بهرب من الكلام في موضوع حساس و شائك و سؤال مركبني الصداع بقاله كام يوم ..
هو ليه ربنا خلق الانسان و جعل له اخ او اخت مع ان اول اخ في البشرية قتل اخوه !!
امرنا الله بصلة الارحام و مع ان كل الارحام تقريبا عايزة تتقطع ومش بتفكر تتوصل الا من رحم ربي !!
ربنا قال ادفع بالتي هي احسن .. ولما تقدم الحسنة و تلاقي المقابل كله كله سيء .. بيتهيالي ساعتها مش هتقول الا انت شاهد يا ربي و حرمت الظلم علي نفسك وجعلته محرم بين الناس بس في من الناس من يتخذ الظلم سبيله في الحياة .. الله يهدي !!
ولابد من يوم هيكون تترد فيه المظالم .. ابيض علي كل مظلوم واسود علي كل ظالم .. ( دا علي ما فاكرة اعتقد تتر مسلسل مش فاكرة اسمه) بس جه علي بالي بالمناسبة الهباب اللي اتدبست فيها..
اول مرة في حياتي ادعي علي حد و دعوة الصائم ان شاء الله لا ترد ,,, للحق هي تاني مرة بس اول مرة ادعيها وانا متاكدة اني مليش يد ولا متسببة باي حال في حدوث الظلم دا .. ولو انها مش دعوة عليه بالمعني الصريح .. دعوة الله باسمه المنتقم و اسمه الجبار احب اسماء الله الي قلبي .. الله ينتقم من كل ظالم و يهديه ان شاء ان يهديه وان لم تكن مشيئته في الهداية فادعو الله ان يهديني انا الي الصبر علي ابتلائه ...
احلي جبر في اخر يوم زي اللي عدا دا موضوع رااااااااائع لقيته بالصدفة بس ريح قلبي و دا في نظري اجابة الله الجبار و جبر خاطر و طبطبة من رب رحيم .. الحمد لله رب العالمين
موضوع كتاب الله....... اول مرة ادخل المدونة دي ولعلها فعلا جبر خاطر من الله ..
انا شفت كذا مأساة في مشاكل الاخوات ببعضها .. شفت الاخوة عن حق وشفت اللي بيستغني باسرته الجديدة عن القديمة و شفت اللي بيفضل مصلحته علي مصلحة الكل و شفت اللي بيفضل الكل علي نفسه و شفت اللي بيراعي ربنا في اهله و اهل اهله و شفت نماذج كتيرة لأخوات منهم الكبار و الصغيرين و حاولت ادور علي اجابة ...
ليه لما يكون اللي بيجري في دمهم نفس الدم و قسموا سوا نفس اللقمة .. ليه بيعملوا كده في بعض !!!
علي كل حال ... اللهم لا اعتراض ولعله خير محدش عارف ...
وعلي رأي سيف لما بيقولي الواحد مهما حصل اول ما بيتوجع بيقول "آخ" ....
بس دا سيف = ملاك في صورة بشر ..
انا شريرة و قلبي اسود و لما بتوجع بقول بحبك يا أخي علشان دمي ودمك من امي ربنا يخليها وتستحملنا دايما وبردة اللهم لا اعتراض ..
هناك 7 تعليقات:
السلام عليكم...
شكرا لزيارتك مدونتي المتواضعه ...
أسعدني تعليقك...
وكلامك الطيب ....
....................
الحمدلله أنكي وجدتي بمدونتي تهوين من الله عليكي ...
والله قد غمرتني السعاده...
وشعرت ببروده جميله تتخللني وانا أقرأ رسالتك.....
..........................
بالنسبه لموضوع صلة الأرحام فهو أمر إلاهي...فليس لنا أن نعترض عليه..
حتى ولو كان أرحامنا قاطعين لنا..
وعن ابي هريرة - رضي الله عنه - قال: سمعت رسول الله صلى الله عليه وسلم يقول: (تعلموا من انسابكم، ما تصلون به ارحامكم، فان صلة الرحم محبة في الاهل، مثراة في المال، ونسأة في الاثر).
فإن لم ينل الشخص جزائه بالدنيا
فما أعظم جزائه من ربه يوم الدين..
....
وجميل جدا كلامك( لعله خير محدش عارف)
فادفعي بالتي هي أحسن...
.................
في أمان الله..
إزيك يا أليس أخبارك أيه
طبعا ربنا خلق الأخوه لزيادة البشريه وهكذا في كل الكائنات
فهناك من يموت صغيرا دونما إنجاب فيتم الإستعواض في نسل أخيه وهكذا
وصلة الأرحام واجب ولو كانوا سيئين
وإن كانت بمكالمة هاتفيه ففيها العوض
والمسلسل تقريبا ذئاب الجبل ,
والأخ دائما ما يكون السند والظهر لأخيه
فهما يحملون نفس الهموم لأنهم يحيون بنفس البيت والمؤثرات عليهم واحده
لذلك يكون فقدان الأخ أو الأخت من الأمور الشديدة الصعوبه
وربنا يقدرنا وإياكم دوما على صلة الأرحام
دمتي يا أليس بكل خير
اليس : لوتصدقت على وانا اخاك فقبلت يدك شكرا وامتدحت فعلك بين الناس فقد وفيت حقك ، واخذت اجرك
وان تصدقت على اخيك فجحد فصبرت ضاعف الله الاجر وبارك فيه
قلبك اكثر بياضا مما تصفيه
تحياتى والسلام
بيرم المصرى
الييييييس ازيك
بقالي كام يوم بادور على مدونتك يا شيخه حتى كلمتك مرتين ما بتبقيش موجوده
اصل وصلات المدونات الى كانت عندي راحت فى تغير شكل المدونه
الواحد بيعمل الى عليه يا اليس ويقول كله عند الله وخلاص
واحنا مأمورين بصلة الرحم نصلها بقى ومانقولش الباقي مش بيصل
صليهم وان قطعوك يا اليس
تحياتي لكى ووحشاني
وسلميلى على سيف اوي
جزاكم الله خيرا جميعا واشكركم علي التعليقات
بس انا مش قادرة افهم غير حاجة واحدة وهي ان الاخ اخ مهما حصل ومهما كان في بينك وبينه حاجة يعني انت قدره وهو قدرك ومهما حصل مينفعش يروح يغيرك ولا يقطع قلة الرحم اللي بينهم علشان ربنا سبحانه وتعالي اوصي بها
مش عارفة العيب في الدنيا ولا في طمع الدنيا .. مهي لو كانت حلوة اوي و خير كده ما كان ربنا جعلنا فيها مخلدين .. ليه هي دار فناء .. لو فيها الخير فهو اصبح يكسوه حاجات كتيرة اوي ساعات بتبوظ معني الخير دا وشكله و طعمه...
مفيش حد عاقل يقولهم !!!
بيتهيالي مفيش حاجة في الدنيا تعوض حضن الاخ او الاخت لما تحتاجله يسندك في شدتك وفي فرحك .. انما مش لاقيه لا في الفرح ولا الشدة وهو مش مطلوب منه حاجة اصلا الا انه يتواجد بروحه حتي بلاش تواجد فعلي في قلب الحدث ..
راحوا فين اللي عايشين دا ولا حتي لسه فاكرينه من زمان...
حسبي الله ونعم الوكيل
___________________
m.k ربنا يباركلك .. اكيد كل الافعال وراها نية الجزاء عند الله مش عند العباد .. الله المستعان
______________________
احمد
ان شاء الله تكون بخير
مبقاش في صورة الاخوات اللي اتكلمت عليها دي الا من رحم ربي .. او يمكن النماذج اللي بشوفها مفيهاش من دا كتير .. ربنا يلطف بنا
________________________
بيرم المصري
صدقني لو تصدقت علي اخي لا ابغي شكرا ولا حتي مجرد انه يفتكر اني عملت معاه حاجة كويسة .. كل طلبي احس انه اخويا بكل اللي في الكلمة من معاني مش مجرد وجود صفات وراثية مشتركة بيننا ولا اننا مواليد لنفس الاب والام .. الاخوة دي نعمة كبيرة اوي ميحسش بيها الا اللي ذاقها و راحت منه او اللي مشافهاش او اللي فيها و بيتمني تدوم ان شاء الله :)
_______________________
صبرني يارب
معلش انتي عارفة النت في البيت ساعات مش بيوصل كلام .. بس علي كل تشكري علي سؤالك و ربنا يديم المعروف يارب
موضوع الوصل دا بيتهيالي حاجة بين العبد وربه .. هو يعلم من يصلها كما امر ومن يلصمها ومن يقطعها وان وصلتها .. الله المستعان
اما سيف باه هسيبك انتي تسلمي عليه :) وابقي وصيه عليا وخليه يسمع الكلام ويبطل مناكفة في الدكاترة :)
يارب يجمعنا علي الخير دايما يارب و يكفينا كل سوء
طيب تعملي ايه لو كنتي زيي
عارفه انا مين مديري في الشغل؟
أخويا الكبير
انا مدير الممصنع
وهو مدير البحوث والتطوير وبيراجع عليا الشغل !!!!!
وكده كفايه
اسيبك تتوقعي الباقي بدون تعليق مني!!
احمدي ربنا على اللي انتي فيه لو كان عندك مشاكل بخصوص مثل هذا الأمر
لأن اللي انا بشوفه يوميا مفتكرش فيه حد بيشوفه أبدا
هههههههههههههههههههههههه سبقتك
لورانس العرب
من موقع المتميز دا احب ابلغ سعادتك ان ان كان اخوك الكبير مديرك فخد عندك دي باه
انا ابويا هو مديري في الشغل و معاه 3 كمان .. عمرك شفت حد ليه 4 مديرين كل واحد ماسكه من حته :)
هههههههههههههه حلوة اللي بتشوفه مفيش حد بيشوفه دا
تعالي زورنا ساعتين بس مش هقولك يوم وانت تشوف العجب العجاب
عارف المثل اللي بيقولك اللي يشوف بلاوي الناس تهون عليه بلوته
ربنا معاك ونورتنا :)
إرسال تعليق