ستينكي

لحقته وهو صاحي قبل ما يكمل بيات شتوي :)

ساعات بتعدي علي الواحد حاجة بتعلق بيها وبيحبها ( حاجة مش حد)

هواية .. تجربة عاشها .. رحلة عملها .. اي حاجة سابت جواه علامة

زي الارنب بتاعي كده :( الله يرحمه

ولاد اخويا عندهم STINKY دي تيرتل برمائية (شكلها قريب اول للي في الصورة بس دا لما كبرت)

لونها اخضر كلها و اول ما جت كانت اد علبة الكبريت الصغيرة

دلوقتي ما شاء الله كبرت و بقت اد 3 صوابع جنب بعض

يعني بانتلها راس ورقبة و رقبتها فيها خطين لونهم احمر .. اللي فاهماه عنه(بما انه ذكر) انه من آكلي اللحوم .. بس كويس ان معدل نموها بطيء


بصراحة انا بخاف منه بالرغم من انه صغير كده انما بيعض

اخويا مرتبط بيه جدا و اول ما يسمع صوته يجري في البحيرة اللي عايش فيها و يجي ناحية صوته

لما يقرب منه يبقي عايز ينط منها

وهو كله علي بعضه ممكن تفتكرة ودعة مرمية في شوية مية :)


ستينكي دا الكائن الوحيد اللي ما شاء الله معمر معاهم لحد دلوقتي

جابوا سمكة (جولدن فيش) زي اللي في الافلام كانت قبل ما سيف يشرف

سليم كان يادوب سنة ونص يبصلها و عايز يدخل ايديه يجيبها

توفاها الله .. غالبا من الوحدة

بالصدفة بتعمل ثوم .. لقت دودة جوة فص ثوم كبير

جابت برطمان زجاج صغير و حطيتها فيه و خرمت الغطاء علشان يدخلها هوا


كان فرحان بيها بردة لحد ما باباه سهاهم ورماها من وراهم (الاب هو الاب .. مفيش فايدة :( مش بيراعوا ارتباط ولادهم بالحاجات دي)


شوية و قررت تجيب بغبغان من اللي بيتكلم .. بس الحقيقة انا استحرمت تمنه اوي كان ب4000 جنية .. والحمد لله الفكرة باظت لما لقيتنا شخصيات محبطة ان كنت انا ولا اخويا :)

شوية و جابت قفص فيه عصافير .. فرحوا بيه سليم وسيف بس هي اللي زهقت من صوتهم و نضافتهم .. فرقتهم


وفضل ستنكي في البيات الشتوي ال3 شهور اللي فاتوا و صحي من يومين :)


هو كلام ملوش علاقة بحاجة اكتر من اني متأكده ان ستينكي هيفضل في ذاكرة سيف وسليم لما يكبروا ان شاء الله .. زي ما الارنب في بالي دايما .. اينعم انا حصلتلي عقدة لما توفاه الله وعلشان قسوة ابويا في التعامل مع الموقف من اوله لما اكتشفه بس بردة كانت ايام جميلة


مش عايزة اقول حاجة من الحكاية دي غير .. يا ريت اللي عنده حاجة بيعملها وبيحبها ميبعدش عنها واللي عنده اولاد و ليهم حاجة بيحبوها ميبعدوهاش عنهم او يقسوا عليهم تحت مسمي مصلحتهم


في ناس كتير ناجحة وهي بتمارس هواياتها و ناس كتيرة فاشلة عمليا و الاسم انها كانت بتجيب اعلي درجات في المدرسة والجامعات


العلم اللي بيتعلموه في المدرسة محتاج اخلاق ونفس متربية ومتأسسة علي خدمة الناس والدنيا



العلم اللي في الكتب محتاج حد بيشوف التطبيق مش بس كلام في كلام و لما فجأة يلاقي نفسه في الدنيا و مطلوب منه يتعرف عليها ويتعايش كمان مع اللي فيها حلوه ومره .. يفضلوا الاتنين يلطشوا في بعض .. لا هو عارف يراضيها ولا هي عارفة هو عايز منها ايه !!





كمان متزعقوش لولادكم :( علشان النتيجة اللي انتو عايزينها هي هي هتعرفوا تجيبوها بالتفاهم وبالرفق .