الظلم
حرم الله الظلم علي نفسه
بس في ناس في الارض ظالمة و كتير مش قليلين
ليه الناس بتظلم بعضها
دا حتي في الاب اللي بيظلم ابنه والام اللي بتظلم بنتها و العكس
دي الموديلات الجديدة اللي نازلة السوق .. اصبح كله بيظلم كله و مش يهمه الا مصلحته و بس
او حتي مش نفسه دا ساعات بيظلم لمجرد انه متخيل ان دا التصرف الصح لغيره مش بس ليه
انا عارفة ان ربنا مش بيسيبه و عارفة ان المظلوم له دعوة مستجابة وعارفة ان الله يجبر المظلوم و يقصم له الظالم
بس بردة ليه الظلم
هو اللي بيظلم دا مش بيحس بحاجة كده.. بتعدي عليه عادي يعني ...
مفيش حاجة بتوجعه ولا بيحس انه ظالم او حتي انه عمل حاجة غير اللي المفروض تتعمل..........
بيتهيالي اول واحد ظلم نفسه ابليس لما فضل كرامته في المعصية عن الطاعه والسجود لمن خلق من طين
وعلشان كده اللي بيجي من وراه بيكون من اتباعه
انا بيتهيالي المفروض اللي بيظلم حد دا بيكون وقع عليه هو نفسه ظلم فالتبعيه بيقول وليه انا كمان مظلمش غيري لما غيري ظلمني
بس طبعا مش كل الناس بتعمل كده .. الحمد لله انهم مش كلهم والا بقت مأساه بكل المقاييس
مع ان اللي اتظلم وداق وجع الظلم المفروض ميظلمش غيره .. بس بنقول لمين!!
انا ف رأيي باه اسوء انواع الظلم اللي بيظلم روحه بظلم اهله واقرب الناس اليه ... :(
الزوج اللي يظلم زوجته .. طب ليه اتجوزها اصلا لما هو مش قادر يتقي الله فيها
فكرتوني بحاجة صحيح... مش هما لما بيجوا يكتبوا الكتاب بيقولي انهم استخاروا الله ...طب ناس كتيرة باه مش بتستخير ولا تعرف صلاة الاستخارة دي بتتصلي ازاي...هل وقتها تبقي الجوازة مش صحيحة ؟؟ ,,,,,,, دي حاجة برة الموضوع بس افتكرتها وعايزة عليها اجابة:(
المهم يعني مش يوم لما اتجوزها اتجوزها بمزاجه وبرضاه ؟؟ طب ليه بيدوس عليها بعد كده .. ليه ممكن يضربها وممكن يطردها وليه حتي بتوصل ساعات انه بيعذبها
تصدقوا انه من اوله تعذيب فعلا حتي بالنظرة او الكلمة قبل التعذيب البدني .. هما مش دول اللي كانوا من شوية اسعد اتنين و الحياة مفيش احلي من كده
الي متجوزة من 35 سنة نسخة قديمة يعني بس تصدقوا لو قولت ان اللي متجوزة من سنة بالظبط هو هو اللي حصل مع القديمة اتكرر ف النسخة الجديدة ولو انهم ملهمش علاقة ببعض اساسا و مش دول وبس دا كتير كده واللي بيسكت مش بيتكلم اكتر
طيب ليه؟؟؟ هما الرجالة يعني كربون من بعض ... استحاله .. يبقي ليه بيتعاملوا ف نفس المواقف بنفس الطريقة مهما اختلف سنهم و ظروفهم و عقلياتهم
هي دي حاجة ليها علاقة بهرمونات مثلا ؟؟ مهي مش تربية ولا بيئة علشان علي اختلاف مستويات ناس كتيرة متزوجين كتير منهم بالشكل دا و حالات الطلاق ف ازدياد مستمر مع النسخ الجديدة .. والنسخ القديمة من زمان رضيت و قالي حسبنا الله ونعم الوكيل و قعدت تربي ف ولادها وقالت امر الله و اهي جوازة والسلام او يمكن علشان وجود اولاد قالوا بلاها الطلاق دا
مع اني بصراحة افضل الطلاق ف ظرف زي دا عن ما طف يشوف امه بتتهان او ابوه بيتغلط فيه من امه ؟؟
ليه البيوت بقت كلها ظلم كده
حتي الابناء بيظلموا بعض علي مستوي الاخوات و يا سلام باه لو فيها ورث وفلوس هنتفرج علي اسوء مسرحية ممكن مخرج يخرجها ... ولا هيفرق معاهم لا دم ولا اخوة ولا غيره...
الابناء بيظلموا ابائهم ساعات كتيرة و ربنا امرنا الا ننهرهم والا نقول لهم أف بس السؤال ليه منعملش اللي عكس دا ونشوف الاباء بيعملوا ايه ظلم ف اولادهم و بيخلوهم يطلعوا نبت ظلم شرب الظلم عمره و عليه دلوقتي يحدد يا يكون ظالم كناتج طبيعي للظلم اللي شربه طول عمره يا يطلع جدع و يلاقي طريقه ف سكة تانية و ساعتها يبقي ربنا انقذه من مصير سيء ربنا يعافينا منه ..
يعني النسبة 50% و 50% ولو ان النسبة انه يظلم بيتهيالي اكبر خصوصا لو الجرعات كانت مكثفة علي مدار السنين الا من رحم ربي
هو بيتهيالي موضوع زي بقية الابتلائات اللي ف الدنيا وربنا بينعم بيها علي الناس فمن صبر و شكر فله الاجر ومن اعترض و تذمر فلا يلومن الا نفسه والله اعلم
كفاية كده الموضوع دا حله عند الله و هو المستعان ..
هناك 8 تعليقات:
يشرفني دعوتك لمدونتي
أنتظر الزيارة والتعليق وأتمنى أن تكون المدونتان صديقتان
كأني أتكلم وأه منك يا دنيا
تحيتي
كل الود
مدونتي هنا
http://kanyatklam.blogspot.com/
اليس
خلق الله البشر علي اشكال مختلفه وبطباع متغايره, فمنهم الصالح السوي ومنهم الفاسد والطالح
وهذه سنة الله في خلقه
فقد كان الله سبحانه قادر أن يخلق الناس جميعا مؤمنين ولكنه خلق الكافر والمؤمن حتي يقدر المؤمن قيمة ايمانه عندما يري الكفر
وكذلك لم نكن لنعرف قيمة العدل الا بوجود الظلم , فلو كان كل الناس يتعاملون بعدل فيما بينهم لما اصبح للعدل قيمه
ومثال ذلك اننا لا نعرف قيمة الصحه الا عندما نشاهد المرضي ونحمد الله الذي عافانا
والله خلق الأنسان مخيرا في اختيار أفعاله وتصرفاته وان جبرهم علي سلوك معين فليس هناك حاجة للثواب والعقاب او الجنة والنار
ارجو ان أكون وفقت في ايصال فكرتي
وبخصوص سؤالك فصلاة الأستخاره سنه وليست شرطا لصحة الزواج فشروط الزواج البلوغ والأشهار والعقل والشهود والولي وليس من ضمنها الأستخاره ولنها قد تضاف كديباجه في عقد الزواج ولكنها ليست شرطا لنفاذ صحة العقد والله اعلم
وتقبلي خالص مودتي
في أمان الله
كاتب مصري
ما شاء الله قرات اكثر من قصة في مدونتك و كانت لطيفة ما شاء الله
الي مزيد من التقدم ولعل الله يجعلك سبب في توصيل كلمة حق ..
بالتوفيق
جزاك الله خيرا يا احمد علي مشاركتك و علي معلومة الاستخارة
بس انا لاحظت انك لم تعلق علي ظلم الزوج والاب والام للابناء و لبعضهم البعض
انا عارفة اني ساعات بقول كلام مش مرتب بس بفكر فيه كده و اللي بيطلع مني بكتبه
ربنا يعافينا جميعا
مشكور علي الزيارة والكلام الطيب
بارك الله فيك
فعلا الظلم بقى فكل مكان
و انا فعلا مقده معنى كلمة ظلم
لاني اتظلمت كتير
تحياتي
نورتينا عاشقة الحب
ربنا يكفيكي شر الشر والظالمين و يرد لكي حقك في اضعافا مضاعفة باذن الله
دا ربنا كريم اوي والله و هتلاقيه بيعوضك من حتة تانية :)
ربنا معاكي
السلام عليكم الأول قبل ما نبدأ التعليق
عشان ربنا يكرمنا :)
طيب هقولك على حاجة دلوقتي انا اتظلمت وانتي اتظلمتي
نقعد جمب الحيطة ونغني ظلموووه؟؟
لولا وجود مرارة الظلم لما وجدت حلاوة العدل
أولا ابدأي بنفسك هتلاقي نفسك بتظلمي نفسك الأول قبل ما الناس دي تظلمك
الأب اللي بيظلم ابنه !
بيظلمه ليه؟
بيكرهه؟
ما اظنش عمري ما قابلتها في حياتي
بيظلمه عشان الواد نفسه ظالم لنفسه ومضيع حقها
ومرة يشرب سجاير ومرة يدخل البيت الفجرية
ومرة يسقط ويعيد السنة ساعتها الأب بيتصرف تصرفات معينة تبان للولد انها ظلم من ابوووه
البنت اللي تقول أهلي ظلموني كمني بنت
بيفرقوا بيني وبين أخويا طيب ما طبيعي في فرق
انتي بنت وهو لد!!
ولا ده مش كفاية
عايزة تاخدي نفس حقوقه؟
خلاص خدي كل واجباته
ربنا ما خلقناش إناث وذكور على الفاضي
ده ربنا حكيم
وربنا بيقول
(( ورفعنا بعضكم فوق بعض درجات ليبلوكم فيما اتاكم ))
سبحانك يا رب واحد غني وأخر معدم مش لاقي قوت يومه
كل منهم ليه مشاكله في حياته
وكل واحد عنده اللي يكفي من هموم
وعنده اللي يكفيه من أفراح برضك !!
أكررها تاني اللي اتظلم من الأخرين
ظلم نفسه الأول عشان يديهم الحق أنهم يظلموه
ظلم نفسه بأنه غلط في حقها مرة واتنين وتلاتة
تتوقعي الناس هتتبطب عليه؟
وتقوله معلش يا كوتو معلش؟
لا يرفع هو الظلم عن نفسه الأول
بعديها يرفع الظلم من الناس
بعديها برضك مش هيستنى
يرفع الظلم عن اخوانه المظلومين
ما دام ربنا اداه القدرة انه يرفع الظلم عن نفسه
كده النفس بتكون أقوى وأقوى
تعالي فكري في معنى الظلم شوية؟
انا عن نفسي لما اتظلم من حد
بقعد أفكر كتيــــــــر
كتيـــــر بطريقة لا يمكن تخيلها
طيب انا غلطت في ايه عشان اتظلم من الناس دي
ساعتها ده بيبقا حساب مباشر من نفسك ليكي
يبينلك الصح من الغلط
الصح اللي ما عملتهوش
والغلط اللي عملتيه
شوفتي ان الظلم ليه فايدة برضك؟؟
بلاش النفس المنهزمة دي مش هنقعد نغني ظلمووه القلب الخالي ظلموووه
الله يرحمك يا عبد الحليم
دلوقتي في نظري ان الزوج بيظلم نفسه
لما يظلم مراته وعياله معاه تتوقعي ليه
لأن الدنيا نفسها ظلمته ومراته وعياله ما سابهوش أو على الأقل وقفوا جنبه
لا خلوا جرحه جرحين
ساعتها تتوقعي من أي شخص قدرته على الاحتمال هتوصل لفين؟؟
ليه وقت هيقع فيه ويبدأ يظلم نفسه والي حواليه
ما تخليش حد يظلمك بأنك ما تظلميش نفسك
وما تظلميش علاقتك بربك الي قادر يساعدك على تخطي كل ده
فكرتيني بحاجة الانسان دلوقتي لما يظلم مراته معاه
بيظلمها عشان هو نفسه ضعيف
يبقا مراته تقول ده ظلمني؟؟
وتقعد برضك تغني الأغنية اياها
لا تقف جمبه شوية وتحسن علاقتها بيه
وتساعده يرفع الظلم عن نفسه ساعتها تخيلي سعادته بنفسه وبيها هتبقى قد ايه
ارجووووووو انك تكوني أقوى من كده
ده مش اقرار انك ضعيفة لأن كلنا ضعاااف
بس ده تنبيه في خط معين اوعي تتخطيه
عشان تعرفي تكملي حياتك صح
صلاة الاستخارة رد عليها الأخ احمد ربنا يباركله ويباركلنا جميعا
وربنا يوفقنا واياكي والمسلمين
وبعدين تعليق أخير (( انتو تعرفوا ايه عن الظلم عايز واحد يقولي انا اتظلمت في الدنيا من فلان وفلان يقولي اتظلم ليه ومنين جالو الشعور بالظلم
بصوا على الأخرين شوفوا حياتهم عاملة ازاي
بصوا على اخوانا في فلسطين بيتعذبوا كل يوم ازاي >> ظلم ده ولا لأ؟؟
شوفوا الطفل الصغير اللي تيتم في سن مبكرة >> ظلم ده ولا لأ؟؟
برضك ده مش اعتراض على حكم الله انا مؤمن بالله وقدره
بس الاخوة الفلسطينين قادرين على تخطي الظلم ده لما ينبذوا ما بينهم من خلاف ويوحدوا بقلووووبهم الي تتطهر تاني قلوووووووب العرب والعرب يطهروا قلوب المسلمين ساعتها نرفع الظلم عن فلسطين
الطفل الميتم يرفع الظلم عن نفسه ازاي؟
انه يحمد ربه على قدره ويشكر ربنا على ما ابتلاه وما سيحظى به من مميزات جراااء اللي حصله
يرفع الظلم عن نفسه انه يتعلم ويثابر ويرفع راسه وسط الناس ويتقدم بخطوات ثابتة
ساعتها هتبقاله مكانة وبعد ما يرفع الظلم عن نفسه هيرفعه عن الأخرين))
كترت في التعليق تقريبا ارجو ان ربنا يوفقنا ويوفقك لما يحبه ويرضاه
وتتقبلي كلامي بصدر رحب وبرضك في الأخر انا ممكن أكون غلط
ولو سمحتم يا جماعة انا مظلوم :):)
المصروف هيتقطع عني حوالي اسبوع
بس مش هسيب حقي وهرفع الحكاية لمحكمة العدل الدولية
ظلموووووووه القلب الخالي ظلموووه
التوقيع // THE WHITE KNIGHT
تحياتي،،،،،
مش عارفة اقولك ايه بس الاول لازم تعرف اني كتبت الكلام دا عن الظلم مش علشان نفسي خالص
لو كان وقع عليا ظلم فانا مش بفكر فيه بالقدر اللي انت تصورته علشان ساعات في انواع من الظلم كل ما صغرتها هانت و قدرت تعديها
انا اتكلمت عن ظلم الزوج لتجربة شايفاها قدامي مش واحدة ولا اتنين زي ما قلت لا كتير بجد
و الظروف اللي هما فيها مش زي ما انت قلت ان الزوج فيه حاجة وهي موقفتش جنبه بالعكس
دا انا شايفا زوجات قاعدين تحت رجلين ازواجهم و ازواجهم اسهل كلمه بيقولوها انا اقدر اطردك ف الشارع بمزاجي وقت ما احب لا فارق معاه لا عشرة و لا حب و لا ولاد لو كان في ولا اي حاجة ... دي نماذج عايشة في المجتمع و كتيرة مش قليلة
اه مش كل الناس كده بس لو تعرف ناس كده ساعتها هتعرف ليه دا اسمه ظلم و تحول لحياة الندية لما هتلاقي روحه هتفقد كل حاجة ليها علاقة بالامان اللي حاولت تبنيه لا يبقي انا ضيعت نفسي علي الفاضي ؟؟ لا مش هيحصل و بتتحول الحياة بينهم لجحيم ساعات بارد زي الحرب الباردة كده من تحت الترابيزة يمكن متبانش الا للناس القريبة منهم
اما عني فانا مقلتش اني مظلومة ولا جبت سيرة نفسي اصلا ف الكلام علي اد ما فاكرة يعني انا كتبت ايه
وبعدين انا مليش ف الاغاني انت عارف
لا هغني لا ظلموه ولا نصفوه
علشان اللي بيرفع الظلم عن العباد هو العدل سبحانه و اصلا هقولك حاجة مهمة مؤمنة بيها
الابتلاء بيجي علي قدر الاستطاعه
يعني لن يصيبني حزن او هم الا وانا قده و قادرة اتحمله
لو ببرطم شوية دي حاجة طبيعية ف بني الانسان انما مش بيقف عندها
غصب عنه بيفكر ف اللي بعد البرطمة دي
وعلي فكرة ظلم الاب لابنه دي مش شرط زي ما بتقول
بس المفاضلة بين الابناء دي حقيقة موجودة مش شرط بنت وولد لو بنتين او ولدين ساعات بيكون في بينهم المفضل و المميز عن الباقيين
يا ابني دا في بيوت تلاقي فيها مقسمين الاولاد الاب يصرف علي فلان وفلان والام علي الباقيين
اهو بالاتفاق ولا بلطجة مش هتفرق اهي بتسيب جواهم حاجة ايا كانت هي ايه هتكبر ولا هتتمحي بالزمن ,,, الله اعلم
والحمد لله علي كل حال ... لا ظلم بيدوم ,, و لا حزن بيفضل ف قلب طول العمر.. الحمد لله يا نايت:)
إرسال تعليق