الثلاثاء، 27 نوفمبر، 2012

العدل مرفوع ... حتي حين!


ما بين ليلة والتانية يتقلب حال من حال لحال!!

كنت معزومة رابع يوم العيد علي خطوبة ولد اعرفه 
العزومة جتلي قبل العيد باسبوعين تقريبا 
و كنت فرحانة بيه جدا لاني بحبه اوي وهو ابن حلال ويستاهل كل خير .. طايش حبتين بس غلبان جدا و الدنيا قسيت عليه كفاية .. يكفيه انه لا اب ولا ام ولا اهل يركن عليهم في حاله .. المهم 

يشاء ربنا اني امرض من اول يوم عيد و لمدة طويلة مخرجتش من البيت و حتي مكنتش اقدر اكلمه اعتذرله اني مش هقدر احضر الخطوبة رغم ان مكانه مش بعيد و اني كنت فرحناله جدا

وانشغاله ورا انشغاله (حلوة ومرة) مكلمتوش ولا عرفت اخباره لحد امبارح بليل 

كلمني و قالي انه من قبل العيد و لحد امبارح بس مكانش يقدر يتصل بيا ولا باي حد تاني لانه كان محبوس!!

انا بساله كليتك اخبارها ايه ؟

سمعني غلط وافتكر بسال علي خطيبته فقالي محصلتش الخطوبة اصلا و ابتدي يحكي حكايته

قبل العيد بكام يوم ولاد في الشارع اتخانقوا مع ناس علي قهوة قريبة من مكان سكنهم .. و الظاهر كان معاهم مطاوي .. بس محدش اتعور ولا حتي اتضرب في الخناقة كانت كلام وبس .. جت "الحكومة" زي ما وصفها هو (الداخلية البلطجية بوصفي انا)

جت الحكومة لمت الولاد كلهم اللي في الشارع و طلعت فوق في مكان سكنهم لمت كل الولاد اللي فيه بردة و منهم اللي كان نايم واللي كان بيذاكر ومنهم القصر اللي لسه في مدرسة اعدادي

لموهم و رموهم في الحبس .. اتصلوا بمدير السكن دا قالوله اللي حصل قالهم طيب هبعتلكم محامي و لما كلم الظابط في التليفون وقتها قاله لا دول بس هيستنوا للصبح و يخرجوا .. و التاني صدق و قفل تليفونه و نام و في ولاد  ( مسئولين منه قانونا ) بايتين في الحجز لمجرد الداخلية البلطجية حابة تعمل منظر في المنطقة

ليه عايزة تعمل منظر؟؟

لان الكلام دا كان بعد ما اتخانقوا مع الباعة الجائلين في ميدان الجيزة و قتلوا واحد منهم "21 سنة" الله يرحمه .. و ظابط اتضرب و "هيبة الشرطة" اتهزت في المنطقة

فقرروا يرجعوها انهم يلموا اكبر كم من الشباب في المنطقة في الخناقة دي .. وحصل

المحضر اتكتب علي انهم اعتدوا علي السلطات و انهم اتسببوا في ارهاب مواطنين و حيازة اسلحة و تهم حلوة من بتوع الايام دي .. 

الجميل كمان .. انهم خلوا اللي علي القهوة (الطرف التاني في الخناقة ) .. يشهدوا علي العيال كلهم ان كلهم كان معاهم سلاح و هددوهم .. حتي اللي كان نايم في سريره - روحه كان طايره هناك باين .. حتي القاصر !!

و اتحبسوا العيال كلهم اكتر من شهر و اخلي سبيل كام واحد منهم امبارح و لسه في محبوسين علي اعتبار ان الحكم في القضية يوم 1/5/2013 يعني كمان 6 شهور!!

الحكاية مش مستغرباها .. دا طبعهم و "هيبتهم"

بس اللي عز عليا الولد وهو بيقولي " مش زعلان اني اتحبست .. عادي.. زعلان اني مظلوم والله وملقيتش حد يقف جنبي يقول الحق اني مكنتش هناك اصلا"

 اكيد ملقيتش رد ..

والا كنت هقوله معلش يا ابني علشان يمكن تكون ذنوبنا اكتر من الناس اللي قبلنا فاترفع عنا العدل بذنوبنا!!!

اقوله ايه دا وبقاله 18 سنة بيتمرمط من "الحكومة" اللي في اي مكان تاني علي الكرة الارضية المفروض تكون سنده و ظهره بدل ما تبقي دايما سبب في التنغيص عليه!!

اضطريت اقوله معلش في زيك الوفات مرميين في السجون في كل المحافظات ولا حد عارف عايشين ولا اتاخدوا من بيوتهم اتقتلوا .. و في غيرك كتير ماتوا اتاخدوا من الشارع او من بيوتهم  كبار و صغيرين ولا حد عارف لهم طريق 

الظلم ساد و سود عيشتنا

قادر ربنا يرفع عنا البلاء و يجيرنا في مصيبنا  و يقصم الظالمين جميعا

الأحد، 18 نوفمبر، 2012


ولسه الموت له شوق في اختبار صبرنا علي الابتلاء

اللهم إنا نسألك الرضا بعد القضاء والصبر علي البلاء 

الاثنين، 12 نوفمبر، 2012

العدل

وقعت في هوة سحيقة ما بين ايماني بمعتقد وجود عدل علي الأرض وما بين الظلم المستشري بين جنباتها

البشوات بيقولوا عليها مثالية .. ازاي البحث عن العدل في الارض والمطالبة بيه بقت مثالية تسخروا منها؟

اكيد ربنا مخلقش الارض ورفع عنها العدل .. اكيد موجود في صور ما باشكال ما حتي لو مشفنهاش 

بس والنبي متقوليش انه مش موجود .. انا معتقدة فيه حتي لو معيشتوش او مشفتوش في اللي حوليا 

اكيد علشان ربنا العدل .. هينزل علي الارض اشكال من صفاته سبحانه 

اكيد بشكل ما في ولو اجزاء بسيطة مشتقة من العدل زي ما في لسه شوية رحمة فاضلين 

اينعم بتتضاءل فعلا بين البشر بس محدش يستجري يقول ان مفيش رحمة في الارض 

يمكن اللي اقصده عدل البشر مع البشر .. بس دا كمان مش شاكه فيه بنسبة ما 

لسه في ناس شوية حاسة انها علي الاقل ظالمة غيرها ( اعتقد )

اكيد والله لسه في احساس بان وجود العدل دا مش وهم ولا تطلع للمثالية 

"اعدلوا هو اقرب للتقوي"

وليسقط الظالمون في قعر الجحيم

الأحد، 11 نوفمبر، 2012

دعاء جديد



اللهم لا تشغل عقلى بما يقلقه

ولا تشغل قلبى بمن لا يرحمه

ولا تشغل وقتى بما يغضبك ولا ينفع

اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع