فرضا اني كتبت كلمتين في صفحة تحمل اسمي افتحها بكلمة سر خاصة بيا
بتاعتي يعني
-فرضا -
لانها مملوكة للموقع المقدم للخدمة
طبيعي اي حد في اي مكان في العالم ممكن يقرأهم
و عادي يعني يكون له عليهم تعليق
ساعتها يكون اقل واجب علي الكاتب الرد علي المعلق
يمكن الرد يتأخر
يمكن يرد رد جماعي علي الكل
بس علي الاقل اللي عبره و كتبله حاجة المفروض يرد عليه
دا ربنا سبحانه وتعالي قال "واذا حييتم بتحية فحيوا باحسن منها او ردوها .. ان الله كان علي كل شيء حسيبا"
دي حاجة
الحاجة التانية
ليه يعني الشتايم و الكلام اللي مش محترم بقي هو السمة المميزة للكلام اللي بيعجب الناس ؟؟!!
ولا هي بقت انا اشتم اذا انا موجود؟؟؟؟
والغريب ان الممتدح بيمدح السباب دي بمنتهي الاطراء و افضل الكلمات و تلاقيه بعد شوية بيقول نصائح اخلاقية و دينية !!
زمن عجيب ولايعجب !!
علي الاقل مش عاجبني انا
هناك 12 تعليقًا:
سلام عليكم
تعرفى يا بنتى أحسن حاجه يعملها الانسانه أنه يقرأ للناس اللى بيحترهم ويكتب تعليقه بصراحه وبدون مجامله لكن اللى بيدخل على أى مدونه يجب أن يكون قادر على إبداء رأيه بدون أى تجريح للكاتب .... المهم بصراحه كده الكلمتين بتوعك دول فى الصميم ويجب أن نلتزم جميعا بهم .
على فكره أنا منفعش غير قارئ وبس كفايه عليه كده ... سلامى لابنى الغالى .
مدحت
سلام عليكم يا سيف يا أغلى الابناء إحنا بخير والله آسف جداااا على تقصيرى معاك لكن كانت ظروف كده والحمد الله كله تمام وبخير ومهما اتكلمت ولا قلت مش هعرف يا أبنى اعبر لك عن شعورى لكن خليك دايما عارف وحافظ أن فيه ناس حبتكم يا ابنى من غير ماتشوفكم والله يا أبنى أكاد أتخيلكم وان شاء الله هتكونوا وده أكيد أن شاء الله أجمل 100 مره مما أتوقع خلقا وأدب وحب للناس ربنا يا أبنى ما يحرمكم من بعض ويحافظ عليكم ويجبر بخاطركم .
مدحت
بصراحة أنا شايفة ان اللى بيقعد يشتم ده انسان ضعيف مش قادر يوصل وجهة نظره...و بصراحة فى مدونين كتير يسيئوا للتدوين بأسلوبهم و طريقة ردهم...بجد احسن حاجة تجاهل اى حد بيشتم تماما
السلام عليكم ورحمة الله وبركاته
يمكن حضرتك مشفتش مدونات كتيرة وخصوصا اللي بقصدهم بكلامي .. فمشفتش الموضوع فج اد ايه
بس النتيجة واحدة .. زي ما انا قلتها مرة قبل كده .. اللي بيقولك لو مش عاجبك كلامي متجيش هنا تاني .. و يعتبر نوعا ما واقع تحت بند حرية شخصية و خصوصا ان ما يلفظ من قول الا لديه رقيب عتيد .. مش انا ولا انت ولا اي حد يملك يحاسب بشر ..
لا مش هنهرج .. هتكمل .. وانا هلاحق علي مين ولا مين .. حضرتك بس عارف اعتراضي علي التدوينة الاولي ليه .. ركز كده و اكيد هتقول حاجة مفيدة ان شاء الله ..
ويا سلام باه لو حاجة ليها علاقة باللوجيستيكس .. خصوصا اني هربانة من الدكتور بيكلمني و مبردش عليه :(:( وشكلي وحش اوي قدام نفسي :(
------------------------------
انا و دماغي
بصي .. هو انتي ليكي حق .. بس دي عاملة زي البيبي الصغير اول ما يبتدي يتكلم .. لو لقي حد بيقوله يا كلب ولا يا حمار و لا سباب اكبر من كده و لقاهم فرحانين بيه انه بيكررها .. هيكبر الحاجات دي عادية بالنسباله و الاسوء قادم
يعني علي راي المثل
ابنك علي ما تربيه
وطالما في استحسان من الاخر علي الاسلوب و هو دا الجاذب للاخرين .. في كتير بيسلكوا الطريق دا لنيل رضا الغير... وفي اللي هو طبعه و عيشته و كلامه اصلا كده ..
انا فاكرة لحد اولي ولا ثانية ثانوي مكنتش استجري اقول كلمة "نيلة" .. كنت بتقابل باستنفرار من اابويا و الدنيا بتقوم عليا وانها اول سكة اني ابتدي اقول كلام مش كويس
بس بما ان المعايير كلها اختلت فكلمة نيلة دي دلوقتي من اقل القليل في الكلمات غير الكويسة بل انها يمكن بقت تتقال كانك بتنادي علي واحدة صاحبتك باحب الاسماء اليها مثلا ..
هو زمن عجيب فعلا .. ربنا يلطف بينا منه
نورتينا :)
فعلا صح كده
في مثل بيقول خالف تعرف
خالف بقي ازي مش مهم
المهم اكون مخالف
عارفه ياليس
زي مفي موضه في اللبس في موضه في طريقه الكلام
وموضه في الكلام نفسه
بمعني تلاقي معظم البنات في الجامعه مثلا تتكلم بطريقه معينه حتي في حركات ايديها
وتلاقي برضه معظمهم في فتره معينه انتشرت بينهم موضوع مش
بمعني لو الواحده عايزه تقول انا معملتش ..... كذا
تقول مش عملت ....... كذا
ديه امثله بسيطه جدا
الكارثه ان بقت الموضه عند العيال دارسي الجامعه الامريكيه ودارسي الجامعات الخاصه المعروف عنها الغلاء
ان المفروض انهم ولاد ناس محترمين جدا
وذات مراكز مرموقه متربين تربيه عاليه
والكل كان يعرف عنهم الادب والاخلاق
وفجأه
تلاقي موضة الكلام بينهم الشتيمه والكلام الابيح
ليه ؟؟؟
مهو خالف تعرف
وتلقي الشخص ده محبووووووووب جدا
وللاسف مستقرش الوضع علي انه بين ولاد الزوات بس
لا للأسف
انتقل لكل فئات الشعب
لدرجه ان بقت الشتيمه القذره عااااااااااااادي جدا
ولما تشمئزي يقولك ده عادي جدا
انتي اللي بيئه ومش علي الموضه
شوفتي ياأليس خلتيني ارغي ازي
بيتك و مطرح مش هترغي اكتر ما برغي انا :):)
ليكي حق في كل الي قولتيه بس بما اني مش محتكة اوي بالشارع من فترة طويلة فبعرف الجديد في الحاجات دي صدف
موضوع الاباحة دا في كل حتة مش بين اولاد الذوات بس دلوقتي
هو تريند ماشي كده الايام دي و الكل متساق وراه زي القطيع
مش عارفة ا قول العيب في مين بالظبط بما انهم ناس المفروض كبيرة كفاية تعرف الصح من الغلط .. بس اعتقد ان الصح عندهم مشوه
بس في كام موقف كده حرقوا دمي الصراحة فمملكتش الا اني اكتب الكلمتين دول
لاني فعلا مش فاهمة هي شطارة يعني ولا اللي بيعمل كده بياخد جايزة
ولا ايه يعني مش فاهمة انا
حاجة بجد تضايق .. الله يعافينا واياكم والمسلمين
بس ارجع واقولك الحمد لله اننا لسه بنعرف نميز الخبيث من الطيب
كل بئر ينضح بما فيه
اللى بيتكلم وحش وبيشتم ده بيبقى من اصله
واللى ميعجبوش حاجة يقول بس ميشتمش يعنى
حلم بيعافر
عين العقل
اوجزت فاحسنت
جزاك الله خيرا
متفقة معاكِ جدا قلبا وقالباً:)
والله ربنا يهدى الناس دى بجد
ولا يهمك سيبك منهم
سلام عليكم
انتى يا بنتى ملاحظاتك فعلا كانت صحيحه ومشكلتى فعلا طولة البال والصبر معرفش ده طبع فيه من زمان يمكن بمرور الزمن بقى عاده ربنا يسهل الامور انا فعلا كتبت فى مدونه جديده حاجه تانيه لكن مين وفين اللى يدينى فرصه اكمل واركز ربنا يهديهم عليه.
لو صادفتى سيف فى اى مدونه او على الميل قوليله ماتزعلش من عمك وسامحه على تقصيره .
مدحت
موناليزا
ربنا يجعلنا دايما مجتمعين علي الحق :)
------------------------------
سعادة محمد غالية
انا متحطتش في الموقف دا بشكل مباشر بس شيفاه بيجرا لناس كتير و مش عاجبني التصرفات دي ومش شايفالها مبرر اصلا
ربنا يهدينا جميعا لما يحب ويرضي
-------------------------------
السلام عليكم ورحمة الله وبركاته
يعني ايه يعني انت بتكتب من ورايا :(
عملت مدونة تانية فين ؟؟؟ طيب كنت مسحت الموضوع الاولاني و كملت ولو اني معترضة عالاسم بردة حاسة انك اتعديت من التشاؤم بتاعي :(
ان شاء الله ربنا يجعل الخير فيما تكتب وتقول دايما
وبالنسبة لسيف مش عارفة والله تقلان علينا ليه كده :(
ربنا يكرمه يارب و يعفو عنه
إرسال تعليق