وشوشهم كلها كانها كارتون مرسوم ونسي الرسام يرسم للوجه ملامح
وشوشهم صفرا مفيهاش عيون ولا ودان ولا حتي ليهم بيعرفوا يتكلموا
هي شايفاهم وشوشهم ناحيتها بس مفيش صوت ولا نفس ولا حتي حد هيسمعها لو نطقت
قامت وهي عارفة انها اتعرضت لاسوء حاجة ممكن تتعرضلها انثي
قامت المغتصبة من رقدتها وهي بتلملم في نفسها
شافت المغتصب بس متعرفهوش
مش عارفة هو مين وليه عمل كده
ايه اللي جابها هنا معرفتش
كل اللي عرفته ان في واحد اغتصبها
تقول لمين والناس كلهم حوليها معندهمش حتي ودان يسمعوا بيها
لملمت نفسها و قامت وقفت
مشيت و بعدت
عدت الايام و وقفت قدامي
سألتها : قلتي لمين؟
مقولتش
ليه محكيتيش ؟
مفيش حد بيتدبح تاني بعد اول دبحة
قلتلها مفهمتش؟؟
هو انتي اندبحتي قبل كده؟
حصل
ازاي؟؟
كلهم زي بعضهم
صور سودة بتدور في دماغي
عمري ما عرفت اوقف الشريط
عمري ما عرفت ليه جرالي
عمري ما عرفت ليه
سكت ومحكيتش
هيقولوا مغتصبة
هيقولوا غلطانة
هيقولوا معلش
هيقولوا مهما يقولوا
اللي اندبحت دمها جري قدام عيونهم
محدش عمره سأل
عمر عدي
والدبحة اي دبحة بعد الدبحة الاولي ملهاش فرق
الدبحة الاولي بتكسر
فاكرة لحظتها زي ما فاكرة اللي بعدها
لون الحيطان
الجزار
لبسه
عيونه
عملية الدبح ولو ثواني اتحفرت في ايام وسنين العمر ولا مية النار تطلعها
الدبحة اللي بعدها واللي بعدها واللي بعدها
كلهم ميساووش
كل اللي فاكراه دلوقتي اني في دايرة اغتصاب
وجاية تسأليني ان كنت قلت ولا حكيت؟
مقدرتش انطق
صوتي مطلعش
اتحشر جوايا
هقولها ايه
مين ممكن يعوضها
مين يردلها حقها
من كل نظرة نهشت فيها
من كل دبحة والمها
يا كل مغتصبة محدش نصفها ولا حد حس بيكي ولا حد عرف بوجودك اصلا
لكي الله
لا اهلك
لا ولدك
لاعزوتك
لا بني ادم
الا
الله
هو وحده عالم بيكي
كل اسف الدنيا وكل الكلام واالافعال ومهما حصل
ملهمش قيمة جنب لحظة عشتيها
بعتذرلك عن الدنيا لو تقبلي اعتذاري كانسان حس بيكي وبألمك ولو اني ميشفعليش حزني عليكي ولا ينفعك
بس بعتذرك لاني اكيد قصرت زي غيري
و اتسببت بدون قصد من بعيد او قريب
انك تتلمسي بسوء
انك يعتدي علي حقك في الدنيا
سامحيني لو ساعدت في دبحك بس والله مكنتش اعرف
محدش قال
اتكتموا وسكتوا و محدش استجري يقول ان دا حقيقة وبيحصل
يمكن لو كانوا زمان صدقوا و اعترفوا مكانش حصلك اللي حصلك
يا ريتنا كنا عرفنا زمان
كنا اكيد هنتعلم اننا طالما عرفت .. فألزم
بس يا خسارة محدش قال
خسارة عليكي وعلينا
هنتحاسب عليكي وعلينا
سامحيني مكنتش اعرف
يا ريتك كنت بتحلمي ودا كله كابوس و افتح عنيا وافتكر اني بس كنت بحلم
لا شفتك ولا سمعتك
يا ريتك حلم
كابوس
اي حاجة
بس متكونيش حقيقة
يا ريت
هناك 3 تعليقات:
صعب ...الحكاية صعبة ... و تخيلها أصعب
لو كنت أنا كتبت موضوع زي ده كنت هعملة عبارة عن خطوط
و مش عارف ليه ...بس حاسس ان ده شئ " خارق " للعادة و "استحالة" يحصل
عمري ما اتصورت ان فيه كده أبداً و لحد دلوقتي مش قادر اتخيل
:|
الكلمات جسدت الموقف بكل قسوته وبشاعته
مع الاسف هيفيد بايه الاعتذار
وهل يضير الشاه سلخها بعد ذبحها
نعم لنا الله جميعا فى عالم القسوة والغدر والخيانة
تحياتى
عذرا لمتابعتى المتأخره لسفرى .. ولكن ماذا يمكن أن يقال غير أننا فى مجتمع لا يرحم ... لهاالله هو حسبها وهو العزيز المنتقم الجبار ولا حول ولا قوة بالا بالله ... ولكن السؤال أين اهلها اليسوا بقادرين على تنفيذ القصاص فيمن فعل ذلك صعب اووى الا تحس بأهلها بجوارها ينفذون شرع الله فى مثل هذا الجبان .
إرسال تعليق