سبحان الله
ناس بتدفع ملايين علشان تسكن في بيت بيبص عليك
واستحوذت علي ضفافك المراكب العائمة اللي بردة بيتدفع فيها فلوس كتير
و بقينا بنشوف فيك اليخوت و المراكب الشراعية دا غير المراكب المعتادة و الله يرحمه الاتوبيس النهري كان ومبقاش !!
بس لسه بنلاقيلنا مكان عندك ..
لسه بنعرف نقف علي كوبري فوقك نشم نسمة هوا زينا زي اللي دافعين ملايين
لسه بنعرف نتمشي جنبك ولو اننا مبقيناش شايفينك
والاجمل
لسه فيك حياة و مستحمل بالرغم من كل اللي بتقاسيه
دي بطة سودة صغيرة
بتسبح في النيل في "البحر الصغير"
بالرغم من الاحساس ان دي ترعة مش نيل
و امتلائها بكمية كبيرة من القاذورات ..
اول مرة اشوف كائن حي في النيل
كائن حي صاحي بيتحرك مش جثة نافقة مرمية في شطه
لقت البطة دي مكان ليها هناك ...
اصل الجزء دا مش بتمشي فيه مراكب و لا بيسكن علي شطه بشوات.. اللي بيبصوا عليه عمارات عادية و مبني كبير مليان مرضي ابتلاهم الله باعظم الامراض سوءا والمبني نفسه اغلبه آيل للانهيار.. ربنا يعافيهم
يا تري كمان كام سنة هيفضل فيك مية بتجري؟
ولا هنصحي الصبح في يوم نلاقيك بقيت ذكري بتقرأ في الكتب انه كان يا ما كان كان فيه زمان نعمة بتجري في ارضنا ؟؟
يا عالم هيجرالك ايه !!
اصلنا نيّلنا نيلنا بعمايلنا
هناك 8 تعليقات:
بوست بيعبر عن أحساس مصرى صادق .. وأكثر جمله معبره هيه آخر جملة فى البوست .... ربنا يوفقك ويكرمك تحياتى وتقبلى أعتذارى عن تقصيرى فى التعليق لكن والله متابع من بعيد.
جميلة البطة دي ... سودا ! .. لكن جميلة
المشكلة ان النيل بقى حكاية منيلة بنيلة
و الظاهر من كتر ما قلنا " مصر هبة النيل " ... النيل جاله إحباط ..
بلا نيلة
السلام عليكم ورحمة الله وبركاته
ازيك:)
انت بتتكلمى فى موضوع من كتر ماهو مرعب
خايفة افكر فيه
الارز مثلا بيغلى وهيغلى تانى
علشان الحكومة الغبية فجأة حست ان المياه ممكن مش تكفى
فى ايام الفاطميين كان فى انخفاض للنيل استمر 7 سنين
اكيد سمعت عنه
اسمه الشدة المستنصرية
المصريين وصلوا انهم أكلوا لحوم البشر
بس فكرة انك تكونى فى نعمة كبيرة جدا على الوصف
وبقالها معاك كتير لدرجة الاستهانة بقيمتها
وبعدين تصحى فجأة انها ممكن تبقى ذكرى
مرعبة فعلا
ربنا يسترها معانا ومانشوفش المصير ده
فاكرة أغنية النيل نجاشى
كنت بستغرب لها قوى وانا صغيرة
ولما اشتغلت بقيت لما البنات يتلخبطوا بين المنبع الدائم والموسمى وكل واحد بيدينا مياه اد ايه
أقولهم النيل نجاشى
يعنى اثيوبيا هى اكبر نسبة مياه
ولو مصر هبة النيل
ممكن نخصص ونقول مصر هبة النيل الازرق
لكن احنا حقيقى اتعاملنا مع النيل ومع دول المنبع بكبر وبغباء مالوش حد
البهوات عندنا مشغولين بحاجات تانية اكتر من المياه
مش حاسين الدنيا حواليهم فيها ايه
ولا مين بينزل عليه مطر
ولا مين هيحتاج مياه
ربنا يعديها على خير
عم مدحت
انا اتولدت واتربيت جواه علشان اخر من بيتنا يمين ولا شمال لازم اشوفه .. بيصعب عليا حاله
ان شاء الله تكون والاسرة بخير
ولد تحت الصفر
هي سودة وجميلة بس كانت لوحدها في الجزء دا من النيل.. ودا اللي خلاني استغربها اوي .. اكيد ليها عيلة او حد بيراعيها ولو ملهاش لها رب كريم بيرزق النملة في جحرها واكيد هيرزقها .. لها ولنا الله
النيل جاله اسوء من الاحباط .. انا لو منه من اللي بشوفه من الناس هطفش لحته تانية .. دا كفاية التلوث اللي بقي عليه
شد حليلك وخلص امتحانات علشان اشوف اخرة انتوني دا ايه :)
وعليكم السلام ورحمة الله وبركاته
ازيك يا استاذة :)
الموضوع مقدرش مبصلوش .. زي ما كنت لسه كاتبه .. انا بشوفه كل يوم بعدي فوقه و بمشي جنبه و برجع اعدي فوقه .. كل يوم صبح ومساء .. بشوفه الصبح صاحي لسه بيتمطع :) نسمة الهوا بتداعبه و الدنيا لسه شمسها مطلعتش وبشوفه بعد العصر او بعد العشاء و بقي مرهق زي الموظف اللي بقي زي الثور اللي مربوط في الساقية .. مرهق وتعبان و نفسه ومني عنيه ينام ومش قادر .. نفسه يغمض ويرتاح علشان يعرف يصحي الصبح فايق .. بس الناس مش سايباه في حاله
فكرة من كااااام سنة لما بوجي وطمطم كان عنوانهم في السنة دي " لا تلوث ماء النيل" و كانت الحلقات عن اهمية النيل العظيم و اهمالنا ليه لحد ما شاخ و عجز
وانا ببص علي البطة دي كانت بترن في دماغي جملة بتتقال في بوجي وطمطم .. التلميذ الصغير بيعلموه "انا لا الوث ماء النيل "
اتفرجي النهر اللي بيخدم البلاد والاراضي دي كلها مهان اخر مهانة و غاية اماني الكبارات يسكنوا في مكان فيه فيو حلو علشان يبصوا عليه لما يفتحوا عنيهم .. يشربوا مياة معدنية .. علشان مية النيل اللي بتنزل في الحنفيات كلها تلوث و بلاوي سودة سودتها .. مش التاريخ والعلم كتبوا ان الماء لا لون ولا طعم ولا رائحة .. احنا غير
احنا مختلفين
احنا مياهنا ملونة ولها طعم من منطقة لمنطقة ومن محافظة للتانية
دا ان وجدت يعني
في اللي مش لاقيين نقطة منها ملوثة ولا فيها ايه حتي .. مش لاقيين .. رضوا بالقرف والهم و بردة مش لاقينها
لما كانت المية الحلوة والنيل هما مصر اصلا .. ولو راحوا هيفضلنا ايه من مصر؟؟؟
مباني عالية اصحابها ابوا الا انهم يسكنوا في ابراج عاجية حوائطها عازلة للصوت !!
مش هنسي الحكاية اتحكت قدامي من سنتين عن اراضي اتزرعت برسيم في توشكا علشان يتعمل مكعبات تتصدر تروح للامارات علشان الخيل!!!!
اه المشروع وقف بعد ما كان بقاله فترة طويلة ومعرفش دلوقتي لسه موقوف ولا رجع .. دي اخرة لما تدي ارضك لغيرك..
مش عارفة ليه مفكروش يقسموا النيل دا لاسهم وسندات؟؟ واللي يشتري اكتر يملك يشرب مية نضيفة و يملك يعمل لروحه سد يحافظ بيه علي ممتلكاته
مهو احنا اتعلمنا واتربينا منحافظش الا علي الحاجة اللي دافعين فيها دم قلبنا
ابو بلاش ابو من غير صاحب دا دايما ملوش قيمة .. يروح مطرح ميروح ولا يجراله اللي يجراله
الارز المصري كاااان زمان له قيمة وله سوق .. كان .. ايام ما كان في ميه تروي بيها الاراضي دي وكانت التربة كويسة .. دلوقتي اراضي كتير في الدلتا باظت ولا لاقيين نقطة مية .. وبردة مصريين يزرعوه هو و يستوردوا القمح من برة .. ما تزرع محاصيل مناسبة لطاقتك بدل ما بترهق الاراضي و بتخربها .. تقولي ايه لمين .. ودن من طين وودن من عجين و المتضرر يلجأ لله و يقول اللهم اقصم الظالمين بالظالمين و اخرجنا من بينهم بسلام
هو غالبا غالبا هما مش مهتمين علي اعتبار انهم اللي باقيلهم من عمرهم ان شاء الله مش هيفضلوا لحد ما يجري للنيل حاجة .. و لو علي الانجال .. هما كده كده تأشيراتهم في جيبهم .. كله تمام ان شاء الله
غلبان والله النيل دا في وسطينا
بس بردة هفضل متمسكة بجملة بوجي وطمطم .. " انا لا الوث ماء النيل " اصل محدش هينضف ورانا .. احنا اللي هنشربه باللي فيه دا لو قعدلنا و مهجش لحتة تانية :(
والله يا بنتى وحشتنى (عمك) دى من زمان ماسمعتهاش منك انا بخير وكلنا الحمد لله بخير هيرجعوا الصعيد ( بعد كمان ما صيفوا فى الساحل الشمالى شوفتى الامله اللى همه فيها)النهارده وانا اسبوع فى شغلى واسبوع بتابع شغل فى السويس .. على فكره الف حمد وشكر لك يارب عمك صغر حوالى 20سنه النشاط والحركة ومشاكل الشغل وحشتنى دعواتك يا طيبه ومن عندك ببعث تحية لحفيدة عرابى كاتبه ممتازه ومتابعه ممتازه لمدونتك يارب يكرمكم يارب ... نسيت ااقلك أن شاء الله شهرين وأحمد يستكمل علاجه بحمد الله .
زى بعضه خرجت عن موضوع النيل لكن رربنا يسترها لاننا بجد مش ناقصين مشاكل اكتر من كده .
معلش انا جاية اكلمك فى حاجة تانية
انا جاية اقولك مش انا
اه مش انا:)
مش انا الغير معرفة اللى سألت أسئلة فضولية
اصل انا فى البوست اللى فات قلت لك بطريق غير مباشر ماتزعليش منى
وانا كنت اقصد موضوع بدراوى
واحساسى لما مهندس مصرى فتح المناقشة انك
عايزة تتكلمى فى الموضوع بس منعت نفسك
مع انى استنجدت بك
بس ماحبيتش اضغط عليك
ده كان قصدى من الاعتذار
بس النهارده وانا بتسحب فى مدونتك:)
فتحت تعليقات البوست اياه
وانا مكنتش قرأتها قبل كده فخفت تفتكرينى انا
لذا لزم التنويه سعادتك:)
لو عايزة تمسحى التعليق ده بعد ما تقرأيه مفيش اى مانع
إرسال تعليق