الثلاثاء، 28 أكتوبر 2008

فاشلة

هيجرا ايه يعني لو عملت مذكرات ابنة فاشلة

هي حقيقة لا مفر من الاعتراف بيها .. هو مش فاشلة من الطرفين


انا فاشلة من طرف واحد ولو جبتله نجمة من السما .. بردة فاشلة


الفشل لو في نظر العالم كله بيعتبره نجاح عنده انا مليش غير تعريف واحدة = فاشلة



انا مش عايزة ابقي حاسة اني تجردت من خصوصيتي بس جواي غربة قوية اوي( والله كنت اقصدها رغبة بس وانا براجع الكلام لقيتها غربة ودي مناسبة بردة ) اني اعترف باني فشلت بكافة الطرق و خصوصا اننا خلاص وصلنا لمفترق طرق .. هو وضع فيها نقطة النهاية full stop و المفروض ابتدي من اول السطر لوحدي ..

بالظبط شكلي دلوقتي زي اللي ايده مربوطة ورا ظهره و في كمامه علي فمه و مصر يحاول يصرخ .. او واحد بيصرخ في وسط الصحرا في عز الشمس ولا عمر حد هيسمعه ولا الصراخ هيحميه من لسعة الشمس الحارقة

بقالي عمري كله بهرب من اللقب دا مش ببالغ هو انا مجيئي للدنيا كان بامر من الله ولكنه لم يكن علي هواه ولا عايزه و استمر رفضه لوجودي طوال السنين مع اني حاولت وربنا اللي يعلم ولحد من ايام كنت بحاول

بس خلاص لحد كده .. اللي عملته و حصل ربنا عالم بيه هو وحده يعلم الحق فين ..

بدون التفاصيل شكلي اكيد من الابناء والبنات العاقين و امرنا الله ببر الوالدين و كنت محافظة علي امر الله قدر الامكان والله اعلم يمكن اقدر احاول فيه تاني بس دلوقتي لا مش هحاول ومش هعمل حاجة .. مش هغضب ربنا ولو بنظره وهو عالم بيا ويعلم الله اني مش هعملها علشان خاطر ربنا بس مش لاي سبب تاني

ساعات بنفتقد ناس في حياتنا او بنتمني وجود ناس في حياتنا ..

صورة لشخص تتمني يكون هو دا اللي تعيش معاه

قصة سمعتها تتمني تكون بطلها

بس هي ثواني و تفوق و تعرف ان ربنا اراد ليك الحياة دي بالشكل دا

الخبر الكويس الوحيد في مشوار فشلي معاه دا اني واخيرا وبعد سنين انتزعت اعتراف باني علي حق او هو مش انتزعت هو انا اهديت هذا الاعتراف من القريبين مني او علي الاقل اللي ابتدوا يحسوا المشكلة فين .. انا معنديش مانع الناس تظلمني وتعتبرني غلطانة لو دي ارادة ربنا وعلشان معملش اللي يعتبر غلط فعلا لما احاول ابرر افعالي .. هو ربنا الرقيب شاهد و عالم وهو وحده العدل

احسن نعمة مرتبطة بالموضوع دا و غيره طبعا والحمد لله عليها اوي اني بتكتم و بسكت مهما حصل .. بعتبرها نعمة و غيري بيشوفها سلبية بس هي نعمة طالما بتخليني اعمل حاجة تبعدني اني اعمل حاجة تغضب ربنا او ارتكب ذنب .. بس اصبحت مشكلة دلوقتي علشان بقت تتسبب في امراض :( الحمد لله علي كل حال

شكلها مش هتنفع مذكرات ابنة فاشلة دي علشان لو اتكلمت هلم شوية ذنوب في السكة :( وانا مش ناقصة .. يكتفي بهذا القدر الي ان يقضي الله امرا كان مفعولا.. وربنا يسامحني لو اسأت لاي حد من قريب او من بعيد

_________________________

تحديث :-

قدر الله وما شاء فعل

مش انا عملت فالحة و راجل وقولت مش هحاول تاني وبتاع .. ربنا جابها من عنده و رجلي فوق رقبتي و خلاني اروح اعمل حاجة احتسبتها عند الله وهو اعلم بنيتي لعلها ترضيه !! ( ترضيه دي مش علي الله .. لو علي رضا الله انا احتسبتها خلاص وعلي يقين ان الله لا يضيع اجر من احسن عملا )

علي راي امي عن ام امي الله يرحمها .. ربنا مش بيتعاند .. الامر لله

هناك 12 تعليقًا:

غير معرف يقول...

Welcome To My world

صبرني يارب يقول...

ايه يااليس

يا فاشله يا اليس

هههههههههههههههه
روقي يا بنتى

هو فى اب وام بيعجبهم ولادهم لما يكبروا

عادي انا كل حاجه باعملها اصلا غلط

حتى تربيتى لولادي غلط وكلامي غلط عادي

واضح اننا مش هانعجبهم اصلا

فخلاص بنراضيهم على اد ما نقدر وخلاص

ما لكيش بركه الا ماما وبابا يا اليييييس

أميرة يقول...

اسمها المتعارف عليه

JOIN THE CLUB :)

دا انا من مؤسسيه بس انت تلاقيك كنت غايب الحصة دي

وبعدين دي ال WORLD بتاعتنا كلنا مش بتاعتك لوحدك :)

الله يهدي الحال يارب

أميرة يقول...

اه فاشلة و عندي شهادة بكده و متوقع عليها بعمري كله

الموضوع مش موضوع عاجب ولا مش عاجب .. عاجب دي يعني في حاجة اساسا فيها امل بس لما يكون شكلك اسود في اسود كده يبقي علي راي عمك سعد زغلول "مفيش فايدة"

بس انا سبحان الله كتبت التدوينة دي من هنا و اتاخدت من قفايا باللفظ والفعل .. ربنا ساقني علشان اعمل حاجة ولا يمكن بيقولي كملي و الاجر عند الله .. الله وحده اعلم بكل دا بيحصل ليه

مقولتش حاجة انا في موضوع البركة دا وربنا يعلم اني بحاول اراضيهم بكل اللي اقدر عليه ..

بس واضح ان حكاية فاشلة دي عجبتك اوي ... مش هتنازلك عن اللقب متخافيش :)
دا مكتوب علي اسمي ولا يمكن التنازل عنه او توريثه :)

اقصوصه يقول...

امممممممممممممممم

الفشل دايما له اكثر من وجه

بس حسب ما احنا نشوف

خلنا نحاول ننظر للامور بطريقه اخبرى

ومن زوايا اخرى

وفقك الله..وابعد عننك الهم اخيه

أميرة يقول...

يااااااااااااااااااااااارب

اللهم امين ياااااااا رب

انا لي رجاء واحد في الدنيا وربنا العليم به ومش عايزة غيره و علي الدنيا السلام و كفاية منها لحد كده

الحمد لله رب العالمين

اقصوصة : ساعات الفشل في نظر الفاشل بيكون ليه لذة خاصة و خصوصا لما يكون فشل في نواحي معينة هي بالنسبة له ميزة و للاخرين فشل ذريع :)

موناليزا يقول...

حبيبتى فى الله
الاعتراف بالفشل اولى خطوات النجاح
وذى ماقلتى المهم ان ترضى الله فى جميع افعالك
ربنا ييسرلك جميع امورك ويفرح قلبك يارب

أميرة يقول...

اللهم امين يارب

ربنا يتقبل ان شاء الله يا أمة الله :)

لا تنسينا من دعائنا سيف وانا :)

بس انا مش بهزر في موضوع الفشل دا .. زي ما تقولي كده حاجة زي الوشم مش ممكن يتشال الا بحرق الجلد :(

كلام حسام يقول...

بصي يا اليس انا مش فاهم ابعاد الموضوع بس هاقولك حاجة
سيبك انتي كل اللي بيفضل من الاهل والاخوات مجاملات في مجاملات مش اكتر وكل واحد لما بيكبر بيعيش حياته بعيد عن التاني وبتفضل دايما العلاقة بينهم علاقة مجاملات

أميرة يقول...

لا يا حسام مش هيحصل دا

ان مكنتش حاسة باللي بقوله مش بقوله وان مكانش دا اللي جوايا فعلا فمش هعمله ابدا

مهي دي المصيبة لو بعرف اعمل كده كانت مشاكلي نصها اتحل

اهلي لما بودهم بيبقي علشان فعلا بحبهم ولو علي المجاملات هتلاقيني اسوء حد ممكن تقابله في الموضوع دا .. انما في الواجب اكيد مشاركة .. مجاملة بتاعت سد خانة دي مليش فيها ولو عملتها ببقي مش طايقة روحي و بعملها وباين عليا اني مش طايقة اعملها .. فعلي ايه الغلب دا

ومالها بس المعاملة بالحسني وبما يرضي الله :(

سبهللة يقول...

بصى يا حبيبتى
فيه حديث عن الرسول صلى الله عليه وسلم بيقول فيه
رحم الله امرىء اعان ولده على بره
وفى كتير من الاحيان بعض الاباء والامهات بيدفعوا اولادهم دفعا للعقوق
وطبعا اللع تعالى اعلى واعلم
بس هاقولك حديث تانى
قال صلى الله عليه وسلم:
من حد النظر الى ابويه احدهما او كلاهما فأن برىء منه يوم القيامة
وحياتك من ساعة ما سمعت الحديث دة والواحد اتغير معاهم كتييييييير اوى
على قد ما يقدر
تقبل الله منك صالح الاعمال وجعلها فى ميزان حسناتك وتجاوز عن سيئاتم

أميرة يقول...

نورتي سبهللة :)

انا عارفة الحديثين و لو قريتي تاني هتلاقيني بقول مش هعملها ولو بنظره .. انا والله ما عايزة ازعل حد .. بس الحقيقة دايما مرة و صعب تصدقي حاجة معيشتيش فيها ..

الحديث الاول .. رحم الله من اعان ولده علي بره وهو المستفيد والله .. والله صدق رسول الله صلي الله عليه وسلم ..

ساعات كتيرة جدا مش هقولك قليل علاقتي بامي بتتوتر بس دلوقتي مبقتش كده اوي .. هي كبرت وانا كبرت و بقيت والله بحاسب علي كل حاجة وبشوف ايه يريحها و بعمله علي اد ما بقدر علشان مبقاش في العمر بقية لعلها ترضي و ببقي في قمة السعادة لما اكون وصلتها مكان او خرجت معاها زيارة عائلية او وديتها تشتري حاجات واحنا راجعين وانا بركن العربية دايما في اللحظة دي تقولي ربنا يديكي الصحة و يوسع عليكي رزقك ويخليكي .. بحس اني معملش حاجة قصاد دعوة زي دي وبفرح بيها اوي .. ربنا يبارك فيها يارب و يديها علي اد طيبة قلبها و نيتها الصافية ويوسع عليها رزقها و لا يجعلها تحتاج لمخلوق يارب ابدا لا قريب ولا غريب

الحمد لله رب العالمين .. ربنا بيقطع من هنا ويوصل من هنا و لله الامر من قبل ومن بعد.

اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع