هو انا كنت شميت خبر من اسبوعين بس الحمد لله كانت احداث الاسبوعين السوداء لونا و فعلا كفيلة تنسيني اسمي
المهم يعني الخبر دا بيقول الأتي :-
قلت الحمد لله اهي حاجة جبر خاطر من الجبار.. الحمد لله
قالوا لا مش كده
بس الحمد لله علي كل حال
انا قولت انقل الخبر كما جاء و العهدة علي الراوي
واخر دعوانا ان الحمد لله رب العالمين
____________________
محدش يقول لحد باه علشان انا مقولتش غير هنا ومش ناوية اقول علشان مش هتفرق ف اي حاجة برة هنا .. او يمكن اقول لماما لو هي افتكرت وسالتني علي النتيجة وبما انها ناسية الحمد لله فخلي الموضوع بيني وبينكم .. ومحدش يقولي روحي فرحيها و فرحي اهلك .. انا جربتها بدل المرة 3 قبل كده و كل مرة كان فيها حفلة و تكريم و كان رد الفعل من اسوء ما يمكن مجرد تمثيل قدام الناس مش اكتر .. هي ماما اللي حسيتها فرحانة من قلبها .. بس انا لو قولتلها تبقي مصر واللي في العالم العربي عرفوا .. وسيف هيتكفل باوروبا و الامريكاتين :)
الحمد لله رب العالمين
__________________________
تحديث علشان محتاجة طلب او رجاء
الرجاء بالدعاء ربنا يهديني للطريق اللي فيه الخير علشان انا محتارة حيرة لا يعلم بيها الا الله في موضوع الاستقالة دي .. قعادي له مساويء كبيرة وبردة استقالتي ليها مساويء كتيرة .. يارب بصرني اعمل ايه !!
هناك 28 تعليقًا:
الحمد لله أول المهنئين
ألف مليوووووووووووون مبروك
يا أليس
وربنا يكرمك دوما بالنجاح والتفوق
الله يبارك فيك يا احمد
ربنا يديم المعروف
الف مبروك
وربنا يكرمك دايما
وتبقى من عباقرة العالم
ايدك بقى ع الحلاوة
هههههههه
هههههههه
الله يبارك فيك يا علي
انا علي وش استقاله ان شاء الله
الحلاوة دي انتو اللي هتدفعوها علشان هاخد الحديدة معايا وانا ماشية :)
الحمد لله ربنا فرجه قريب ان شاء الله
congratulation... You Are Just fired From The club (Still My World)
والنادى يرجب بكل الزوار الجدد والقدامى
ههههههههههه ما قولنا انا من المؤسسين
دا بالعكس دا انا كده هيدوني الدكتوراه الفخرية فيه :) مهو هبقي عاطل مع مرتبة الشرف قريب ان شاء الله :)
It will always be my club :P
But my world is different as I have an angel who lights all darkness :)
وبعدين العضوية معرفة باه وانت غير معرف :)
علي كل حال نورتنا و الله يبارك فيك و يستغنوا عن حضرتك و تتحول للعالم الفاضل ان شاء الله :)
انا دايما اقول التعليم فى مصر باظ يااليس
هههههههههههههههههههههههههههه
مبروك مبروك مبروك
طب بتقولي لسيف وما تقوليليش
ماااااااشي هاتضربوا انتم الاثنين
بتخبي على عمتك يا الييييييس
طب يا اختي احنا كنا نفرحلك يعنى
(الى هى بتتقال والوش على جنب دي )
هههههههههههههههههههههههههه
الف مبروك يا جميل بس ايه ده والاولى وامتياز ؟؟؟
هما متاكدين؟؟؟
طب هما صححوا الامتحان بتاعك وانتى كنتى مطلعه الموس من بؤك ولا ايه ؟؟
ههههههههههههههههههه
مبرووووووووك يا جميل وعقبال الرساله
وموضوع الشغل يارب يارب يارب يعملك كل خير واستخيرى ربنا وخليها على الله
وعشان خاطري يا اليس تقولي لماما معلش وحياتي عندك بلاش انا عشان العمات حياتهم مش اد كده
وحياة سيف عندك يا اليس تفرحي قلب ماما عشان ولادك يبقوا يفرحوا قلبك ان شاء الله وما يحرموكيش من فرحتك بيهم ابدا
ويا سيتى فيها ايه لما تصيحلك يعنى ؟؟؟؟؟؟؟
انتى غريبه اوي هى مش هاتقول يا ستى انك كنتى مرفعه المصحيين بالموس
هاتقول انك نجحتي بس
مبروووووووووك يا ام مخ انشف من الحجر الصوان
الف مبروووووك ياقمر
ويهديكي للصواب في قرارك
بس عاوزه اقولك لو في امل انك تبقي في الشغل خليكي قعده البيت وحشه اوي
وربنا يقدملك كل خير
الف الف مبروووووووووووووك
وربنا يكتبلك اللى فيه الخير
صبرني يا رب عليكي :)
جديدة يعني حكاية ان دماغي ناشفة :( ما انتي عارفة و مجربة :)
الله يبارك فيكي و بعدين بلاش فضايح قدام الناس باه :)
في حد من اللي عرفوا قالي يا اما انتي شاطرة اوي و مكنتش واخد بالي يا اما هما اللي اغبية اوي :( ميعرفش اللي فيها معلش:)
شايفة باه الكلام :(
وبعدين انا حليت وحش التيرم الرابع دا مهو الميد تيرم من 6 شهور علي يدك كنت ببقي قاعدة معاكي للفجر ايام عملية سيف الاولانية و الفاينل من شهرين كان حالي لا يعلم بيه الا الله ولولا انه اقسم عليا اني اروح الامتحان ولا كنت عتبت االاكاديمية دي تاني بس علشان خاطره وعلشان عايزة افرحه
كل مرة بتظهر فيها النتيجة بكون في حال فيه ظلم واقع عليا وربنا اللي يعلم و زي ما تقولي النتيجة دي بتيجي جبر خاطر فعلا من ربنا ..
والله هي كده بالظبط وكل مرة بقول دا مش فعلي انا ولا مذاكرتي والله .. دا فضل ربنا وبس ومليش اي يد فيه:) الحمد لله
ربنا يرحمني من الرسالة دي باه و يخلصني منها .. كابوس :(
ال حجر صوان ال ... روحي اساليه كده هتلاقيني مطيعة و كويسة و بسمع الكلام :)
________________________
كيــــــار
الله يبارك فيكي يارب و يحفظك
بخصوص الشغل والله بقالي يجي 10 ايام بستخير ربنا .. ان كان علي الاسباب علشان اسيبه في كتير اوي و مفيهمش تجني علي حد بحق ربنا و اللي عليا اعمله اني استخير ربنا وهو سبحانه وتعالي قادر ينور بصيرتي اعمل ايه ..
الله المستعان
_____________________
Blue Wave
الله يبارك فيك يا دكتور
ربنا يكتبلنا الخير جميعا يارب و يديم بنا المعروف و يجعلنا خير صحبة اجتمعت علي الخير ان شاء الله :)
ربنا ييسرلك أمورك
وبالتوفيق
تحياتى
اللهم امين واياكم والمسلمين اجمعين
ربنا يكرمك يا محمد
كتر خيرك:)
طب فاشله لية بقي!
منتي طلعتي ألفه أهوه
ربنا يوفقك لما فيه خير
والله لو عملت ايه بردة .. اللقب اصبح تريد مارك لا يمكن تجاهله او محوه من قلب وعقل مانح اللقب .. ولا حول ولا قوة الا بالله
مش دايما النجاح بيلغي الفشل .. ولا نجاحات الدنيا كلها تعوض حد عن كلمة او نظره طيبة في عين حد كان بيتمني يكونله حاجة اي حاجة مهما كانت حتي حاجة ضئيلة .. معادش ينفع البكاء علي اللبن المسكوب .. الحمد لله علي كل حال
نورتي سابيرنا :)
رغم انى مش فاهة اوى نجحتى فى ايه؟
وليه اهلك مش هيفرحوا؟ وليه برضه مش عايزة تعملى اللى عليكى وتقوليلهم؟
وبتشتغلى ايه وليه عايزة تسيبى شغلك؟
ولا حتى صلة القرابة اللى بينك وبين سيف
بس بقولهالك من قلبى بجد الف مبرووووك
يكفى انك نجحتى وبتقدير كمان
وبقى اللقب دلؤتى ناجحة مع مرتبة الشرف
ماتخليش حد يبوظ فرحتك بنجاحك
ويارب دايما فى نجاح دائم
ههههههههه انتي مش متابعة بأة
دا يا ستي ماجستير في لوجيستيات تصدير الحاصلات الزراعية و سلاسل الامداد
Master Logistics Management of Agriculture Exports and Supply Chain Management
دي حاجة اول مرة تتدرس في مصر بتعملها الاكاديمية البحرية تبع معهد اللوجيستيات و النقل الدولي (حدوتة طويلة كده ومكلكعة)
المفترض اني اكون خلصت علشان العقد شريعة المتعاقدين و انا بقالي سنتين و نص بدرس فيه و ربنا فضله عليا فوق ما ممكن يتوصف الحمد لله بس هما قالوا مفيهاش رسالة و يكتفي بتدريس المواد المكثفة ال 16 مادة علي 4 فصول دراسية كل فصل 6 شهور وانا ارتضيت كل دا الحمد لله.. بس طلع في الاخر حد ابن حلال في المجلس الاعلي للجامعات قال علشان يعتمدوا الماجستير و يبقي اكاديمي مش بس مهني لازم يعملوا رسالة عليه ولو ديزيرت علي راي الدكتور بتاعي بتاع 70 : 100 ورقة و من لحظتها وهي اصبحت الكابوس الاسود اللي منغص عليا تفكيري ( لما بفتكرها حاكم انا اصلي بما بتضلم معايا في حتة بتلاقي الضلمة متوغلة في كله مرة واحدة الحمد لله :)
موضوع اهلي دي ليلة كبيرة ( خلي الليلة تعدي )
عن الشغل يا ستي بشتغل في اللوجيستكس في شركة تصدير حاصلات زراعية كبيرة وليها تاريخ طويل في تصدير منتجات معينة للعالم طوله وعرضه وشرقه و غربه
عايزة اسيبه ليه .. هقولك الاسباب كتيرة اوي و كتبت منها كتير هنا بس الاهم اني الحمد لله استخرت الله كتير اوي الايام اللي فاتت و كل ظلم وليه اخر و ان شاء الله ان شاء الله يكون اللي انتهيت اليه دا الخير والله المستعان
اما عن سيف مش هقولك نصي التاني ..هقولك هو كلي و لو لفيت الدنيا عمري ما هلاقي زوج زيه وربنا قادر يلم شملنا ويرزقنا الذرية الصالحة اللي تدخلنا الجنة ايدينا في ايد المصطفي صلي الله عليه وسلم. زوج واب واخ وصديق ومعلم و ابن و كل شخصية حلوة تتمني تلاقيها في حياتك.. بما انه ذكر ياريت تدعيله ربنا يشفيه من ابتلائه و يصبره ويهونها عليه
أختى العزيزة
بهديلك التاج الموجود فى المدونة
ياريت تقبلية وتجاوبى عليه
تحياتى
ألف مبروك من كل قلبي ، ربنا يوفقك دايما و يكتب لك الخير ، و يهديك سواء السبيل ، و يجعل علمك في خدمة المسلمين ، و يفتح عليكي ، و ينفع بيكي ، و ربنا يثبت سيف و يصبره ، و يشفيه ، فهو القادر على ذلك ، و هو الكريم .
هي الشوكولاته خلصت ولا إيه؟
:) انا اخدته قبل ما تقول يا محمد وجاوبت
باختصار السعادة في رضا ربنا والاحساس انه راضي عنك لما تروحله وانت لوحدك عارف ان مفيش حد سامعك وانت بتناجيه ولما تنزل من عنيك دمعة سخنة في لحظة ضعف قدام الجبار او احساس بالذنب و اعتذار ربنا ولا لما تبقي فرحان و تبقي مش عارف تشكر ربنا ازاي تقوله يا رب انا بحبك اووووووي ارضي عني يارب
وقتها هتحس الدنيا مش سايعاك وعايز الف دنيا و دنيا علشان تلف فيها فرحا برضا الرحمن :)
الله يرزقنا رضاه يارب دنيا واخرة :)
نورتنا يا محمد
___________________
الله يبارك فيك يا استاذ احمد :)
اللهم امين ربنا يتقبل يارب والله هو اللي بيحز في نفسي اوي موضوع علم ينتفع بيه علشان كده والله كنت بحاول لو عرفت حاجة جديدة اقولها و صوتي اتنبح مع البشر اللي شغاله معاهم .. تقولهم حقكم بيتاكل و مش عارفين حقكم ضايع ليه و تلاقوه ازاي .. بس بتقول ايه .. اتعودوا انهم يلموا فتافيت الاجانب اللي لهم اليد العليا القوية دايما .. خايفين يتشرطوا ويلوحوا بحقهم لحسن ميلاقوش الفتات دا :(مع اني عملت معاهم تجربة والله فلحت بس هما جبناء .. مش بغلط فيهم بس هما فعلا حاسين اننا محتاجينهم لدرجة ان رقبتك لازم تكون تحت جزمتة العملاء الاجانب ( اسفة علي التعبير دا بس دي الحقيقة بدون مبالغة)
اللهم بلغت وربنا شاهد
ربنا يجبر بخاطرك يا استاذ احمد كنت لسه عايزة اقولك بجد انشرح صدري لما قريت اللي كتبته علي ماء زمزم صدق رسول الله صلي الله عليه وسلم " وما ينطق عن الهوي، ان هو الا وحس يوحي" صدق الله العظيم
يارب ربنا يتقبل دعائك لسيف و يتقبل منا جميعا وان شاء الله ربنا يقومه بالسلامة واخده من ايديه اعرفه علي كل الناس اللي دعيتله بظهر الغيب علشان يعرف ان الناس الطيبين لسه موجودين و الدنيا مهما كانت دنيا بردة فيها و أمة محمد صلي الله عليه وسلم فيها الخير ليوم الدين :) الحمد لله رب العالمين
اشكرك بجد اوي
الشيكولاتة ان شاء الله لما سيف يقوم بالسلامة ان شاء الله تعالي :) وانا والله املي وحسن ظني في ربنا كبير اوي انه ان شاء الله لن يردنا خائبين بس احنا نقول ياااااارب :)
دي فرحتي ودي الحاجة اللي هتسعد قلبي وربنا العليم بما في القلوب .. الحمد لله رب العالمين
الف مبروك النجاح
ويارب دايما
من حسن لاحسن بأذن الله
يوم الجمعه 14/11بأذن الله
هنروح نزور دار ايتام فى بورسعيد اللى يحب يشرفنا
ياريت تنورنا ونحاول نرسم بسمه ونتعاون على البر والتقوى
وبعدها هنقعد مع بعض شوية طبعا لو تحبوا
التفاصيل عندى بالمدونة
اعتذر لكنه ليس اعلان لكنها دعوه للخير
جزاكي الله خيرا نهر الحب:)
الله يبارك فيكي يارب
كان نفسي بجد كنت اقدر اجي .. ربنا عالم بالحال .. يارب يتقبل منكم جميعا صالح اعمالكم و يرزقنا دايما فعل الخير ويتقبله منا
نورتي و ربنا يوفقك لما يحب و يرضي
ألف مبروك...
وعقبال ما تخلصي الرساله...
.........
والله يسهلك إلي فيه الصلاح...
يااااااااااااااارب يسمع منك ربنا ياااارب :)
ربنا يكرمك انتي كمان و يفتح لك وعليكي ويرضي عليكي :)
نورتي m.k:)
السلام عليكم
كيف حالك يا اليس .. ؟
ان شاء الله تكوني بصحه جيده :)
تأخري على زيارة مدونتك حسسني بإني خايب خيابه :(
اعذريني على التأخير والمباركه .. بس ماشاء الله تبارك الله .. اولاً الف مبروك على النتيجه الطيبه في دراستك :) وانا والله سعيد جداً بهذا .. ثانياً مبروك على الستايل الجديد لأنك محتاجه تغيريه من زمان .. بس مش عارف البنات ليه بيحبوا اللون ده ؟ هو حلو بس مجرد سؤال ؟ .. ثالثاً ربنا يشفي سيف ويعينه على ما ابتلاه فيه ويرزقه الشفاء قريباً ان شاء الله .. رابعاً صور الأطفال الموجوده في اعلى الصفحه جميله وربنا يحميهم ويبارك فيهم ويخليهم لأهلهم يارب .. خامساً في الجزء المحدث في البوست وطلبك للدعاء لأنك محتاره تستقيلي والا تعملي ايه بالضبط ؟ انصحك بصلاة الإستخاره وان شاء الله ربنا راح ييسر لك اللي فيه الخير وكوني واثقه من هذا بس صلي صلاةالإستخاره وانت راح ينشرح صدرك للي فيه الخير ان شاء الله :) وان من جهتي ادعي لك بإن الله ييسر لك امرك ويختار لك ماهو اصلح ان شاء الله .. سادساً واخيراً اقبلي مني هذي الهديه اللي على الروابط واختاري اللي تجي نفسك عليه وما يهمكيش الحساب :)
بس انا مش مسؤل عن اي زياده في الوزن تنتج عن هذا الإختيار :)
هذي المره انا اللي رغيت كثير جداً ..بس اعمل ايه 42 لسان :)
في امان الله
http://up3.m5zn.com/get-11-2008-gdi24o9qxjw.png
http://up3.m5zn.com/get-11-2008-f4w2b7xyeg6.png
http://up3.m5zn.com/get-11-2008-guvkkda6fqj.bmp
اه على فكره سابعاً انا معترض على العنوان (( "الفاشلة نجحت باين" ))
لاتعتبري نفسك فاشله ..امال الفاشلين يعتبروا نفسهم ايه ؟!!!
في امان الله
وعليكم السلام يا علي
لا اتاخرت ولا حاجة
مش عايزة اقول مفرتحش اصلا علشان مبقاش بجحد نعمة ربنا
الحمد لله علي كل حال
علي فكرة اللون مكانش علشان بناتي ولا حاجة دا افتح لونه لقيته ماشي مع لون الخط في اللي كتبته قبل كده
هو يوم كنت بلعب وطلع دا كله منه
الصور لولاد اخويا سليم وسيف .. عقبال اولادك
موضوع الشغل دا انا بستخير فيه ربنا للاسبوع التالت ولا يمكن اكتر وسايباها علي الله هو عالم بحالي و كل اللي يقضي بيه انا مليش اعتراض فلن يكون للاسوء ان شاء الله
انا مش بعمل حاجة الا لما بستخير ربنا بس ساعات بتزود حيرتي يعني انا مقتنعة 100% اني لازم امشي و في اخر لحظة الاقي امي بتقولي بلاش علشان حلم هي شافته
طبعا غصب عني مش هقدر اقولها لا حتي لو كان فيا ايه وبردة مبطلتش استخارة يمكن ربنا يرحمني برحمة من عنده ارحم من رحمة البشر
متشكرة علي الهدايا وتتردلك في الافراح ان شاء الله
وبخصوص كلمة فاشلة دي ربنا يعلم اني مش بقولها هزار وانها حقيقية جدا بس مش موضوعنا كفاية عليا اللي حاصل
ادعيله ياعلي
هو اللي محتاج الدعاء ليل ونهار
إرسال تعليق