الأحد، 28 ديسمبر، 2008

شريط

هي دي الدنيا .. شريط من تعبيرات مختلفة

فيها كل الوشوش .. تستعملها حسب الموقف

بس ساعات بنستهلك اشكال اكتر من غيرها




اعتبروا امبارح تخاريف مريض البرد مبهدله

السبت، 27 ديسمبر، 2008

غمضت

غمضت عنيا ودورت عليا

...

لقيتها ولا حاجة

...

غمضتها وحاولت احلم وانا صاحية

...

لقيتها مش بتعرف تحلم

...

غمضتها اكتر

...

وحاولت اتمني امنية

...

بدل حلم تايه مش لاقياه

...

يمكن يوم تتحقق

...

ولا حتي اتعلم احلم ..

********

دا بمناسبة 1430 هـ

الخميس، 25 ديسمبر، 2008

نقط

...

امتي الواحد ممكن يسكت

يحط مكان كلامه ......

متفرقش معاه اللي قدامه هيحط ايه مكان ال ......

!!!!!!

الأحد، 21 ديسمبر، 2008

الغضب




بما ان الكلام سهل اوي عن الفعل ...


سهل اقول او يتقالي لا تغضب
انما الفعل نفسه صعب اوي


اصلا الغضب دا في حد ذاته حاجة وحشة جدا ..
مش بس وحشة لما تبقي قدام واحد غضبان .. الغضبان نفسه احساسه وحش اوي وقتها

بما ان الغضب انواع او التعبير عن الغضب بمعني اصح

في اللي بيعبر عنه بالثورة - زعيق و شخط و نطر و سباب
في اللي بيداريه و بيحاول يكتمه جواه سواء قدر عليه و لا لا

المشكلة اني بكتمه بس النتيجة سيئة جدا


علشان غضب علي غضب بيعمل حاجات سيئة


ساعات بتظهر اعراض مرضية
- شد في المعدة
- وجع في القولون
- صداع
- ضغط بيعلي اوي او بينخفض اوي حسب الظروف



ساعات بتكتم الغضب اختياري - بمزاجك علشان مش عايز اللي قدامك يشعر بيه او حتي يكون هو المتلقي للغضبة دي

ساعات بتكتمه علشان مينفعش تغضب في الوقت دا


ساعات بتكتمه علشان لازم تكتمه و بس من غير اسباب


محدش مسئول عن غضبك ولا عن انك حصلك كده


يبقي تغضب قدام حد ليه

كتير بقول لنفسي كده .. و الاكتر بغضب وبس من غير ما اتكلم فيها مع نفسي حتي


كنت ناسيه ان في حديث عن الموضوع دا

"عن أبي هريرة رضي الله عنه ، أن رجلا قال للنبي صلى الله عليه وسلم : " أوصني " ، فردّد ، قال : ( لا تغضب ) رواه البخاري ."


وصية نبوية = أمر = حاجة واجبة التنفيذ من غير نقاش ولا جدال .. هو عنده حق .. بس هو اعظم خلق الله صلي الله عليه وسلم


وقفت محتارة قدامه .. الاكيد انه يقصد لا تغضب كثورة و غضب علي حد او قدام حد .. بس هل دا كان يشمل الواحد منهي كمان عن انه يغضب جواه ؟؟!!!!!!!!!!!!!


اعتقد اه

بس غصب عني مش بقدر


اكبر حاجة ممكن اعملها اغضب و اشتكي لو كان ينفع لحد قريب اذا كان ينفع (ودي تحتها مليون خط) و اغلب الاحوال بقول ايا كان الحد دا ملوش ذنب يشوفها

اللي يوجع باه اكتر من كل دا لما الغضب دا يكون من حد مهم بالنسبالك بيكون غضب مر .. حتي كتمانه و نسيانه بعد شوية مش بيضيع المرارة دي .. كتير بتفضل موجودة .. بس مرارة علي مرارة بتتدفن جوه اوي .. بتتنسي او بنحاول نتنساها علشان الدنيا مش هتقف علي دي .. لسه في غيرها عايز يشق طريقه لينا ............



كان قريب في فيلم Anger Management .. لقيتنا متشابهين في اننا بنكتم الغضب غير كده موصلتش لحل في ادارة الغضب زي العنوان ما بيقول ....
اعمل ايه اكتر من اني مش بطلعه من جوايا !!!!!!!!


ربنا يكفينا شر الغضب و الغضبانين و يلهمنا نعمل الصح وقت الغضب


كان النبي صلى الله عليه وسلم يكثر من دعاء : ( اللهم إني أسألك كلمة الحق في الغضب والرضا ) رواه أحمد

{ الذين ينفقون في السراء والضراء والكاظمين الغيظ والعافين عن الناس والله يحب المحسنين }
( آل عمران : 134 )


ختمت بيها علشان فيها الكاظمين الغيظ والعافين عن الناس و المحسنين
- اللي بيكتم غضبه و بيعديه
- اللي بيكتمه و بيعديه و بيعفو عن اللي اثار غضبه

- اللي بيكتمه وبيعديه و بيعفو عن اللي اثار غضبه و يدفع باللتي هي احسن و يقابل الاساءة بالحسني والمعروف وهو محسن

ربنا يجعلنا مع المحسنين

ويخليلنا محسن :)
كتبت دا علشان كنت عايزة الاقي حاجة تانية او حل ..
بس لقيت ان اللي بعمله بيحقق للغير اقل الخسائر و دا في حد ذاته مكسب لي

الاثنين، 8 ديسمبر، 2008

اللهم هذا منك واليك


هما حاجتين اللي بيحسسوني ان النهاردة مختلف


الاول تكبيرات العيد ودي بتفرح قلبي جداااااا


والتانية ودي الاهم التضحية



الحمد لله الحمد لله الحمد لله ربنا انعم عليا اكون من المضحين النهاردة الحمد لله


الخروف كان شكله جمييييييييل اوي لونه بني فاتح ووشه ابيض شوية .. كان شكله جميل اوي وفرحت اوي لما شفت ان شكله حلو .. اصله محجوز عن طريق حد مكنتش شفته الا لما رحت مع امي الظهر .. ما شاء الله الناس هنا بتضحي كتير اوي و بعجول كبيرة .. ان شاء الله ان احياني الله السنة الجاية ربنا يعين فيها


بجد الاحساس دا راااااائع


انا طول عمري بشوف الذبح متعودة عليه في بيت جدتي كانت بتجيب هي خروف و ماما بتجيب واحد .. و بعدين بعد ما توفاها الله ساعات بابا كان بيجيب هنا او ماما دايما بتجيب ،فمتعودة و بفرح اوووووي لحظة الذبح


بحس قلبي بيتخلع لما بفكر انه دا هدية لربنا... يارب يتقبله يااااااااارب


النهاردة وقفت يجي ساعتين علي ما جه علينا الدور و سبحان الله اول ما شفته كانت دموعي هتنزل بس مسكت نفسي .. والجزار اللي ماسكه من قرونه قبل دا كان بيشتم خروف تاني وهو مخرجه يتدبح ..قلت في بالي والله لو غلط فيه ولا حتي مسكه بطريقة توجعه هو حر باه مش هسكتله والله الا دا :( .. انا عايزاه يكون كويس ومحدش يأذية لا بقول ولا بفعل مش علشان مش فاهم يبقي يغلط فيه .. دا هدية لربنا .. حد يطول يجيب احسن حاجة يقدمها لله بس يارب تتقبلها يارب


الحمد لله .. قعدت احمد ربنا كتير اوي ان يسرها .. بجد ليها فرحة مختلفة لما تكون انت المضحي و فرحة مختلفة لما تضحي مع حد و فرحة مختلفة لما تشاهد الذبح نفسه وانت مش المضحي


كلهم عيشتهم و فرحتهم مختلفة فعلا


ماما قالتلي لما يجي يدبح قولي انتي اللهم هذا منك واليك .. علشان انتي المضحية .. قولتلها حاضر وقولتها بس دعيت ربنا بحاجات كتيرة .. كان اهمها انه يقبله واحس انه قبله


نفسي احس ان ربنا تقبل مني التضحية دي اوي .. هو عالم بنيتي فيها ايه و ان شاء الله تقبل


حسيتها ان شاء الله هتقبل لما شفته الله يرحمه و حسيته جميل اوي و فرحت بشكله .. كان نفسي يكون حاجة اكبر من كده .. ان شاء الله علي اد ما ربنا هيوسع عليا ان شاء الله السنة الجاية يكون حاجة كبيرة باذن الله


اللهم هذا منك واليك اللهم تقبل من كل من تقرب اليك بشيء ولو بذكر اخيه المسلم بخير


كل سنة وانتم طيبين و بخير يارب دايما

السبت، 6 ديسمبر، 2008

حرمنا..


اللهم إنا نحب لقاءك ،

ونشتاق لنظرة إلى وجهك الكريم ،

وقد حرمنا الحج بذنوبنا ،

وحرمنا المشاهد بمعاصينا ،

ووالله إن القلب ليحزن ،

وإن العين لتدمع لفوات الحج هذا العام ،

ونخشى أن نكون ممن قيل لهم : " اقعدوا مع القاعدين "

عفوك ورحمتك واكتبنا غدا من عتقائك من النار .

يا ولي النعم ( لا تحرمنا )

لا تنسونا من دعائكم ،

فرج الله كرب كل محروم

الله اغفر لكاتبه وناقله وقارئه

الخميس، 4 ديسمبر، 2008

دروس في الحب



دروس في الحب




جلس رسول الله صلى الله عليه وسلم مع أصحابه رضي الله عنهم وسألهم مبتدأ




أبي بكر




ماذا تحب من الدنيا ؟


فقال ابي بكر ( رضي الله عنه) أحب من الدنيا ثلاث


الجلوس بين يديك – والنظر اليك – وإنفاق مالي عليك



وانت يا عمر ؟



قال احب ثلاث :




امر بالمعروف ولو كان سرا – ونهي عن المنكر ولو كان جهرا – وقول الحق ولو كان مرا




وانت يا عثمان ؟





:قال احب ثلاث


اطعام الطعام – وافشاء السلام – والصلاة باليل والناس نيام



وانت يا علي ؟




قال احب ثلاث:




اكرام الضيف – الصوم بالصيف - وضرب العدو بالسيف





ثم سأل أبا ذر الغفاري:



وأنت يا أبا ذر: ماذا تحب في الدنيا ؟





قال أبو ذر :أحب في الدنيا ثلاث


الجوع؛ المرض؛ والموت



فقال له النبي (صلى الله عليه وسلم): ولم؟



فقال أبو ذر


أحب الجوع ليرق قلبي؛ وأحب المرض ليخف ذنبي؛ وأحب الموت لألقى ربي



فقال النبي (صلى الله عليه وسلم) حبب إلى من دنياكم ثلاث



الطيب؛ والنساء؛ وجعلت قرة عيني في الصلاة




وحينئذ تنزل جبريل عليه السلام وأقرأهم السلام وقال: وانأ أحب من دنياكم ثلاث


تبليغ الرسالة؛ وأداء الأمانة؛ وحب المساكين؛


ثم صعد إلى السماء وتنزل مرة أخرى؛ وقال : الله عز وجل يقرؤكم السلام ويقول: انه يحب من دنياكم ثلاث



لساناً ذاكراً ؛



و قلباً خاشعاً ؛


و جسداً على البلاءِ صابراً





الأربعاء، 3 ديسمبر، 2008

حديث


تتجلى عظمة الخالق..


في الحديث القدسي الشريف ..


قال الله سبحانه وتعالى:

يا ابن آدم جعلتك في بطن أمك.


وغشيت وجهك بغشاء لئلا تنفر من الرحم ..


و جعلت وجهك إلى ظهر أمك لئلا تؤذيك رائحة الطعام ..



و جعلت لك متكأ عن يمينك و متكأ عن شمالك


فأما الذي عن يمينك فالكبد..


و أما الذي عن شمالك فالطحال ..



و علمتك القيام و القعود في بطن أمك ..



فهل يقدر على ذلك غيري ؟؟


فلما أن تمّت مدتك..



وأوحيت إلى الملك بالأرحام أن يخرجك ..


فأخرجك على ريشة من جناحه..


لا لك سن تقطع ...


و لا يد تبطش..


و لا قدم تسعى ..


فأنبعث لك عرقين رقيقين في صدر أمك يجريان لبنا خالصا.


حار في الشتاء و باردا في الصيف .


و ألقيت محبتك في قلب أبويك..


فلا يشبعان حتى تشبع ...


و لا يرقدان حتى ترقد ..



فلما قوي ظهرك و أشتد أزرك ..


بارزتني بالمعاصي في خلواتك ..


و لم تستحي مني .



و مع هذا


إن دعوتني أجبتك..


و إن سألتني أعطيتك ..


و إن تبت إليّ قبلتك ..



صدق الله العظيم

الجمعة، 28 نوفمبر، 2008

تسع معلومات الأجر

بكرة السبت اول الايام المعلومات

يسن فيهن الصوم و الصدقة و البر و الاحسان و التراحم و وصلة الارحام والتكبير والتهليل و التضرع والدعاء وفعل كل خير قدر الاستطاعة

منظر حجيج بيت الله الحرام في صلاة الجمعة لا يوصف مهما بلغت بلاغة و طلاقة المتحدث

اللهم تقبل منهم و اجعلهم وايانا من عتقاءك في هذه الايام الكريمة الطيبة

يا رب اجب دعوة كل داع منهم ومنا

يارب استجب فنحن قد اتينا اليك بقدر استطاعتنا من اعمال و بما رزقتنا انت من طاعة نوفيها لك

اللهم ان كانوا قد رزقوا الحج فارزقنا نحن قبول ضعيف اعمالنا و اعنا علي فعل احسن ما يرضيك عنا

اللهم انك قد رزقتهم الوقوف في هذا المكان المبارك

ورزقتنا ان ننظر اليهم ونغبطهم علي هذه النعمة العظيمة

اللهم ارزقنا استجابة دعائنا فلا نملك غيره

اللهم ارزقنا ان نطيعك بما يرضيك عنا

اللهم اغفر لنا جهلنا و خطأنا و اسائتنا و غفلتنا

اللهم ان كان بين المسلمين من اخلص في دعائه في هذا اليوم اللهم اجعل باخلاصه هذا اجابة لادعية اخوانه واخواته المسلمين

اللهم انت تعلم المذنب والمسيء و انت تعفو وتغفر وتسامح و تتوب علينا

يارب ان كنا قد حرمنا هذا الموقف حتي الأن

اللهم فارزقنا وقفته قبل ان تقبضنا اليك فنأتيك و نحن نلبيك ونحمدك ونشكر نعمك فتغفر لينا و تعفو عنا

اللهم هذه اخر ساعة في يوم عظيم
اللهم ان كانت ساعة اجابة فانت اعلم بحاجة كل منا

اللهم استجب يا مجيب فليس لنا سواك ندعوه

اللهم ارحم اموتنا واموات المسلمين و اشفي مرضانا ومرضي المسلمين و احشرنا مع سيد الخلق اجمعين صلي الله عليه وسلم

اللهم آميـــــــــــــــــــــــــــــــــــــــــــــــــــــــــــن

__________

لا تنسونا والمسلمين في الدعاء فلا يعلم من ينول الاجابة بدعاء من الا الله فهو وحده العليم

اللهم أعنا علي ما يرضيك

الخميس، 27 نوفمبر، 2008

أيام الله المعدودات

روي الترمذي وابن ماجة أن رسول الله صلى الله عليه وسلم قال :ـ
ما من أيام أحب إلي الله أن يتعبد فيها من عشر ذي الحجة يعدل صيام كل يوم منها بصيام سنة ومقام كل ليلة منها بقيام ليلة القدر .


وقد روي الإمام البخاري في صحيحه عن فضل الأيام العشر أن الرسول صلى الله عليه وسلم قال :ـ
ما من أيام العمل الصالح فيها أحب إلي الله عز وجل من هذه الأيام قالوا يارسول الله ولا الجهاد في سبيل الله ؟ قال : ولا الجهاد في سبيل الله إلا رجل خرج بنفسه وماله ثم لم يرجع من ذلك بشئ

وهذه الأيام سماها الله تبارك وتعالي بالأيام المعدودات وذلك لأن أيامها معدودة وفيها من الخير والبركة ما فيها

ففيها "يوم التروية " حيث المبيت بمني

وفيها" يوم عرفه " وهو الركن الأساسي للحج


والرسول صلى الله عليه وسلم يقول :ـ
(الحج عرفة)

ويستحب أيضا صوم يوم عرفة لغير الواقف بعرفة .


وصيامه يكفر سنة ماضية وسنة مستقبلة

وفيها " يوم النحر" حيث افتدي الله سبحانه وتعالى سيدنا إسماعيل بذبح عظيم

ولهذا كانت الأيام العشر من أفضل أيام الله عز وجل

ويكفيها فخرا وشرفا أن الله عز وجل أقسم بها فالله سبحانه وتعالى لا يقسم إلا بكل عظيم . (( منقول))



هل من :
صــــائم
ملـــــبي
مكـــــبر
مهــــلل
قـــــائم
ســـاجد
راكــــع
مستغفر
داعـــي
تـــائب


لا تنسونا من دعائكم :)

الأحد، 23 نوفمبر، 2008

اعلانات مقارنة

==========> أقم صلاتك <============


اكيد بتشوفوا اعلاناتهم

لحد قبل ما ادخل الموقع وانا متخيلة ان دي اعلانات القناة نفسها

مكنتش اعرف ان دول :-

" شباب اتجمعوا وفكروا و اشتغلوا لدينكم ودينا"


بجد مكنتش متخيلة ان ورا الاعلانات دي افراد همهم خدمة دينهم و توعية غيرهم

اعلاناتهم مؤثرة جدا
( للي بيحس طبعا او اقدر اقول اللي ربنا عايزهم يحسوا مش اللي ربنا قال عليهم " بل ران علي قلوبهم"- الله يعافينا)

بجد

الله يجازيهم خيرا علي مجهودهم و تعبهم و من قبل علي نيتهم و يجعله في ميزان حسناتهم

دي ناس تفرح

كان في ناس بيجتمعوا في اماكن متفرقة يناقشوا موضوع القدوة .. و كتير كانوا بينتهوا لان الزمن دا مفيش قدوة خلاص واللي بيشوفوه الاجيال الجديدة مجرد نماذج سيئة و فين و فين لما يدوروا في القديم علي ما يقدروا يطلعوا قدوة

( بتكلم علي الزمن دا مهو اكيد معدمناش نماذج كويسة يحتذي بيها - ناس مشيوا علي خطي الحبيب صلي الله عليه وسلم و عرفوا طريقهم و سكتهم و حاولوا ينوروا الطريق لغيرهم )

لا اب ولا ام هينفعوا قدوة طول ما ولادهم شايفنهم بيقولوا حاجة وبيعملوا حاجة تانية - هيسقطوا من نظرهم
اب بيقول لابنه متسرقش وهو مرتشي
ام بتقول لبنتها متكذبيش وهي بتكذب علي ابوها
دول ابسط امثلة و الاسوء كتير بما يفوق الحصر

الحلو في الشباب دول انهم عرفوا يوصلوا صوتهم براهم

و مش بس كده دا وصل للعالم كله من خلال مادة اعلانية بتتفرض علي الكل في وسط ما هما بيكونوا متابعين حاجة علي القناة دي

وفي مقابل دا تلاقي نفس القناة بتذيع بعدها اعلانات لشباب اسوء قدوة و اتفه مما يمكن و اخرها كلمة *استرجل*

هما اه محتاجين يسترجلوا صحيح بس عمره ما كان بالاكل ولا بالشرب


محتاجين يتعلموا يبقوا رجالة ازاي بعقلهم و تصرفاتهم مش لمجرد شربهم بيرة و جريهم ورا البنات ( اوك بلاش بيرة نقول ماء شعير - من غير كحول ... كده كويس؟ ) بردة النتيجة واحدة اعلانات منفرة

انا بيتهيالي بردة لو كنت شاب كنت هبصلها انها تافهه جدا كمحتوي وفكرة بغض النظر عن كونها اعلانات لمشروب زي دا ولا حتي لو بيعلنوا عن اي سلعة تانية

احييهم علي الدعوة بتاعة " استرجل " بس دي متتسماش رجولة

لو عايزين يتفرجوا علي الرجولة دي ممكن يستنوا الاعلان اللي بعدهم هيشفوها دا ان كان لهم قلوب يبصرون بها

كلام مثالي شوية؟؟

دي ابسط حاجة تتقال

بس ارجع واقول اللي ربنا مش عايزه عمره ما هيحس باي كلام من دا مهما اتقاله

" انك لا تهدي من احببت ولكن الله يهدي من يشاء "

الله الهادي وهو المستعان علي ما يصفون

الأحد، 16 نوفمبر، 2008

هل من مساعدة؟

المرة دي بسجل حفظي لحقوق المؤلف الأدبية وفقا لاتفاقية حماية الملكية الفكرية :)


معلش اصلي تعبانة فيه

الغرض الاساسي هو طلب المساعدة من الاخوة و الاخوات فيما يخص اللغة العربية و من هم أهلها

يعني لو حد شايف الجملة صياغتها مش اد كده او في همزة ، فاصلة ، نقطة ، او اي حاجة المفروض اضيفها و ناقصة يكون كتر خيره لو لفت نظري ليها

و طبعا يا ريت لو حد ليه رأي في حذف او اضافة جملة حسب سياق النص

المهم مراعاة ان دي لازم تكون مناسبة كورقة بحثية اكاديمية

وجزاكم الله خيرا علي المساعدة مقدما :)

TIA معلش دي ملهاش دخل بس افتكرتها اصلي دوخت ورا التلات حروف دول اختصار لايه من كام اسبوع كده واحد يهودي غتت كان باعت ايميل لواحد زميلي و كاتبها في اخر الكلام و هو مفهمش فقال يسألني وانا دوخت علي ما عرفت يقصد ايه البيه وطلعت في الاخر Thanks In Advance .. يمكن حد يصادفها اهو اعتبروها مشاركة معلومة لوجه الله :)

نروح للمهم باه

انا بس هعرض المقدمة بدون اللي قبلها ولا اللي بعدها مؤقتا مع العلم ان المقدمة دي فيها اجزاء مش مريحاني اساسا من بابها :(

___________________________________________________________

الفصل الاول

دور الادارة اللوجستية لمحطات تصدير الخضر والفاكهة في تحقيق المزايا التنافسية للصادرات البستانية المصرية

(دراسة حالة لمحصول الفراولة)

مقدمة:


إن تحقيق الميزة التنافسية للصادرات البستانية المصرية هو هدف رئيسي للمهتمين بالسياسات التصديرية في مصر ، تتميز مصر بموقع جغرافي متميز و عوامل مناخية خاصة و كذلك خصوبة تربتها و عوامل أخري متعلقة بأنها لديها القدرة علي تحقيق ميزة تنافسية للصادرات البستانية من الخضر والفاكهة مثل البطاطس و الفاصوليا و الخرشوف و البصل الاخضر و الفراولة و العنب و الموالح و الخوخ .. إلخ

إن تمتع مصر بزراعة و انتاج العديد من المحاصيل البستانية مثل البطاطس و الفاصوليا و الخرشوف و العنب و الفراولة و الخوخ ، و قرب مصر من أسواق الدول الاوروبية و كذلك الاسواق العربية و الخليجية خلق لها العديد من المزايا التنافسية. ويعمل واضعي السياسات الخارجية في مصر علي تحقيق اكبر استفادة من هذه الميزة التنافسية لأخذ مساحات تسويقية في هذه الاسواق مما سيعود علي الدولة بالعديد من الارباح و الفوائد .

إن الاستفادة من المزايا التنافسية لدي مصر لجعلنا نهتم بمفهوم الادارة الجيدة لمحطات تصدير الخضر والفاكهة ، حيث ان هذه المحطات تمثل حلقة حيوية في سلسلة الإمداد للصادرات البستانية. و كذلك فإن هذه الحلقة تعد مفتاح المعادلة التي يكون طرفيها هم الادارة الجيدة للمحطة التصديرية و النجاح للإدارة مما يؤدي الي نجاح المنشأة التصديرية و تعظيم لأرباح المنشأة التصديرية و تقليل التكاليف ، وبالتالي فإن عدم وجود الإدارة الجيدة للمحطة يجعل النتيجة الحتمية هي انهيار المنشأة التصديرية .

تهتم الدراسة بإبراز دور الادارة اللوجيستية لمحطات تصدير الخضر والفاكهة في تحقيق المزايا التنافسية للصادرات البستانية المصرية ، و إيضاح الوسائل التي يجب أن تتبعها الادراة في تحقيق الكفاءة و الجودة المناسبة مع تقليل التكاليف اللوجيستية بما يؤدي الي تعظيم أرباح المنشأة التصديرية.
____________________________________________
دا الجزء اللي مش عارفة اكتب اوله كويس :(

الجمعة، 14 نوفمبر، 2008

Just a phone call

Hello my dear

Oh ! hi , how is everything?

All is OK . How r u ?

Not so bad , I'm still alive

I've brought u the Deutsch books for your young man ;) I left them with the bawab, check it on Sunday.

Oh,thanx alot , I really appreciate it

Not at all , I don't need them anymore

Thank u. My sister-in-law will be happy 2 have them

Oh, never mind ... How is work?

As usual :(

Strawberry business started, ha ?

Yep , just at z beginning

I've talk 2 ur people that u need someone 2 help u .. what u r doing is too much for one 2 do!!

Hahahahaaaaaaaaaaaaaaaaa , what did they say?

They made me mad ,, stupid people

Why my dear ? :) what did they say?? :D

They said , "well , we know this is too much for her but we want to put more load on her, no need to worry, we'll get best results as usual , she can do it , don't bother urself .. She's done it before and she can do it again and again."

hahahaha , OK OK we shall see.. I sweared I'll make them pay for it :D

Are you leaving?

Seriously , sure I will . I'm just waiting to something to happen and meanwhile obeying my mum as she had dreamt of someone telling her not to let me resign now. So be it .. If not today it will surely be tomorrow , just wish me luck :)

If u're leaving in the middle of the strawberry season , this will make them lose money , lots of money indeed

Yes , I know it and I sweared they shall pay for it.. wish me luck

I totally approve it , they deserve it .. Good Luck

I know it , there is always a time set for every and each thing to be done as scheduled .. I'll wait for it

Lets check about trucks , new charges and other logistics issues on Sunday

Ok , so be it . I'll wait for ur call then

Ok . Have a nice day

U too my dear , bye

***********

Just a little chat with a collegue in a sister company :)

وشهد شاهد من اهلها حتي ولو كان ألماني :)الكلام دا مش اكتر من تدوين لمكالمة حبيت اسجلها

يارب يحمل اليوم دا الخير يااااارب

-------------------

هي المكالمة دي سرها باتع اوي كده :)

الناس اللي دخلوا المدونة من ساعة ما نشرتها ما شاء الله كتير

ممكن استغلكم لو تسمحوا و تدعوا لسيف ربنا يشفيه و يعفو عنه و يباركلي فيه وميحرمنيش منه

____________________________

الجديد: (لسه مش عارفين ايه نتيجة التحاليل لانها المفروض كانت هتطلع اخر اليوم بس طبعا الدكاترة خلصوا شغلهم والنهاردة السبت و بكرة اجازة )

(قدر الله وما شاء فعل و لعله خير ان شاء الله )

(هنستني ليوم الاثنين ان شاء الرحمن)

(اللهم اجعله خير يااااااااااااااااااا رب )

الخميس، 13 نوفمبر، 2008

الرحمة + البركة بالشباب

بقالي كتير متفرجتش علي حاجة في التليفزيون

اتكعبلت بالصدفة في كام اعلان كده بجد احترمتهم جداااااااا

حملة الرحمة دي رائعة

تحت عنوان

ارحموا من في الارض يرحمكم من في السماء
الراحمون يرحمهم الرحمن
من لا يرحم (بفتح الياء) لا يرحم (بضم الياء)

ومن عندي الدعاء المناسب للحملة دي

"اللهم لا تسلط علينا بذنوبنا من لا يخافك فينا ولا يرحمنا"

الدعاء دا بالنسبة لي كتير بيكون طوق نجاة بس مش عارفة ليه ساعات كتيرة بيتوه عني وبتوه عنه بس بيعوضه شوية " اللهم اكفينيهم بما شئت و كيف شئت انك علي ما تشاء قدير"

الرحمة دي مهما اتقال عليها بتفضل بحر واسع مهما اتعرفت ومهما اتقال عليها بتعدي علي الواحد لحظات بيحس فيها بمعني مختلف كل مرة و كلهم بيدوروا في فلك الكلمة الجميلة دي

اللهم ارحمنا برحمتك الواسعة التي وسعت كل شيء



-----------------------------------------------------------------------------------
الاعلان التاني تحت عنوان البركة بالشباب

صحيح البركة بالشباب بس لما يكونوا شباب اصلا

الشباب من سن المراهقة اصبحوا دلوقتي شيوخ
شاخوا قبل الاوان و عجزوا و اصبحوا شيبا بالفعل والهيئة والتصرفات

علي اد ما الاطفال دلوقتي اصبحوا متطورين يعني حتي سيف ابن اخويا ابو سنتين و نص اللي بيعرف يفتح الكمبيوتر لوحده و عارف شكل الفولدر اللي فيه الالعاب بتاعتهم علي اد ما اصبحوا ما شاء الله متقدمين علي اد ما لما بيكبروا بيكونوا عاملين زي القنابل الموقوتة محدش عارف امتي هتنفجر او ان كانت هتنفجر ولا لا و بقينا في حالة ترقب وقلق من كل حاجة

محدش اصبح يأمن لحد .. واحدة نازلة من بيتها تركب العربية قرب منها واحد سرق موبيلها وشنطتها وضربها بالقلم و سابها ومشي .. واحد راكب عربيته وواحد قرب منه في اشارة و افتعل خناقة و شتمه فالتاني نزل من عربيته و في ثواني كانت شنطته وموبيله متاخدين من العربية و و و و و و و

انا عن نفسي بقيت بترعب لما اكون في اشارة وحد يقرب من العربية و لو شحات اللي بيبقي في عز شبابه و زي الحصان و مفيهوش حاجة و عامل عبيط او بيستهبل علشان ياخد اي فلوسه .. لا جار و لا زميل ولا اي حد بقي مضمون 100%

بيتهيألي كان زمان لما حد بيحصله حاجة بيجري علي شقة الجار يستنجد بيه .. دلوقتي بيعدي من جنبك و بيستخسر كلمة السلام عليكم ولا حتي رد السلام عليك .. بينرفزني بس برجع اقول احسن انك مردتش في ملأ خير منك ردوا السلام :)

نفسي ميبقاش مجرد اعلان عن همة شباب و حماسهم في تطبيق تعاليم دينهم .. الاعلان رائع و يفرح بجد لو في فعلا شباب كده .. اكيد في بس في انقراض !!

------------------------------------------------------------------------------

اعرف واحد بلجيكي تربطنا علاقة عمل من سنين ..هو راجل محترم و عقليته كويسة كان عندي قريب ولقيته بيجيب سيرة الحجاب و المسلمين في بلجيكا فاتكلمت معاه علي اساس اني حرة البس طويل زي ما غيري حرة تلبس او تقلع قالي معاكي بس بلاحظ حاجة مش عارف هتوافقي معايا ولالا .. ان المسلمين برة بيحاولوا يظهروا بصورة ملفتة تمسكهم بدينهم .. يعني بيهتموا بالمظاهر اكتر ما هو بالجوهر لمجرد اعلان انهم مسلمين
قولتله يمكن يكون جزء من دا صحيح علشان مش عايزين يتوهوا في وسط الزحمة و خصوصا انهم في مجتمعات مختلفة عن كل اللي اتربوا عليه و عاشوا فيه سنين .. لقيته بيقولي امتي البنت بتتحجب ؟؟ انا قرأت القرأن و عارف و فاهم هي امتي بتتحجب و بتتجحب ليه بس اللي مش قادر افهمه ليه واحد يلبس بنته اللي عندها 5 سنوات حجاب وهي رايحة المدرسة .. وكمان لما تكبر حبة تلبس نقاب .. انا قرأت القرأن و فهمت ليه البنت الكبيرة بتتجحب انما الطفلة ليه وهي مبلغتش سن الحجاب!! بصراحة ملقيتش رد غير يمكن رغبة في انهم يربوها علي انها تكون مستورة من وهي صغيرة في وقت كل حاجة بقت مباحة و يمكن علشان تبان انها مسلمة و يمكن حاجات كتيرة في عادات و تقاليد الناس اللي بتتصرف كده مش هيعرفها الا هما .. هو احترم الكلام و بيتعامل مع المسلمين من منطلق انهم بشر ليهم حسنات و سيئات علي الرغم من اعتراضات الناس حوليه علي تعامله مع المسلمين ... و يبقي السؤال .. في كام واحد زي الراجل دا برة شاف من المسلم الكويس و احترمه وقدره و عرف الوحش وعرف ازاي يتجنبه؟!!

_________________________________

ادعوا لسيف ربنا يشفيه ويعفو عنه والنتائج تكون خير ان شاء الله

يارب أسالك لطفك في قضائك يارب

الخميس، 30 أكتوبر، 2008

الفاشلة نجحت باين

يقـــــــــال
والعهــدة علي الـراوي



"الفاشلة نــــجــــحـــــت"
اه والله انا اتقالي كده امبارح بليل :)


هو انا كنت شميت خبر من اسبوعين بس الحمد لله كانت احداث الاسبوعين السوداء لونا و فعلا كفيلة تنسيني اسمي

بس طبعا سيف كان الوحيد اللي عارف من اسبوعين :)


المهم يعني الخبر دا بيقول الأتي :-


مبروك يا فالحة نجحتي في التيرم الرابع والاخير



قلت الحمد لله اهي حاجة جبر خاطر من الجبار.. الحمد لله


قالوا لا مش كده

الفاشلة طلعت الاولي

و أل ايه جابت امتياز كمان :)
و طبعا ناقلي الخبر منسيوش ينكدوا علي زيادة و يفكروني بالكابوس الاسود اللي عليا و معملتهوش ألا و هو الرسالة اللي عاملة زي العمل الرضي كده :(


بس الحمد لله علي كل حال

انا قولت انقل الخبر كما جاء و العهدة علي الراوي

واخر دعوانا ان الحمد لله رب العالمين

____________________

محدش يقول لحد باه علشان انا مقولتش غير هنا ومش ناوية اقول علشان مش هتفرق ف اي حاجة برة هنا .. او يمكن اقول لماما لو هي افتكرت وسالتني علي النتيجة وبما انها ناسية الحمد لله فخلي الموضوع بيني وبينكم .. ومحدش يقولي روحي فرحيها و فرحي اهلك .. انا جربتها بدل المرة 3 قبل كده و كل مرة كان فيها حفلة و تكريم و كان رد الفعل من اسوء ما يمكن مجرد تمثيل قدام الناس مش اكتر .. هي ماما اللي حسيتها فرحانة من قلبها .. بس انا لو قولتلها تبقي مصر واللي في العالم العربي عرفوا .. وسيف هيتكفل باوروبا و الامريكاتين :)

الحمد لله رب العالمين

__________________________

تحديث علشان محتاجة طلب او رجاء

الرجاء بالدعاء ربنا يهديني للطريق اللي فيه الخير علشان انا محتارة حيرة لا يعلم بيها الا الله في موضوع الاستقالة دي .. قعادي له مساويء كبيرة وبردة استقالتي ليها مساويء كتيرة .. يارب بصرني اعمل ايه !!

الثلاثاء، 28 أكتوبر، 2008

فاشلة

هيجرا ايه يعني لو عملت مذكرات ابنة فاشلة

هي حقيقة لا مفر من الاعتراف بيها .. هو مش فاشلة من الطرفين


انا فاشلة من طرف واحد ولو جبتله نجمة من السما .. بردة فاشلة


الفشل لو في نظر العالم كله بيعتبره نجاح عنده انا مليش غير تعريف واحدة = فاشلة



انا مش عايزة ابقي حاسة اني تجردت من خصوصيتي بس جواي غربة قوية اوي( والله كنت اقصدها رغبة بس وانا براجع الكلام لقيتها غربة ودي مناسبة بردة ) اني اعترف باني فشلت بكافة الطرق و خصوصا اننا خلاص وصلنا لمفترق طرق .. هو وضع فيها نقطة النهاية full stop و المفروض ابتدي من اول السطر لوحدي ..

بالظبط شكلي دلوقتي زي اللي ايده مربوطة ورا ظهره و في كمامه علي فمه و مصر يحاول يصرخ .. او واحد بيصرخ في وسط الصحرا في عز الشمس ولا عمر حد هيسمعه ولا الصراخ هيحميه من لسعة الشمس الحارقة

بقالي عمري كله بهرب من اللقب دا مش ببالغ هو انا مجيئي للدنيا كان بامر من الله ولكنه لم يكن علي هواه ولا عايزه و استمر رفضه لوجودي طوال السنين مع اني حاولت وربنا اللي يعلم ولحد من ايام كنت بحاول

بس خلاص لحد كده .. اللي عملته و حصل ربنا عالم بيه هو وحده يعلم الحق فين ..

بدون التفاصيل شكلي اكيد من الابناء والبنات العاقين و امرنا الله ببر الوالدين و كنت محافظة علي امر الله قدر الامكان والله اعلم يمكن اقدر احاول فيه تاني بس دلوقتي لا مش هحاول ومش هعمل حاجة .. مش هغضب ربنا ولو بنظره وهو عالم بيا ويعلم الله اني مش هعملها علشان خاطر ربنا بس مش لاي سبب تاني

ساعات بنفتقد ناس في حياتنا او بنتمني وجود ناس في حياتنا ..

صورة لشخص تتمني يكون هو دا اللي تعيش معاه

قصة سمعتها تتمني تكون بطلها

بس هي ثواني و تفوق و تعرف ان ربنا اراد ليك الحياة دي بالشكل دا

الخبر الكويس الوحيد في مشوار فشلي معاه دا اني واخيرا وبعد سنين انتزعت اعتراف باني علي حق او هو مش انتزعت هو انا اهديت هذا الاعتراف من القريبين مني او علي الاقل اللي ابتدوا يحسوا المشكلة فين .. انا معنديش مانع الناس تظلمني وتعتبرني غلطانة لو دي ارادة ربنا وعلشان معملش اللي يعتبر غلط فعلا لما احاول ابرر افعالي .. هو ربنا الرقيب شاهد و عالم وهو وحده العدل

احسن نعمة مرتبطة بالموضوع دا و غيره طبعا والحمد لله عليها اوي اني بتكتم و بسكت مهما حصل .. بعتبرها نعمة و غيري بيشوفها سلبية بس هي نعمة طالما بتخليني اعمل حاجة تبعدني اني اعمل حاجة تغضب ربنا او ارتكب ذنب .. بس اصبحت مشكلة دلوقتي علشان بقت تتسبب في امراض :( الحمد لله علي كل حال

شكلها مش هتنفع مذكرات ابنة فاشلة دي علشان لو اتكلمت هلم شوية ذنوب في السكة :( وانا مش ناقصة .. يكتفي بهذا القدر الي ان يقضي الله امرا كان مفعولا.. وربنا يسامحني لو اسأت لاي حد من قريب او من بعيد

_________________________

تحديث :-

قدر الله وما شاء فعل

مش انا عملت فالحة و راجل وقولت مش هحاول تاني وبتاع .. ربنا جابها من عنده و رجلي فوق رقبتي و خلاني اروح اعمل حاجة احتسبتها عند الله وهو اعلم بنيتي لعلها ترضيه !! ( ترضيه دي مش علي الله .. لو علي رضا الله انا احتسبتها خلاص وعلي يقين ان الله لا يضيع اجر من احسن عملا )

علي راي امي عن ام امي الله يرحمها .. ربنا مش بيتعاند .. الامر لله

الثلاثاء، 21 أكتوبر، 2008

أخ ولا آآآآآآخ

بهرب من الكلام في موضوع حساس و شائك و سؤال مركبني الصداع بقاله كام يوم ..

هو ليه ربنا خلق الانسان و جعل له اخ او اخت مع ان اول اخ في البشرية قتل اخوه !!

امرنا الله بصلة الارحام و مع ان كل الارحام تقريبا عايزة تتقطع ومش بتفكر تتوصل الا من رحم ربي !!

ربنا قال ادفع بالتي هي احسن .. ولما تقدم الحسنة و تلاقي المقابل كله كله سيء .. بيتهيالي ساعتها مش هتقول الا انت شاهد يا ربي و حرمت الظلم علي نفسك وجعلته محرم بين الناس بس في من الناس من يتخذ الظلم سبيله في الحياة .. الله يهدي !!

ولابد من يوم هيكون تترد فيه المظالم .. ابيض علي كل مظلوم واسود علي كل ظالم .. ( دا علي ما فاكرة اعتقد تتر مسلسل مش فاكرة اسمه) بس جه علي بالي بالمناسبة الهباب اللي اتدبست فيها..

اول مرة في حياتي ادعي علي حد و دعوة الصائم ان شاء الله لا ترد ,,, للحق هي تاني مرة بس اول مرة ادعيها وانا متاكدة اني مليش يد ولا متسببة باي حال في حدوث الظلم دا .. ولو انها مش دعوة عليه بالمعني الصريح .. دعوة الله باسمه المنتقم و اسمه الجبار احب اسماء الله الي قلبي .. الله ينتقم من كل ظالم و يهديه ان شاء ان يهديه وان لم تكن مشيئته في الهداية فادعو الله ان يهديني انا الي الصبر علي ابتلائه ...

احلي جبر في اخر يوم زي اللي عدا دا موضوع رااااااااائع لقيته بالصدفة بس ريح قلبي و دا في نظري اجابة الله الجبار و جبر خاطر و طبطبة من رب رحيم .. الحمد لله رب العالمين

موضوع كتاب الله....... اول مرة ادخل المدونة دي ولعلها فعلا جبر خاطر من الله ..

انا شفت كذا مأساة في مشاكل الاخوات ببعضها .. شفت الاخوة عن حق وشفت اللي بيستغني باسرته الجديدة عن القديمة و شفت اللي بيفضل مصلحته علي مصلحة الكل و شفت اللي بيفضل الكل علي نفسه و شفت اللي بيراعي ربنا في اهله و اهل اهله و شفت نماذج كتيرة لأخوات منهم الكبار و الصغيرين و حاولت ادور علي اجابة ...

ليه لما يكون اللي بيجري في دمهم نفس الدم و قسموا سوا نفس اللقمة .. ليه بيعملوا كده في بعض !!!

علي كل حال ... اللهم لا اعتراض ولعله خير محدش عارف ...

وعلي رأي سيف لما بيقولي الواحد مهما حصل اول ما بيتوجع بيقول "آخ" ....

بس دا سيف = ملاك في صورة بشر ..

انا شريرة و قلبي اسود و لما بتوجع بقول بحبك يا أخي علشان دمي ودمك من امي ربنا يخليها وتستحملنا دايما وبردة اللهم لا اعتراض ..

الاثنين، 20 أكتوبر، 2008

برطمة حول الحوض

المصريين بيضحكوا علي الطلاينة والطلاينة بيضحكوا علي المصريين

دا ملخص اللي طلعت بيه من seminar ملوش لازمة حضرته امبارح عن منطقة التجارة الحرة في حوض البحر المتوسط ودوله

المصريين متلخصين في حد من وزارة النقل و المشاريع الوهم اللي بيحكي عليها و هنعمل و نسوي واصلا اصلا احنا معندناش اساطيل نقل في اي صورة و دا عمال يتكلم عن النقل متعدد الوسائط اللي هو اصلا بالنسبة لينا زي الحلم كده بعد ما يقرروا اصلا يبقوا ناس بتخاف علي بلدهم و مصالحها ( دا ان فكروا ف كده)

احنا معندناش حاجة عدلة في النقل خالص

الجوي : زفت و مصر للطيران طبعا لها باع في مرمطة الركاب والبضائع .. يعني حدث ولا حرج
البري : زفت الزفت ومعندناش اساطيل نقل بري و يادوب شركة محتكرة النقل المبرد بتحط الاسعار علي كيفها ولو حد صغير بيلعب معاها و بردة مفيش حاجة تحكمهم ولا تحكم شغلهم ولا تأمين ولا حاجة تربطهم الا ضمائرهم ( ان وجدت )
البحري : الاسوء علي الاطلاق دا اساسا لو لقيت السفينة المصرية .. كله اجنبي و لو دفعولي فلوس اصلا مش هشحن علي مصرية بقالها ميت سنة و لا صيانة ولا حد بيسال فيها

وشوية وواحد تاني من ميناء اسكندرية و طبعا اشاد بزيارة الرئيس لافتتاح التطويرات والانجازات .. الحقيقة الصور حلوة اوي بس متاخدة من 2006 وبما اننا في اخر 2008 يعني عيب يكونوا حاضرين حاجة زي كده و يحطوا في عرضهم للتطورات صور قديمة من سنتين .. الله وحده يعلم شكلهم ايه دلوقتي.. ما علينا ( ربنا يهني سعيد بسعيدة ) اهو ميناء الاسكندرية دا بردة ساترنا قدام الناس .. احسن من مفيش

كلام كلام كلام .. و ال ايه مش هتكلم عن ال80 مشروع اللي احنا بصددهم دلوقتي ( دا بتاع النقل) .. حسبي الله ونعم الوكيل .. سنين و سنين و الاساسات بتتبهدل و لسه بتدور علي رفاهيات و انت اصلا عايز تعمل بنية تحتيه جديدة بدل اللي اتمرمطت دي..

انا كنت قاعدة في الاول مستمتعة جدا لما الايطالي كان بيتكلم وانا مجبتش ناقل الترجمة :) عارفة انه رغي واي كلام وانا دماغي كان فيها كام مشكلة عمالة تتنطط فيها .. بس لما اتكلموا المصريين الطلاينة قلبوا انجليزي و طلع الحال من بعضه

الايطاليين كمان بيرغوا و بيمنونا نفس الاماني اخت اللي بيمنينا بيها بتوع النقل هنا .. لايق عليها اوي المثل بتاع ( زغرتي يا اللي منتيش غرمانة )

بعتذر عن الكلام بحدة او لو قولت كلمة مش اد كده بس المشوار كله حرق دمي ..

بس في ميزة .. واحد ايطالي قال كلام لطيف اوي : " مينفعش نقول اننا من افضل الناس كمقدمي خدمات لوجيستية .. بس احنا دورنا علي الناس اللي اثبتوا انهم افضل و دورنا عملوا ايه علشان يقولوا علي نفسهم كده و حاولنا نشوف ظروفنا وايه ينفعنا علشان نستحق لقب الافضل من العملاء مش احنا اللي هنقول علي نفسنا كده .. " راحوا للاكثر خبرة منهم و سألوهم و درسوا هما عملوا ايه علشان يتفقوا و يوفروا فلوس و وقت !!

ولو حد حضر هيضحك كمية ضحك علي جدول عملينه بتوع ميناء الاسكندرية عن كمية الاجراءات قبل التطوير والتوقيعات و بعد التطوير

في جهة حكومية منهم كانت بتاخد 38 اجراء و 28 توقيع علي الشحنة الواحدة و ال ايه المفروض دلوقتي اصبح اجراء واحد بدون توقيعات ( طبعا كله كلام ف كلام )

بس يعني اللي اعلنوا عنه انه 38 اجراء دا بيعملوا ايه في الورق .. وال ايه كمان دلوقتي التعامل من خلال شباك واحد في الجمارك و تقدر تروح one stop shop تخلص منه كل حاجة في دقائق وانت واقف ............. حاجة من اتنين يا المتكلم يا المستمع فيهم حاجة غلط وانا اعتقد والله اعلم اني مش مجنونة اوي يعني لسه بعقلي في شوية حاجات ... حسبنا الله ونعم الوكيل

بس بردة الطلاينة لو بيبيعوا الهوا بيبيعوه بشياكة عننا .. هما عندهم روتين مقرف اخو بتاعنا و رشاوي و تعنت و حاجات كده بس بردة بشكل اقيم من بتاعنا كتير .. حتي الزن بتاعهم مختلف

ويبقي الحال علي ما هو عليه و علي المتضرر اللجوء الي الله بالدعاء ان يرفع عنا البلاء

الأحد، 19 أكتوبر، 2008

حق لابد آتي

ماذا لو علمت اني سأموت غدا ؟

ما أنا فاعلة في أمري !!

____________________

لو علمت اني سأموت غدا .. سأ.................

مينفعش كل اللي بفكر اكتبه .. مهما تمنيت او عملت او قولت او دعيت ..

الأحد، 12 أكتوبر، 2008

اعرف واعترف

في رحايا العمر .. كتب المهندس احمد حقائق يجب ان تعرفها - الأن

قرأت الموضوع مرات كتيرة .. قرأته مرة بعنيا في صمت و اعدت قرائته مرات و مرات بتركيز في كل كلمة و قرأته بصوت عالي لعلي استشعر احساس مختلف او اتجاهل احساسي ان الموضوع قد يخصني معظمه ان لم يكن كله

لعله أتي في التوقيت الذي احتاجه .. لعله اشارة من الله لي او لغيري .. احسبها رسالة بكل ما فيها و احسب ان فيها الكثير من الخير لمن يستطيع تقدير ما ورد بها التقدير الجيد العاقل.

وردت فيه جمل لم استطيع ان اتجاهل اني قرأتها او اني اريد التعليق عليها او حتي مجرد نقل احساسي بها بدون تعليق ..

" فأنت في النهاية الذي تبني الحياة التي ستحياها " بيتهيالي دي الغرض الاساسي من الموضوع .. بس البناء محتاج مقومات و محتاج عامل بناء ماهر و مهندس يخطط و ينفذ و محتاج ادوات و معدات و تمويل و جهة تنفيذية و حاجات كتيرة .. مش سهل بناء الحياة !!

" لو اختلفت الخريطة عن الحقيقة ، فالخريطة تحتاج لتغيير " بردة محتاجة حد بيعرف يخطط .. انهي احسن و ايه افضل البدائل و اصحح امتي و لحد فين ..

" نحن ما نفعله " اكبر علامة استفهام ممكن احطها قدام الكلمتين دول .. ليه نحن ما نفعله .. مش يمكن نحن ما نحن عليه تكون اصدق .. مش يمكن افعل ما لا اريد او اريد ما لا افعل .. ليه يتحكم عليا بفعل لا يعلم ما ورائه من تأثيرات الا الله وحده .. ... يمكن نجحت علشان حد مش علشاني .. يمنك بشتغل لسبب غير كل الاسباب اللي الناس حسبتها اسباب منطقية تدعو للعمل .. يمكن بسكت علشان الاحساس يفوق كل كلام .. يمكن و يمكن كتير بس النتيجة اللي ترضيني في الوقت الحالي اني لست ما افعل !!

"المشاعر تتبع الافعال" اللي فهمته هنا الترتيب : العقل - الفعل - القلب .. افكر و اعمل حاجة احس بيها بعد ما اعملها .. ان فكرت و قررت و مقدرتش اعمل برغم المحاولة حتي رجعت في نص الطريقة .. النتيجة النهائية هي هي نفس الصفر زي اللي مفكرش ؟؟ معتقدش
يمكن احس اني عملت و حاولت و يرضيني مجرد المحاولة .. يمكن ازعل اني موصلتش للهدف .. يمكن وانا ببتدي المحاولة قولت كده كده مش فارقة زي ما تيجي تيجي .. يمكن فكرت في الصفر في كل الاحوال مهما عملت فلما نجحت فيها لقيت ان شعوري ان بعد كل دا هو احساس الصفر ولم يغيره الفعل !! عجيبة النفس والله مفيش حاجة عاجباها ولا بترضيها.. اعوذ بالله من شر نفسي

" تعلق القلب برب الاسباب ، يأتي بنتائج لا تتناسب مع الاسباب " الوكيل .. الغني .. الشكور .. الرؤوف .. الودود .. الرحمن الرحيم .. الله
مهما عملت و مهما حاولت لن يكون الا ما اراد الله .. لعل الله يرد بي خيرا فيكون نتيجة الفعل اضعاف ما يستحق او عكس ما هو متوقع .. بس صدق الله من يتوكل علي الله فهو حسبه .. وما بالي بالله وهو حسبي .. اكيد خير ان شاء الله :)

" تحليل حسابات الربح والخسارة والتي ستقود الي التغيير الامثل" لو جاوبت لماذا و لم لا .. مين يضمنلي اني الاقي بكرة اجابات علي استفهامات جديدة هتيجي مع بكرة جديد.. بردة بخاف من بكرة و من كل لحظة جديدة جايةعليا .. بتمني لو متجيش .. مش عايزة اعرف الغيب علشان اتطمن .. عايزة يزيد ايماني ان الله قد كتب علي ما كتب و قضي الامر و ان مسيرة لما قضي الله لي .. مين يضمنلي اني محسبهاش غلط ؟؟ ايه يضمن ان الربح يفضل ربح والخسارة خسارة و لا حتي يضمن بصيرتي للاشياء تكون بصيرة صادقة!! مش قلنا توكلي علي الله :(

" اننا لا نستحق ما نتمني " نفس الخوف من المجهول بالرغم من الرغبة الاكيدة في ان نعيشه و بالرغم من انه هو الامنية والحلم ... بس بردة خايفة .. بس ربنا موجود .. الخوف ساعات ميكونش من ضعف .. ممكن يكون خوف ووراه قوة بس محتاج تثبيت .. ومن يثبت غير الله :) اسالك الثبات يا ربي

"اننا لا نعرف ما الذي سيحدث عندما نتغير" "الامل والايمان " ما هو حجم التغيير الآمن ؟؟ هو سؤال نط قدامي .. اقدر العب في التغيير دا لحد فين وابقي في امان من عواقب لا اعلمها؟؟ اتوكل علي الله فهو حسبي و لكنه امرني بالسعي فلبيت النداء واخذت بالاسباب - اسعي لاحسن الظن بالله و ليزداد يقيني في انه وحده الذي يعلم اين هو الخير لنا .. احسن حل في الحتة دي اعمل زي ما رسول الله صلي الله عليه وسلم قال للرجل (اعقلها وتوكل ) فهو حسبي ونعم الوكيل :)

" هناك من يملي علينا الواجب فعله " كل الناس بمعني كل الناس بدون مبالغة تعتقد انها اعلم الناس بالمفروض فعله بغض النظر عن حقيقة علمهم و مدي صحة ما ينصحون به او ما يملون علينا فعله .. مين يقوووووولهم لا تتدخلوا فيما لا يعنيييييييييكم ..

" لا تتوقع نتيجة مختلفة الا اذا قمت بعمل شيء مختلف " مجرد التفكير بطريقة مختلفة حسب الحالة النفسية و الذهنية في وقت التفكير في الموضوع نفسه سوف يؤدي بالضرورة الي إحداث نتيجة مختلفة .. بس اللي يفكر ساعتها من اساسه :( !!

" لا سبيل للهرب من الحقيقة " ساعات بتكون شايفها و عامل مش شايفها و تصر علي انها مش هي الحقيقة او انها مش موجودة قدام الناس مع يقينك انها هي الحقيقة - لن يفيد الناس ما هي حقيقة امر ليس من شأنهم معرفته و لن يضيرني ان اتجاهل الحقيقة لبعض الوقت بشرط الا اصبح زي جحا اللي كذب الكذبة و صدقها !!

" نحن نخاف مما لا يستحق " من هو ذا الذي يقدر و يقرر؟؟ فما لا يستحق اليوم قد يستحق بعد حين !! و آآآآآآه من الندم بعد فوات الاوان :(

" قد ننظر الي الماضي بحنين" ومنا من قد ينظر اليه بمرارة لتجربة مريرة عاشها او لذكري أليمة او حتي لفقد شيء او عزيز .. مش دايما الماضي وردي وله حنين بس المشكلة في الامل في الحنين ذاته .. نحاول ندور علي اجابة للسؤال : ما هو الشيء الذي تحن اليه وتفتقده و يمنعك من المضي قدما في طريقك اليوم وغدا ؟؟!!

" نحن نحتاج حرية الاختيار" الحرية تحتاج التحرر .. التحرر من السيطرة .. اي سيطرة .. واسوء انواع السيطرة سيطرة الغير ..قد تكون سيطرة فكرة حزينة علي يومك .. سيطرة ذكري ما مرت بك .. سيطرة شخص علي تفكيرك او افكارك او علي انفاسك .. كلها سيطرة و كلها بتعيشك في سجن و احيانا يصبح السجن قبر بلا شاهد ..

في النهاية سأل الكاتب الاستاذ احمد كام سؤال في الجون :

" هل تعرف ما الذي تريده من هذه الحياة ؟ "
- اريد الخروج منها بسلام .. كتير بفكر في المثل ( يا نحلة لا تقرصيني ولا عايز منك عسل ) يمكن اكون مش صادقة في اني مش عايزة منها عسل الفترة الاخيرة دي .. زمان انا صادقة مليون في المية بس دلوقتي تراجعت علشان عندي حاجة مهمة عايزاها من الدنيا دي دلوقتي .. وبرغم كل حاجة عندي يقين ان عند ربنا الحياة افضل اكيد .. علي الاقل معروف لونها يا ابيض يا اسود .. يا من اهل الجنة برحمة ربنا و عفوه ان شاء الرحمن الرحيم .. يا من اهل النار واعوذ بالله منها ومنهم .. انما الدنيا اللي احنا فيها دي معتقدش انها تتعاز الا برحمة من الله لنا ان اراد ان يجمعنا من من يمدنا بالامل في حياة افضل ( في الاخر كلها من اولها لاخرها برحمة ربنا والحمد لله علي كل قضائه )

"هل تعرف كيف تحصل عليه؟"
- لا املك الا الدعاء وان كان عليا الاستمرار في البحث عن مخرج وكلي يقين ان في مخرج اكيد موجود بس يمكن انا اللي اصابني العمي عنه .. وقد يكون العمي و الغفلة دي وقتية لفترة و قد تكون دائمة والله تعالي أعلي وأعلم .. ورحمته وسعت كل شيء

" هل تملك القدرة علي ان تفعل هذا؟"
- املك القدرة علي الدعاء ما شاء الله لي ان ادعي ، ما دامت ارادة الله ان يكون ما يصبرني في هذه الدنيا هو الدعاء فهو نعمة الله والحمد لله رب العالمين .. قد لا يملكلها غيري وفي هذه احسب من الاغنياء :) الحمد لله

" لا تسمح لاي شخص او ظرف ان يحرمك من تحقيق اهدافك في الحياة "
لا استطيع كسر كل القيود ولا حتي نصفها ولا حتي ربعها بس برغم دا كله .. الله المستعان ولله الامر من قبل و من بعد

دي حقائق اعترف بها الأن ..

اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع