ينفع كده ؟؟؟

من  كام يوم رجعت بدري علي غير العادة .. فجت بالصدفة اني بقلب في القنوات في التليفزيون فلقيت احد المشايخ -بدون تحديد شخصيته - بس سبق و شفته في برنامج مرة علي قناة تانية لما كان في هوجة البهائيين..

المهم كانوا مستضيفينه مذيع و مذيعة في احد البرامج المسائية - و كان في  واحد تاني قاعد معاه علي نفس الكنبة  معرفهوش .. وانا مكنتش ببص علي التليفزيون اصلا كنت بعمل حاجة تانية بس سامعه الكلام وانتبهت لما لقيت في خناقة .. ركزت

لقيت الراجل اللي موجود مع الشيخ دا داخلين في خناقة .. والمذيعين بيحاولوا يشعللوها زيادة .. الشيخ بيتهم الراجل - طلع كاتب - انه كتب بعض الكتب المسيئة للدين و للذات الالهية و لرسول الله صلي الله عليه وسلم .. ورفع عليه قضية لهذا السبب

الشيخ بيقرأ مقاطع من الكتاب .. علي اد ما فاكرة في جملة بتقول ان الرسول لما بلغ 40 سنة حسم امره انه يكون هو خاتم النبيين - حسم امره بفتح الحاء .. مش بالضمة .. يعني انا علي اد فهمي اما اسمعها كده تبقي هو اللي حسم امره وهو اللي اختار يكون خاتم النبيين عليه افضل الصلاة والسلام

طبعا الكاتب معجبهوش الكلام .. فضل يقوله اهو دا اللي فالحين فيه .. انتو كده اللي بتتشددوا و بتودونا ورا .. انتو اللي الشباب مبقاش طايقكم .. انتو بتبيعوا الدين وبتقبضوا .. مش انت اللي بتاخد فلوس علي الرقية الشرعية ؟؟  .. مش انتو اللي بتبيعوا الدين كل واحد في القنوات الفضائية .. يا راجل بدل ما تقعدوا تصعبولنا حياتنا و تسودوها في وشنا .. احنا عارفين ديننا جميل و بسيط و حلو .. انتو اللي معقدينه و بتعذبونا  .. روحوا البلاد اللي في الصحرا ولا اللي فيها مجاعات.. اعملوا حملات تبشير هناك .. روحوا علموهم الاسلام .. جاييين علينا احنا تعلمونا الاسلام ؟؟ .. ما احنا عارفين الاسلام دا ايه و عارفين مين هو نبينا سيدنا محمد عليه الصلاة والسلام  .. يا راجل باه دا انتو فقدتوا مصداقيتكم .. مفيش حد بقي عايز يسمع منكم حاجة .. روح افتح الانترنت و شوف شباب المدونات و المنتديات بيبعتولي يهنوني علي كتاباتي واني بمثلهم شمعة تنورلهم الظلام اللي بتسودوه في وشهم .. مفيش حد من الشباب بيسمعلكم دلوقتي .. بقالكوا 1400 سنة قافلين عقولكم ....

في نفس وقت الكلام دا

كان الشيخ شايط و عمال يهلل و يحاول يرد عليه و كله زعيق زعيق و يحال يقتبس جمل من مؤلفات الكاتب .. بس كانت الحكاية عنده ملخبطة .. بيقوله انت كاتب ان في كعبات مش كعبة واحدة .. المفروض كنت تكتب مصادرك .. انت كاتب اسرائيليات والمجمع الاسلامي رفض كتبك وانت رفعت قضية علشان تبيح نشر احد الكتب  الممنوعة لك

رد الكاتب قاله و القاضي كان واحد مستنير و حكم ان  حكم المجمع الاسلامي دا مكانش في محله .. و اوصي بطباعه الكتب علشان  الناس تستفيد من العلم والتفكير اللي فيهم !!

الشيخ بردة بلهجة عصبية في حين ان الكاتب بمنتهي البرود و قليل جدا ما ثار عليه .. الشيخ قاله  انت بتتعدي علي الذات الالهية و بتتكلم عن محمد بن عبد الله  بصورة لا تليق و دا اللي دفعني اني ارفع القضية

المذيع والمذيعة كل اما الخناقة تولع يقولوا فاصل .. يا شيخ .. ادي فرصه للاستاذ يرد زي ما انت اتكلمت وقلت  هو كمان حقه يرد  و هكذا .........

شوية و يسمحوا بالمكالمات التليفونية .. مرة واحد بيتكلم بيقول للكاتب .. عايز اعرف ايه هدفك من اللي بتكتبه دا .. يعني ايه المستفاد منه .. وواحدة اتصلت قال للشيخ انا مسلمة و غيورة علي ديني بس شوف انت بتتعصب ازاي و بتقول محمد بن عبد الله في حين ان الدكتور هادي و بيقول سيدنا محمد صلي الله عليه وسلم و رسولنا رسول الله صلي الله عليه وسلم  - يا شيخ انا مش مقتنعه بكلامك و محترمة الدكتور وآراه و مينفعش انت تتكلم علي رسول الله  كده تقول محمد ... واحد قال انه رئيس محكمة  وعاب علي الشيخ انه بيقول القاضي اللي اصدر الحكم غلطان  و قعد يشعر في اهمية كتابات الكاتب وانه بينور العقول .. واحدة اتصلت بتقول انا مسلمة بس عايزة اشكر الدكتور جداااا .. الاسلام نزل من 1400 سنة والعقول متحجرة ولما يجي واحد يحاول ينور للعقول دي علشان تفكر وتعمل حاجة تقوموا تهاجموه ؟؟ ينفع كده ..

واحد كمان في مداخلة قالهم انا بسجل اعتراضي علي اسلوب الحوار دا .. لا ديطريقة نقاش محترم ولا ينفع واحد يدافع عن رايه او يتكلم بالاسلوب دا  مهما كان الموضوع .. المفروض كان يكون في مناظرة  بطريقة متحضرة .. نسمع فيها بعض و نتناقش و نسيب فرصة للمستمع انه يفهم و يعي اللي بيحصل ايه و مين صح ومين غلط ..

 واحدة اتصلت اللي حصل دا مينفعش ايه الراجل دا جايبيه يتكلم ليه  وازاي يكتب كده .. المذيع قالها انتي قرأتي اي من الكتابات ؟ قالتله لا قالها طيب يبقي مينفعش تصدري  حكم قبل القراءة .. اقرأي و بعدين ناقشي..

بعد الدوشة دي كلها  اتقالت جملة خلتني اضحك جداااا

بغض النظر عن ردهم علي استفسارات المتصلين اللي بردة كانت بنفس  اسلوب الحوار العنيف السابق  .. كله تهكم و سخرية من جهة الطرفين ..

الشيخ  بيرد علي القاضي اللي اتصل .. قاله انا مش بهاجم القاضي و لا بقول ان حكمه غلط بس دا كتاب اجمع عليه اكتر من خمسين عالم من علماء المجمع الاسلامي و لا يصح ان القاضي يتغاضي عن ذلك .. بعدين دا الاستاذ الكاتب دا صديقي وهو عارف من زمان .. يعني انا في كل كتاباته مفكرتش ارفع عليه قضية الا لما حصل انه اخد جايزة علي القضية قيمتها 200 الف جنية (تقريبا بس هو حاجة كبيرة مش فاكرة ان كان كده ولا اقل ) .. يعني ايه ياخد من مال الدولة مبلغ زي دا ؟؟ وليه ياخده علي الكتابات دي .. يعني انا خايف علي مال الدولة !!!1

وهنا بصراحة انفجرت في الضحك من الهم اللي يضحك .. صحيح شر البلية ما يضحك 

يعني مهياش غيرة علي الدين ولا هي غيرة علي رسولك الكريم ولا اي من الكلام الرنان اللي  قاله باسلوب سيء جدا  جدا 

كل المشكلة ان  حضرة الشيخ -العالم الاسلامي - معترض ان الكاتب اخد جايزة مالية عن كتاب ما من كتبه وفي نظر الشيخ انه لا يستحق انه ياخد من مال الدولة  اللي هو ماله يعني !!

 عيب دا ولا مش عيب؟؟؟