الخميس، 17 يوليو 2008

اغلي امنية اتمنتها .. لسه وقتها مجاش

من 3 سنين في نص شهر ابريل .... رجعت ماما من الشغل في يوم وقالتلي عندها في الشغل فتحوا باب حجز لعمرة في شهر يونيو و كانت هتطير من الفرحة يومها :) علشان بقالها فترة مراحتش و كان نفسها تروح وكمان علشان العمرة دي كانت بالتقسيط المريح جدااااااااا.. انا طبعا سمعت الكلام و اتكتمت ولا فتحت بقي :( علشان عارفة اللي فيها و عارفة اني مش مسموحلي اروح علشان معنديش محرم :(


تاني يوم كانت ماما اخدت المقدم و راحت تشوف ايه اللي مطلوب من تجديد الباسبور و التطعيم و كل حاجة محتاجينها عملتها بسرعه جدااا علشان كانت يا حبيبتي فرحانة اوي انها هتروح بعد غيبة :)

انا زي ما كنت اتكتمت و مقدرتش انطق بحاجة .. هي طبعا كانت عارفة اني هموت واروح هنا :( بعدها بكام يوم قالتلي انها سالت عندها في الشغل ان كان ينفع اروح معاها ولالا .. في اللي قالها اه وفي اللي قالها لا ... قالت مش هنخسر حاجة .. كانها شالت من علي قلبي هموم الدنيا كلها .. فرحت اووووووووووووي وبقيت مش عارفة اعمل ايه ولا ايه .. اصلا هي قالتلي الكلام دا الظهر في التليفون ... قالتلي روحي جيبي استمارة علشان تعملي الباسبور .. بعت الساعي جابلي 2 من مكتب البريد تحت المكتب و مليتها و سالت عرفت ان في امكانية اني اروح المجمع اقدم الورق واجي اخد الباسبور تاني يوم .. نزلت وانا مروحة رحت المجمع و قدمت الورق و قالي تعالي بكرة خديه .. وانا راجعه عديت علي المصور واتصورت بخلفيه بيضا .. و روحت البيت وانا عايزة اسابق الزمن و بتمني افتح عنيا واغمضها الاقي ماما بتقولي خلاص هتيجي معايا :)

تاني يوم عملت فيلم استاذنت من مديري بعد عذاااااااااااب و بعد تقرير مفصل الساعتين اللي هنزلهم دول هروح فين و مع مين و هعمل ايه و ليه :( المهم نزلت رحت المجمع استلمت الباسبور .. لا يا ربي انا اتصورت يومها و تاني يوم رحت عملت الباسبور :( معلش كده التسلسل المنطقي :) معلش باه..

المهم جبت الباسبور و رحت اتطعمت في مكتب الصحة و جبت الوصل و اديت كل دا لماما .. فات يوم واتنين و تلاتة و اسبوع .. ها يا ماما في اخبار .. اصل الراجل مش لاقياه ... اصلهم قالوا ينفع الصحبة الصالحة .. اصل اصبري علشان متستعجليش علي رزقك:(

المهم فات وقت حسيت بمرور الوقت دا بالضيق من جوايا و مكنتش مبسوطة :( وفي واحدة زميلتي في الشغل لما عرفت اني بعمل الباسبور وقتها و بظبط الحاجات دي .. وف وشي كده جت قالتلي انتي طبعا مش هتطلعي .. مينفعش :(( وانا بتوجع من اللي بيقفل الحاجة في وشي كده .. يا ستي حتي لو دا حقيقي هيجرالك ايه يعني لو قلتي ان شاء الله تطلعي و ربنا ينولك اللي بتتمنيه :(

المهم اني فقدت الامل و قلت قدر الله وما شاء فعل و قعدت ايام كتيرة اعيط و اقوله يا ربي لو مش عايزني انا مش عارفة انا عملت ايه وحش اوي كده علشان تردني:( ولو وحشة اوي كده انت بتقبل اللي بيجيلك و عايز رضاك ونفسه ينوله :((

المهم امي كتمت علي الموضوع و مبقتش تتكلم قدامي في الموضوع دا و كل اما بسالها بتقولي اهو ان شاء الله تتحل..

لحد ما جت في مرة سمعتها بتكلم حد في التليفون و بتقول ان المسئول عندها في الشغل بعت لشركة السياحة الباسبورتات كلها ماعدا بتاعي :( فهمت اللي فيها و سكت متكلمتش خصوصا و انا سامعه بتقول انا عارفة انها نفسها تروح بس انا مش عارفة اعملها ايه بس:( صعبت عليا امي انها محتارة و انا مكنتش عايزة انكد عليها فرحتها .. انعزلت شوية كده و مبقتش بفتح الموضوع دا

مرة روحت ملقيتش ماما في البيت و استغربت انا برجع متاخر و ماما بالكتير بتكون 4 في البيت .. راحت فين .. رجعت بليل افتكرتها كانت عند اخويا مسالتهاش علي حاجة بس سمعاها بتقول رحت السفارة .. وانا كنت قررت اقفل الموضوع دا علشان منكدش عليها .. و كتمت الالم جوايا ومحدش كان يعرف حاجة عني زعلي دا ..

وجه الميعاد اللي هتسافر فيه امي .. رحت وصلتها مع اخويا و انا راجعه اتفتحت في العياط طول السكة و كان ابن اخويا عنده كام شهر و انا كان المفروض هقضي المدة دي عندهم .. بس اخدت يومين اجازة و رحت لبنت خالي اسكندرية ... لما رحت هناك لقيتها بتقولي انتي متعرفيش امك عملت ايه علشان تروحي .. وكانت مسافرة زعلانة علشان حاسة انك جواكي زعلانة و نفسك تروحي :(

حكيتلي كان ايه حكاية السفارة دي .. اتاري امي الله يكرمها يارب دنيا و اخرة ,, راحت سفارة السعودية ويا حبيبتي حاولت تقابل اي حد هناك وتحاول تحل المشكلة دي و تلاقي حل علشان اسافر معاها .. ولما غلبت و ملقيتش في فايدة .. قامت كتبت جواب كبير للملك فهد الله يرحمه و بعتت واحد من عندها في الشغل يبعت الجواب دا تلغرافيا باسم الملك فهد ... والله ما عارفة اقول احساسي ساعتها .... علي طيبتها و حنيتها و لا علي انها حاولت علي اد ما هي قادرة و هي عارفة انها سكة مسدودة و انه مينفعش .. ربنا يجازيها عني خيرا يارب :)

انا بحكي و دموعي نازلة حاسة اني عايشة الموقف دا زي ما هو دلوقتي :( يلا الحمد لله علي كل حال .. سافرت ماما و رجعت بالسلامة الحمد لله .. بعدها وقعت انا في مشكلة كبيرة في الفترة دي و لمدة شهور ..

جينا للسنة اللي بعدها .. معرفتش تسافر وقتها علشان كانت تعبانة :( السنة اللي فاتت باه حصلت حاجة تانية ...

انا في يوم في شهر 7 اللي فات .. صحيت من النوم علي حلم شفته .. حلمت اني في مكان واسع انا و ماما واقفه قدامي وانا قاعدة و الارض لونها ابيض وانا من جواايا حاسة ان دي عمرة و ماما واقفه قدامي وبقولها روحي انتي انا دايخة و برفع صباعي وبلفه كده علي اني داخية .. صحيت من النوم قلت ربنا يجعله خير ان شاء الله ..

علي المغرب لقيت ماما واقفة قدام باب الاوضة عندي بتقولي .. انا مش عايزاكي تزعلي .. بس عملوا عمرة عندنا في اول رمضان ان شاء الله و انا قدمت من يومين .. مكنتش عارفة اقولك ازاي علشان عارفة انك هتزعلي ... انا بلمت و حسيت بالدنيا بتلف بيا .. منطقتش حرف واحد .. اصابتني صدمة اسكتتني ... قالت بعدهم كلمتين وانا ساكته بردة و سابتني و مشيت .. يمكن تكون فهمت اني زعلانة علشان كده مقلتلهاش حاجة ..

لما مشيت ماما اترميت علي السرير و قعدت اعيط بحرقة اوي وانا بقولها انتي مقلتليش يا ماما بس ربنا قالي .. ومليش فيها نصيب ... امر ربنا كده .. ومقدرش اقول الا الحمد لله .. مقدرتش اقولها علي الرؤية دي و لا نطقت لحد الا بعد فترة .. بنت خالي بتكلمني في التليفون لما نزلت مصر اجازة .. بتقولي طنط ان شاء الله لما هتروح هتدعيلك تروحي المرة الجاية معاها ان شاء الله .. قلتلها لسه ربنا مش رايدهالي ... انا خبطت علي الباب كتير ولسه ربنا مش رايد انه يفتحلي .. الحمد لله علي كل حال ..

نسيت اقول ان ما بين ما قالتلي علي العمرة دي و بين مكالمة بنت خالي دي .. اكتر من حد قالي ممكن نحاول نشوف حد اسمه قريب من اسمك و تطلعي .. قلتلهم يعني اروح اغسل ذنوبي بذنب؟؟ و رفضت الفكرة وانا من جوايا بتقطع و ربنا يعلم بحالي.. الحمد لله رب العالمين


وسافرت ماما الحمد لله رمضان اللي فات .. و رجعت بالسلامة و انبسطت جدااااا الحمد لله :) ربنا يتقبل منها صالح اعمالها يارب .. طبعا دعتلي اروح معاها المرة الجاية :)

اااااااااااااه وادي المرة الجاية جت خلاص ... من يومين راحت امي تدفع فلوس العمرة بتاعت رمضان اللي جاي ان شاء الله .. ربنا يقويها يارب ويديها الصحة و العافيه و يتقبل منها صالح اعمالها ياااااااااااااارب ويزيدها ..

محدش يسالني عن اللي عايزاه دلوقتي .. انا بسمع الكلام في الموضوع دا لو هي بتحكي لحد وانا من جوايا حاسة اني بموت من جوايا .. استغفر الله العظيم .. مرات كتيرة بكلم ربنا بقوله ياربي انت تعلم انا نفسي اروح ليه و تعلم ما في نفسي و ان كنت اذنبت ذنوب وحشة اوي كده تحجب استجابة دعائي .. دلني اعمل ايه علشان ترضي عليا ..............

الحمد لله علي كل حال ..

يارب تروحي يا امي و ترجعي بالسلامة

بس السلام امانة لرسول الله :'(

هناك 12 تعليقًا:

غير معرف يقول...

يا رب تنالى ما تتنمين
ويكرمك بزيارة الكعبة المشرفة وزيارة رسوله الكريم

ولو ان الموضوغ ليس بصعب لانه لديك محرم وهو اخوك ابو سليم
تستطيعين السفر معه انت و والدتك
http://live.gph.gov.sa/

منذر

أميرة يقول...

يا ريتها كانت بالسهولة دي :(

الحمد لله علي كل حال .. وزي ما قلت لسه ربنا لم يرد لي ما فيها من خير :(

الحمد لله علي كل حال

ونورتنا بالزيارة :)

غير معرف يقول...

ارجوكى يا بنتى هذه الرسله ليست للنشر
عند ماقريت عنوان المدونه عرفت امنيتك
وعمك جاى هارب للكمبيوتر فبعد ان كلمت بعض الاصدقاء كعادتى كل يوم جمعه
لقيت اللى مسافر منهم يوم 2 ومنهم يوم 7 ومنهم يوم 15 ومنهم يوم 21 والله هربت من الصاله وشغلت الشيخ عبد الباسط عبد الصمد والدموع فى عينيه ولقيت عنوان الرساله.
لا حول ولا قوة الا بالله ياربى كبرت بما فيه الكفايه من هذه الدنيا و مرض احمد جعلنى جبان لدرجة اصرف فلوس احتاجها فى علاجه .
يارب تولنى برحمتك اتصلت باخويا كتيييييييييييير جداا عشان دعوه لكن يا سبحان الله وعود من اكتر من 5 سنين
ربنا هايكرمك يا بنتى وهاتعملى عمره وحج كمان وانا شخصيا اعتقد ان ميزان حسناتك عند رب العزه كثير يااااارب
يكرمك وما تنسيش عمك بدعواتك فانتى خير ونعم البنات عمك مدحت

أميرة يقول...

يا عمي .. انا واثقة انها دعوة من الله للذهاب هناك ..

مش مين كويس ومين وحش .. مهو في وحشين كتير بيقدروا يروحوا .. دا حتي الحرامي اللي رايح علشان يسرق .. بيعرف يروح .. يمكن ربنا بيمهله الذهاب هناك علشان يتوب الي الله .. بس كل شيء بامره .. الحمد لله

مش همسحها يا عمي علشان تفتكر بيها الكلام دا ..

مين قالك ان مرض احمد مش ابتلاء اجره عند ربنا هو وحده يعلمه .. شوف احمد بقاله كام سنه بيتعالج و انت بتعافر علشان تدبرله العلاج و بتتعب معاه اد ايه و شوف تعب الناس التانية مع ولادها اد ايه و قارن .. كفاية خوفك و حبك ليه و محاولاتك اليومين لتدبير الحقن بتاعته رغم عدم وجودها قريب منكم..

ربنا يجعله في ميزان حسناتك و يشفيه يارب و يبارلك فيه وفي اخواته و في مامتهم :)

قول يارب .. لا لينا غيره و لا حد بيسمع شكوتنا و كلامنا و بيحس بينا الا هو ..

اللهم لك الحمد انك انت ربي ..

Unknown يقول...

ربنا سنولك الي تتمنيه والله هأدعيلك ف كل صلاة وف كل وقت وإن شاء الله ربنا يكتبهالك ... وطالما انت نفسك فيها قوي كده يبقى ربنا مش هيخزلك أبدا..
شرفتيني بزيارة مدونتي ومستنيكي دايما..
كل الود
إبراهيم العدوي

أميرة يقول...

نورتنا يا كاتبنا الهمام:)

ربنا يتقبل منك صالح اعمالك .. جزاك الله خيرا يا اخي :)

انا واثقة ان كل شيء بأوان و ان شاء الله خير..

الله معك :)

غير معرف يقول...

بنتى الغاليه اليس
مافيش فايده رغم كل الطيبه اللى فيكى الدماغ العنديه هيه هيه ولا يهمك خللى الرساله .
وربنا يوفقك وينولهالك ولينا جميعا يارب بس ماتنسيش عمك بدعوه من قلبك الطيب ده ربنا يابنتى يكرمك بكل خير .
عمك راجل صعيدى

أميرة يقول...

ما انت عارفني يا عمي مش بعند الا علي روحي :)

ادعيلي ربنا يحققلي اللي بتمناه وقلبي عايزه .. وبردة يفرحك و يحققلك دعوتك :)

Saudi Romantic يقول...

السلام عليكم

الاخت الكريمه أليس في بلاد العجائب..

اتمنى أن تكوني بصحه جيده..

بصراحه ..أنا قرأت هذا الموضوع أكثر من مره ’’ وكل مره كنت احاول ان اعلق ولكني لا أجد المفردات اللتي تعبر عن ما أحس به..وهذه المره سوف اعلق حتى لو لم أجد من الكلمات ما يصف إحساسي بهذا الموضوع الرائع..لاأنك بل أعترف أن هذا الموضوع أثر بي بشكل كبير جداً..لأعرفك بنفسي أنا Saudi Romantic
من المملكه العربيه السعوديه ومن أهل الحجاز تحديداً وبتحديد أكثر أنا من طيبه الطيبه (( ألمدينه المنوره ))..
أنا أعرف قدر المكان اللذي أسكنه بجوار الرسول صلى الله عليه وسلم..وأحمدالله وأشكره دوماً على هذا الكرم منه..وكثيراً ما أفكر وأقول ألحمدلله اللذي خلقني مسلماً وكتب علي أن أكون من أهل هذه المدينه المشرفه..ليس غريباً علي أن أرى أختاً لي في الدين من اهل مصر ويكون لديها كل هذه الرغبه في الذهاب للأراضي المقدسه لأداء العمره..فأهل المدينه المنوره محظوظين في مكان سكنهم..لانهم يحتكون دائماً بكل الشعوب وكل الثقافات من خلال زوار الرسول صلى الله عليه وسلم..فنحن نقابل الزائرين من كل الدول العربيه وزغير العربيه على مدار اليوم..وأنا أعلم كيف يفكرون الاشقاء في مصر تجاه الاراضي المقدسه وأشعر بذلك الحب لتلك الاماكن..وأعلم أن الكثير منهم ربما يتقاعد من عمله وهو يحلم بأن يزور الحرمين الشريفين..إن هذا الحلم رائع وصاحبه يستحق الاحترام حتى لو لم تكتب له العمره..أختي الفاضله من أكثر ما أعجبني في ما كتبتي هو رفضك للذهاب للعمره بطريقه غير شرعيه أو غير نظاميه أو بها تحايل على القانون..فعلاً إنه قرار رائع قرار رفضك للذهاب بهذه الريقه مع علمي بمدى رغبتك بالذهاب للعمره..
(( فما بني على باطل فهو باطل))
أعتقد أن من يفكر بهذه الطريقه ويلتزم في حدود الحلال والحرام بهذه الطريقه ..ربنا إن شاء الله سوف يرزقه ما يريد بإذنه تعالى..
أختي الكريمه لأقول لك ما أراه في الحج..في الحج يأتون الحجاج من كل بلد في العالم ونراهم في الحرم النبوي الشريف حين نصلي ..ومن الاشياء الملفته للنظر أن بعض الحجاج وخصوصاً من أندونيسيا يأتون للحج وأعمارهم تتجاوز التسعين عاماً ويكونون منهكين من عناء السفر واداء فريضة الحج وقد يتعكزون على عصا من كبر سنهم..وكنت دائماً أتكلم معهم لاعرف كيف يفكرون كبار السن من هذه البلدان وهم يأتون في سن التسعين..وكنت أسألهم لماذا لم تلأتون وأنتم شبان لاداء هذه الفريضه..؟ بدلاً من تعبكم وانتم شيوخ مسنين..وكانو يردون علي ويقولون ..
إنهم فقراء جداً في بلدهم وكانو يعملون طوال ذلك العمر لجمع تكاليف الحج..سبحان الله هم بهذا الفقر المتقع ومع هذا هم يصممون على جمع تكاليف الحج حتى لو إستغرق هذا الجمع كل العمر..إني أتأمل في تلك الأمنيات وأتأمل في تحقيقها..إن الله يعرف بما في القلوب ويرزق وهو الرازق الكريم.. ذلك التسعيني يحج وفي هذا السن ..إنها حكمه مهمه يجب علينا التأمل بها..
أختي الكريمه ..ما أردت أن اقوله لك
من كل ما ذكرت ..أنك لازلت شابه وربما موظفه ايضاً وبلدك قريب جداً للسعوديه فهناك مميزات تمتلكينها وقد منحك الله سبحانه وتعالى هذه المميزات عن غيرك..فانظري لها وتمسك بلأمل في الله دائماً
وادعي منه ان يرزقك العمره والحج ..
فهو العالم بمافي الصدور..ويعلم الله أني ادعوا لك بأداء العمره بإذنه تعالى..
أما بالنسبه لوالدتك فأسال الله أن يرزقها طول العمر والصحه والعافيه ويتقبل منها عمرتها..
وبخصوص سفارة السعوديه في القاهره..فهناك اكثر من مكان للدبلوماسيه السعوديه في القاهره فهناك السفاره السعوديه والقنصليه ايضاً ..وأنا بصفتي سعودي أقول لك إن سفارة السعوديه في القاهره من أسوء السفارات السعوديه في دول العالم..فهي تبجل البيروقراطيه..زرت مصر عدة مرات ..وفي احدى المرات توجهت لسفارتنا هناك..لامر تافه وليس مهم..وواجهة بعض الموظفين السعوديين يتعامل مع السعوديين بشيء من البيروقراطيه الزائده..وتشاجرت معه وطلبت الموضف الاعلى منه متبتاً وقمت بعمل ما اريد..وانا اقول هذا لاشير لك أن موظفين السفاره في مصر لايهتمون كثيراً بواجبهم..ولهذا لا اعتقد انهم اهتمو في ارسال برقيتك لخادم الحرمين الشريفين الملك فهد بن عبد العزيز يرحمه الله..وصدقيني يا أختي الكريمه لو وصلت تلك البرقيه للمك لكان وافق عليها..حكامنا يساعدون دائماً في هذه الاشياء..نصيحه أقدمها لك ..إذا قمت بإرسال برقيه للملك السعودي أُطلبي رقم البرقيه واطلبي أيضا رقم الهاتف للديوان الملكي السعودي لتتابعي برقيتك وتعرفي هل وصلت للديوان الملكي أم لا.. وهذا شي عادي لان الديوان الملكي هو المحتص نظامياً في استقبال البرقيات الموجهه للملك وتوصيلها له..

أعتذر أختي الكريمه على الإ طاله ..
ولكنني أحس بك وأحس بمدى شوقك للحرمين الشريفين .

في امان الله

أميرة يقول...

سعودي رومانتك

والله انا ما عارفة اقولك ايه

ابكتني كلماتك و مجرد ذكرك انك من طيبة الطيبة ..

يا طيبة يا دوا العيان :) اشتقنالك والهوا ندانا :)

انا بحب الانشودة دي جدا :) عرفتني عليها بنت خالي في احدي عمراتها للمدينة و قالتلي في انشودة لاطفال حلوة اوي و كانت مستعجلة ملحقتش تجيب منها نسخة زيادة و طلبت من امي لما تروح تجيب نسخة لاخوها و طبعا ماما جابتلي واحدة .. يا طيبة دي كلماتها بحسها قريبة .. هي المركب سار و نساها :(

الحمد لله علي كل حال.. كل شيء بأوان .. بالله عليك لا تنسانا من دعائك :) و لو ينفع تقرأ السلام لرسول الله صلي الله عليه وسلم :)

اقولك علي سر محدش يعرفه بس كتير فكرت اعمل زي الشيوخ اللي حكيت حكايتهم ..
طبعا الحج دلوقتي بمبالغ رهيبة و انا زي ما شفت كده لحد دلوقتي مليش حل والله المستعان ..

فكرت احوش اللي اقدر عليه و اشيله علي جنب يمكن لما يجي وقته الاقي معايا مبلغ استعين بيه .. انا مش عايزة اروح بفلوس حد .. عايزة اروح بفلوسي انا اللي تعبت فيها و الله المستعان وهو وحده يعلم امتي هيحصل دا او هيحصل ولا لا .. يمكن لسه مستحقش الشرف دا لعيب فيا :( الله يعافينا

لما فكرت في موضوع الادخار للحج دا قلت اسيبها لربنا محدش عارف بكرة فيه ايه .. ساعات بفكر اعمل كده فعلا و ساعات بقول بلاش ابقي بستعجل حاجة يعني علشان معملهاش و اجي في يوم احتاج حاجة من الفلوس دي و مقدرش اقربلها علشان حبستها بالنية دي .. ربنا قادر ييسرها ان شاء الله :)

اما بخصوص البرقية :) زي ما حكيت كده والله انا معرفتش الا و امي هناك و لما رجعت قالتلي معلش باه ان شاء الله يكون ثوابها اتكتبلك :(

مرة واحد زميلي وهو بيعمل عمرة مع والده .. لما رجع من يجي 3 سنين كده .. لقيته بيقولي انا افتكرتك هناك ..شفت واحدة شبهك واعدت ادعيلك كتير .. فرحت اوي لما قالي كده :) اهي دي انا بعتبرها جبر خاطر من الجبار :) كلمة صغيرة بس فرحتني اوي :)

نورتنا يا اخي و اتباركت بزيارة طيب من بلاد طيبة الطيبة :)

علي فكرة يجمع كل الناس اللي اعرفهاان زيارة المدينة حاجة تانية غير اي مكان في الدنيا .. بيقولوا كلهم ليها ريح طيبة مش بيهون عليهم يسيبوها و بيكون فراقهم ليها بالدموع ..

اكيد مش فيها اعظم خلق الله صلي الله عليه وسلم .. اللهم اوعدنا شفاعته و رفقته في الجنة :)

أميرة يقول...

طال شوقي يا حبيبي الي اللقاء
زدت شوقا راعيا عهد الوفاء
متي تأذن يا اللهي وازور
روضة المختار في حرم الرسول
عسي يشفع لي عندك يا غفور
حب النبي وآل البيت الانقياء

Saudi Romantic يقول...

السلام عليكم ورحمة الله وبركاته

اختي الكريمه اليس ..

تقولين - و لو ينفع تقرأ السلام لرسول الله صلي الله عليه وسلم :)


ارد عليك واقول -إن شاء الله ينفع ليه ما ينفع..ما عندي علم بشرعية هذا..لكن إن شاء الله أوصل السلام في اول ما أروح الحرم بإذن الله ..

تقولين - اقولك علي سر محدش يعرفه بس كتير فكرت اعمل زي الشيوخ اللي حكيت حكايتهم ..

أنا أقول - ليه لا...؟ الفكره جميله جداً..واذا خايفه من انك تواجهي ظرف مادي وتصرفيها في غير العمر إنوي إنك بالمقام الأول جامعتها للعمره..وإذا حصل ظرف لاقدر الله واظطريتي تصفيها في شي ثاني لا مانع من هذا..وبكذا أعتقد إنك قد نويت نيه تحتمل كل الظروف .

تقولين - نورتنا يا اخي و اتباركت بزيارة طيب من بلاد طيبة الطيبة :)


أنا أقول - يعجز لساني عن الرد على لطفك ..

تقولين - علي فكرة يجمع كل الناس اللي اعرفهاان زيارة المدينة حاجة تانية غير اي مكان في الدنيا .. بيقولوا كلهم ليها ريح طيبة مش بيهون عليهم يسيبوها و بيكون فراقهم ليها بالدموع ..

أنا أقول - إن شاء الله راح أسألك عن إحساسك هذا بعد ما تاخذي العمره وترجعي مصر ^_^ وراح اعرف منك .

تقولين - اكيد مش فيها اعظم خلق الله صلي الله عليه وسلم .. اللهم اوعدنا شفاعته و رفقته في الجنة :)

أقول - اللهم أمين ..

وفي النهايه وبما ان الموضوع عن العمره وعن سيدناالرسول صلى الله عليه وسلم..أقول جزاك الله خير ويارب تتوفقي في أخذ العمره قريباً ..واللهم صلي وسلم وبارك على سيدنا محمد وعلى أله وصحبه أجمعين .

في أمان الله

اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع