طلعتها وللاسف كان مكتوب دور تاني .. مكنتش عارفة اقول ايه للراجل .. كان عمال يقولي الواد تاعبني ومطلع عيني وانا اقوله معلش كل الولاد دلوقتي بقوا متمردين علي كل حاجة حوليهم ومعلش واستحمل و هانت وربنا يقويك .. الخ
طبعا قعدت افكر اقوله ايه .. قلت اطبع الورقة و انا طبيعي مشغولة اديله الورقة وهو هيشوفني مشغولة مش هيتكلم كتير .. المهم دخل قالي ها يا استاذة ربنا يكرم فرحيني .. قولتله الحمد لله رب العالمين ..اتفضل النتيجة اهي طبعتهالك.. بص للورقة و بعدين قال يعني ساااااااااقط ؟؟ وبانت علي وشه ملامح قهره و كسره نفس .. قولتله لا مش ساقط متخافش .. دا دور تاني . . يعني كلها شهر ويمتحن كده يبقي نازل مادة او اتنين متقلقش ان شاء الله تعدي علي خير...
فاتت الليلة دي و بعدها كل اما يطلع فوق يعدي عليا يسلم ويقولي الواد مغلبني .. اقوله معلش ربنا يهديهولك و يصلحله حاله
الصبح لقيته داخل بيقولي الواد امتحانه النهاردة خلينا نخلص من همه
امبارح جاله المدرس بيني وبينك اخد 100 جنية و اداله ورقة الامتحان وقال هياخد 70 جنية يوم الامتحان بردة علشان يشوفه في اللجنة والكلام دا للمادة الواحدة .. انا بقول هو احسن خلي الواد يخلص باه .. هو مش النمر اللي هيجيبها دي هتتضاف علي المجموع؟
انا اتلهيت عايزة ااقوله انت كنت بتعلمه السرقة و انعدام الضمير ولسه هنطق لقيته بيقول عارفة حضرتك الواد دا قاعد فطسان في البيت .. امه لا مؤاخذه عندها عجز كده مش بتتحرك .. تقوله قوم هاتلي مية يبقي بيجر في رجله بعد ساعة اما يتحرك انما يرن تليفونه يجري هوا يفط من مكانه يرد !! و يتسبسبلي بالقرف اللي بيحطوه علي شعرهم دا ... اقعد اقوله يا واد شعرك ناعم بلاش الحاجات اللي تبوظه دي .. سيبك انتي انا كده مرتاح انه هيرتاح من هم الامتحانات دي مش كده ولا ايه ؟؟ رايك ايه ؟ ياخدوا اللي ياخدوه بس الواد يخلص !! هي مش النمر دي هتتضاف علي المجموع؟
انا كل دا مكتومة مش لاحقه انطق و مش عارفة اقوله ايه و اتضايقت اوي من نفسي اني مش قادرة اقوله انت غلط و حرام اللي بتعمله دا .. قولتله ربنا يهدي حاله ويغنيه بالحلال علشان الحرام مبيدومش
قالي اه والله عندك حق بس المدرس دا يغور بالفلوس اللي اخدها بس كده احسن
ما بين راجل غلبان يصعب علي الواحد حاله و انه عايز يخلص من واحد من كوم اللحم اللي عنده وما بين اني مفهمتش هو بيحكي و بيعيد ويزيد لاحتمال يكون عايز مساعدة مثلا؟ ولا بيحكي بيقولي اخبار ابنه يعني .. الله اعلم
بس بجد جيل مهبب و مش العيب علي الولد .. العيب علي ابوه اللي فاكر انه ربي ويا زين ما ربي .. طلع للدنيا غشاش صغير و يا عالم بكرة هيبقي ايه !!
لو كان فعلا طالب مساعدة .. الحمد لله ان ربنا سترني اانا ومطلبهاش صراحة علشان كنت هغرق في شبر ميه مش هعرف اقوله لا لانه محتاج بس لا لانها رايحة في الحرام :(
وواحد تاني يوم ما كنا نازلين نعزي والدة زميلتنا و انا بستعمل عكاز .. قالي بقول لحضرتك ايه : الوصفة اللي متخيبش باه خديني نصيحة صريحة من عمك دسوقي .. انتي تروحي تعملي فول نابت و عيش و تنزلي علي السيدة و تفرقي الفول النابت والعيش علي الغلابة هناك و هتصبحي تجري زي الحصان .. كنا في الاسانسير .. معلقتش علشان مش عايزة احرجه .. يسكت ؟؟ ميقدرش :)
اصطادني تاني واحنا راجعين .. يا ستي اسمعي الكلام بس اعملي الفول النابت دا و هتشوفي هيجرالك ايه .. قلت خلينا بالهداوة عليه .. قلتله انت تقصد اطلع حاجة لوجه الله ؟ قالي لاااااااا انا بقولك علي الوصفة اللي هي اسمعي الكلام الفول النابت والعيش عند السيدة و بعدين انا مش فاهم انتي مش عايزة تعملي كده ليه دا مش هيدفعك كتير يعني !!
علي اعتبار يعني اني مستخسرة ادفع فلوس الفول والعيش !!!!!
قولتله بص الله يكرمك .. لو كنت تقصد اطلع حاجة لوجه الله من باب قول الرسول :داووا مرضاكم بالصدقات .. يبقي كتر خيرك وان شاء الله ربنا يقدرنا .. انما هتقول فول نابت وعيش والسيدة و دا هيشفيني .. الله يرضي عليك انا مليش في الحاجات دي و الشافي هو الله .. مش الفول اللي هيخلي ربنا يشفيني .. لو تقصد اني اساعد في اكل حد او صدقة لحد .. الله يجازيك خير انما الكلام الفاضي دا مليش فيه و مش هعمل حاجة تغضب ربنا وانا بعملها علشان هو دا اللي هيخففني !!!
بصلي حتت بصة .. الراجل فاكرني فعلا مستخسرة ادفع كام جنية ف شوية فول !!!!!!
مأقنعوش اني بقوله مش هعملها علشان لو عايزة ربنا يشفيني هطلب منه هو الشفا مش من الفول ولا السيدة !!
***********
محدش يقولي المدونة بقي شكلها سيء علشان انا متضايقة كفاية علشان باظت :(
جايز اكون لم احسن التصرف من الشخصين دول .. بس معرفتش اعمل ايه :(
هناك 23 تعليقًا:
:) كنت لسه هعلق على شكل المدونة على فكرة
خلاص مش هقول حاجة:)
===
الموضوع بقى حاسة بيكِ لان اوقات ببقى فى مواقف مش بعرف ساعتها انطق
ربنا يشفيكِ يارب ويخفف عنك
:( متقوليش اه
بس هي وحشة اوي اوي كده يعني ولا تعدي :)
وعلي فكرة باه دي ارحم واحدة في كل اللي موجودين انا قعدت يجي اكتر من 11 ساعة ادور علي حاجة تنفع و مفيش ولا واحدة كانت مريحاني :(
===
ساعات والله ربنا بيفتح عليا و بعرف اسكت اللي قدامي بس لما حد بياخدني علي خوانة كده مبعرفش و كمان مبرضاش احرج حد كبير
ربنا يكرمك يا حبيبتي و يشفي مرضانا ومرضي المسلمين .. انا احسن كتييييييير اوي اوي اللهم لك الحمد كنا فينا وبقينا فين :)
وبرضه انا كنت هعلق علي المدونة ليه ... مقسومة نصين زي الايس كريم ... بس خلاص مش هقول ... انا مقلتش حاجة اهه.
ثانيا : الراجل الاول الساعي بتاعك مظلوم ... لانه مسكين ... يعني هوه لقي علام لابنه ومعلمهوش ؟ ... هوه صحيح استخدم طريق غلط ... لكن للاسف ده يمكن معاه عذره ... فهو ليس متعلما ...ولا مثقفا ... فما بالك بالمدرس اللي عاوز الشنق ده اللي بيبيع الامتحانات ؟
ثالثا : انا لو كنت مكانك - وعارف انه هيقبل المساعدة - كنت ساعدته ... لانه هنا الحكم الشرعي انك مش متأكدة انه هيستخدمها غلط ... ما يمكن يجيب دوا لزوجته العيانة ... زي الحكم الشرعي لواحد انت عارفة انه ماله مختلط فيه الحلال بالحرام ... فيجوز انك تقبلي منه هدية ..لانك غير متاكدة
رابعا : بصراحة نكديتني بالقصة بتاعتة الساعي ده ... مرات اتفرس من الشباب واقول الشباب عاوزين الـ ..... , ومرات يصعب عليا العيال لاننا مقدمناش ليهم حاجة كويسة يقلدوها ...ولا امل في بكرة ... يعني عاوزينهم يطلعوا كويسين ازاي ؟؟
خامسا : الراجل بتاع الفول النابت ده ... مفيش فايدة من محاولة اقناعة ... فللاسف هوه ده مفهوم التدين الشعبي في مصر ... ندعو الله ان يعتبرهم من المعذورون بالجهالة ...
سادسا : الف لا بأس عليكي ... شفاك الله وعفاك ... بس سؤال ؟ هووه الحادث ده بسبب زعلك من شكل المدونة الجديد اللي شبه الايس كريم ؟؟ ... انا مقلتش حاجة اهه
نتمني قيامك بالف سلامة ... شكرا ... والسلام عليكم
ولا تزعلى نفسك
المدونات بتروح وتيجى اهم حاجة اللى جوا المدونة
بس انا عارف انتى مضايقة منها ليه؟
عشان مش عارفة تعمليها لوحدك
هتتجننى انك قعدتى كتير عليها ومعملتيش اللى انتى عايزاه
وكمان سألتى ومعرفتيش توصلى وأنتى مبتحبيش تسألى حد اصلا
:))
بس عادى اعملى مدونة بديلة للاختبار وبعدين الغيها-حل سهل اهو-
يعنى فى حالة العامل الاول كلنا بتعدى علينا ساعات بنعمل الغلط ومش بنبقى طايقين حد يقولنا انه غلط او على الاقل مش متخيلين من فرط عاديته انه شئ غلط
ورب معصية قربت صاحبها وسجدة ادخلت صاحبها النار
ربنا يغفر لنا جميعا
فى حالة التانى انا اصلا لا احب حالة الود الغير مبرر التى تسمح لمدعيها انه ينط جوا دماغنا وميخرجش منها الا بالشبشب :)
بس عموما النابت والعيش ميضرش لو ما اخدتيهوش بحساسية هو الراجل قالك وزعى تماثيل هبل واللات؟
احيانا مخاطبة الناس على قدر عقولهم يفيد
المهندس
متقولش :( انا حاسة لوحدي ومش مرتحالها (( كنت ))
المدرس صورة من آلاف الصور للفساد وللانسان اللي بايع اي حاجة علشان اي حاجة .. و المشكلة انها مبقتش تقف عند المدرس .. الطالب نفسه عارفه لو شاور بجوز جنيهات لاي مدرس ممكن يجيله جري .. الله يعافينا
مع ثالثا دي - لنا هنا وقفة بجد
هو اللي حكي انه دفع للمدرس المبالغ دي .. يعني انا دلوقتي علي علم مسبق قبل ما اديله فلوس .. صح؟؟
يبقي متقوليش معرفش انه هيدفعها في حاجة غلط !! عن ما الولد اتعلم .. ما في الوف الطلبة بينجحوا و بيتعبوا و بيلاقي ثمرة نجاحهم .. يعني هو ناقص عنهم ايه علشان يتربي و يعرف مصلحته .. لما ولد يوصل ل 17 سنة ولا اكتر و دا اسلوبه في الحياة - اعتماد كلي علي اي مصلحة تجيله من برة .. حتي النجاح في المدرسة ابوه بيشربهوله بالعافيه .. الدددددلع
معلش انا مقدرش افكر كده
الرسول صلي الله عليه وسلم قال : استف قلبك وان افتوك و كررها 3 مرات
وانا افكر وقتها اني لو حبيت اعمل حاجة لوجه الله .. يبقي في غيره اولي بيها .. علي الاقل اساعد مريض علشان ربنا يساعد مريضي
وموضوع الواحد اللي ماله مختلط بالحرام .. لو علي علم بدا .. الله يعافيني ان اقبل دي هدية .. و يارب ما اتحط في موقف زي دا ابدا .. ربنا يغنينا بالحلال و يبارك فيه
معلش اني ضايقتك باللي قريته .. سؤالك وجيه جدااااااا .. هيطلعوا عدلين وكويسين لمين كده لما اللي جابوهم طالعين عوجين ؟؟!!
اما عن بتاع الفول .. متخافش عليه .. هو كل شوية بيفكرلي في اختراع جديد .. بس كل اللي غايظني منه انه ساب كل اللي اتقال و لازقه في دماغه اني استخسرت الفلوس في الفول
تسلم علي سؤالك .. الحادث ملوش علاقة لا من بعيد ولا قريب دا بقاله 4 شهور كده :)
واديني غيرت الشكل اللي مش نازل لحد من زور و اعتقد دا احسن كتير
شرفتنا يا باشمهندس
-------------------
الكلمة نور
انا طبعا زهقتك من كتر الاسئلة و اشكرك جدا علي صبرك
بس يعني كلامك دا معناه ان حتي الاخير دا شكله وحش ولا ايه ؟؟ :(
و صحيح عرفت منين حكاية اني مبحبش اسال حد علي حاجة دي :)
انا صحيح اخدت وقت طويل في التجربة و الخطأ بس اكتشفت اني ممكن اعجب بشكل رسمة ما بس عند التطبيق العملي بحس انها مش انا ودا حصلي في واحد حبيته اوي .. كان شكل الايتامين - قماش الكنفاه و مطرز بكام وردة و عليه فراشة و كان شكله حلو اوي ..بس لقيت الكلام مش باين و هيتعب اللي بيقراه فشيلته ..
والاخيردا حساه مش وحش - ولا شايف ايه ؟
موضوع عمل مدونة للتجربة دا فكرة حلوة فعلا بس اعتقد ممكن اعملها لو نويت اعمل بنفسي التمبلت .. انا اتكعبلت في كام حاجة بيعلموا ازاي يتعمل .. احتمال ضعيف بس مضمنش نفسي ممكن علي الاقل اعرفها للمعرفة :) و عندي المدرس اهو ربنا يباركله بيساعد في الاستشارات :)
اللهم امين ربنا يغفرلنا اجمعين ..
مش عارفة تعرف المدونة بتاعت رحايا العمر ولا لا .. بس المهندس احمد كمال صاحبها كان كتب مرة موضوع باسم فضيلة لم تختبر .. كان بجد موضوع جميل و حقيقي اوي ..
الموقف اللي حصلي دا لو كنت انا مكان الراجل ابوه .. الله ااعلم كنت اتصرفت ازاي .. هتبقي التجربة دي ورد فعلي عليها فضيلة لم تختبر .. لو مكانه هصمد ولا هعمل زيه .. انا لا اعلم و لكن الله اعلم .. الله يعافينا
والتاني مش عايز يخرج لا بشبشب ولا بغيره ..
حساسية ايه بس .. انت مش فاهم
انا اصلا مشفتش الفول النابت دا شكله ايه اصلا :) يعني ينفع كده :)
وبعدين الراجل دا بالذات لو صبرت عليه شوية و اديته وش كده هيجيب الشيشة و يجي يقعد في مكتبي يقولي ها باه طابخين ايه النهاردة :)
حشري مووووووت
ومشكلتي اني مبعرفش ارد :( بتحرج احرجه
وفي النهاية لا يسعني الا شكرك و تتردلك في الخير ان شاء الله :)
نورتونا
السلام عليكم ورحمة الله وبركاته
حياكم الله وبياكم أخوانى وأخواتى وجعل الجنة مثواى ومثواكم
ربنا يردنا جميعا الى دينه ردا جميلا ويهدى شباب وبنات المسلمين ويوفقهم لما يحب ويرضى .
ربنا يكون فى عون الأباء والأمهات ، انا لفت نظرى فى الحكاية الأولى انى تخيلت حال أبو الولد دا وأد ايه صعب عليا قلة حيلته مع إبنه ،بس صعب عليا اوى الطريق اللى هو شاف انه فيه حل المشكلة ، عموما انا شايف ان الناس دى محتاجة مننا توعية اكتر محتاجة نتكلم معاهم بهدوء شديد اوى أوى ونخاطبهم بلغة يفهموها نطبطب عليهم ونقولهم براحة ان التصرف دا غلط وإنه طالما غلط ربنا مش هيبارك فيه وأكيد الأسلوب هيختلف من واحد لواحد المهم إننا نوصل للناس دى ونوضحلهم الصح فين والغلط فين ، الكلام دا بردو ينطبق على الموضوع التانى بتاع الفول لازم نتحرك باه اكتر من كدة ، لازم نقعد ونتكلم مع الناس دى وأهم حاجة براحة عليهم وبشويش .
ملحوظة : إذا عملتى الفول النابت ابقى هاتيلى شوية بقالى اكتر من 20سنة مأكلتوش .
سبحانك اللهم وبحمدك أشهد أن لا إله إلا أنت أستغفرك وأتوب إليك
وانا كنت اعرف شكله ايه اصلا :)
اما يجي سيف بالسلامة ان شاء الله نبقي نشوف الحدوتة دي :)
حلوة 20 سنة دي .. ربنا يديك طول العمر و نسمعك بتقول بصوا يا احفادي من يجي 190 سنة كده حصل وحصل :) ربنا يجعل عمرك في الخير
بصوا باه انا مستفزة كفاية من الدلع اللي ملوش لازمة دا
اه ابوه غلبان وعلي اد حاله و اكيد بيقضي مصاريفهم بالعافيه .. بس زيه كتير اسوء منه حالا .. دا مش مبرر ان العيل منهم يطلع فاشل
في ولاد ناس علي اد حالهم كتير اوي طالعين زي الفل .. دا مش مبرر
لا القسوة بتجيب نتيجة ولا الدلع اللي ملوش مبرر دا بيخلي الولد يفلح !!
لو ابوة بيحبه فعلا كان رباه علي الامانة و انه يكون ابن بار .. بس الناس بتخلف عيال و خلاص .. من الاول خالص لا بيفرق معاهم شبر ونص في الارض بيشتم زي ما ابوه بيشتم .. ولا فارقه معاهم سرق من زميله في الفصل قلم رصاص ولا فارقة معاهم اول سيجارة شربها .. الواد كبر وبقي راجل .. يا فرحتي !!!!!!!
في زيه كتير كانوا يتمنوا ياخدوا فرصة يتعلموا و يبقوا حاجة وفي زيه و اسوء منه كتير وكل واحد وله حكاية تشيب
وفي اللي دخل صنايع و اجتهد و خلصها و دخل معهد و اهو السنة دي خلص و ان شاء الله ينجح بتقدير كويس زي اول سنة و يشق حياته علشان عايز يعمل حاجة .. الولد دا عاش مع اللقطاء و ابوه وامه عايشين وقادرين يصرفوا عليه بس رموه هو واخوه الصغير للحكومة تتكفل بيهم .. ومفيش داعي لذكر مهازل كفالة الحكومة .. بس كان عايز ينجح علشان شايف دا السبيل الوحيد لخلاصه من الشارع اللي مرمي فيه .. و عايش حياته زي باقي اللي في سنه بس في حدود لانه عايز يطلع من اللي هو فيه و عارف قيمة اللي عايزه والمتاح جنب اللي مش متاح ومش في ايده
دا فرق ولدين في نفس السن .. واحد في حضن ابوه والتاني في حضن الشارع
والله في ناس في نعمة مش حاسة بيها وانا اولهم :(
محترمة رايك جدا في ان الناس دي محتاجة اللي يوعيها ويفهمها صح .. بس الككلام لوحده مش حل .. علي الاقل اضعف الايمان نكون احنا بنعمل كده .. قدوة .. فاكر الكلمة دي زمان؟؟
لما تلاقي القدوة و تلاقي فيها اللي بتحلم تكون عليه بكرة .. اكيد هيفرق الحال وقتها !!
و بردة كل دا هيفضلنا فضيلة لم تختبر طول ما احنا مش محطوطين في نفس الظروف بتاعت اصحابها .. بس ارجع واقول ربنا ما يكتبها علي حد ابدا يارب
شرفتنا يا باشمهندس ودعواتك
سلام عليكم
اولا : المدونه بقيت كويسه على الاقل من وجهة نظرى و ده رأى شخصى يمكن يعجبك ويمكن لا لأن أمكانيتى عمرها ما هتخرج حاجه زى دى يمكن قلة صبر .
ثانيا : الأب كان مفروض يشوف لابنه شغلانه او مهنه بدل حكاية المدرس دى .. ورغم خلافات كتير فى وجهة النظر بينى وبين أبنى الأيام دى كان رايح يعمل فيش عشان الجيش قلتله يا محمد وانته بتديله ورقة الفيش اديله القلم الجاف سألنى ليه قلتله هيسهلك الامور رد عليه رد هبتديها برشوه .. انا بلمت بجد وسكت شويه و قلتله روح ربنا يسهلك أمورك المهم راح ورجع بيضحك بقوله مالك قلى عرفت حكاية القلم دى منين قلتله من الحياه وخبرتى فيها ليه ؟
رد أصله فعلا طلب القلم الجاف ؟ قلتله شفت كلامى ... قلى رفضت اديهوله وقلتله ده قلمى ؟؟؟
ربنا يسهله أموره اهو لايص فى تخليص اوراق الجيش ورافض ان ان حد يشوفله اى شخص ييسر عمليى تسييير الاوراق .
ثالثا : الفول النابت ده ممتاز بس فى حالة الانفولونزا المهم انك انتى اللى تشربى شربته مش توزعيها ... كان الله فى عون الشعب المصرى والف سلامه يااااااه معقوله لسه بتمسكى عصايا الف سلامه ليكى يا بنتى .
رابعا وهيه مفروض اولا وأخيرا أخبار سيف ايه والله انا محرج من الراجل ده جدااااا ومش عارف اعمل ايه بس ربنا قادر أنه يشيل عنه ويرجعه بالسلامه .
عمك مدحت
نسيت اقولك أن الفول النابت ده عباره عن الفول العادى اللى بيتعمل منه المدمس كل الحكايه انك بتغسيليه كويس وتحطى فوطه او قماشه مبلوله ميه وتقلبيها كل كام ساعه لغاية ما ينبت وبعد كده بتحطيه فى ماء مغلى وتحطى عليه ملح وكمون وتعصرى نص ليمونه بس لغاية ما يستوى ... جميل فى البرد جدااا وخاصه لو شربتى الشوربه بتاعته بجد بضيع او بتساعد فى الانفلونزا وكمان بيدفى بس فى الصيف صعب اوووى يا بنتى وعلى فكره الفول لما يستوى بيبقى جميل .
مدحت
حمد الله علي السلامة
انا مع محمد قلبا و قالبا طبعا و معلش هو ليه حق و نص
بس ضحكت علي حكاية قلمي دي :) جدع والله
انا بعمل زيه كده و بمنتهي الهدوء .. متفكرنيش باه علشان ورق البطاقة مرمي في الشنطة بقاله 3 اسابيع اهو مش عارفة اروح اعملها :( ومش بدفع انا فلوس لحد ولو مش عايز يعملها عنه ما عملها ..
والله لو خارج و طالب من ربنا يحميك من اي حاجة تعملها معصية ربنا هيحميك .. وبعدين الراجل بياخد قلم جاف يعمل بيه ايه اصلا ؟؟؟ بيقف يبيعهم اخر النهار دا ولا ايه ؟؟
دي حتي قلة قيمة :)
مشفتوش والله الفول دا بس اسمع عنه و افتكر امي مرة قالت ان جدتي كانت بتعمله حلو .. بس هو كل اللي اعرفه انه بيبقي لونه مش بني زي الفول العادي و بيتهيالي وصححلي لو غلطانة .. هو بيتعمل من الفول المدشوش دا اللي بنأكله للخروف :)
ايه دا مطلعش اللي فاكراه
و بعدين عنه ما اتعمل ايه اللي احطه في فوطه واستني اما يزرع :) هو انا ناقصة غلبة
انا اصلا بتضايق جداااا لما اشتري حاجة - فاكهة مثلا ويقولولي استني عليها لما تستوي كام يوم .. مبحبش كده اجيبها مستوية وانا لازم احطها اتفرج عليها ..
بس فكرتني صحيح بالفولة اللي كنت بحطها علي قطنة وانا صغيرة لحد ما تنبت
مشكرين علي المعلومة الطبية :)
بس هو ينفع يعني يتعمل بالفول الحيراتي اهو اخضر من الاول بدل ما يتعمل بالمجفف :)
سلام عليكم
وقبل آذان الضهر اللى على وشك ... الله يفتح عليكى زى الفوله اللى كنتى بتحطيها على القطنه ... اهو الفول لما تشتريه وحطى عليه الفوطه المبلوله بيبقى زى الفوله اللى عليها القطنه دى .
وعلى فكره هو بيتباع منبت جاهز بس الفكره انك لما تعمليه من الاول انتى هتضمنى سلامة الفوله من اى عطب يكون فيها وهو بمجرد ما ينبت ويتحط فى الماء المغلى وتعصرى نص ليمونه هيبقى لون الشربه بتلعته أبيض ومش غامق حتى لما يستوى هتلاقى لونه أبيض ياااااااااااه يا اليس رجعتينى اكتر من 45 سنه ورا كان فى ست فى قريتنا بتبيعه وكانت تنادى بصوت عالى أبيض يا فول أبيض كنت والله يا بنتى أجرى اخد طبق وأستناها لما توصل كان يأتى صوتها وبعد اكثر من 10 دقائق او اقل تصل هيه كنت مدمن فول نابن وانا صغير
ربنا يكرم سيف بالخير كان النقاش معاه فى الاكل هيكون بأستفاده من معلوماته يلا سلام عليكم آذان الضهر .
عمك مدحت
بردة عنه ما اتعمل :) :)
يعني اكله اقعد اطبخ فيها 3 ولا 4 ايام علي الاقل .. وماله الفول العادي :)
بالف هنا وشفا ليكم .. انا كويس بس اعرف انكم بتاكلوه وبتحبوه :)
فكرتني بالفول الحيراتي والله بقالي مدة مأكلتوش :)
نسيت
طبعا ما ينفعش الفول الاخضر ابدااا لازم يكون الفول ناشف زى الفول اللى بيتعمل منه المدمس على كل حال اجلى الموضوع ده للشتاء القادم هتحتاجيه هناك فى البرد نبقى نتكلم لو فيه فى عمرى بقيه ان شاء الله .
مدحت
يا عالم
يا بكرة شايل ايه
ربنا يسترها معانا اللحظة دي و بكره سيبه في علم علام الغيوب
السلام عليكم ورحمة الله وبركاتة
اختى الغالية اليس
جزاكى الله خيرا على طرحك للموضوع دة وفعلا بنقابل النماذج دى كتير فى حياتنا وللاسف مش الفئة دى بس لكن وناس مثقفين وشباب ونماذج كتيرة وبيلجؤا لاساليب منها السحر وحاجات احنا بنسمع عنها للاسف كتير علشان بيتحججوا بقلة الرزق او عدم الزواج اوالخنقة او الكبت وخلافة بس نسيوا شئ مهم التوكل على الله وحاجة بسيطة لو قالوها ان شاء الله كل حاجة هتبقى تمام ان شاء الله الاستغفار ....شئ مهم جداا..
هل تريد قوة الجسم وصحة البدن والسلامة من العاهات والآفات والأمراض والاوصاب ؟
عليك بالاستغفار:{اسْتَغْفِرُوا رَبَّكُمْ ثُمَّ تُوبُوا إِلَيْهِ يُرْسِلِ السَّمَاءَ عَلَيْكُمْ مِدْرَاراً وَيَزِدْكُمْ قُوَّةً إِلَى قُوَّتِكُمْ} [هود: 52].
هل تريد دفع الكوارث والسلامة من الحوادث والأمن من الفتن والمحن ؟
عليكم بالاستغفار: {وَمَا كَانَ اللَّهُ لِيُعَذِّبَهُمْ وَأَنْتَ فِيهِمْ وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ} [لأنفال:33].
هل تريد الغيث المدرار والذرية الطيبة والولد الصالح والمال الحلال والرزق الواسع استغفر الله
{اسْتَغْفِرُوا رَبَّكُمْ إِنَّهُ كَانَ غَفَّاراً * يُرْسِلِ السَّمَاءَ عَلَيْكُمْ مِدْرَاراً * وَيُمْدِدْكُمْ بِأَمْوَالٍ وَبَنِينَ وَيَجْعَلْ
لَكُمْ جَنَّاتٍ وَيَجْعَلْ لَكُمْ أَنْهَاراً} [نوح :10ـ12].
اظن الحل بسيط ياريت نطبقة وان شاء الله كل مشاكلنا هتتحل بس نلجأ الى الله فهو خير معين
ومش تنسينا فى النابت الله يكرمك:)
وربنا يثبتك دايما والمسلمين الى طاعة الله واتباعة اوامرة واجتناب نواهية اللهم امين...
يا ما شاء الله
انتو كلكو بتحبو النابت كده :)
الله يفتح عليك يا اخي ويجعلنا ممن يذنبون فيستغفرون فيغفر الله لهم
عين العقل بس اللي يعي
و حكاية اللجوء للسحر والحاجات دي .. اولا قلة ايمان دا اكيد .. ما اصابك لم يكن ليخطئك وما أخطأك لم يكن ليصيبك !!
بس بصراحة عندنا بيئة خصبة جدااااااااا للسكة دي .. انا اعرف ناس اتبهدلوا فيها سنين و سنين و بدون فايدة
مش بنكر السحر .. بالعكس انا مؤمنة بيه جداااا و معنديش شك ان في سحر وسحرة و اعمال بتحصل .. بس ربنا قال وما هم بضآرين به من احد الا بإذن الله
يعني هو قدر الله علي المصاب .. وبردة اللي بقوله فضيلة لم تختبر الحمد لله .. ربنا يكفينا شر كل مؤذي و يبعد عنا كل سوء احنا والمسلمين اجمعين يارب
نورتنا
اس اس السلام عليكم
كح كح ... آسف .. بنهج علشان تعبت لحد ما ولتلك ، مع ان حلقة الوصل ( هي الباشا مهندس ) إلا اني ما لاحظتش الوجود الجميل لسعادتكم ، و من النهاردة انا أعلن رسمياً ، اني مناصر للحزب الأليساوي .
المعايير انهارت بانهيار القدوة ، و اللي بيعمل خير دلوقتي بيعمله لنفسه ، و مش بيعرف حد بيعمله ازاي ، علشان كده نشأ عندنا جهل ، جهل بالوعي ، بقى وعينا جاهل ... يا نهار أبيض!
على العموم يا رب دي تكون فاتحة خير ، و عقبال ما المدونة تسيح و تبقى أجمل
السلام عليك ورحمة الله وبركاته :)
حمد الله علي سلامتك .. اقعد طيب ارتاح من المشوار .. اجيبلكش صورة حاجة ساقعة و لا نخليها عشاء علي طول :)
الله ينصرك يا محمد و يجعلك من خيرة عباده الصالحين .. نورتنا :)
دا احنا جهلنا بقي جاهل و الوعي دي كلمة مبقتش من الكلمات المدرجة في قواميس البشر الا من رحم ربي
بس والله الخير موجود يا محمد وفي ناس كتيرة بتعمله و بتعين بعضها عليه بس يمكن ينقصهم دعوة غيرهم ينضموا اليهم !!
يمكن ينقصهم وايانا الاجتهاد اكتر علشان زي ما ابو حازم قال من تعليقين احنا علينا دور علي الاقل يعني نعمل في نطاق اللي حولينا .. و يا بخت من قدم خير و دل عليه :)
سعدنا بزيارتك الطيبة :)
بلاش تسيح دي .. خليها تربط علي كده دي دوختني .. خلفتها ونسيتها دي كمان :)
ربنا يهديهم..
تعرفي..كثيييير من اللي يتصرفوا كده بيكون جهل...
جاهليين و مش عارفين...
الله يهديهم و يعقلهم
==
قربتي من المدونة القديمة...مش بطالة دالوقتي
:)
سيف ازيه؟
تحياتي
على فكرة
أنا قلت "و اللي بيعمل خير دلوقتي بيعمله لنفسه ، و مش بيعرف حد بيعمله ازاي"
و انت قلت "بس والله الخير موجود يا محمد وفي ناس كتيرة بتعمله و بتعين بعضها عليه بس يمكن ينقصهم دعوة غيرهم ينضموا اليهم !! "
كلامي مش على الناس عامة ، أ،ا بس كلامي عموماً ، و الاستثناء بيأكد كلامي و مش بينفيه ، و على فكرة انتي عندك حق ، جهلنا بقى جاهل ، و مناهج العلم ، خليناها مناهج للجهل
و لينا الصدارة في كده ، و نقول ايه ......مصر أوب دولة تخلي الجهل ممنهج ، و يمتحنوا العيال فيه
ربنا يرحم مصطفى كامل لما قال " لو لم اكن مصرياً لوددت أن أكون مصرياً " كانوا بيدوروا على العلم ، على النور ، و متهيألي لو جه دلوقتي كان هيقول " لو لم أكن مصرياً لوددت أن أكون .................. أهلاوياً"
و بعدين انتي ما شرفتنيش ليه .... صحيح أنا مش عندي أكل لكن أجيب ، و مش عندي شرب ، لكن هشتريلك ، و ما فيش حتى مياه ، لكن هوصل مواسير من الرئيسية لكل الأقسام علشان خاطرك
و مش هقول تسيح ، ربنا يخليهالك بس احفظيها في الثلاجة
راشد
هي اصبحت معتقدات و تقاليد و كمان بقت عادية مش بتثير في النفس اشمئزاز مثلا ولا حتي ضيق لما تسمع ان فلان قدم رشوة علشان حد يسهله شغلانة ولا فلان حط ايده علي ملك مش ملكه .. اصبح رد فعلنا عليها بارد اوي
تسلم علي سؤالك .. بس يا ريتني اعرف ازيه .. ادعيله
انا مجنناني ان السايد بار يبقي يمين و في كل التمبلتس بتتحول من يمين لشمال اول ما اغير اي لون او خط .. بتتجنن و تعكس .. فقلت جنان علي جنانك هشوف واحدة اصلا شمال و اللي حسبته لقيته اتعكست لما غيرت فيها :)
اهي مش سيئة اوي .. يعني شغالة لحد ما اتكعبل في حاجة الطف
-------------------------------------
محمد
انا لما قلت كده كنت اقصد مش اذاعة الخير بس انك تدل عليه برد فعل .. عارف دلوقتي اللي بيدفع الوفات عن اعماله علي انها زكاة و يقولك رجل البر و التقوي و تلاقيه بعدها ممسوك في قضية رشوة ولا قتل ولا اي مصيبة ........ دا يتقال عليه ايه ؟؟
ممكن نقول حسابه عند ربنا وهو اعلم ان كان الخير اللي عمله عمله ابتغاء وجه الله و لا عمله علشان الضرايب ولا ولا !!!
الاسم انه بيعمل خير قدام الناس فالناس تقول عليه قدوة كويسة .. بس شوية والقدوة بتنهار قدام حقايق غافلين عنها واولها ان الله طيب لا يقبل الا طيبا
مفيش مال حلال بيأذي صاحبه - اعتقد
دايما الحرام اللي تلاقيه له رائحة وصوت
مش مختلفين احنا :)
وبلاش سيرة المناهج الله يكرمك .. انا اعرف ناس في ثانوي دلوقتي ومبيعرفوش يقرأوا كلمتين علي بعض عربي .. ولا اي لغة من اساسه
اما اكون باخد نفس المنهج اللي ابويا اخده يبقي ساعة الزمن بتاعتهم واقفة
اما يكون التاريخ ملعوب فيه بالشكل البشع دا والمفروض اصدق كتاب الوزارة و اقول امين يبقي مفيش فايدة
التاريخ اللي بيرسم جوانا الامل في بكرة مستمد من امبارح الكويس .. لما امبارح يبقي باطل اكيد بكرة هتلاقيه كاروهات زي الايام دي
تبقي جاهل و عندك ادب واخلاق
احسن من دكتور علي اعلي مستوي من العلم و معداش علي ادب ولا تربية
وبعدين يعني مين قالك اني لم أقرأ ما تكتب :)
بالعكس انا قرأت اكتر من موضوع و بصراحة بسم الله ما شاء الله عليك ربنا يحميك :)
عجبني ردك في موضوع عمرو خالد جدا .. ربنا يرزقك علما نافعا ويزيدك من فضله :)
وبعدين ما انت موجب معانا عندنا امال عندك هتعمل ايه باه :) :)
انا ساعات اقرأ واسكت و ساعات اقرأ وتلاقي كلام نازل متعرفش توقفه .. فشلت اني اعتدل بين الاتنين ... بس الله المستعان .. تتحل ان شاء الله :)
إرسال تعليق