوا فى القرداتى الذى ذهب ليسحب أوراق ترشحه ومعه قرده صيدا ثمينا، وعندما سألوه: لماذا يترشح؟ فقال لهم: اسألوا القرد.. فضحك الجميع واعتبروها نكتة، ولكنهم عندما وجدوا أن أبوح يتكلم بجدية ومصمم على موقفه فسألوا القرد وهم يشعرون باللخبطة والخجل، ففاجأ القرد الجميع بأن قال أمام الشاشات التى يراها الملايين بصوت واضح وجاد جدا: إن أبوح هو الرئيس المنتظر.. ثم أسلم الروح ومات فى الحال.

وكأن زلزالا ضرب البلد ولخبط كل حسابات أولى الأمر ومرشحى الرئاسة، وفوجئ الجميع بالشعب يوثق ملايين التوكيلات للقرداتى فى الشهر العقارى!! وخرج الموضوع عن السيطرة، فلم يعد الأمر سياسة بل ميتافيزيقا.. وفوجئ العالم بأبوح يفوز بأغلبية ساحقة ويصبح رئيسا.

فى اليوم التالى، استيقظ الناس على أمر مفزع، فقد اكتشفوا أن مؤخراتهم أصبحت حمراء كمؤخرة قرد!! ونبتت لهم ذيول!! فاجتمع قادة العالم ليبحثوا تلك الظاهرة الغريبة العجيبة التى تسير عكس نظرية التطور!! وانتهى الأمر أن استصدروا بيانا من مجلس الأمن والأمم المتحدة باعتبار ذلك البلد ((محمية طبيعية)).

ما حدث لأبوح وزوجته طلوع الروح وابنه مندوح  بقلم صلاح متولي - التحرير 09/04/2012


الأحد، 1 أبريل 2012

يا رب ارحم منهم والنبي يا رب



اللهم عليك بمن أراد بنا السوء

اللهم عليك بالعسكر
اللهم عليك باصحاب اللحي المنافقون
اللهم عليك بكل من يضمر لنا السوء


يا رب خلصنا منهم يا رب

وارزقنا رضاك وطاعتك و انعم علينا بمن يقربنا منك وميكونش منافق والنبي يا رب

اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع