جاتلي الفكرة ومجتليش الجرأة
حاسة اني مقدرش عليها خصوصا للسبب اللي خلاني افكر فيها
ساعات الاحاسيس اللي جوانا مش بتلاقي حروف تعبر عنها
ساعات الصوت و نبرته و اختلاف طبقاته بيعبروا احسن
لو عايزة اصرخ هصرخ بصوت يوصل اقوي من اي كلام
لو عايزة اضحك ممكن يتحس في نبرة الصوت الفرحة اللي بتغلف الكلام
بستغربني اما بسمع صوتي
صوتي جوايا غير لما بيطلع و بعيد سماعه
هي غريبة بس بتحصل
الفكرة دي فكرتني اني زمان كنت بفكر ساعات اكون مذيعة
كنت بحب العب كده
مرة مذيعة ومرة مدرسة
ومطلعتش ولا واحدة فيهم مع ان الاتنين كانوا ينفعوا في مجال دراستي
هما كانوا ومازالوا
بس مينفعش خلاص
حتي لو مجرد صوت يستأنس بيه انسان في مكان ما الله اعلم حالته ايه وقتها لما بيسمعك
يمكن لو صوتك فرحان يتعدي منك ويفرح
يمكن لو حس ان الصوت جاي مخنوق و زعلان تزود همومه
يمكن يستسخفك و يقفل في وشك
وعلي ايه كل دا
الله هو الغني
ييمكن ميعجبوش الصوت ولا اللي بيتقال ويقفل في وشك وساعتها تبقي بتكلم نفسك وبس
يمكن يعجبه الصوت و يغمض عنيه ويحاول يرسم صورة لصاحب الصوت
يا تري شكله زي ما متخيله كده ؟
يا تري كلامه حقيقي هو اللي بيؤمن بيه و في ضميره
ولا هي متطلبات الوظيفة بتحتم عليه يكون كده
مين عارف
كده كويس الحمد لله
في ناس كنت بسمعها في الراديو زمان وانا صغيرة ولما جيت شفتهم في التليفزيون اتصدمت
الصورة اللي رسمتها انهارت و طلعت مش شبه الحقيقة خالص
كنت اتمني لو اقدر احافظ علي صوري كلها من غير ما السنين تعمل فيها حاجة او تخرب فيها
اد ما الاحلام والتخيلات بتطلع دايما جميلة لما بنبقي عايزينها جميلة
اد ما ممكن الحقيقة تكشف عن مرارتها وتبوظ الصور الجميلة
اهي ذكريات اللي بقي منها و عاش فين وفين علي ما ايد بتخبط فيه ونفتكره
واللي راح لحاله منها اهو مكتوبله يروح ويسيب مكانه لغيره
لعلها تبقي ذكري احسن
وبردة تراودني فكرة الكتابة الصوتية
وهتفضل فكرة غير قابلة للتفعيل
خليها حلم اتخيله جميل
هناك 10 تعليقات:
متفق معكى فى اننا احيانا يكون التعبير عما بداخلنا من افراح واحزان بالكلمات صعب جدا وربما يكون التعبير عنها بالصوت اكثر تاثيرا ومنطقيا حتى لو كانت كلمه اااااااااه او ابتسامة بسيطة
الفكرة جميلة واحيانا كثيرة بنحلم بيها
واحيانا يتملكنا الصمت والسكون لانه يكون ابلغ من الكلام
تحياتى
السلام عليكم
ازيك عاملة ايه
افكارك جميلة وفيها فلسفة
عارفة انا مرة عملتها زمان ايام الروقان
كنت بجيب شريط وأغنى ماانا كنت غاوية غنا
او اتكلم
بس بصراحة استغربت صوتى جدا
لما انا حسيته مش انا
طيب ازاى!؟
فى مدون نفذها فيديو
مدونة اسمها الاوتوبيس
وبيعمل بوستاته مصورة
الفكرة جميلة
خليك جاهزة
واكتبى كتابة صوتية زى ماقلت
بينك وبين نفسك مبدئيا
لغاية ماتحسى انك راضية عن التجربة
كان فى اصوات جميلة بنسمعها زمان
عبرت بشدة عن معانى حلوة مكانش ممكن توصل غير بصوتهم
الصوت وطريقة الكلام مهم جدا
مش عارفة اللى هقوله ده ليه علاقة بالموضوع ولا لا
بس حتى القران
أصوات القراء
بتخليك تركزى وتحسى بالمعانى
انا بحب سورة طه جدا من العفاسى
صوته وتلاوته بتخلينى احس انى حضرت المشاهد الجميلة فى السورة
بحب صوته كمان فى سورة مريم
نطقه لايات محددة برضه بيجسد المشهد تمام
زى
(وأتت به قومها تحمله)
تحمله
بينطقها بطريقة تحسسك بالازمة اللى كانت فيها السيدة مريم
ولما قومها كلموها
(فأشارت اليه)
برضه صوته ادانى معانى التسليم والعجز وطلب المدد من الله الذى اخبرها ان المخلوق الضعيف الرضيع ده سيتولى مهمة الدفاع عنها
من غير الصوت يمكن اكون محرومة من المعانى دى
جربى مش هتخسرى حاجة
السلام عليكـــم الأول...
جتلك فكرة معينة جربيها يا بنتي يمكن تنفع،، بس أنا أختلف معاكي أن الصوت بيفرج أكتر يمكن يعمل كده لما يكون في حتة رايحلها بدل ما يضيع في الفضا،،، بس الكتابة بترتب الأفكار، وتنسقها، وتبينلك أوجه قصور ومميزات كل فكرة لأنك بتفكري وأنتي بتكتبي
ثم أن في حاجات أدبتنا وخلت الإنسان ما ينطقش بكل الي يجول بذهنه، أولها الدين طبعا وثانيها الحضارة
عمر بن الخطاب رضي الله عنه كان يضع حجرا صغيرا في فمه عشان لسانه ميغلبوش
يفضل أننا ما نطلعش كل الي يدور في دماغنا على لسانا
ده أحسن لينا طبعا،، بس ممكن نطلعه على ورق وهيطلع منظم ومنسق ويرسم طريق حلو ومريح وكله خضار في خضار..:)
وبعدين ايه بستغربني لما بسمع صوتي دي..:) انتي جايباه مغشوش ولا ايه
بلاش احساس الغربة عن الذات والوطن ده ...:) عشان مش موضته دلوقتي ...:)
في موضة إنهم خلفي (( they are coming after me ))
ماشية مع نص الناس اليومين دول
خلاصة الأمر أن أنصح أنك تقدمي ورقك وتطلعي مذيعة،، شغلانة مريحة وفلوسها كتيرة
مش عايزة غير واحد رغاي ..:) بس دي بتبقا موهبة
وعشان ما تقوليش اني بحبطك .. اعملي اعلان على جنب في المدونة اكتبي فيه المدونة الصوتية قريبا ... ولما يجي قريبا ده يبقا ربك يحلها من عنده
uncle / The White Knight
انتى ليه حزينة يا حبيبتى ؟
هونيها تهون
السلام عليكم ورحمة الله وبركاته
الله يكرمك يا بنتى ... كلامك طالع من القلب بيهز وجدان اى انسان .. مين عارف يمكن حلمك يتحقق .. وعلى ايدك تعرفى انتى واحد فضل يحلم حوالى 4 سنين انه يرجع يشتغل تااانى .. ويا سبحان الله رجع يشتغل اكتر من الاول .. وكمان بالانجلش لما عنيه طلعت خلاص ... يارب يجبر بخاطر بنتى الغاليه .. اعتذر لتأخرى دائما لانه فى البيت مافيش نت وفى الشغل مافيش وقت لكن يادوب بقعد نص ساعه لما برجع من الشغل .
همس الاحباب
عندك حق
كتير يتملكنا الصبمت لما يصعب علينا الكلام
ان شاء الله تكونوا بخير جميعا
شرفت
حفيدة عرابي
وعليكم السلام ورحمة الله وبركاته
ازيك انتي يا استاذة
انا الحمد لله رب العالمين بخير
من عاشر القوم .. اصلي معاشرة ناس فيلسوفة فاتعديت منها :)
كويس اني مش لوحدي اللي مستغرباني
انا عملتها كتير جدا وانا صغيرة
و كنت بتضايق اما اسمع صوتي علشان بقول لنفسي انا مش بسمعني كده وانا بتكلم فليه لما بسجله واعيده الاقيني مش انا !!
لو عرفتي ازاي ابقي عدي قوليلي :)
التدوين بالصوت والصورة صعب جدااا و خصوصا لما تكون بنت.. يعني في زمن زي اللي احنا فيه دا مش حاجة مضمونة ولا مأمونة العواقب
اما الصوتية منها فاعتقد هتكون احسن بس للي عنده جرأة انه ينفذها وخصوصا لو كانت بنت .. مين عارف يمكن تحصل :)
الاصوات اللي بتتسمع من غير ما تشوفي شكلها بيبقالها تأثير جميل .. بتسيبك تتخيلي وتحلمي بالصورة اللي بينقلهالك بصوته
بحسها دلوقتي فرصة رائعة للراحة من اللي بيجري طول اليوم
لما تغمضي عنيكي و تسمعي وبس
الدنيا تبقي هادية و تنصتي للصوت اللي بتسمعيه و تعيشي جواه
بجد احساس مختلف ومريح اوي
وخصوصا لو اللي بتسمعيه كان قرآن كريم
انا قعدت فترة طويلة جدا بسمع سورة مريم بصوت العفاسي برواية شعبة عن عاصم .. لا تتخيلي اختلاف القراءة دي عن القراءة المعتادة من المقرئين خلت السورة ليها احساس مختلف اد ايه
وزي ما بتقولي كده
بجد بيصورها بصوته كانت فين وبقت فين و معاناتها و اد ايه ردهم عليها كان افتراء علي الله و اد ايه الانبياء ربنا فضلهم علي باقي الخلق .. جميلة رائعة تحفة وممتعة جدااااا و لو قعدت اسمعها مرات ومرات ورا بعض مش ممكن احس بزهق ابدا
حتي شريط الكاسيت القراءة دي علي وجه والوجه التاني قراءة عادية وبردة جميلة اوي جدااااا
السورة دي بالذات ليها في قلبي حب كبير اوي
بجد حلوة اوي اوي
كلام ربنا كله جميل و لما بنسمع سورة معينة اكتر من مرة بتركيز وبننصت فعلا للكلام بتلاقي معاني واحاسيس رائعة
سبحان الله
الحمد لله علي كلامه كله الحمد لله
ان شاء الله لو فيها خير ربنا يهدي لحاجة كويسة فيها :)
اشكرك جداااا لانك فكرتيني بحاجات حلوة اوي
ربنا يعزك :)
ميدووووووز :)
وعليكم السلام ورحمة الله وبركاته
منور يا دوك :)
هو انت عندك حق طبعا .. وانا عن نفسي مضمنش نفسي لو اتكلمت هسرح اروح لحد فين و اوصل لايه .. لو جتلي الجرأة اجربها هجربها ولو حتي بيني وبين نفسي واشوف نفسي رأيها ايه :)
في حدود الادب وبما يرضي الله دي اول حاجة تحكم الكلام .. مفيهاش اي خلاف دي
اعرف ناس نفسها ومني عينها تعرف اللي بيدور في الدماغ دي :) بس مش بيطلع حاجة الا كل فين وفين .. لعله كده احسن
حكاية بستغربني دي حقيقة بجد
هو انت مش بتستغربك ؟؟ جرب كده و قولي :)
متطلعهاش في دماغي بدل ما تبقي انت من اللي هاجرب فيهم .. انا يعني بس خايفة عليك بس :)
ايه الموضة دي؟ انت عارفني متأخرة عن الركب .. ودي كده مش موضة .. دا وسواس و احساس بالاضطهاد ولا ايه؟
مين عارف بكرة مخبي ايه .. بس مذيعة اطفال يعني ولا رايك ايه؟ ومن جهة الرغي سهلة بس مش هيجي الرغي الا في حاجة محسوسة اوي .. وشكلك مش شايفني رغاية ..
