الأحد، 12 أكتوبر 2008

اعرف واعترف

في رحايا العمر .. كتب المهندس احمد حقائق يجب ان تعرفها - الأن

قرأت الموضوع مرات كتيرة .. قرأته مرة بعنيا في صمت و اعدت قرائته مرات و مرات بتركيز في كل كلمة و قرأته بصوت عالي لعلي استشعر احساس مختلف او اتجاهل احساسي ان الموضوع قد يخصني معظمه ان لم يكن كله

لعله أتي في التوقيت الذي احتاجه .. لعله اشارة من الله لي او لغيري .. احسبها رسالة بكل ما فيها و احسب ان فيها الكثير من الخير لمن يستطيع تقدير ما ورد بها التقدير الجيد العاقل.

وردت فيه جمل لم استطيع ان اتجاهل اني قرأتها او اني اريد التعليق عليها او حتي مجرد نقل احساسي بها بدون تعليق ..

" فأنت في النهاية الذي تبني الحياة التي ستحياها " بيتهيالي دي الغرض الاساسي من الموضوع .. بس البناء محتاج مقومات و محتاج عامل بناء ماهر و مهندس يخطط و ينفذ و محتاج ادوات و معدات و تمويل و جهة تنفيذية و حاجات كتيرة .. مش سهل بناء الحياة !!

" لو اختلفت الخريطة عن الحقيقة ، فالخريطة تحتاج لتغيير " بردة محتاجة حد بيعرف يخطط .. انهي احسن و ايه افضل البدائل و اصحح امتي و لحد فين ..

" نحن ما نفعله " اكبر علامة استفهام ممكن احطها قدام الكلمتين دول .. ليه نحن ما نفعله .. مش يمكن نحن ما نحن عليه تكون اصدق .. مش يمكن افعل ما لا اريد او اريد ما لا افعل .. ليه يتحكم عليا بفعل لا يعلم ما ورائه من تأثيرات الا الله وحده .. ... يمكن نجحت علشان حد مش علشاني .. يمنك بشتغل لسبب غير كل الاسباب اللي الناس حسبتها اسباب منطقية تدعو للعمل .. يمكن بسكت علشان الاحساس يفوق كل كلام .. يمكن و يمكن كتير بس النتيجة اللي ترضيني في الوقت الحالي اني لست ما افعل !!

"المشاعر تتبع الافعال" اللي فهمته هنا الترتيب : العقل - الفعل - القلب .. افكر و اعمل حاجة احس بيها بعد ما اعملها .. ان فكرت و قررت و مقدرتش اعمل برغم المحاولة حتي رجعت في نص الطريقة .. النتيجة النهائية هي هي نفس الصفر زي اللي مفكرش ؟؟ معتقدش
يمكن احس اني عملت و حاولت و يرضيني مجرد المحاولة .. يمكن ازعل اني موصلتش للهدف .. يمكن وانا ببتدي المحاولة قولت كده كده مش فارقة زي ما تيجي تيجي .. يمكن فكرت في الصفر في كل الاحوال مهما عملت فلما نجحت فيها لقيت ان شعوري ان بعد كل دا هو احساس الصفر ولم يغيره الفعل !! عجيبة النفس والله مفيش حاجة عاجباها ولا بترضيها.. اعوذ بالله من شر نفسي

" تعلق القلب برب الاسباب ، يأتي بنتائج لا تتناسب مع الاسباب " الوكيل .. الغني .. الشكور .. الرؤوف .. الودود .. الرحمن الرحيم .. الله
مهما عملت و مهما حاولت لن يكون الا ما اراد الله .. لعل الله يرد بي خيرا فيكون نتيجة الفعل اضعاف ما يستحق او عكس ما هو متوقع .. بس صدق الله من يتوكل علي الله فهو حسبه .. وما بالي بالله وهو حسبي .. اكيد خير ان شاء الله :)

" تحليل حسابات الربح والخسارة والتي ستقود الي التغيير الامثل" لو جاوبت لماذا و لم لا .. مين يضمنلي اني الاقي بكرة اجابات علي استفهامات جديدة هتيجي مع بكرة جديد.. بردة بخاف من بكرة و من كل لحظة جديدة جايةعليا .. بتمني لو متجيش .. مش عايزة اعرف الغيب علشان اتطمن .. عايزة يزيد ايماني ان الله قد كتب علي ما كتب و قضي الامر و ان مسيرة لما قضي الله لي .. مين يضمنلي اني محسبهاش غلط ؟؟ ايه يضمن ان الربح يفضل ربح والخسارة خسارة و لا حتي يضمن بصيرتي للاشياء تكون بصيرة صادقة!! مش قلنا توكلي علي الله :(

" اننا لا نستحق ما نتمني " نفس الخوف من المجهول بالرغم من الرغبة الاكيدة في ان نعيشه و بالرغم من انه هو الامنية والحلم ... بس بردة خايفة .. بس ربنا موجود .. الخوف ساعات ميكونش من ضعف .. ممكن يكون خوف ووراه قوة بس محتاج تثبيت .. ومن يثبت غير الله :) اسالك الثبات يا ربي

"اننا لا نعرف ما الذي سيحدث عندما نتغير" "الامل والايمان " ما هو حجم التغيير الآمن ؟؟ هو سؤال نط قدامي .. اقدر العب في التغيير دا لحد فين وابقي في امان من عواقب لا اعلمها؟؟ اتوكل علي الله فهو حسبي و لكنه امرني بالسعي فلبيت النداء واخذت بالاسباب - اسعي لاحسن الظن بالله و ليزداد يقيني في انه وحده الذي يعلم اين هو الخير لنا .. احسن حل في الحتة دي اعمل زي ما رسول الله صلي الله عليه وسلم قال للرجل (اعقلها وتوكل ) فهو حسبي ونعم الوكيل :)

" هناك من يملي علينا الواجب فعله " كل الناس بمعني كل الناس بدون مبالغة تعتقد انها اعلم الناس بالمفروض فعله بغض النظر عن حقيقة علمهم و مدي صحة ما ينصحون به او ما يملون علينا فعله .. مين يقوووووولهم لا تتدخلوا فيما لا يعنيييييييييكم ..

" لا تتوقع نتيجة مختلفة الا اذا قمت بعمل شيء مختلف " مجرد التفكير بطريقة مختلفة حسب الحالة النفسية و الذهنية في وقت التفكير في الموضوع نفسه سوف يؤدي بالضرورة الي إحداث نتيجة مختلفة .. بس اللي يفكر ساعتها من اساسه :( !!

" لا سبيل للهرب من الحقيقة " ساعات بتكون شايفها و عامل مش شايفها و تصر علي انها مش هي الحقيقة او انها مش موجودة قدام الناس مع يقينك انها هي الحقيقة - لن يفيد الناس ما هي حقيقة امر ليس من شأنهم معرفته و لن يضيرني ان اتجاهل الحقيقة لبعض الوقت بشرط الا اصبح زي جحا اللي كذب الكذبة و صدقها !!

" نحن نخاف مما لا يستحق " من هو ذا الذي يقدر و يقرر؟؟ فما لا يستحق اليوم قد يستحق بعد حين !! و آآآآآآه من الندم بعد فوات الاوان :(

" قد ننظر الي الماضي بحنين" ومنا من قد ينظر اليه بمرارة لتجربة مريرة عاشها او لذكري أليمة او حتي لفقد شيء او عزيز .. مش دايما الماضي وردي وله حنين بس المشكلة في الامل في الحنين ذاته .. نحاول ندور علي اجابة للسؤال : ما هو الشيء الذي تحن اليه وتفتقده و يمنعك من المضي قدما في طريقك اليوم وغدا ؟؟!!

" نحن نحتاج حرية الاختيار" الحرية تحتاج التحرر .. التحرر من السيطرة .. اي سيطرة .. واسوء انواع السيطرة سيطرة الغير ..قد تكون سيطرة فكرة حزينة علي يومك .. سيطرة ذكري ما مرت بك .. سيطرة شخص علي تفكيرك او افكارك او علي انفاسك .. كلها سيطرة و كلها بتعيشك في سجن و احيانا يصبح السجن قبر بلا شاهد ..

في النهاية سأل الكاتب الاستاذ احمد كام سؤال في الجون :

" هل تعرف ما الذي تريده من هذه الحياة ؟ "
- اريد الخروج منها بسلام .. كتير بفكر في المثل ( يا نحلة لا تقرصيني ولا عايز منك عسل ) يمكن اكون مش صادقة في اني مش عايزة منها عسل الفترة الاخيرة دي .. زمان انا صادقة مليون في المية بس دلوقتي تراجعت علشان عندي حاجة مهمة عايزاها من الدنيا دي دلوقتي .. وبرغم كل حاجة عندي يقين ان عند ربنا الحياة افضل اكيد .. علي الاقل معروف لونها يا ابيض يا اسود .. يا من اهل الجنة برحمة ربنا و عفوه ان شاء الرحمن الرحيم .. يا من اهل النار واعوذ بالله منها ومنهم .. انما الدنيا اللي احنا فيها دي معتقدش انها تتعاز الا برحمة من الله لنا ان اراد ان يجمعنا من من يمدنا بالامل في حياة افضل ( في الاخر كلها من اولها لاخرها برحمة ربنا والحمد لله علي كل قضائه )

"هل تعرف كيف تحصل عليه؟"
- لا املك الا الدعاء وان كان عليا الاستمرار في البحث عن مخرج وكلي يقين ان في مخرج اكيد موجود بس يمكن انا اللي اصابني العمي عنه .. وقد يكون العمي و الغفلة دي وقتية لفترة و قد تكون دائمة والله تعالي أعلي وأعلم .. ورحمته وسعت كل شيء

" هل تملك القدرة علي ان تفعل هذا؟"
- املك القدرة علي الدعاء ما شاء الله لي ان ادعي ، ما دامت ارادة الله ان يكون ما يصبرني في هذه الدنيا هو الدعاء فهو نعمة الله والحمد لله رب العالمين .. قد لا يملكلها غيري وفي هذه احسب من الاغنياء :) الحمد لله

" لا تسمح لاي شخص او ظرف ان يحرمك من تحقيق اهدافك في الحياة "
لا استطيع كسر كل القيود ولا حتي نصفها ولا حتي ربعها بس برغم دا كله .. الله المستعان ولله الامر من قبل و من بعد

دي حقائق اعترف بها الأن ..

هناك 10 تعليقات:

Ahmed Kamal يقول...

عزيزتي أليس ، مرة أخرى أضع عنوان موضوعك عندي ، لأن به ما يفوق التعليق ، إنها محاورة شخصية ، تكشف أكثر مما تداري ، و تحاسب و تتأمل . و أحب أعلق تعليقات سريعة جدا على محاورتك الجميلة:
- طبعا بناء الحياة مش سهل ، لأن هو ده الهدف من الحياة
- نحن ما نفعله مقصود بها حكم الإنسان على نفسه ، مش حكم الآخرين ، بل الإنسان على نفسه بصيرة
- و أحييك على اعترافاتك :)

mohamed ghalia يقول...

يحضلرنى كلمة لعمر بن الخطاب يقول ودت لو أخرج من الدنيا لا لى ولا على.
تحياتى وإعجابى

أميرة يقول...

كام مرة حاولت اكتبلك رد وكل مرة بمسحه

الاول لازم اشكرك لانك اعتبرت اللي كتبته يستحق القراءة من اساسه .. انا لا اراديا سحبت ورقة و قلم و قعدت انقل جمل من عندك و عليها تعليق ولما جيت اكتب هنا اختلفت بعض الحاجات عن ما كتبتها اول مرة بس مش كتير و يمكن دلوقتي لو اعدت كتابتهم هلاقي اختلافات جديدة ..

تصدق في حكاية بناء الحياة دي لما قريت ردك اكتر من مرة لقيت ان اللي سهل هدم الحياة انما تبنيها دي صعبة .. يمكن اكون مجربتش ابني بس بحاول اشوف اللي حوليا القريبين بيحاولوا يبنوا اولادهم ازاي..

بس بردة عندي امل ان ربنا هيديني الحياة اللي اقدر ابنيها ايدي في ايد اللي منور حياتي ان شاء الله و الله المستعان :)

حضرتك اللي تستاهل التحية علشان بدون قصد خلتني اخرج شوية من حاجات بتدور في دماغي و يمكن بكده اكون فضيت حبة في دماغي علشان اعرف افكر في المشاكل اللي عندي .. يمكن اعرف اقف قدامها قريب

جزاك الله خيرا يا استاذ احمد


_______________


لما عمر بن الخطاب رضي الله عنه بيقول كده .. اعمل ايه انا اللي ولا اسوي شيء جنبه .. بس ادينا مجتمعين علي اكتر من حاجة و اخرهم ان اخرج من الدنيا لا لي ولا علي

جزاك الله خيرا mohamed ghalia

أميرة يقول...

هو اللي انا كتبته دا يستدعي البكاء ولا انا اللي بتلكك .. قرأت الرسالة اللي كتبتها امبارح كام مرة و كل مرة دموعي بتغلبني مع اني مقلتش حاجة تبكي ..

شكلي انا اللي بتلكك باين :(

_________

استاذ احمد بالاضافة لما سبق انت عملت فيا معروف علشان بموضوعك دا نسيتني اللي جرالي في المرور يومها و كده احسن بدل ما كنت كتبت عن اليوم دا واللي شفته ويمكن كنت اخد ذنب مش ناقصاه:(

بردة اشكرك :)

على عبدالله يقول...

السلام عليكم ورحمة الله وبركاته

دى اول مرة ادخل فيها مدونتك
وبشكر الاستاذ احمد كمال انه عرفنى عليها
الموضوع جميل جدا ومحتاج برضو شوية قراءة تمام زى موضوع الاستاذ احمد
ده بخلاف اعجابى الكبير بالمدونة كلها
ربنا يبارك فيكى
ويزيدك شوق الى لقاءه جل وعلى فى غير ضراء مضرة ولافتنة مضلة


خالص تحياتى

كـــيــــــــارا يقول...

موضوع محتاج قراءه متانيه

وبجد زي ماقلت في الاول محتاج قراءه عده مرات

-------

فأنت في النهاية الذي تبني الحياة التي ستحياها
--------
ده حقيقي بس عشان نبنيها لازم نكون عندنا مهرات البناء مش التواكل علي الغير

---------

موضوع مهم واكيد هقراه عده مرات

تحياتي

كلام حسام يقول...

نحن ما نفعله
عميقة بجد

عاشــــــ النقاب ـقــــة"نونو" يقول...

لسة ما قريتش بس لي عودة
ودلوقتي عتاب
مش تطمنيني بقى
ايه الاخبار يا حبيبتي
باذن الله خير
منتظراكي

أميرة يقول...

المفروض اشكركم جميعا علي الكلام الطيب و علي اجتماعنا علي خير حتي ولو بالكتابة .. فرقتوا معايا كتير حقيقي و فرق معايا تواجدي في وسط ناس محترمين واحسبهم علي خير امثالكم

جزاكم الله خيرا

معلش انا بدوشكم بكلامي بس اهو بنفضي شوية من الكوباية المليانة علشان تتملي من تاني

ربنا يعينكم عليا :)
____________

علي عبد الله
كيارا
حسام
نونو

بارك الله فيكم

_____________

لا تنسونا من دعائكم
__________

نونو انا معنديش اخبار كويسة اقولها الحمد لله والله علي كل قضائه .. برِضّي القلب بأمر الله علشان يرضي ويرتاح ولله الامر من قبل ومن بعد

الحمد لله عل كل حال

Unknown يقول...

آخر موضوع في مدونتي خصيتك فيه بالذكر ياريت تشوفيه وتقوليلي ردك
كل ودي وربنا معاكي

اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع