الناس ليه الرحمة منزوعه من قلوبهم و ليه لو شفت واحد بيموت في الشارع اكبر حاجة ممكن تعملها انك تتصعبن عليه و تسيبه و تمشي
العيد الصغير اللي فات كنت مع ابويا وامي راحين لخالتي واحنا قدام مسرح البالون ما بين النفق و مطلع كوبري 15 مايو عربيات ماشية بسرعه و فجاة اللي قدامي وقف فجاة و كنت هخبط فيه بس الله ستر .. الاول مفهمتش في ايه بس سمعت فرملة جامدة
لقيت امي بتقول لا حول ولا قوة الا بالله الظاهر في حد اتخبط
للحظة سكت انا و متحركتش لقيت ابويا بيزعقلي ويقولي امشي من هنا .. طب في ايه افهم طيب حصل ايه لمين لسه بعدي العربية اللي قدامي
لقيت بنت مرمية علي الناحية اليمين قرب الكوبري و الناس وقفوا حوليها و في نص الشارع اسورة بلاستيك مكسورة و قرب النفق الناحية التانية بنت تانية مرمية في الشارع بردة قدام عربية تاكسي
انا لله وانا اليه راجعون معرفش حصل ايه اكتر من كده لان دا كان اخر حاجة شفتها علشان ابويا فضل يزعقلي علشان امشي ( بحجة مش هناقشها علشان مبقتش تفرق خلاص )
مفيش دقيقتين وصلت عند خالتي و طلعت في البلكونة قعدت ابص علي الشارع الكبير من الدور العالي
عربيات كتيرة اوي رايحة جاية و ناس كتيرة بتعدي و الجنينة اللي في نص الشارع مليانة اطفال و شباب بيفرحوا بالعيد
لو كنت انا مكان البنت حد كان هيسال فيا؟؟؟
ياتري جرالها ايه؟؟؟؟؟؟؟؟؟؟
قبل ما اشوفها مرمية قدام العربية شفت الاسورة المكسورة و حسيت قلبي وجعني و اتصدمت و اتلهيت للحظات مش عارفة افكر ف ايه ولا ليه
هو مش اخويا دا انا اتربيت معاه و فرحت و حزنت معاه .. اكلت معاه من نفس الطبق و شربت وراه من نفس الكوباية .. هيكونوا احسن من مين يعني لما البشرية نفسها ابتدت بقابيل و قتله لاخوه غيرة و حسد .. لو كان في فلوس وقتها كان طمع فيها زي ما بيطمع فيها الاخوات دلوقتي
ليه الجحود دا و ليه قسوة القلب متمكنة من الانسان .. لما قابيل قال لاخوه " لأقتلنك " طب ليه ؟؟؟؟؟
لو الانسان الاصل فيه الشر كده و حب الذات وبس .. مين هيرحم مين غير الله .. يعني اكيد ربنا الرحمن الرحيم خلقنا و احنا جوانا ولو ذرة واحدة من مكونات بني البشر ممكن نعتبرها فيها جينات رحمة .. بس تاهت راحت فين .. وانا اللي كنت عبيطة و عماله اقول هو الايام دي بس اللي الناس مبقتش رحيمة بجد وساعات حتي الاب مش بيرحم ابنه والاخ مش بيرحم اخوه .. بس طلعت عبيطة دي من اول ما الدنيا اتخلقت .. ابتدت بالدم قاله هقتلك و قتله .. و للحظة اللي احنا فيها دي في كام قابيل بيعمل ايه في كام هابيل و علشان ايه علشان الدنيا اللي متستهلش اي حاجة اصلا ..
ملوش جيوب الكفن
لا حول ولا قوة الا بالله .. قلوب جاحدة و نفوس مريضة لا طمر فيها خير ولا احسان
الله يلطف
عارفة ان الكلام اكيد ملوش علاقة ببعضه
قبل المغرب امبارح كان في سؤال هيجنني وواجعني اوي .. ليييييييييييه ؟؟
بليل لما شفت عمرو خالد في قصص القرآن .. لقيت ربنا بعتلي اللي بيقولي ليه بيعملوا كده .. علشان هو دا حال الدنيا من يومها
اعتبروها تخاريف صائم بينزف من جحود اخوه الانسان
هناك 7 تعليقات:
دي مش تخاريف ده كلام حقيقي فعلا الدنيا اللوقتي معدش الواحد بيامن فيها حتى أخوه مش عارف الناس دي ايه ضمايرها ماتت والا الحكاية في ايه..يمكن كله باه بيجري ورا الماديات وعمرك ما تلاقي حد ملهوف ع الفوس وفيه في قلبه رحمة.. لا يجتمعان طالب مال وقلب رحيم..
خير ربنا يعافينا يارب..كل سنة وانت طيبة وربنا يارب يجبر بخاطرك ويتملك شفاء سيف على خير ويهنيكم يارب
رمضان كريم
كل ودي
يارب ما يكونش كلامي بايخ
بس لو اتكلمتي عن الموت من رحمة ربنا انه مش بيحس بيه غير القريبين ولا كانت الدنيا هتوقف
ربنا يريح قلبك يارب وتنولي اللي اللي انت عايزاه
ربنا معاكي
كنت اتمني اني اقدر اعملك حاجة
لكن لا املك سوي الدعاء
مش بتكلم علي يأمن ولا يدي ولا ياخد
انا مش عارفة اصدق مقدرش احب اخويا ازاي .. دا احنا اتشاركنا اللقمة
مش بقولك اخويا المسلم ولا اخويا الانسان
لا بقول اخويا ابن امي و ابويا اللي الدم اللي بيجري جوايا هو نفس الدم بتاعه اللي بناكل من نفس رغيف العيش و بنشرب من نفس المنبع
للدرجة دي الطمع بيغير النفس
انا علشان مليش غير اخ واحد مش عارفة
هو لو كنا اكتر من واحد يمنك هيبقي في اللي كويس والوحش
بس اللي شايفاه مع الاخوات الكتير كلهم يبقوا وحشين يبقي في حاجة غلط ؟؟؟
مين اللي يقولي السبب ايه
مين رضعهم الجحود دا ؟؟ اعوذ بالله من دي دنيا .. الله يكفينا شرها و شر ما خفي منها
والله يا شملولي لا مرض ولا موت بقوا بيأثروا في نفوس البشر
ايه القسوة اللي ملت القلوب دي
مين علمهم يبقوا كده
لا حول ولا قوة الا بالله
كملوا جميلكم و ادعوا لسيف الايام دي كمان
ان شاء الله هيعمل العملية الكبيرة الاسبوع اللي جاي
الله المستعان وهو الولي والوكيل
لا يا أليس الناس فعلا دلوقتي إتغيرت
من الزحام
الزحمه عملت زي ما تقولي زياده في العصبيه عند الناس
فمفيش حد متحمل التاني
لكن زمان كانت الدنيا رايقه والناس فيها خير وخوف على بعض
أكبر مشاكلنا الزحام يا أليس
والتكدس في الوادي والدلتا
بيصيب الناس بأمراض عديده
الضغط والسكر والقولون
مش دي أمراض العصر زي ما بيقولو
والسبب الخنقه
الناس بقت مخنوقه في كل حاجه
ربنا يلطف
"أيحب احدكم ان ياكل لحم اخيه ميتة فكرهتموم" صدق الله العظيم
اهم مش بيكفيهم ياكلوا لحم اخواتهم لا كمان مش عايزين وجودهم في الدنيا اساسا
انا شفت آباء كارهين اولادهم و شفت أبناء كارهين أهلهم و كل منهم ليه اسبابه
بس دائما و ابدا الاخوات بيتخانقوا
من بعد الاب والام بتتفتح بوابات جحيم بين الابناء
مش ممكن تكون هي دي الدنياولا دي الارض اللي ربنا طلب منا نعمرها
ولا عزاء لحاملي ذرات الرحمة
يارب ترجع لنا بالسلامة من تاني يا اليس
إرسال تعليق