احباط ايه بس دا انت نورتنا يا ميدو:) وتعليقات اسعدتني .. ربنا يعزك و نفرح بيك يارب عن قريب بس شد حيلك :)
dreem
فين حزينة دا :)
ربنا يكفينا شر الحزن يارب ويكفينا والناس جميعا كل سوء
انا كويسة والله
الحمد لله :)
تسلمي علي سؤالك و ربنا يهونهاعلينا جميعا .. ربنا كريم اوووووي
راجل صعيدي
وعليكم السلام ورحمة الله وبركاته
الاحلام عايزة ارادة واجتهاد وتمسك بيها.. كام حلم بيعدي علي الواحد وبيسيبه يفلت من ايديه .. يمكن مش محتاجة لدرجة انه يتمسك بيه اوي كده .. بس في حلم لازم تتمسك بيه علشان مينفعش تسيبه ويمكن لو راح منك ميجيش غيره ..
الله المستعان و هو نعم المعين
بالتوفيق ان شاء الله
طبعا بحترم كل التعليقات اللى عندك هنا من ابنائى وبنات .... بس السؤال هو ليه انتى ماتتمسكيش بالحلم انتى يا بنتى مش عارف بتكبرى نفسك ليه بس .... لسه قدامك العمر ان شاء الله طووووووووووويل جربى فعلا هتكونى مذيعه ناجحه جداا لان كلامك من القلب وده بيوصل للمستمع بسهوله ..... على فكره لقيت نفسى لايص خالص فى الانجلش قلت ادخل عندك هنا شويه .. اتمسكى بالحلم ومتسيبهوش مين عارفيارب نسمعك قريب فى الراديوا وبلاش التلفزيون ياستى مع انك هتكونى باذن الله منوره العالم كله ... ربنا يحميكى ويوفقك ان شاء الله .
وحشني كلامك جدا جدا
نفس الفكرة دي راودتني و بنفس الطريقة ... جربت أسجل لنفسي على التليفون ...خفت من صوتي
سبحان الله
--------------
بس ليه هتفضل حلم غير قابل للتفعيل
جربي و اتدربي و ان شاء الله تبقي إذاعية قد الدنيا
السلام عليكم
والله هذا الموضوع جداً حلو ولازم اتكلم فيه شويه لاني فكرت فيه قبل كذا .. ابدأ واقول ان اللي اهم من الكلام هو الذكاء الموضوع مو موضوع كلام وبس .. وعشان كذا ماراح اقول ان الكلام موهبه قبل لا اشترط وحود رأس ذكي بدرجه موهوب ويعرف يطرح افكاره بتسلسل وبلباقه جذابه .. الكلام ككلام فقط يعتبر ثرثره فارغه بدون فائده .. لكن لما يكون مرتب وبمنطق حلو اقدر اسميه ابداع .. انت لو تتصلي على فودافون الان وتطلبي من خدمات العملاء خدمه معينه او تفعيل اي خدمه راح تلاقي موظف او موظفه يتحدث بلباقه كبيره لكن لما تقفلي الخط تقدري تقيمي هل هذا الشخص موهوب في الاقناع من خلال الكلام والا كل اللي طلع منه كلام ليل مدهون بزبده يطلع عليه النهار يسيح ومن هنا تقدري تقيميه لما يقنعك بخدمات الشركه وتفعيلها اما اذا استحسنتي كلمات حضرتك وسياتدتك ويافندم وبس اعتبري انه مثل الببغاء ماقال شيء مفيد وكأنه يسمع درس حافظه وبس وخالي من اي فائده .. مهم لما تتكلمي يا اليس انك تكوني مقنعه في الكلام اللي يخرج من فمك ونرجع هنا لموهبة الاقناع واللي هي مرتبطه بالذكاء وسعة الاطلاع وفي الاخير تحتاجي حاجه بسيطه عشان تكملي فكرتك وطريقة طرحها عشان تعرفين توصلينها وهي نبرة الصوت وتفاعله مع الموضوع اللي تكلمتي عنه ومهم كمان اختيار حتى الوقت اللي تتكلمي فيه والشخص اللي ممكن يهتم في كلامك فلمجرد المثال فقط لايمكن انك تكلمي شارون لو كان صاحي عشان تقنعيه بالانسحاب من فلسطين *_^ لانه ماعنده استعداد لهذا :)
في امان الله
إرسال تعليق