الحمد لله ان ربي عفو غفور
الحمد لله ان ربي تواب رحيم
الحمد لله ان ربي غفور شكور
الحمد لله ان جعلني مسلمة دون ان اسأله
فوجب عليا شكره علي نعمة من ملايين النعم المنعمين فيها
اللهم لك الحمد الف حمد وشكر
اني أذنب فاتوب فتقبلني باذن الله
اللهم لك الحمد الف حمد وشكر
ان بابك مفتوح ومفيش عليه حراس
اللهم لك الحمد الف حمد و شكر
احمدك علي معرفة الحق والنور والهدي وطريقهم
وان بعدنا
وان اذنبنا
وان ضللنا الطريق
بردة عارفين انك غافر الذنب قابل التوب شديد العقاب بس رحمتك وسعت كل شيء
تعفو عن المسيئين
تغفر للتائبين
والله نعمة الاحساس ان في فرصة للعفو وفي فرصة للتوبة وفي فرصة للقبول نعمة من ربنا
انعم بيها علي المسلم العاصي ولم يطرده من رحمته ان تاب واناب
وان لم يتب امهله و صبرعليه
سبحان الله العظيم
والله الدين دا نعمة
بس يتفهم صح
ويتطبق صح
لاظلم ولا جور ولا طغيان علي حق حد
لا ضعيف يكسر
ولا قوي يقهر
الحمد لله ان الظلم الي نهاية
الحمد لله ان الله رحيم عفو غفور
رمضان قرب بسرعة اوي
الايام والشهور كلها بتجري
والعمر بيعدي بسرعة جدا
اللهم ارزقنا نعمل عملا صالحا تقبله منا
اللهم ردنا اليك ردا جميلا
اللهم لك الحمد علي كل حال قضيته علينا
الحمد لله رب العالمين
كلها اسبوع كام يوم ويبدأ شهر رجب
ومن بعده شعبان
اللهم بلغنا رمضان
اللهم بلغنا رمضان
اللهم بلغنا رمضان
اللهم هذب اخلاقنا و اكفينا شرور انفسنا الامارة بالسوء
اللهم اني اعوذ بك من الرياء واعوذ بك من العجب
يارب رمضان السنة دي يرجعلنا والاسلام عزيز في قلوبنا
يارب اعز الاسلام والمسلمين
يارب الاسلام عزيز بس احنا اللي مش حاسين ولا بنحافظ عليه فسامحنا وقوينا لعزته
يارب استر المسلمين يارب احفظهم
اللهم لا تحوج مسلم لاي حد الا لك
اللهم ارحم ضعفنا فقوينا طمعا في نصرة الدين
يارب ميباتش مسلم جعان ولا عريان ولا مظلوم
يارب ميباتش مسلم ظالم ولا واكل حق حد
يارب احنا ظلمنا نفسنا والدنيا زينت الشر في عيون كتير منا
يارب ضللنا الطريق فردنا اليك
اللهم لا يبات في ارضك مسلم جائع ولا محروم الا اعطيته مسألته
يارب علمنا منخافش من بعض
يارب علمنا يبقي قلبنا علي بعض
يارب علمنا منبصش علي رزق بعض
يارب علمنا نحب بعض
يارب علمنا نحب الخير لبعض
يارب علمنا نفرح لفرح بعض
يارب علمنا ناخد بايدين بعض للحق
يارب سكة الشيطان سهلة وميسرة بس تقيلة علي القلب مبيقبلهاش
يارب ردنا اليك ردا جميعا
يارب علمنا نحب النعم اللي غرقانين فيها من فضلك
يارب علمنا نقول الحق و نسمع الحق و نعمل الحق
يارب علمنا نقسم اللقمة بينا وبين اللي مش لاقيها
يارب علمنا ندي من مالك اللي محتاجة
يارب علمنا ان المال رزقنا صحيح بس مالك انت مش مالنا
يارب علمنا ميبقاش المال سيدنا
يارب علمنا منتمناش حاجة مش بتاعتنا
يارب علمنا نرضي بنصيبنا
يارب علمنا نبقي اقوياء
يارب علمنا منسيبش حقنا
يارب علمنا نقتل الشر جوانا
يارب علمنا نطبطب علي بعض
يارب علمنا ندي من غير ما نستني ناخد
يارب علمنا نحن علي بعض
يارب علمنا نسأل علي بعض
يارب علمنا نود بعض
يارب علمنا ما ينفعنا وانفعنا بما علمتنا
يارب يسرلنا الخير
يارب ارزقنا الخير
يارب اهدنا للخير
يارب علمنا نستر بعض
يارب علمنا نساعد بعض
يارب علمنا عشان نسينا
يارب فكرنا باللي المفروض نكون عليه
يارب سامحنا عشان نسينا
يارب ملناش عذر يوم ما نقف قدامك
يارب خلينا نلحق نفسنا
فوقنا يا رب قبل ما يفوت الوقت
فوقنا يا رب لاجل نشوف الحق
فوقنا يا رب علشان منسكتش عن الحق
قوينا يا رب علي كل غاصب معتدي اخد حقنا
قوينا يارب علي كل ظالم مفتري نهبنا و خربنا
قوينا يارب لاجل ننصر الحق علي الباطل
قوينا يارب قوينا
ولا حول ولا قوة الا بالله العلي العظيم
اللهم حول حالنا لاحسن حال
يارب حسسنا اننا لسه في امل فينا
يارب متخليناش تهون علينا نفسنا اوي كده
يارب متخليناش يهون علينا اهلنا وارضنا اوي كده
يارب متخليناش يهون علينا نفسنا
يارب احيي الضمير في قلوبنا
يارب احيي الحق جوانا
يارب لا تجعلنا من المستضعفين فالمؤمن القوي خير واحب اليك من المؤمن الضعيف
قوينا و خلينا نحس من تاني
مبقاش في العمر اد اللي راح
ولا بقي في عدل اد اللي كان زمان
اللهم رحمنا برحمة من عندك تغننا بها عن رحمة من سواك
اللهم لا تسلط علينا بذنوبنا من لا يخافك فينا ولا يرحمنا
اللهم لا تسلط علينا بذنوبنا من لا يخافك فينا ولا يرحمنا
اللهم لا تحرمنا من فضلك
اللهم لا تحرمنا من فضلك
اللهم لا تحرمنا من فضلك
هناك 9 تعليقات:
عايزه اقولك علي حاجه بس ياريت متزعليش مني
لو قولتي قولي هقول
لو قولتي لا متقوليش هحتفظ بيها لنفسي
بس من غير متسئلي انا مين
اتفضلي خدي راحتك
انا عرفت موضوع سيف وكنت متابعه من زمان اوي ا
احساسك ايه دلوقتي بالحب
وهل عندك استعداد تحبي ولا فقدتي الثقه في الرجاله
وازي قدرتي تتخلصي من حب انسان اعتقد انه مخادع ده لو كنتي فعلا بتحبه حب حقيقي
هقولك ليه انا بسئل الاسئله ديه
بس بعد اجابتك
وطبعا من حقك ترفضي الاجابه
مستغربة فضولك جداااااا
فكرت اقولك وانتي ايه يعنيكي في حياتي و قراراتي واختياراتي
فكرت امسح التعليقين واريح دماغي
فكرت اقولك خلي الي حكيتلك الحدوتة ترد عليكي
فكرت اقولك ان ربنا خلقنا فينا الخير والشر و ان في ناس بتبدي الشر علي الخير والعكس
فكرت اقولك ان حسن النوايا لا يشفع سوء النتيجة
فكرت اقولك ان مفيش انسان علي وجه الارض لم يخطيء .. بس في اللي اخطأ و اصاب وفي اللي اصاب ثم اخطأ
فكرت اقولك حاجات كتيرة بس لقيت الكلام بصراحة مش هيفيدني في شيء .. خصوصا واني عندي شوية ظنون عن شخصيتك مين
