بحبك بس مش عارفة اقولك بحبك
مش علشان مش عايزة بس مش عارفة اقولك بحبك
ساعات كتير بحب حد ومش ببقي عارفة اقوله اني بحبه حجات بتمنعني حتي ساعات مش حجات جوايا زي العادة ..
مثال لو واحدة بحبها و انا متاكدة من جواايا اني بحبها و بعزها كتير .. بقول هيجرا ايه لو رحت قولتلها اني بحبها و ببقي عاقدة النية و عازمة اني اروح اقولها باللي ف قلبي ناحيتها .. مش عارفة دا بختي ولا ايه بس ف 90% من الحالات بلاقي نفسي ف موقف تاني مختلف تماما
يعني اجي لسه هتكلم الاقي اني اساسا سايبه مشكلة و المفروض دلوقتي بدل ما اقول اللي كنت جايه اقوله الاقي نفسي مضطرة ادافع عن نفسي يا اما انفي اتهام يا اوضح موقف... وهكذا
مش علشان انا ملاك و مش بغلط وهما ظالمني بس يمكن مش عارفة اتفهم ..!!!
الله اعلم ..
كتير بشوف نفسي وحشة اوي و مينفعش حد يحبني و بستغرب لما الاقي حد بيعبر عن اني غاليه عنده او عندها !! مهياش تقليل مني بقدر ما هو اني عارفة اني مستاهلش الحكاية دي و محدش يقولي ليه ... كلنا بنغلط ماشي بس انا الغلطة عندي الصغيرة بتفضل تعذب فيا كتير وضميري بيفضل يأنب فيا كتير اوي بحد ما احس انها عدت يا اما اتصلحت يا اما جت حاجة غطت عليها :(
بس بردة نرجع لمشكلة اني مش بعرف اقول للي بحبه اني بحبه :( تقصير مني يمكن .. كتير كسوف .. ساعات خوف من رد الفعل .. بس الاكيد انه مش احساس بالضعف لو قلته علشان محدش يقولي خايفة تبقي ضعيفة:(
بتبقي جوايا و عايزة اقولها والاقي سبب ورا سبب بيمنعوني:(
و ساعات مع حد تاني تلاقيني بقولها بمنتهي السهولة بدون كل اللي قلت عليه فوق دا .... غريبة انا عارفة
زمان كنت بقول انا بكتب احسن ما بتكلم يعني بالكتابة يمكن اعبر عن اللي مش عارفة انطقه
بس من قريب اكتشفت اني بالكتابة ساعات مش بعرف اقول اللي حساه اد لو سكت :( ساعات السكوت بيكون ابلغ رد ... او يمكن غلطانة بردة الله اعلم :(
هناك 3 تعليقات:
الحمد لله أول تعليق
اختي السلام عليكم
قديما قالوا
اذا كان الكلام من فضه فالسكوت من دهب
ممكن تقولي ليه ما الكلام من ذهب برضه أرجع اقول السكوت من الماس
المهم مش موضوعنا
التعبير عن شعورنا تجاه الآخرين يمكن ان نعبر بيه بلأفعال أكثر من الكلمه المباشره
وقد يكون الفعل ابلغ من الكلام
يعني انا شايف اني لو قلت لشخص ما أني احبك بشكل مباشر قد تؤخذ علي محمل اقل مما يختلج جنباتي
ولكني اذا كنت بجواره دوما اساعده قدر امكاني في حل مشاكله ,اكون مثلا دائم السؤال عنه,اساعده في مناسباته
وكل ذلك علي سبيل المثال فقد يكون فعلي معه أبلغ من الكلام المباشر
فمثلا ولله المثل الأعلي
قد يقول قائل أنا بحب ربنا أوي (بحبك يا رب)وبحب النبي خالص
ونأتي نفتش في أفعاله نجده مثلا لا يصلي لا يصل رحمه لا يبر بوالديه
فمثل هذا اني له ان يكون محب لله ولرسوله
فالفعل اختي الكريمه والعلاقه الودوده الرحيمه قد تكون أبلغ في رسائلها من الحب اللفظي
وفقكي الله ودمتي بكل خير
ملحوظه يا ريت تشيلي تأكيد الكلمه علشان تسهيل عملية التعليق وكمان ممنهاش فايده
وعليكم السلام ورحمة الله وبركاته
معاك في اللي قلته بس ساعات ممكن تكون محتاج تسمع الكلمة دي حتي لو شايف الافعال بتقول عليها...
يعني لو اتقالت بردة هيبقالها طعم مختلف و ساعات التعبير عن المشاعر دا بيقرب بين الناس .. انا فاكرة حاجة ليها علاقة بانك تقول لحد بتحبه انك بتحبه بس مش مجمعه دلوقتي .. ان شاء الله هفتكرها واقولك عليها .
اما بخصوص الافعال ،، فالعادي بتاعك انك بتعمل علشان اللي بتحبه واللي عادي بالنسبة ليك وعلي رايك طبعا بيبان مين اللي افعاله بتدل علي محبة ومين لا!!
المثال اللي قلت عليه دا وجعلي قلبي:( تخيل ان مفيش حد يعرف يفتش التفتيش اللي انت قلت عليه دا ابدا.. مهو اصل مفيش حد وحش اوي علي طول .. دا اعظيم عظيم يعني ف وقت الشدة بيقول يارب و بيقولها وهو قاصدها و محتاج ربنا فعلا ووقتها بيطلع حبه اللي كان مدفون جواه و عفا عليه التراب ... والله اعلي واعلم
بس انا باه معترضة علي كلمة الحب اللفظي دي .. علشان لو تحولت للفظ بيتقال متبقاش هي اللي انا قصدتها ف كلامي .. انا قلت عن الاحساس الحقيقي اللي نابع من القلب و عامل زي الشجرة ف مهب الرياح اللي عماله تجيب وتودي ف الاوراق والاغصان بس الشجرة ثابتة مكانها فين وفين باه علي ما تيجي ريح شديدة اوووي علشان تعرف تهزها و لازم كارثة طبيعية هي اللي تشيلها من جذورها ( ربنا يعافينا من كل دول :) )
معلش طولت عليك ف الرد بس مين كلمة تأكيد اللي قلتها في الملحوظة دي ؟؟ انا مفهمتش تقصد ايه:(
سعدت برايك واضافاتك دوما:)
حديث: ” إذا أحبّ الرجل أخاهُ فليخبره أنه يحبه ” رواه عن المقداد بن معد يكرب رضي الله عنه أبو داود والترمذي وقال حسن صحيح
هو دا الحديث .. معلش كان رايح عن بالي:)
إرسال تعليق