الأحد، 9 مايو، 2010

حقيقي بندفع؟؟


"ثق انك مش هتاخد حاجة من الدنيا دي الا و هتدفع تمنها "

الحقيقة باه بالاضافة لكده

احنا بنقول عايزين الاخرة
نتعب في الدنيا ونقول معلش عايزين الاخرة
نتعب و نحزن و نقاسي و نتحمل ونقول عايزين الاخرة

يعني بندفع تمن الآخرة ؟؟
اه الدنيا بتدينا ساعات الحمد لله
بس العادي بتاعها انها بتاخد
وبنرجع نقول معلش
اصل دا من تمن الأخرة اللي بندفعه
وكل اما ندفع اكتر نقول
ان شاء الله الاخرة احسن
دا طبعا بعيدا عن العبادات بكافة اشكالها و اجورها التي لا يعلمها الا الله

بتكلم عن حاجات بتتدفع في الدنيا
بنسكن الالم بتاعها و نقول معلش ان شاء الله الاخرة احسن
بنت متجوزتش تقول الاخرة احسن
ست مخلفتش تقول الاخرة احسن
ام عاقها ولادها تقول الاخرة احسن
اللي اتاخد منه اي حد او حاجة في الدنيا
كله بيقول معلش الاخرة احسن
وان هو مقالهاش
هيلاقي اللي جنبه بيصبره ويقول معلش الاخرة احسن

اللي بيفرح باه في الدنيا
لو ركزنا هنلاقيه دافع تمن الفرح دا من حاجة تانية
زي ما في حد بيتوفاه الله في نفس اللحظة بتلاقي مولود اتولد
كفتين الميزان لازم يفضلوا متوازنين
عدل
انصاف
اخد و عطاء
بدفع من جهدي ووقتي واتعب علشان اقبض مرتبي اخر الشهر
وادي منه لغيري اللي تعب لي في حاجة ودا اجره عليها
و غيري يدي غيره
بدفع و بلاقي
بيختل الميزان لما ادفع وملاقيش
لما اتعب و مجنيش تمن تعبي
لما يرتاح غيري واتعب بداله
ياخد هو كله راحة واخد انا كله تعب

بس للحق

محدش بيتعب كل الوقت
ومحدش بيرتاح كل الوقت

ان فرحت النهاردة بكرة في تمن قدام الفرح دا
وان تعبت النهاردة بكرة في تمن قدام التعب دا
يمكن اخده بكرة ويمكن اخدته امبارح و مأخدتش بالي

بس هي الدنيا
خد بس هات

هات مصاريف المدارس غليت او رخصت
خد بيهم تعليم لحاجات مهما عملت مش هتعرف تعلمها ليهم ابدا

هات حنية ام لاولادها النهاردة
خد بكرة من اللي اتخزن جواهم بسبب اللي اديته امبارح

ممكن استني يوم واحد كل فين وفين
يكون هو اليوم دا بعينه اللي تعبت علشانه
واتمني الاقي فيه تمن تعبي وان مجاش يومها ارجع تاني اقول
معلش في الاخرة احسن ان شاء الله

لو فتحنا صفحة بيضاء
كل يوم سجلنا دفعنا ايه
كل يوم كتبنا اخدنا ايه

تفتكر ممكن نطلع مظلومين ؟


بيتهيألي هنطلع مديونين للدنيا
بالرغم من كل اللي بتعمله فينا

الكلام دا بحساباتنا احنا
امال بعفو ورحمة الله هنطلع ايه

يا تري الكسبان هو اللي هيخرج من الدنيا له ومش عليه؟
يا تري ممكن الواحد يعرف يحسبها اصلا؟
بيتهيألي مهما كنت امينة في الحساب
عمري ما هعرف احسبها صح
يمكن ادالي حاجة مفهمتهاش صح
يمكن اداني من غير ما ادي
يمكن اللي اتاخد مني قبضت تمنه قبل حتي ما الحق اسجله


حكاية تحير
اديتها ولا اديتني
اخدت ايه و خدت مني ايه

اللهم اخرجنا منها علي خير واحسن خاتمتنا و طهرنا من الذنوب والخطايا واجعل الجنة مثوانا

مرات اسرح كده وافكر انهي بني ادم حوليا ممكن اقول عليه بكل ثقة هو دا المرتاح
يمكن الست اللي واقفة بتبيع عيش في الشارع؟
ارجع اقول مهي بستحمل سخافات الرايح والجاي وفي الاخر تمن التعب قروش ..
يمكن البيه المدير اللي بيقبض ألوف و عايش في افخم البيوت و يرتاد احسن الاماكن؟
ارجع اقول كل اما المال بيزيد كل اما بتزيد قنوات الانفاق وكل اما بيزيد القلق ليخلص يقوم يتعب زيادة علشان يكتره و يفضل في قلق وبردة مش هو دا المرتاح
يمكن في العابد اللي محافظ علي الصلاة والصوم وكافة العبادات و قائم نائم في معية الله؟
ارجع واقول مهو لازم يكون بيشتغل و يكون اسرة و يعمل باللي بيتعبد بيه علشان يكون له اجر .. هو دا مرتاح نفسيا غالبا .. بس ساعات اقول يمكن هو بيحاول يقرب من ربنا اكتر واكتر لانه مش مرتاح؟ ولا يمكن مرتاح وعايز يزود الراحة ويعلي من مكانته؟
مش عارفة
بس لو فكرت اعمل زيه
طيب مهو الدنيا فيها التزامات مادية عليّ وعلي غيري
ممكن نكون الانسان دا ازاي؟؟؟؟؟؟
اه بنحاول نقرب من ربنا كل واحد بطريقته وبما فتح الله عليه
بس بردة الاحساس انك مش قريب ومقصر وتقدر تعمل احسن من كده مليون مرة
بس انت وحش اوي لانك مش بتعمل اللي تقدر عليه وانت عارفه وعارف السكة منين :(

اللهم اعنا علي ذكرك وشكرك وحسن عبادتك

يا تري كده نبقي دفعنا تمن الاخرة ؟؟

اشك

لو اضفنا علي عملنا العبادات و اجرها

تكفي تمن الاخرة؟

اشك

لو اضفنا علي عملنا والعبادات والاجر .. رحمة الله التي وسعت كل شيء

تكفي تمن الاخرة ؟

نتمني علي الله ولا يكتر عليه شيء

اللهم ادخلنا الجنة بغير حساب ولا سابقة عذاب

تذكر دائما :
عفوا رصيدك لا يكفي

من فضلك حاول التقرب الي الخالق
لعله يمن عليك برصيد ينقذك

الأربعاء، 5 مايو، 2010

5/5





5/5

يوم مميز كل سنة من سنين عمري
طيب وحنين وخدوم جداا
صحيح الدنيا اخدته
بس برجع واقول ربنا سخره علشان يكون سبب في تخفيف آلالام الناس
ربنا يوسع عليه يا رب ويزيده من فضله

لقيت اغنية لايقة عليه جدا
وقديمة جدا اوي
بس لايقة عليه
واسعدتني

فكرتني بكتير

اهداء لأخي العزيز حتي لو موصلش


الشاطر مين
الامور مين
الحبوب مين
السكر مين

احمد يا حمادة
يا سكر زيادة
يا حبيب بابا وماما
يارب يخلي احمد

بيسمع الكلام
ويحب النظام
يسأله المدرس
بيجاوب أوام

عشان دايما مذاكر
بيعمل واجبه وشاطر
ودايما من الاوائل
ولد شاطر تمام

احمد ولد رياضي
اخلاق وادب وهادي
بيحب اللعبة الحلوة
ويشجع كل نادي

بيتفرج علي الكورة
واللاعيبة المشهورة
ويسقف للي يكسب
من كل النوادي

احمد يا حمادة
يا بندق بالشيكولاتة
يا حبيب بابا وماما
يارب يخلي احمد

-------------

ودي كمان :)




هنعد الشمع كام
يا حمادة
عقبال كل عام

احمد اعياد اعيادك
مبروك عيد ميلادك
ونعد الشمع الكام
ويزيدوا كل عام
والصحة تكون تمام ان شاء الله
ونؤدي التهاني

فين اصحابك منور
وهما واقفين حوليك
كله عايز يتصور
حبا في جمال عنيك
وتاني تاني تاني
تيجي نغني الاغاني
ونرقص ونؤدي التهاني


-----------

اللهم ارزقه تمام العافيه


الثلاثاء، 4 مايو، 2010

ممكن رقيقة ؟




ممكن من فضلك..
تقترح عليّ رقيقة ما ؟

حاجة تنضف القلب ..
حاجة تشرح الصدر ..
حاجة تهون الصعب ..

حاجة تذكرة ..

من الرقائق

تكون بتحبها
اثرت فيك


اقتراح محدد
وياريت لو ليه رابط اوصلها بيه


"فذكر فان الذكري تنفع المؤمنين"

و شكر الله لكم المساعدة

اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع