حكمة راجل طيب

زمان كان في بتاع تين شوكي بيعدي في الشارع عندنا  و كان ليه كلمة دايما بيقولها

زمان ايام ما كان في شمس بتدخل الشارع و عمارات و فيلات صغيرة مش عمارات متعرفش تشوفلها اخر 

زمان كنت بشوف النيل من اليمين والشمال 

زمان كانت الشمس بتدخل الاوضة 

نفسي الراجل يرجع ينادي تاني 

كان بيقول " خليك مع الله "

ويفضل يكررها بطريقة جميلة 

مفيش حد متبرع ينادي في الناس وانا قبلهم و يقولهم خليك مع الله  علشان تكسب

--------

مناسبة الكلام دا حاجتين 

الايام العصيبة اللي فاتت دي بكل اللي فيها من مشاكل لا حصر لها وان كانت مشاكل مستمرة و كل يوم في جديد .. مكنتش بحب اقول علي حد قدمه وحش .. بس لقيت نفسي بقول في حد من الجداد اللي جم  الشهرين اللي فاتوا دول قدمه مش كويس

كمية مشاكل متتعدش وعلي كافة مراحل العملية التصديرية  .. من اول الارض للعنب للنقل لشحنه لتاخير مراكب للوصولات و مشاكلها و الاعجب و يكاد يكون لاول مرة في التاريخ علي حد علمي القليل و علي حد راي الناس اللي بقالها 40 سنة في الشغلانة دي لاول مرة حاجة درجة حرارتها المفروض تكون صفر مئوي  في اثناء الرحلة المبردة بتاعتها توصل لعميل درجتها 11 مئوية .. يعني  لحد 6 مثلا المفروض الللي جوة الكراتين دا يفرقع .. دا اقل واجب .. 

و بغض النظر عن الليلة دي كمان 

قالوا في المثل .. الفاضي يعمل قاضي .. و ما بالك باه لو قاضي القضاة ملوش لا شغله ولا مشغله يعمل ايه ؟؟ واللي حوليه كلهم مطحونين شغل و غرقانين مشاكل .. يبقي ملهاش حل غير انه يعمل عليهم مشرف مثلا .. يتأمر هنا حبة وهنا حبة 

حاجة تضحك والله .. جايلنا من شهرين اكس من الناس بمرتب يعتبر الاول من نوعه في الشركة دي و اعلي من مرتب العضو المنتدب ذاته  و مجابيه - الله يسامحه - 

اكس دا جاي علشان يصدر محصول معين .. حلو

احنا بعد ما عيناه بقاله شهرين بياخد مرتبه من الشركة ودا التالت

لسه بيدوروا يجيبوا ازاي ومنين موافقات من وزارة الزراعة علي انهم اصلا يزرعوا المحصول اللي عينوا اكس دا علشانه !!!

اكس دا بياع .. يعني هيستلم من نقطة ان المحصول دا مجهز لللتصدير وما عليه الا انه يقول اسعار السوق الخارجي كذا هبعت دا فين و بكام 

جابوا زرار الجاكت اللي عاجبهم قبل ما يلاقوا قماش الجاكت ولا المحل اللي بيبعه و لا حتي عارفين هيفصلوه عند مين و بكام .. هم يبكي وهم يضحك

دا اكس .. اما واي باه  فله سابق معرفه قديمة من سنتين و حرقة الدم منه اصبحت من الحاجات اليومية المعتادة .. و الفضا وحش اصله .. فلهم عذرهم

المهم يعني سبب الرغي دا ان الواحد لما بتضيق بيه الدنيا اوي و بتكتر عليه المشاكل و اصلا نفسيا زي الزفت .. ممكن تجيله اوقات يقول كلام المفروض ميتقالش و يحس احاسيس المفروض متتحسش .. يعني انا كنت هتجنن و ايام بروح من المكتب 10 بليل معيطة من كتر الضغط و التدخلات اللي بتكون عبء زائد و مش في وقتها  ..

يومين تلاتة و ابتديت اخد بالي ان في حاجات غلط .. هل مش مقصود اني اكون في المواقف دي .. هو انا مش مقدرلي اني اتحط في المواقف دي بالشكل دا و فلان ولا فلانة يتصرف معايا بالشكل دا؟؟ المشاكل اللي مغموسة فيها دي مش قضاء الله عليا؟؟ الرعب و القلق والخوف علي اللي غايب و الله اعلم بغيبته دي بتعمل فيا ايه كل ثانية مع اني قلت المرة دي هبقي جامدة و علي راي المثل يعني ياما دقت علي الراس طبول مش اول مرة  يحصل دا ومش اول مرة يغيب بس كنت خايفة عليه و كل اما بفكر لثانية في كمية الالم اللي بيتالمها بقول تهون الدنيا باللي فيها قدام لحظة الم لاي حد مش بس قريب ولا اللي من دمي .. اي حد مهما كان مين حتي غير المسلم ولا الملحد .. الالم مكتوب عليه اه بس مفيش حاجة في الدنيا تعوضه .. الحمد لله علي حال

وقفت شوية كده ولقيت نفسي باصه في الناحية الغلط .. انا ببرطم بقالي كام يوم من تدخلات افراد مش فاهمين حاجة لمجرد بس يقولوا احنا لينا دور ما في الدنيا هنا .. لقيت نفسي بشتكي وانا مش عايزة اشتكي .. بس جت عليا لحظة لقيتني افتكرت اني لحد قريب لما كنت بتظلم بقول يارب "رب اني مغلوب فانتصر" و لو كنت مظلومة اجبر بخاطري"اللهم يا جابر المنكسرين اجبر كسري".. انا مش عارفة انا اصلا من الاول صح ولا غلط بس حاسة اني مش صح لما بقيت مخنوقة طول الوقت و مش طايقة حد يتنفس قدامي ولو اننا هنا كلنا كده الايام دي .. بس دا مش اول موسم عنب يعدي عليا بقرفه و مشاكله و الضغط النفسي الرهيب للي فيه .. بس بردة انا غلط

من بعدها كده والله حسيت ان في هم اتشال من علي قلبي و اللي كنت شايفاه تدخل .. لقيتني بقول طيب وماله اللي عينه في حاجة بعملها و عايز ياخدها اهلا وسهلا يورينا هيشيل اد ايه .. ولقيت اللي فكرني انه عادي الحاجات دي حصلت كتير قبل كده وفي النهاية لا يصح الا الصحيح 

و حسيت اني اتعدلت شوية و حسيت اني ابتديت ارضي لما فكرت و قلت مهو الرزق مكتوب مش بايد مخلوق .. سواء شغل و لا فلوس ولا صحة ولا اي حاجة .. اولها واخرها رزق من ربنا و هو وحده يرزق من يشاء .. و مقدر عليك و عليا اللي هنرزق بيه .. وله حكمة في كده اكيد .. سيبتها لله ..بالفعل مش كلام .. سلمتها لربنا و حسيت حمل رهيب اتشال من علي قلبي 

حتي غياب الغايب سلمته لربنا يقضي ما يشاء سبحانه وتعالي اعلم بالخير فين وانا كلي امل ان ربنا هيجبر بخاطره و هيرجعه و سامع وشايف و يعلم ما تخفي الصدور

يعني صدق الراجل بتاع التين اللي قالها حكمة " خليك مع الله "