الثلاثاء، 12 أغسطس 2008

اسلام

الموضوع اللي فات كان وراه في ضميري حاجة بس انا الكلام اخدني لسكة اعتبرتها تمهيد للحاجة اللي نويتها في ضميري



بس كنت ناوية اركنها علي جنب شوية علي اعتبار انها لسه عليها شوية .. بعدين هقول عليها علشان مش عايزاها كلمة تتقال و تتنسي دي محتاجة حد يقدرها ويحسها...



المهم ...



البنوتة الجميلة ذات ال13 ربيعا صاحبة مدونة مصر يا .. و كاتب مصري صاحب مدونة كأني اتكلم اتكلموا في موضوع يوجع قلب اي حد بيحس و يعرف انه هيتحاسب علي اخوة المسلم اللي في الوقت اللي بيته كان مليان من خيرات الله .. اخوة المسلم بياكل من فضلاته من وسط اكوام القمامة .. هسيبكم تقرأوا الموضوعين وبعدين اسمعوا الحكايات دي ..



يمكن اطول انا لحد دلوقتي مش عارفة هحكي ايه و اسيب ايه



هحكيلكم الحدوتة من اولها خالص و ممكن حتي بالاسماء هشوف كده وانا بكتب هيحصل ايه



بالصدفة في احد المنتديات من اكتر من 4 سنين و نص واحد نزلت موضوع ... محتاجين متطوعين في مؤسسة اجتماعية ولا اقولكم ناجل الجزء دا لبعدين



المهم شاءت الظروف ان فلانة تروح مكان اختلط فيه اليتيم باللقيط باللي اهله رامينه باللي اهله مش عايزين يصرفوا عليه باللي مطرود من بيت امه علشان اتجوزت و من بيت ابوه علي اتجوز .. نماذج من البشر استحاله تجمعهم لاختلاف ظروفهم البيئية و حالاتهم الاجتماعية .. يشاء ربنا انهم يتلموا تحت سقف واحد في مؤسسة من المؤسسات الاجتماعية في احدي الاحياء ..



كانت مؤسسة بنين ..اصغر ولد كان عمره 5 سنين و اكبرهم كان 18 و في النص كل مراحل التعليم و الللي فيهم بيشتغل و اللي فيهم بيشتغل و بيدرس و اللي بيهرب من التعليم و اللي فيهم بيشرب مخدرات واللي بيشرب سجاير من اصغر لاكبر واحد واللي محتاج مساعدة و منكسر واللي نفسك تكسر رقبته و اللي طيب و عاقل و نفسه يكون كويس و اللي بالضرب ممكن يتعدل حاله



المهم كل التشكيلة دي بتتلم علي ترابيزة واحدة فطار و غدا و عشا ( بغض النظر عن انه اكل ميتاكلش في معظم الاحيان ) الا ان ربنا اراد انهم يتجمعوا



طبعا عاملين في النص شلل ( جمع شلة ) كل شلة منهم ليها ريس و معاون و حد هيموت نفسه و يبقي قريب من الريس دا .. المهم ان ورا كل واحد منهم من طارق ابو 5 سنين لحد الطقهم بتاع ثانوي و اللي في التشغيل كلهم كل واحد منهم وراه حكاية تتحكي في مجلدات و كلها خليط من اسوء حاجات ممكن يعملها بنو البشر في اخواتهم



ناخد اسلام كمثال.. اسلام في تانية اعدادي .. رجع المدرسة بطلوع الروح ..دا لوحده عايز كنسولتو محللين نفسيين علشان يعرفوا يتعاملوا معاه .. عمره 13 سنة ... شرير جداااااا .. ممثل بارع .. غلبان في بعض الاحيان ... لو عصرته هتلاقيه معجون بالكذب .. بيتنفس كذب و اونطه و بلطجة ..



اسلام دخل هناك ليه باه ... ابوه وامه عايشين ؟؟؟ اه ابوه و امه عايشين احياء يرزقون ... في يوم من الايام و ابوة برة البيت دخل اسلام لقي امه في وضع زنا مع راجل غريب .. و بمنتهي البجاحة طلبت منه يروح يشتريلهم حاجات و يرجع و اتكررت الحكاية قدام اسلام و من ناحية تانية بيشوف ابوه مع ستات تانية .. لحد ما في يوم قرر يقول لابوه علي اللي بيحصل من وراه .. ابوه طلق امه و هو كارهه اسلام طبعا .. و امه مسكته ضربته علقة موت و طردته في الشارع



عمه راح عمل محضر و حواديت كده لحد ما قرروا الاتنين يتخلوا عنه و يودعوه احد مؤسسات الرعاية الاجتماعية .. في اثناء الحواديت دي كان اسلام بيهرب من البيت و يقعد في الشارع .. حتي بعد ما دخل هناك كان علي طول بيعمل خناقات مع الولاد و بيهرب و بيرجعوه و مش عايز يروح المدرسة .. في مرة كان في حد بيروحلهم و كانوا الولاد تقريبا كلهم بيحبوه جدا والحد دا كمان كان بيحبهم جدا جدا .. عرف ان اسلام هرب مرة تانية .. زعل عليه جدا و اثر فيه انهم حاولوا معاه بكل الطرق .. كلام و تهديد و ضرب و مكافات ... كان بيهرب و يرجع لو سمع ان في متبرع جايب هدوم و لا فلوس للولاد .. بيرجع و يقعد يتمحلس و يمثل للمشرفين علشان يتحايلوا علي المدير انه يرجعه و الراجل كان بيوافق و اول ما يتلايم علي الحاجات الجديدة يجري و يهرب تاني ... المهم في يوم كان في رمضان .. والحد اللي بيحب الولاد دول كان بيصلي التراويح قريب من المؤسسة و كان بيركن عربيته عند المؤسسة ( كان معظم ايام الاسبوع هناك معاهم .. معتبر انه واحد منهم و عادي كل الناس هناك يعرفوه) المهم لما سمع حكاية اسلام و انه هرب المرة دي و ضرب مشرف و ضرب واحد زميله ( نسيت اقول الاسم الحركي ليه دا المؤسسة كان شارون .. من كتر مهو بيعمل حاجات شريرة للي معاه سموه شارون و كتير منهم كانوا بيبعدوا عن المكان الي هو فيه ) المهم الحد دا وهو بيصلي التراويح فجاة لقي اسلام قدامه .. كان ناسي انه هربان .. علي ما ساله ازيك و انت فين و قاله انا هربت من المؤسسة علشان المشرفين و المدير ووووووو وعارف ان الحد دا سهل يتضحك عليه من خيبته و اصلا علشان بيحب الولاد دول جدا و عارف انهم هما كمان بيحبوه و مش بيكذبوا عليه .. طيب تحب ترجع يا اسلام؟؟ ياريت بس استاذ فرج مش هيوافق ... ملكش دعوة انت ... انت قاعد فين .. انا قاعد مع شيخ الجامع و في ناس بيجيبوا اكل و جابولي لبس ..هما عارفين انك هربان .. سكت اسلام ومردش .. ليه بتعمل كده يا اسلام مش المؤسسة احسن من الشارع ؟؟ هتلاقي حتة تنام فيه اخر الليل بدل ما تتكوم علي اي رصيف



اصر اسلام يومها ان الشارع احسنله ... سكت الحد دا وهو مروح دخل المؤسسة و اتكلم مع مشرف من هناك و عرف اللي حصل تفصيليا و طلب منه المشرف يجي الظهر تاني يوم علشان يقابل المدير و يتحايل عليه علشان يرجع اسلام





راح الحد تاني يوم ( كان شكله وحش اصلا جدااااااااااا وهو بيتحايل علي المدير و المدير قاعد يعدد في المصايب اللي عملها اسلام في زمايله و قلة ادبه مع المشرفين .. و الحد عمال يستسمحه و علشان خاطري وانا اضمنه المرة دي ووعدني مش هيعمل كده تاني ) المهم المدير قالي انه رفض يروح المدرسة .. و مش عايز يشتغل .. وقال سياسة المؤسسة يا التعليم يا التشغيل .. معنديش حد قاعد عالة كده ( الراجل ليه حق علشان مصلحتهم )



المهم اتفقوا لو الحد قابل اسلام في المسجد هيتفق معاه انه يرجع بس علي شرط ان الحد يكون حاضر الرجوع دا ويشهد عليه .. و يومها المشرفين والاخصائي الاجتماعي اجمعوا ان الحد دا بينفخ في قربه مقطوعه .. اسلام هيفضل شارون .. انا ضامنه المرة دي يا جماعه و حرام دا مهما كان عيل و مش عارف مصلحته و ظروفه وحشة وراعوا انه شاف امه في ماساة اكيد اثرت عليه وشاف كتير في الاوقات اللي قعدها في الشارع :(



رجع اسلام المؤسسة .. راح الحد بليل علشان يشوف حصل ايه .. قالوله انهم رضيوا يوافقوا علي رجوعه بس هو معموله محضر هروب اصلا و مش هيسجلوا رجوعه دا لمدة اسبوع يختبروا فيه هيعمل ايه اسلام ..



نسيت احكيلكم اسلام بينام ازاي ..



الولاد متقسمين لاسر .. يعني حسب اعمارهم و حسب شغلهم .. كل اسرة ليها اوضة كبيرة اوي ( زي العنبر ) و كل واحد ليه سريره و دولابه و هدومه وهو مسئول عن غسيلها و تنظيفها و تنظيف الاوضة من وظيفة الدادة .. يعني بس ياخدوا بالهم من حاجاتهم وبس .. اسلام كان يرفض رفضا باتا الحمام ( مش بيستحموا الا لو المشرفين اخدوه و رموه في المية ) بيلبس الهدوم عليه لحد ما يتضرب علشان يقلعها لان هدومه لو بتتكلم هتشتكي من كمية القذارة اللي عليها .. بياخد الهدوم الجديدة و يحوشها مش عايز يلبسها بس بيستميت في انه يحصل علي الجديد دايما .. ويوم ما اتقابلوا في المسجد كان لابس جديد اكمن الشيخ اقنعه انه لازم يكون شكله كويس والناس هتساعده مش هتقرف منه .. اسلام ليه سرير ..... الولاد كلهم ليهم سراير .. اسلام بيسيب السرير زي ما هو بينام تحت السرير



ضربوه و فهموه بالذوق وبالضرب بالمحايلة و بالحوار و بكل الاشكال .. انت بني ادم ولازم تنام فوق السرير مش تحته .. ودا ابداااااااااااااااا هو بيحب ينام علي الارض و مش بس علي الارض وخلاص .. لا بينام تحت السرير في يزنق نفسه .. اتعود علي كده



نقول خلاص اسلام رجع المؤسسة و مشكلته اتحلت ؟؟ يااااااااااااا ريت ... ممرش اسبوع الا و المدير بعت جاب الحد اللي اتوسطله .. قاله بص ... وافقت يرجع علشان خاطرك اوك ... انما المدرسة مش عايز يروح و مضيته علي كده انه هو اللي ممتنع عن المدرسة علشان دا نصاب و مش بعيد يرجع يقول اني انا اللي بعذبه و منعته من التعليم .. قلتله تشتغل يا اسلام قال موافق.... راح يشتغل اول يوم عدي حلوة و مره ... مفاتش اليوم التاني الا و كان ضارب الاوسطة بتاعه في راسه ........... ليييييييييييييييييييييييه ؟؟؟؟؟؟؟؟؟ عملت في الراجل كده ليه ؟؟؟ اصله شتمني ... احكيلي حصل ايه طيب ... بقولك شتمني .. كنتو بتعموا ايه طيب .. كان بيعملني اعمل حاجة في الشغل ..... وانا مفياش دماغ بيقولي فهمت قلتله مش فايقلك .. راح شاتمني رحت ضاربه و مشيت و سيبتله المحل... راح المدير واتحايل علي الراجل و باس الايادي .. ورجع اسلام بعد يومين... بيزوغ و لا بيرجع المؤسسة ولا بيروح المحل ...قوليلي اعمله اييييييييييييييييييه ... المدير بيقول للحد:( معلش ومش معلش و هكلمه ووعدني و مش هيعمل كد تاني ...و اسلام نجح للمرة المليون يثبت الحد دا و خلاهم يغيروا الشغلانة ... العيد قرب... المشرف قال للحد في يوم علي فكرة انا اهو وانت اهو اسلام مستني هدوم العيد و العيدية و هيطفش تاني .. يا راجل الله يسترها و يهديه ان شاء الله مش هيحصل .. و تحققت النبوءة ... جه العيد و اسلام هرب ....



فاتت شهور لحد ما واحد قابله من الولاد قريب من المؤسسة .. قاله انت فين قاله دي امي اخدتني وانا كويس.. رجع الولد قال للمدير والمشرفين و للحد ... اللي نسيت احكيه انه في الاول لما رجع اسلام .. بيكلموا امه علشان تيجي تشوفله حل تكلمه او تديهم عنوان ابوه يجي يستلمه .. امه قالتلهم انا مش امه انا خالته و مليش علاقة بيه و ابوه قالهم سلموه للقسم انا مش عايزه





اسلام بيختفي و بيظهر .. ساعات بيكون لابس حلو ونضيف و يقول انا عند اهلي و ساعات بيقول انا ضايع و في الشارع والله اعلم هو فين دلوقتي و بيعمل ايه ...



اسلام نموذج ممكن احكيلكم علي عشرات النماذج غيره .. مش كلهم شريرين .. فيهم نماذج ناجحة وفي بارقة امل في بعضهم



و للحديث بقية مع بارقة امل ان شاء الله :)

هناك 7 تعليقات:

Unknown يقول...

ربنا يعافينا ويكفينا الشر..مش قلتلك لازم نساعد العيال الي زي كده..والله حرام يضيعوا..لو اتجمعنا عدد وعرفنا نعمل خطوات صح ونأسس مشروعنا صح هنساعد ناس كتير مش شرط زي إسلام بس ع الأقل أطفال محتاجة ومش لاقية والملاجئ مليانة وطبعا انت عارفة ملاجئ الحكومة شكلها ايه الشارع أرحم منها..
يارب بأه نعرف نعمل للعيال الي زي دول حاجة خاصة إننا داخلين على رمضان..
كل ودي..وياريت دايما تستمري معايا..على فكرة والله أنا بلاقي نفسي في المدونة بتاعتك قوي..م الآخر كلامك بيريحني ويشدني

تحياتي

أميرة يقول...

الله يعزك يا ابراهيم :)

علي فكرة انا لم اقصد اني اذكر مثال سيء بالعكس ...اسلام .. انت نفسك لو عرفته هتحبه غصب عنك و بدون حتي ما تعرف ظروفه ..

انا طالما ابتديت هكملك .. هكمل حكاوي ولاد كتير اوي زي اسلام .. في منهم اللي احسن و اللي اسوء بكتير ..

وطبعا اسعدتني جدا المجاملة الطيبة اللي قلتها في الاخر و فعلا ربنا يعلم اني ارتبطت بناس كتيرة من اللي بيشرفوني و ينوروني و حسيت اننا بقينا زي اسرة وربنا يجعلنا دايما نجتمع في الخير و يديم بينا المعروف:)

(المهاجر الى الله) يقول...

ادعوك لزيارة مدونتى المتواضعة
www.eyuon.blogspot.com
وشكرا

bastokka طهقانة يقول...

يا لطيف معقول في كده في الدنيا!!!!!!!!!!!!!!!!!
ربنا يسلمنا و ينجي كل المساكين من مصير الضياع


اوروفوار

أميرة يقول...

في ناس كده و حوادت اسوء من كده كتير يا طهقانة

بس زي الاعلان ما بيقول

تعاطفك لوحده مش كفاية

وانا بقولك ولا حتي تبرعك بجنية كفاية

لو تقدر اتبرع بنفسك شوية وقت .. وانت الكسبان في الاخر والله

ahmed_k يقول...

ياااااه يا أليس
اللي يعيش يا ما يشوف
الولاد دول ضحايا لأسر قاسيه
لا تراعي الله في هذه الهبه التي وهبهم إياها
اللوم الول يلقى علي الأم والأب الفاجرين
الذين لم يرحما طفولة ابنهم ليشاهدهم على تلك الحال القذره والتي بالتأكيد أثرت في نفسيته أثر شديد
كيف يكون نبت مثل تلك الأسر غير نسخه منهم
هم وأمثالهم يخرجون للمجتمع مجرمين ولصوص بسبب فسقهم وفجورهم

نسال الله العفو والعافيه

قصه مؤثره جدا يا أليس
نسأل الله أن لا يؤاخذنا بما فعل السفهاء منا

ودمتي بكل خير

غير معرف يقول...

اسلام,,
مأساة تتكرر ,, فكل مجتمع ,,
اللوم على مين؟؟
للاسف على الوالدين ,,
على الام الي المفترض تكون الصدر الحنون ,,
و على الاب الي المفترض يوفر الامان و الرعايه,,

مانقول غير حسبي الله و نعم الوكيل ,,
و الله ييسر لمثل هالأطفال الأشخاص الأكفاء الي لهم القدره على احتواء مثل هالاطفال و فهم اوضاعهم و حالاتهم النفسية الصعبه ,,

أشكرك اختي ع كتابتك لمثل هالموضوع
و بأنتظار البقية ,,

اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع