لحظة صدق Moment of Truth برنامج امريكي باين .. بالصدفة اتكعلبت فيه مرة ولا مرتين قبل كده و النهاردة بردة
**
عندهم في البرنامج دا بيوجهوا اسئلة زي من سيربح المليون بس واضح ان الاسئلة العامة مبقتش بتثير اهتمامهم .. قالوا ندخل اكتر في الخصوصيات .. بس الشوية اللي اتفرجت عليه فيهم .. مش متخيلة ان حد ممكن يعمل في روحه كده (( معظم الاجابات للاسئلة المحرجة بطريقة مقرفة جداااااا .. كشف لستر ربنا )) يعني بيفضحوا روحهم قدام العالم .. علاقات مشبوهه و حاجات تخرب البيوت ان كان في بيوت اصلا..
***
استوقفتني الحكاية دي .. مش علشان كشف ستر ربنا بس .. بس لحاجة تانية .. مش احنا لينا وقفة امام الجبار .. يوم نعرض عليه ( لطفك بينا يا ربي) .. مش احنا هنقف قدام ربنا قدام كل خلق الله .. ياااااااااه مين لو اتصور الموقف دا ممكن يستحمله .. مش عايزة اتصورها حتي .. اقف قدام ربنا .. بلاش دي .. هل ممكن اقف قدام اهلي و يتفرجوا علي صحيفتي ؟؟ حتي اهلي مش هقدر .. مهو اكيد في حاجات كتيرة مش هتعجبهم .. لما انا عارفة اصلا انا عملت ايه و معملتش ايه .. استحمل كشف الستر دا قدام مين ؟؟
***
طب ادور علي حد في الدنيا دي ممكن استحمل يجرالي كده معاه؟؟
***
بيتهيالي مهما حد كان قريب من حد بردة بتفضل حاجات مينفعش حد يعرفها .. مش يمكن عملت حاجة في يوم قررت اني معملهاش تاني .. ذنب و تبت الي الله عنه .. فكرة جاتلي و استغفرت ربنا عليها .. مليون حاجة و ملايين الذنوب بنعملها حتي من غير ما بناخد بالنا احيان كتيرة ..
***
مش احنا لما بنستغفر ربنا بنستغفره عما علمنا وما لا نعلم ... مين اللي يعلمهم كلهم علي بعضهم .. ربنا .. هو وحده الي يعرفهم كللللللللللللللهم .. الصغيرة والكبيرة .. الي فاكراها دلوقتي و اللي نسيتها ..
***
مفيش بني ادم بيتهيالي غبي لدرجة انه لو افتكر ذنب عمله ميستغفرش ربنا عليه .. كده تبقي النتيجة اللي وصلتلها .. مفيش حد اقدر اتكلم معاه عن كل دا و مبقاش كشفت ستر الله الا الله .. مهي النتيجة الوحيدة المعقولة و اللي هداني اليها تفكيري دلوقتي .. بس بردة انطق اقوله ايه بس مهو عارف و عالم و هو اقرب الي من حبل الوريد ويعلم ما تخفي الصدور .. وهو الله ... هو اللي هقف قدامه و هيحاسبني قدام الناس كلها .. مش من باب اولي استسمحه دلوقتي .. لازمتها ايه استني الفضيحة قدام خلق الله :(
***
يارب سترك و عفوك قبل عدلك
***
من رمضان اللي فات و ادي رمضان الجديد هيهل علينا اهو كمان كام يوم ان شاء الله ( اللهم بلغنا رمضان وانت راض عنا )
***
عملت ايه باه انا في الدنيا .. دي سنة كاملة .. والله ما حسيت بيها .. الايام بتمر و الدنيا دي بحسها بتلطشني بالقلم بتتوهني كتير .. بفوق من القلم دا بردة مش مستسلماله ..
***
بس بردة مش عارفة دماغي دي هتوديني علي فين و اخرتي ايه :(
***
ربنا يكفيني شر نفسي و يحسن خاتمتي و يغفر لي ما عملت وما نسيت و ذنبي كله .. بالعفو ياربي قبل العدل
هناك 3 تعليقات:
حبيبتى البرنامج اللى انتى بتتكلمى عليه ده بتاع ناس متعرفش ولا تفهم كلمة من اللى انتى قولتيهم فى البوست دة
احنا بس اللى نفهم الكلام دة
ونفهم ان الله حليم ستار
ونفهم حاجات كتير هم مش بيفهموها
ثانيا
ماتخافيش
رحمة ربنا وسعت كل شىء
ومين منا لم يخطىء فى حق نفسه وحق خالقه
لكن طمعنا بكرمه فى العفو الغفران كبير
وانصحك انك تبيضى صحيفتك يوميا
زى ماقال صلى الله عليه وسلم
من قال فى يوم سبحان الله وبحمده مائة مرى غفرت خطاياه وان كانت مثل زبد البحر
ومن سبح الله وحمد الله وكبر الله دبر كل صلاه ثلاثا وثلاثني مرة واتم المائة بلا اله الا الله وحده لا شريك له له الملك وله الحمد وهو على كل شيء قدير غفرت خطاياه ولو كانت مثل زبد البحر
وقال فيما معناه
رمضان الى رمضان كفارة لما بينهما
والجمعة الى الجمعة كفارة لما بينهما
والصلاة الى الصلاه كفارة لما بينهما
مالم ترتكب الكبائرولاتنسى اختى الكريمة هذا الدعاء
اللهم اتنا فى الدنيا حسنة وفى الاخرة حسنة وقنا عذاب النار وادخلنا الجنة مع الابرار ياعزيز ياغفار
ولا تنسى قوله صلى الله عليه وسلم
من استغفر الله لذنه وذنوب المؤمنين كتب الله له بكل مؤمن ومؤمنه حسنة
يعنى قولى
اللهم انى استغفرك لذنبى ولذنوب المؤمنين والمؤمنات
ونصيحة منى
شدى السبحة واستغفرى ربنا فى اليوم الف مرة هتاخد منك وقت نص ساعة بالظبط
قولى استغفر الله واتوب اليه الف مرة فى اليوم او لو تقدرى بعد كل صلاه
هاتشوفى من الخير اللى عمرك ما شفتيه فى حياتك ودة عن تجربة شخصية
وكما قال الله تبارك وتعالى
"فقلت استغفروا ربكم إنه كان غفارا يرسل السماء عليكم مدرارا ويمددكم بأموال وبنين ويجعل لكم جنات ويجعل لكم أنهارا" آية 11 سورة نوح
حبيبتى لا تيأسى من رحمة الله
اللهم استرنا فوق الارض وتحت الارض ويم العرض
اميييييييين
معلش طولت
بس موضوع الاسغفار ورحمة ربنا بيشدنى انى اتكلم فيه لانى مجربة حلاوته
وانتى كمان جربى وقوليلى ايه اللى حصل بعد الاستغفار
سلام عليكم
وعليكم السلام ورحمة الله وبركاته
مش عارفة انا اللي طلعت بيه من تعليقك الجميل دا انك يمكن تكوني فهمتي قصدي علي نفسي مش زي ما كنت حابه اوصله بس مش مشكلة :)
كلامك جميل .. ربنا يباركلك
علي فكرة انا اعتقد اللي اتكلمت عليه دا اعظم عظماء المسلمين اكيد كانوا هيحسوا بيه كده بردة يمكن مش زي ما انا قلته بس اكيد هول الموقف والاحساس هيكون قريب من دا.. الله يلطف بينا ويهونها علينا
نورتينا
أمريكان مستنين منهم ايه ..ألدور والباقي علينا احنا الي فعلا في ناس بينا بتكشف ستر ربنا عنها..يعني بالعربي بتجاهر بالمعصية ودول ايه بأه كل أمتى معافى إلا المجاهرون
ربنا يسترنا يارب..
كل ودي
إرسال تعليق