زعلانة منك عليكي
زعلانة من اوي وانتي كنتي حبيبتي
زعلانة من كل بدلة بيضا جواها قلب اسود
زعلانة من كل ايد بتتمد تنهش اللي حوليها
بيتهيألي مهمة الشيطان فيكي خلصت خلاص
مبقاش له دور
شكله خلاص هيبقي عاطل قريب
مش زعلانة من الشيطان لانه مستأذن ربنا في وسواسه
زعلانة من اللي اتوسوسله من شيطان نفسه و وغلب شره شر الشيطان
هيجي عندك ليه؟؟
مبقاش فيه حد يلزمه مساعدته خلاص
اللي بيحمي و يدافع طغي لاخر مدي
اللي بيربي و يعلم طغي لاخر مدي
زعلانة منك اوي والله
زعلانة علي الللي بايت مش لاقي لقمة ولا غطا
زعلانة من اللي داس علي رقبة الغلابة و بقينا كلنا غلابة
زعلانة علي نفسي واهلي والناس كلهم
زعلانة من كمية الشر اللي مالية القلوب دي
زعلانة من الجحود والطغيان و الكره اللي عمي الابصار
زعلانة اني بنزل من البيت الصبح وانا مش عارفة ان كنت هرجعله تاني ولا لا
زعلانة علي اللي كل يوم بينزلوا ومبيرجعوش
زعلانة منك بجد و تستاهلي اللي يجرالك
تستاهلي خيرك ميبقاش ليكي
تستاهلي يسيبوكي الي بيحبوكي
تستاهلي يتجمع فيكي كل ظالم مفتري
مش انتي اللي كبرتيهم و فتحتلهم دراعك و حضنك؟
ان انت اكرمت اللئيم تمرد
ويا عالم بكرة كمان هتعملي و يتعمل فيكي ايه
زعلانة منك اوي وانا كنت بحبك اوي اوي
وجعتينا بجد اوي اوي
هناك 4 تعليقات:
بصى ياستى
ده لو انا فهمت صح:)
لو مافهمتش بصى الناحية التانية:)
مش الناس قالت من زمان جواز عتريس من فؤاده باطل
وافقنا عتريس على الجوازة الزور
متوقعة ايه بعد كده
هى مغلوبة على امرها
هى مين غيرى انا وانت والناس كلها؟
احنا السبب فى اللى هى فيه
ماتزعليش منها
احنا خلفتها اللى مايعلم بيها الا ربنا
انا كتير ببقى محبطة
واقول حتى لو النظام اتغير
ده الناس عايزة تتربى من اول وجديد
وتعرف ربنا صح
مش مظاهر كدابة
بس دلوقت برغم كل الغم ده
عندى أمل تبقى دى ارهاصات
حلوة ارهاصات دى:)
فظيعة انا لما اتكلم كلام كبير
المهم ارهاصات ميلاد جديد
حظنا اننا عشنا فترة زى دى
بس هى عسولة قوى والحمد لله اانا لقينا نفسنا رغم الوجع بنحبها قوى
اصل انا من زمان
من ايام بلادى وان جارت على عزيزة
واهلى وان ضنوا على كرام
روقى كده
وادعى ربنا يفرجنا علينا
فاكرة فيلم الارهاب والكباب
لما الامام كان بيدعى
ربنا لا تؤاخذنا بما فعل السفهاء منا
ادعى من قلبك
كلمات موجعة جدا
وعلى المنا وحزننا ووجعنا عليها ومنها
الا اننا لسه بنعشق ترابها ونتمنى نشوفها احسن بلد فى الدنيا
هى ام لكن لم تحسن تربية ابنائها
تحياتى
حفيدة عرابي
والله من كتر ما بقينا بندور علي اي شماعة هزلية نعلق عليها القرف اللي عايشينه بجد حاسة ان الحيطة اللي متعلقة عليها الشماعات دي دابت و اتفتفتت حتت من هول ما تحمل
الله يلطف بينا
احنا ما يعلم بينا الا ربنا صحيح .. بس بردة زعلانة منها علشان بتوري الغريب حلوها و حارمة القريب منه و مغرقاه في مرها وشرها
معاكي مليون % في حكاية ان الناس عايزة تتربي من اول وجديد و تعرف ربنا وتعرف ان الله يمهل ولا يهمل وان ربك لبالمرصاد
كويس كده انك متفائلة.. اثبتي علي كده.. المهم هي كفاية كده و ربنا يهديها ويهدينا والقارئين
رغم الوجع بنحبها بس كتر البكاء يعلم الجفاء .. والقلب يبكي منها وعليها كتير بجد
مش هقول زي الفيلم .. هقول اللهم لا تسلط علينا بذنوبنا من لا يخافك فينا ولا يرحمنا
اللهم اقصم الظالمين بالظالمين و اخرجنا سالمين
تسلمي علي الطبطبة دي .. منجيلكيش في حاجة وحشة ابدا :)
والله يا خالد ان كانت ام او اب ولا حتي جدة ... لا ربت ولا كبرت .. خلفت و رمتهم في الشارع .. و اعتادوا علي قانون الشارع اللي كان اخف حبة من قانون الغاب .. بس من القانون اتطور وبقي اسوء من قانون الغاب .. بقي وحش مسعور بينهش في الكل
لا بينجد ملهوف ولا بينصر مظلوم
بيرفع الظالم و يعز الهلفوت
اللهم لا تسلط علينا بذنوبنا من لا يخافك فينا ولا يرحمنا
ان شاء الله تكون بخير واسرتك بخير .. كل سنة وانتم طيبين و قادر ربنا يجعل الايام الطيبة دي بشرة لخير قادم
إرسال تعليق