الاثنين، 22 سبتمبر 2008

ما احلي الجماعة

سبحان من ادخلني مدونة الاستاذ\ احمد كمال "رحايا العمر" اخر ما كتب بعنوان تراويح

بجد رسم صورة رائعة وجميلة اووووووووووي

بارك الله فيه وفتح عليه وعلي المسلمين اجمعين

عيشتني احساس جميل اوي .. صحيح صلاة الجماعة من احلي ما يجتمع عليه المسلمين

يحزني انه احساس بعيشه مرة واحدة.. بس بالنسبة لي غصب عني

انما غيري و بالتحديد الرجال دا فرض عليهم يعيشوا الاحساس دا 5 مرات يوميا

مش متخيلة حد في ايده نعمة زي دي ويسيبها

صلاة الجماعة دي بجد نعمة سبحان من بيجمع عباده 5 مرات في اليوم

الاحساس ان كتفك في كتف حد تاني واقف في صف واحد معاك لا تفرق انت مين ولا هو مين ولا عمرك و لا اي حاجة في الدنيا

يكفي رب العالمين انك تكون مسبغ الوضوء متجه للقبلة خاشع القلب طالب عفو الله وان يتقبل منك

ينادي منادي ان حي علي الصلاة حي علي الفلاح فيهب العبد ليلبي نداء الرحمن

ما احلي الصلاة خلف امام تحسبه علي خير .. ويا سلام باه لما تكون صلاة جهرية خلف امام انعم الله عليه بحسن التلاوة

والله نعمة مش حاسين بيها ..

مش عارفة بس الاحساس في المكان نفسه مختلف .. يعني حتي لو بنصلي جماعة في مكان تاني مش مسجد .. الاحساس داخل المسجد مختلف حقيقي وصدق الله العظيم في قوله " في بيوت أذن الله أن ترفع ويذكر فيها اسمه يسبح له فيها بالغدو والآصال "


فعلا نعمة ربنا يديمها علينا

كمان احساس بالامان داخل المسجد .. تنسي همومك و تعبك و تحس بالامان و تبقي في وسط 100 واحد و حاسس انك لوحدك بس وحدة مختلفة .. تبقي واقف معاهم في الصف و حاسس انك الوحيد اللي واقف بين يدي الله .. مش بتفكر اللي جنبك بيقول ايه لربنا .. كل همك تقوله اللي جواك .. تدعوه بما يجول في خاطرك .. مش عارفة اوصفه .. ممكن تحس وانت في وسط كل الناس دي انك واقف لوحدك قدام الكعبة .. ممكن في الدعاء كل الناس بتقول آمين متسمعش غير صوتك انت .. تحس انك لوحدك اللي بتدعي الله مع انك عارف ان عدد الذاكرين لله الداعين له في اللحظة دي كتير اوي لا يعلم عددهم الا الله سبحانه وتعالي

احساس مش هينفع يتوصف او مش هينفع مني لاني مش عارفة اقول اللي حساه

ربنا يديمها نعمة و يتقبل يارب

ساعات بيكون في حد جنبك بيدعو الله وتحسه ملهوف اوي علي استجابة الدعاء من حرارة دعائه ولا تملك ساعتها غير انك تغير الدعاء بدل ما تدعي باللي كنت ناوي عليه تلاقي نفسك بدون وعي بتدعي ربنا انه يستجيب لدعاء اللي بيدعوه جنبك .. حصلتلي كتير بلاقي حاجة وقفتني و الجمت لساني عن اي دعاء عايزة ادعيه و الاقي نفسي بقول يارب تقبل منها دعائها و استجب لتوسلاتها .. ساعات اقول يمكن هي احوج مني بالدعاء و يمكن لو دعيت لها باجابة الدعوة ربنا يكرمني باجابة دعائي .. مرة حتي قولت مش يمكن دي تعتبر تفريج كرب عن مسلم .. في حد محتاج الدعاء ولو دعيت ان ربنا يستجيب لدعاءه مش يمكن اكون بكده فرجت عنه حاجة هو عايزها من ربنا .. الله اعلم ان كنت صح ف دا ولا لا بس انا وقتها اخدتها كده

الموضوع طيب اوي و جميل بجد .. ياريتني كنت بقدر اعبر بالكلام عن الاحساس اللي حساه .. بس الحمد لله رب العالمين .. المهم ربنا يتقبل
___________________
بقالي ساعتين مش عارفة اكتب كلمتين علي بعض :(
كل شوية حد يدخلي يشتكيلي من حاجة :(
الناس هنا كلهم النهاردة كل واحد حد عامل فيه حاجة تضايقه .. الله يهدي

ساعات تبقي جواك هموم كتيرة ومش عايز تسمع حد ولا تتكلم مع حد بس لو فكرت للحظة هتلاقي ان يمكن ربنا بعتلك الحد دا علشان يقولك انت مش لوحدك الي فيك هموم .. زيك زي باقي البشر .. بيشوفوا الحلو والمر ..

الله يعافينا والمسلمين من كل سوء و يتقبل منا دعائنا وصالح اعمالنا
____________________

اللهم اصلح لنا فساد قلوبنا
اللهم انا طرقنا بابك فلا تردنا خائبين
لكل منا سؤال و مسألة

اللهم يا سميع يا مجيب اجب دعوانا
اللهم انك عفو كريم تحب العفو فاعفو عنا والمسلمين

هناك 8 تعليقات:

Ahmed Kamal يقول...

جزاك الله خيرا على موضوعك ، في الحقيقة كنت ناوي أضع تعليقك الجميل في الموضوع عندي في قائمة أفضل تعليقات رحايا العمر ، فإذا بك كتبت هذا الموضوع الجميل ، و لهذا أستأذنك في ان أضع رابط لموضوعك كذلك ليقرأه كل من يقرأ تراويح .

السلام عليكم

أميرة يقول...

جزانا واياكم والمسلمين ان شاء الله

اسعدتني زيارتك جدا علشان بصراحة مهما قولتلك موضوعك اثر فيا اد ايه وجايلي في ظروف الله وحده يعلم بيها ومش هقدر اوفيك شكر

يشرفني الكلام الطيب اللي حضرتك قولته

تقبل الله منا ومنكم ومن المسلمين جميعا الصلاة والصيام والقيام و صالح الاعمال

RASHA يقول...

اللهم ماتقبل من جميعا قريت بوستك اللى فات

ويارب يشفى سيف ويعافيه وتسعدى به ومعه

انشالله

أميرة يقول...

اللهم امين

ربنا يتقبل منا جميعا فهو القريب السميع المجيب سبحانه وتعالي القادر العفو الكريم

صبرني يارب يقول...

ازيك يااليس وهاروح اشوف موضوع احمد كمال عشان كلامك عنه جميل

وما تخافيش على سيف انا واثقه ان ربنا هايكرمه وهايبقى كويس

بصراحه مش عارفه ليه لكن حاسه كده

لان التسخيف بتاع الدكاتره حقيقى حاسه ان ربنا هايكسفهم اوي
لان كلامهم من وجهة نظري فى تجرأ على قدرة الله اعاذنا الله

طز فيهم وفى علمهم قدرة ربنا مافيش حاجه ادها ولا زيها وربنا يرد سالم باذن الله

صبرني يارب يقول...
أزال المؤلف هذا التعليق.
أميرة يقول...

ان شاء الله ربنا هيخزيهم باذن الله

انما متخافيش علي سيف دي مقدرش عليها دا انا روحي فيه و كل لحظة بتمر عليا بتتعلق روحي بروحه وربي يعلم باللي جوايا ليه

ان شاء الله العلي القدير ربنا هيشفيه و يستجيب دعائنا فهو حسبنا ونعم الوكيل

ان شاء الله بكرة احسن و لعله خير

محدش عارف اللي بيحصلنا بيحصل ليه بس اكيد فيه خير لي وليه ولكل الناس علشان اللي خلقنا بيحبنا و بيصطفي من عباده من يصطفيه ليطهره ويبتليه والله اعلي واعلم

ادعيله ان الله سميع مجيب

وعلشان البقين الكويسين دول هعديهالك " انا تقوليلي عارفاكي لما بتقفلي دماغك :( ما انتي عارفة اني مش مستحملة عليه شكة دبوس ..ربنا يهونها يارب علينا وعلي المسلمين اجمعين "

اللهم اعز به الاسلام واجعل الاسلام عزيزا في قلوبنا .. قادر علي ذلك فانت ولينا ونعم الوكيل

أميرة يقول...

حلوة طز في الدكاترة دي

بس ربنا يجعلهم سبب في شفائه باذنه

أل ايه "في حد يعمل تمرينات رياضية مكررة كده مش تغير شوية" .. دا كلام الممرضة لما شافته بيصلي القيام:)

الجهل وحش

الحمد لله علي نعمة الاسلام والحمد لله علي ابتلائه والحمد لله علي كل حال

اللهم اني استودعك قلبي فلا تجعل فيه أحدا غيرك

وأستودعك لا إله إلا الله فلقني إياها عند الموت

وأستودعك نفسي فلا تجعلني أخطو خطوة إلا في مرضاتك

وأستودعك كل شيء رزقتني إياه فاحفظه لي من شر خلقك أجمعين

يامن لاتضيع عنده الودائع