افهم اللي بيكتب في اعلان العروسة في جريدة ولا مجلة
جميلة
بيضاء
ممشوقة القوام
قصيرة
متناسقة
حلوة العشرة
طيبة
سمراء
علي خلق
متدينة
وغيرها من الوصف العادي .. او اللي جرا العرف واتفق عليه
مهو كل واحد من حقه يحقق حلم بيحلمه في الشكل او الهيئة اللي تكون عليها شريكة حياته
حقه و حقها هي كمان تقول وتتشرط زيه
كتير بستني اهرام السبت اتفرج علي جزء البيت السعيد في بريد الاهرام
فضول الناس بتدور علي ايه
النهاردة شرط من الشروط استوقفني لغرابته ولا يمكن عندي انا بس
محاسب و من ضمن شروطه طالب انها تكون ذات وظيفة مرموقة !!!
مش فاهمة يعني هو بيدور هي وظيفة مرموقة يعني بيدور علي مكانة اجتماعية معينة مثلا؟؟
ولا يعني وظيفة مرموقة بمرتب محترم ويشترط التعاون التام في الصرف علي البيت؟؟
ولا يمكن وظيفة مرموقة تعويض لنقص ما عنده ؟؟
كمان معني كده انها لو فكرت بعد ما تتجوز تقعد في البيت وتؤدي دورها الطبيعي في الحياة ..
ساعتها تبقي اخلت بالاتفاق و يحق له طلاقها مثلا ؟؟
والله اعلم النية ايه بس استغربت الشرط دا جداااا ..
علي الاقل انه اشطرته بشكل علني ..
فقد جرت العادة انها تكون بشكل خفي ضمني !!
صراحة تحترم
بغض النظر عن المصرح به
هناك 11 تعليقًا:
دا داخل على طمع
وعايز واحدة تنطره
بس شكله هينطر من الشباك
اولا مدونتك جميلة جدا
ثانيا فعلا حاجة ملفتة للنظر
بس دلوقت فى رجالة كتير بيتعاملوا مع الستات على اساس ان مفيش فرق
وعينى عينك كده لازم تشتغل ومش تساعد لا ياريت تشيل الهم كله
فى واحدة صاحبتى اتقدم لها واحد ولما سألته ليه هى بالذات
قالها انه اختارها لانها مدرسة انجليزى والدولة اللى بيشتغل فيها محتاجة مدرسين فى التخصص ده
ربنا يرحمنا برحمته
تعرفى اكتر حاجة بتلفت نظرى فى الباب ده
طلبات النساء وطلبات الرجال والمقارنة بينهم
تلاقى البنت مهما كان سنها طلباتها عادية واقل من العادية كمان وممكن تقبل اى وضع المهم تتزوج
عكس الرجل مثلاً مهما كان سنه ووضعه الاجتماعى برضه بيتأمر
اغرب اعلان لفت نظرى كانت بنوتة لسه فى اوائل العشرين وكلامها عن نفسها كويس جدا ومؤهلها التعليمى ومستواها الاجتماعى بصى تحسى كده انها بجد عروسة لقطة:) ومع ذلك طلباتها اقل من العادية
وبينى وبين نفسى اقول اللى زى دى تعمل اعلان ليه؟؟؟؟
هما الرجال نظرهم قل ولا ايه؟
موضوع الجواز ده فعلا فيه عجايب
والله انا سعيده وفرحانه جدا من كلام سيف
والله ديما بدعي ربنا يسدعكم يارب يارب يارب
بخصوص البوست بقي
فعلا ساعات الصراحه بتصدم او بتحترم
وغالبا الانسان السوي بس هو اللي بيحترم صراحة الاخرين
الكلمة نور
والله في ظل الظروف اللي الدنيا فيها .. هيلاقي اللي ترضي بيه لو هو داخل علي طمع تحت بند انها تتستر و تتجوز .. في افكار جديدة ولدتها الظروف اللي بقينا فيها .. اللي بيخلي اللي توافق تتجوز علي ضرتين و تبقي التالتة و اللي توافق علي العرفي تحت ضغط ظروف لو مكانش فيها كان عمرها ما تفكر كده ابدا .. وغيرها وغيرها
و ممكن كمان يقع في شر اعماله في واحدة تطلع عليه القديم والجديد مهو المستقويات الايام دي بردة كتير
ربنا يكفينا كل خبيث سوااء واحد ولا واحدة
--------------------------------
لقد خلقنا الله احرار
اولا انا اللي اشكرك جدا علي كلامك الطيب :)
مهو مفيش فرق دي يعني هو مش راجل وهي مش ست ..الاتنين انسان و بناءا عليه متسوايين في الحقوق و الواجبات .. عن نفسي مشفتش الاتنين انسان ابدا .. هتلاقي واحد منهم دايما اقوي من التاني
معظم البيوت مفتوحة بمرتب الست ومن زمان اوي و بقي عادي ان الست اللي بتصرف وتربي وتشتغل و يطلع عينها و في المقابل يا زوج متبهدل بردة علشان يكفي باقي المصاريف .. يا زوج معندوش من الاحمر ولا حاسس بحاجة و مستني منها تصرف عليه .. و النماذج كتيرة اوي وكل بيت غير التاني .. وما خفي كان اعظم
اهي صاحبتك دي لو هي موافقتش هيلاقي هو غيرها يوافق .. صدقيني النظرة للموضوع دا اختلفت و بنات كتيرة بقت بتفكر في حاجة زي دي علشان تخرج من البيت و البلد و حتي لو بقي زواج مصلحة زي دا .. اجبرتنا الظروف علي حاجات كتيرة مكانتش عمرها تخطرلنا علي بال !!
لنا الله يلطف بينا في ايامنا و ايام من بعدنا ... يارب
نورتينا :)
--------------------------------
سيف باشا اللي بيدور علي عروسة
الاول يعني يكون في علمك يعني ان الزوجة الاولي لازم تكون علي علم هه
دمها خفيف .. ممكن نصفيها و تزوده شوية مية .. وبعدها نشوفلنا طريقة نرجعه :):)
مثقفة .. كويس علشان تكلمك بالنحوي و تفكرك بالعربي بما انك بتحبه اوي واهو لو زهقت منها شوية افتحلها فصل عندك في الجنينة تعلم الناس لغة عربية .. واهو كله بفايدة
بتحب حبيبها .. اه مهي ناقصة
نكدية .. وتدور برة ليه يا حبيبي ما انا موجودة اهو :)
مش بسمع الكلام .. طييييييييييب طالما انت بتحب كده عنيا الاتنين :) :)
بتعرف تعمل كوارع .. مش قولنا رجلين البقر دي مهياش مأساه يعني :(
هو يعني مين عبيطة تلاقي حد بيحبها كده وهي بتحبه اكتر من كده بكتير و تضيعه يعني :(
تستحمل عيشة !! ما احنا راضيين يا كابتن و مستحملين .. لزومه ايه البص برة بس
بتنام 18 ساعة .. ودي عايز تتجوزها في الفواصل الاعلانية ما بين كل حلم و حلم ولا ايه .. ما انا عكسها اهو و صاحية ال18 ساعة و يجي مني :)
طيب تبقي تستجري واحدة و تتصل هنا :( دي اخرتها يعني
شفت باه انك ملكش غيري :) ربنا يخليك لي يا رب و يرجعك بالف سلامة :)
طب والله ما هتلاقي حد بيحبك ادي :(
عمك خليته يعمل مدونة و مشغول بيها :) :) بس كتب اول موضوعة حاجة مدح وهمي .. ان شاء الله يكون مسحها و كتب غيرها :)
وبعدين اصلا كل الناس بتسال عليك بس انت الي تقلان علينا :)
--------------------------------------
موناليزا
المقاييس بالطلبات بالمتاح كله اتغير عن من 5 سنين عنه من 10 سنين
كل شوية بتلاقي اللي بتقدم تنازلات اكبر لمجرد انها يبقالها اسرة و تعيش و بصراحة من حقها
والبنت اللي اتكلمتي عليها في زيها كتير و ان كانت ممكن تقول قدام الناس غير كده انما في قرارة نفسها عايزة تعيش حياتها مع حد و تنجب اطفال و يبقالها حياة مستقلة
حتي العرايس اللقطة مبقوش حاجة مميزة .. الدور والباقي علي العين اللي هتشوفها هتشوفها ازاي و هتقييمها ازاي جنب اللي بتحلم بيه و عايزاه
مش كل البنات الكويسين شبه الموديلز يا حبيبتي :)
سعادة محمد غالية
انت لسه شفت حاجة :)
-------------------------------
حواء :)
ربنا يسعدك يارب دايما
شفتي الكابتن اللي بيدور علي عروسة :) بس انا ظبطتهاله :) :)
وبردة القديمة تحلي بغض النظر عن بقية المثل :)
بصي الصراحة ولو كانت صادمة فهي تحترم لانها افضل كتير من الخبث و اللؤم
احترم عدوي ان واجهني بعداوته و اكره صديقي ان اصطنع محبتي :(
احترام الصراحة غير الشعور اللي بيأتي من ورا الصراحة دي .. في صراحة بتتقال بتجرح و تقتل وفي صراحة بتطيب خاطر و تهدي .. حسب الظروف و المصارح و المصرح به بس بردة تحترم !!
نورتينا يا ام فاطمة :)
السلام عليكم ورحمة الله وبركاته حياكم الله وبياكم أخوانى وأخواتى وسدد على طريق الحق خطاى وخطاكم وطبتم وطاب سعيكم وممشاكم وتبواتم جميعا من الجنة منزلا ، وأسأل الله العظيم رب العرش العظيم أن يجمعنا فى الدنيا أخوانا متحابين على طاعته وفى الأخرة فى دار جنته وكرامته ، إنه ولى ذلك ومولاه والقادر عليه.
علمنى سيدنا محمد صلى الله عليه وسلم ان الله عليم حكيم مطلع على أفعالنا وأنه سبحانه وتعالى لا يظلم أحدا أبدا.
أذا كان هدفى من الزواج البحث عن الحسب أو النسب أو المال أكيد دى كلها أهداف دنيوية ليس فيها إبتغاء لمرضاة الله عز وجل وفرق كبير بينها وبين اللى ينوى فى جوازه تأسيس بيت مسلم يتردد بين أركانه لا إله إلا الله محمد رسول الله صلى الله عليه وسلم .
ربنا يردنا جميعا الى دينه ردا جميلا ويشف صدور قوم مؤمنين
اخى الكريم سيف نورت الدنيا كلها وأحب أبشرك طلبك عندى اخى بس ياريت لو سمحت وسيلة إتصال أخرى لإن اكاد أرى سمة تهديد فى أحد التعليقات .
وفقك الله لما يحب ويرضى ورزقك الزوجة الصاحلة التى تعينك على تقوى الله عز وجل والذرية الصالحة المباركة إن شاء الله
سبحانك اللهم وبحمدك أشهد أن لا إله إلا أنت استغفرك وأتوب إليك
السلام عليكم ورحمة الله وبركاته
طلبك عنده يعني ايه يعني
لقيتله واحدة نكدية :)
كان غيرك اشطر يا باشمهندس
وبعدين مش وقت تشجيع تعددية السعادي .. خليك محضر خير الله يرضي عليك لحسن يصدق و اضيع انا :(
رؤية لسمة تهديد في احتمال تتحور لما هو اكبر من كده .. اسعي في الخير:)
كل سنة ننتظر الطلة الجميلة وكلامك الذي يسر .اذا امكن نريد ان نعرف هل هناك زواج هذا المدة لفتاة العقرب ام لا .اريد ان اعرف الوضع العاطفي لي .احببت رجلا من برج الدلو هل سيكون ارتباط بيننا .مع الشكر
إرسال تعليق