من زرع حصد

بمناسبة تدبيسي في الزراعة

انا علي فكرة كنت بتريق مع امي :( اكمنها مهندسة زراعية و كنت بقول لامي ( بهزار طبعا هي علي راسي ) دي كلية فلاحة .. المهم انا قلت قبل كده اني لبست في الشغل في شركة زراعية لا و كمان بقالي سنتين ودخلت ف التالتة اهو وبعمل ماجستير في الزراعة او تحديدا يعني في لوجستيات تصدير الحاصلات الزراعية و دي حدوتة كبيرة كده ملهاش لازمة دلوقتي ( مش طالبة افتكر و انكد علي روحي و خصوصا اني قربت اخلص الدراسة و المفروض اكون شغالة ف الرسالة من 6 شهور وانا لحد دلوقتي ولا عملت الطلب بتاع العنوان والموافقة عليه اصلا ... بلاش السيرة الغم دي باه:( خلينا في العنوان )

من ساعة ما ابتديت اكبر كده و اعي الحياة من حوليا و بقيت ما بقيت يعني اللي هو انا دلوقتي وانا كان من زرع حصد دا جملة بتتقال في الفيلم ولا في كتاب القراءة في ابتدائي و خلاص

بس من قريب يعني سنتين ولا تلاتة كده ابتديت احس بيها بشكل تاني خالص .. مش فاكرة السبب ايه بس كان لازم الاقي حل لحالي و الاقي مبرر لحاجات كتيرة بتحصل حوليا .. و مش بتفلسف ولا بخترع

انا لقيت الجملة دي ادق حاجة في الدنيا تصف الواقع المرير .. حقيقي من زرع حصد

بس المصيبة نفسها هي البذرة اللي حطها في الارض........

اللي بيزرع خير اكيد اكيد مش هيحصد الا الخير و اللي بيزرع شر اكيد مش هيلاقي الا الشر

بس تصدقوا ان ساعات الارض مش بتفهم البذرة صح.. يعني زي ما تقولوا كده لو حطيت بذرة علشان تطلع خوخ مثلا و لما كبرت الشجرة لقيتها طارحة ليمون حامض

بقول كده لسبب ..

ممكن اب و ام يحطوا البذرة في الارض صح .. بس مع الوقت و شوية عوامل طبيعيه خارجية كده بتعدي علي الارض دي هتلاقي البذرة دي اتحولت بقدرة قادر لحاجة تانية .. مش بيقولوا يخلق من ظهر العالم فاسد و من ظهر الفاسد عالم..

دا العادي يعني اللي بيحصل .. مش شرط كل اللي يزرعه الاهل في الابناء بيطرح فيهم .. او ساعات بيكون كامن لحد ما تيجي حاجة تخليه يطلع برة ..

المصيبة باه في اللي بيشذ عن القاعدة دي ... اللي يكون عارف البذرة بتاعته اصلها ايه و عارف ان البذرة دي متراعيه ازاي و مر عليها ايه من العوامل الخارجية و يبقي هو عايز يشذ لوحده بعيد عن الارض دي ..

ساعات بقعد اتامل الجملة دي ........ من زرع حصد ... لو حد زرع قسوة في قلب حد ايه اللي في الدنيا ممكن يحول القسوة دي لحنية و حب؟؟ ( بعيدا عن محاولة ايجادها علشان خاطر ربنا وبس) يعني منين تتجاب الحنية ان كان اللي اتزرع كله قسوة و جفاف؟؟

الكلام هرب مني علي فكرة انا كنت بحاول اتكلم ف حاجة في بالي بس دلوقتي مش عارفة اترجمها لحروف ..

اعرف اكس من الناس مش بلاقيله جوايا الا ذكريات مؤلمة او حاجات تضايق و مازالت يعني الحد دا مازال متواجد بنفس الصورة هي هي ان مكانتش بتزداد سوء

ساعات اقول يمكن ابتلاء وملهاش حل غير اني استحمل واحتسب اجري علي الله يمكن يجي يوم و ربنا يأذن بحل من عنده .. ساعات بفكر اثور و احاول اوقف المأساة دي والاقيلها حل نهائي مهما كانت النتائج بس برجع و اقول الابتلاء علي قدر الاحتمال و يمكن لو مكانتش الحاجة دي هي الي وحشة ف حياتي يمكن كان ربنا بعتلي حاجة اسوء من كده .. يعني احمدي ربنا انها جاية علي اد كده و اهي الدنيا ماشية كده و لا كده و مش هتقف عليا ان كنت فرحانة ولا زعلانة .. و ساعات باه ولاد الحلال بيسخوها من برة .. بس اهو ربنا بيسترها قبل ما تهور واعمل حاجة مش المفروض تتعمل .. هما شايفينها سلبية ( الكلمة دي عاملة زي الحبل اللي بيخنق فيا شوية شوية و زي ما يكون حد ماسك طرف الحبل دا و مصر يضيق الحبل حولين رقبتي كل شوية:( ) مش لازم علشان ابقي ايجابية اتصرف تصرف مش المفروض اعمله .. انا علي الرغم من اني كتير بحس اني مخنوقة من التصرفات دي و ببقي مش طايقة نفسي و نفسي اعمل اي حاجة تخلصني من المشكلة دي مهما كانت العواقب ايه بس برجع واقول اكيد ربنا هيفرجها و تتحل بدون الحاجة لحل بمشكلة بمشكلة اكبر منها ..

وبالرغم من الكلام دا مش عاجبني تصرفي بردة مش علشان بيتقال عليا سلبية او حتي علشان المشكلة دي اللي ملهاش حل علي الاقل لحد دلوقتي ... المشكلة اني مش عارفة الاقيلها حل غير المثل اللي بيقول شيل دا من دا يرتاح دا عن دا .. بس مع الاسف مش نافع المثل دا في الوقت الحاضر.. بس مسيرة يحصل ( بحاول اتخذ احتياطي انه ممكن يحصل في اي وقت ويمكن دا موترني معظم الوقت علشان مش عايزاه يحصل بس عارفة انه هيجي عليا وقت في يوم ما في سنة ما واعمله وربنا يسترها من عواقب المشكلة دي)

انا عارفة اني برغي حولين المشكلة يمكن مش عارفة اقول هي ايه المشكلة اساسا ,, انا عارفاها بس طرحها في حد ذاته غباوة مني ,,

طب والله في نماذج زي الفل :) فكرتوني ببنت خالي الله يرحمه يارب و يحسن اليه .. انا كنت بحبه اوي و زاد الحب في اواخر حياته الله يغفر له و ينعمه في جنات النعيم .. بنت خالي دي علشان الارض بتاعتها طيبة و اللي كان بيراعي البذرة كان بيتقي الله في زرعته .. طلعت كده .. تقولك انا ابر اهلي فرد فرد حتي اللي يعتبر بعيد بس كفاية ان ابويا كان بيحب فلان علشان احبه .. كفاية ان امي كانت علي علاقة بالحاجة فلانة علشان افتكرها بالدعاء والزيارة .. الله يباركلها يارب دنيا و اخرة

عارفة ان الخير موجود و الناس الطيبة موجودة و لله الحمد بس بردة ملقيتش حل لمشكلتي ... ا ه نسيت اقول ان الحل المؤقت او هو مش حل يعني هو التطور الطبيعي للحال اني اصبحت بتجنب الشخص دا لدرجة لو بيتكلم معايا مش بقدر ابص في عنيه و يمكن حتي بطلت ابصله اصلا .. مش كره والله بالعكس انا صعبان عليا الشخص دا جدا و بتمني من ربنا احساسي بيه يبقي غير كده بس فشلت والله وحاولت كتير و بحاول بس اي محاولة للقرب بيجي وراها بعد اسوء من اللي قبله..

شوية كلام لا ليه علاقة ببعضه ولا يهم حد اساسا ولا انا ارتحت لما كتبته:( بس انا نفسي الناس تخاف علي زرعتها و تعرف ان الزرعه دي بتحس بكل حاجة بالفرح والحزن باللي مهتم من اللي مهملها باللي عايزها من اللي مش عايزها .. دي الزرع في الحقيقة ما بالك باه باللي بيزرع في انسان سواء قريب او غريب..

في ناس تقابلهم مرة واحدة في حياتك او مرات قليلة بس يسيبوا جواك حجات تفضل معاك العمر كله سواء حلوة او وحشة الاتنين وارد حدوثهم و بيسيبوا اثر جوا الانسان مهما حاول يبعدهم يمكن ينزلوا في بئر التفاعلات جوه عقولنا و يبقي مجرد ذكري بس موجودة يعني لو نكشت عليها شوية هتطلع تاني ..

ربنا يلطف بينا .. انا عن نفسي مش عايزة اسيب حاجة عند حد الا لو كانت حاجة كويسة ولو اني اشك ان يطلع مني حاجة زي دي .. يبقي علي الاقل ادعي ربنا مسيبش حاجة وحشة ف قلب حد:(

الله المستعان كفاية كلام فاضي لحد كده.