بعد كل التفكيرات دي موصلتش لاي حاجة ممكن تفيدك من ردي بصراحة فلو تسمحي تقولي ايه المطلوب بالظبط علشان انا مبحبش اللون الرمادي
السلام عليكم ورحمة الله وبركاته
ابدا والله
كل الموضوع اني واقعه في نفس الشي
وعايزه اعرف عملتي ايه في نفسك
يمكن مع فرق التوقيت علشان كده سئلتك يعني انتي حصلك كده قبلي بفتره
عايزه اعرف لسه في امل اني القي الانسان اللي احبه تاني بجد
بس
بس واضح انك فهمتي كلامي علي انه فضول او رخامه
لكن ربنا يعلم اني سئلتك علشان لو قدرتي تنسي اعرف عملتي ايه في نفسك يمكن اقدر انسي انا كمان اللي اتعمل فيه
وعموما انا اسفه جدا
خديها من منطق كنتي في اتوبيس ومحفظتك اتسرقت .. هتعملي ايه؟
قيسي رد فعلك
واد ايه هتتأثري لما يكون فيها كل مرتبك
واد ايه هتسألي ربنا انه يفرجها عليكي بحل للمشكلة اللي وقعتي فيها
واد ايه ممكن تقربي او تبعدي عنه
بالرغم من اني عند شبه يقين بشخصك بس هجاوبك اجابة لغير معرف
لو قرأتي اللي كتبته في التدوينة دي هتلاقي الرد
هتعرفي انك دايما هتلاقي صفحة بيضا جديدة تقلبيها وتفتحيها و تكتبي فيها من اول و جديد
المهم هتكتبي ايه وامتي ولمين وازاي
مش هقدر انصحك بصراحة لاني لست اهل للنصيحة و ما اكثر وقعات وقعتها لاني لم احذر
كل اللي هقولك عليه متصدقيش الا اللي تشوفه عينك و يصدقه عقلك و خليكي مع ربنا اكيد ربنا مش هيعملك حاجة وحشة ابدا
عارفة
ان شاء الله هتلاقي و هتحبي وتتحبي
بس المشكلة مش في الحب ذاته ووجوده
المشكلة في دوامه والمحافظة عليه
كام حد اتجوز عن حب و كام ساب عن حب وكام طلق بعد حب
محدش بياخد من الدنيا كل حاجة
لازم تصدقي كده
يمكن لو ملقيتيش الانسان اللي بتتمنيه يكون ربنا معوضك الحب دا في حاجة تانية بس محتاجة انتي تركزي شوية في حياتك وتطلعي ربنا مميزك عن غيرك بايه و ادالك ايه قدام اللي شايفه انك محرومة منه
الحمد لله علي كل حال
ومتخافش انا مش متضايقة
انا ردي اللي فات كان مجرد بقولك اللي فكرت فيه ولو اتضايقت كنت مسحت او مردتش
متشكره جدا علي ردك
فيه كتير كان غايب عن عقلي
وانتي فكرتيني بيه
وخصوصا موضوع المحفظه
كان نفسي أقولك حاجة تفيدك بس زي ما قلتلك منفعش أنا في النصائح اللي من النوع دا
بصي
كل واحد بياخذ نصيبة من الدنيا في شكل ربنا مقسمهوله والمصيبة اننا مهما أخدنا مش بنرضي طول الوقت
ربنا يرضي عنا و يرضينا بقضائه فينا :)
أبقي طمنيني علي حالك
جزاك الله خير الجازء وجعله الله في ميزان حسناتك.
(حملة الجسد الواحد)
أرجوا من المدونين الموقرين أن يضعوا شعار الحملة في الشريط الجانبي لمدوناتهم تضامنا مع أمة محمد !!
صورة الشعار .. في مدونتي كركر .. ويكتبون فوقها ..
(حملة الجـسد الواحـد)
رابط المدونة
http://krkr111.blogspot.com
جعله الله في ميزان حسانتكم .. آمين
إرسال تعليق