بدون عنوان

ساعات كتيرة بقف كده ورا زجاج البلكونة

بحاول ابص للدنيا مرة من نفسي لفوق

اقصد اني ابص للسماء

سواء عايزة ادعي ربنا

او عايزة ابص علي الدنيا

مجرد نظرة مختلسة من ورا زجاج البلكونة

علشان" جار" غير محترم..  بيختلس هو النظر علي الرايح والجاي

هو مش لينا حق نبص علي الدنيا زي بقية الناس بدون ما حد يأذينا ؟!!

***************

لم عزاله و حاله و كل ما له في الدنيا

حطهم في شنطة كبيرة اوي

يمكن حتي اكبر منه

بس هيروح بكل دي علي فين !!

شوية تفكير كتير اوي

وصل لنتيجة واحدة

الحمل تقيل اوي انه يشيله ويدور بيه علي حتة تانية

ركن حمله و استني

و فضل مستني

ولسه مستني

يمكن اللي مستنية يجي

يمكن يغير رايه ويرجع

يمكن يفضل حاله ما بين الامل بعد الانتظار

و ما بين الخوف من الرجوع خطوات لورا

الماضي لو حاولنا نعيشه مرة تانية

مستحيل هنحبه مهما كان حلو

و المستقبل وقته مجاش

وبناءا علي ما سبق

نلم عزالنا دي كلها

و نقف علي باب المولي عز وجل

هو اللي عارف انهي فيهم احسن

وبردة علي باب الرحمن

هنستني

بس بنفس راضية كتير عن الاول

لانه مهما كان قراره وقضائه وقدره

اهون  من اي قرار بشر

**********

اللهم آمين