{وَمَا تَشَاءُونَ إِلَّا أَنْ يَشَاءَ اللَّهُ}
سبحان من اذا اراد شيئا ان يقول له كن فيكون
ساعات كتيرة جدا الهوي بيغلبنا وبنتمني علي الله حاجات ممكن يكون فيها هلاكنا
و ساعات بنبعد عن حاجات يمكن هي دي اللي فيها نجاتنا
******
لو الدنيا دار شقاء وابتلاء ..
هل مقدر علينا نعيشها مبتليين و اشقياء؟
واحدة اعرفها توفي والدها بعد مرض شديد لوالدتها
المتوقع كان ان والدتها هي اللي متقومش من المرض دا
توفي الله والدها
ومن بعده بشوية والدتها
وبقي السؤال هيجننها لحد دلوقتي بالرغم من مرور سنوات علي الفراق .. ربنا يصبرها
حد تاني بيلتمس في كل حاجة تحصل له الفرج
يمكن المرة دي تصيب ..
وبتخيب ......
ولسه عنده امل .. ربنا يراضيه
حد تالت عايشها باحساس المقهور دائما وابدا
رغباته والا فلا
مطالبه والا فلا
الله اعلم جواه ايه ..
حاجات كتيرة بتزيد فيها رغباتنا اوي عن حاجات تانية
******
فرضا اننا نقدر نختار حاضرنا بسلطة كاملة فيه ..
يعني اللي هنفكر فيه وبس هو اللي هيحصل
بدون تدخلات ولا عراقيل ولا مشاكل
كله ميسر
هو دا اللي هيسعدنا؟
طيب لو اختارنا غلط من الاول
ولقينا اللي اخترناه ميسر لينا
وحققناه خلاص
مش هيجي وقت نقول ياريت ما كنا احرار كده؟
حكاية تغلب بجد
بس الاكيد بجد و بالتجربة و باليقين فعلا
ان اختار الله هو احسن حاجة ممكن تحصلنا
مهما شفنا عذاب وقرف و تعاسة
يمكن في بعدها فرج
ويمكن يجي الفرج بعدين
ويمكن ميكونش من نصيبنا اصلا وهو مكتوبلنا كده وبس
مهو ربنا عادل
يعني اكيد هيشيل دي و هيدي حاجة تانية قدامها
محدش بيفرح اكتر من حد
ولا حد بيحزن اكتر من حد
ولا حد بقي بيشيل هم حد
خليها علي الله
سيبهاله
ان شاء الله يسرت
وان شاء الله فرجت
وهتفرج ان شاء الله
ربنا يختارلنا الخير ويرضينا بيه
هناك 10 تعليقات:
ياااه فينك من زمان
وحشتييييينى جدا
الموضوع طبعا لا غبار عليه
وانا عن نفسى سايباهاله من زمان
فهو حسبى ونعم الوكيل
ربنا يراضينا جميعا
ربنا يراضينا جميعا يارب ونؤمن بحاجه واحده ويارب اكون واحد من الناس دى ان ربنا بيكتب لكل واحد حاجه معينه فى وقت محدد وفى الاخر كله بيتساوى فى الرزق وراحة البال والابتلاء والابن او الابنه الصالحه والرزق ودعاء الوالدين اذكر حديث عمره ماراح عن بالى لفضيلة الشيخ متولى الشعراوى ويارب اعرف اوصله تانى كان فى يوم جمعه وكنت يمكن فى اولى جامعه وكا حديث رائع من خلاله أثبت أن كل الناس بتتساوى ومافيش حد أفضل من التانى لازم بيتساوى الاتنين فى النهايه هو حديث طويل اووى ربنا يراضيكى انتى وكل ابناء وبنات المسلمين يارب .
تسلم الايادى
نعم حسبنا الله ونعم الوكيل
سبحانه اذا اراد شىء ان يقول له كن فيكون
حمدلله على سلامتك
تحياتى
فعلا اختيار الله هو احسن حاجه تحصلنا مهما شفنا عذاب والم ومراره
انا معاكى جدااااا فى الرأى ده
تقبلى مرورى
موناليزا :)
حي يرزق اهو .. ويارب متشوفيش وحش ابدا ولا يوحشك غالي يارب
هو حسبنا ونعم الوكيل
ان شاء الله يراضينا ويرضي عنا جميعا ويجعل لنا الخير دايما وينور بصيرتنا للحق
خدي بالك من نفسك :)
عم مدحت
رحمة الله علي الامام الشعراوي وعلينا وعلي امة المسلمين اجمعين .. ان شاء الله لو حضرتك افتكرت جزء من الحديث قولنا اهو نستفيد ان شاء الله
وربنا يراضينا جميعا يارب بما قسمه لنا
وسلامي للاسرة
همس الاحباب
الله يسلمك يا ابو همس ويسلم بناتك واسرتك والمسلمين جميعا
ونعم الوكيل .. الحمد لله
فضفضة :)
كويس انك متفقة معايا
يبقي نشوف في كل حاجة وحشة بتحصل ان اكيد فيها خير لحد او في وراها خير لينا او حتي لو هي وحشة من كل ناحية .. يمكن ربنا يجعلنا بيها خير في الاخرة
ربنا يرزقنا جميعا الرضا و يرضي عنا
نورتي
يا ابنتى الطيبه اليس فعلا انا حاولت انى الاقى الحديث بس من النت لكن لم اصل له عندى الكتب بتاعة فضيلة الشيخ متولى الشعراوى رحمه الله كلها بس فى اسيوط ودلوقتى بينى وبين اسيوط اكتر من600 كم دعواتك ان ربنا يوفقنى فى شغلى الجديد عشان اللغه عامله عامايلها معايا وربنا يسهل .
ونعم بالله
حاضر هسيبهاله
هو انا أقدر أعمل غير كده
عاملة ايه؟:)
عم مدحت
ترجع بالسلامة ان شاء الله
وبالتوفيق
حفيدة عرابي :)
حلوة وانتي بتسمعي الكلام كده وبتقولي حاضر :)
ربنا يحضرلك الخير يارب ويرضيكي بيه :)
الحمد لله علي كل حال بخير :)
السلام عليكم ....
جبتي خلاصة الخلاصة وزبدة الزبدة في الفقرتين الأخيرتين
ولو علمتم الغيب لاخترتم الواقع
ربنا سبحانه وتعالى عادل وبيعدينا من حاجات مكناش نحلم مجرد حلم اننا نعديها
بس بيعدينا
وبعد ما نعدي ونبقا في الآمان
يرجع الشيطان يلعب في دماغنا
عشان ينسينا فضل ربنا سبحانه وتعالى علينا
وترجع أوامر الأمارة بالسوء تلح في الدماغ
بس ربنا بيرحمنا الحمد لله
لأنه واسع الرحمة
وبنفتكر كرمه
ونعمه علينا
مش بالقدر الي يوفيه حقه
ومع ذلك كريم بعباده
وعارف ضعفهم
بوست حلو كالعادة وبيعبر عن الي بيجي في دماغ ناس كتير
شكـرا
uncle/ The White Knight
:)
ربنا يكرمك يارب
ويجزيك خيرا عن كلامك الطيب دا
بجد قلت المفيد
ربنا يرضينا بقضاءه ياااارب و يختارلنا الخير ويرضينا بيه
ويكتبلك الخير وفي كل خطوة سلامة :)
إرسال تعليق