تقييم لابد منه

السلام عليكم ورحمة الله وبركاته

زي مهو باين كده من العنوان  .. انا حابة اعمل تقييم لاول سنة تدوين .. مع ملاحظة ان الغالبية العظمي من التدوينات المنشورة خاصة بشخصي انا وحياتي وان كان في بعض التدوينات كان نفسي اكون بعمل فيها حاجة لوجه الله اقول فيها علي حاجات واجبة علينا انما تاهت مننا في زحمة الدنيا واللي بيشوفه كل واحد في حياته 

انا والدنيا معتقدش ان الموضوعات دي فرقت مع حد الا انه ممكن يفكر انه في ناس مبتلاه غيره - علي اختلاف انواع و شدة الابتلائات - وان في صنف من البشر زيي كده بكل عيوبي و متناقضاتي !!

علشان مبقاش بقول حاجة مش بعملها .. انا امبارح قولت لاحد المدونين في جملة " احنا هنروح واللي باقي ما سطرت ايدينا في صحائفنا" وعلشان من باب اولي اقول لنفسي قبل ما انصح غيري والا ابقي منافقة وانا مش عايزة اكون كده..  انا كتبت حاجات كتيرة كمسودات فيها غضب ساعات و فيها ضعف كتير و فيها حتي سخرية ولو انها مش كتيرة ولم انشر اي منها للسبب دا .. حققت الغرض اني كتبت وفي نفس الوقت حاولت امسك نفسي ازود في ذنوبي بدون داعي..

انا بشوف في عداد الزائرين بلاد كتيرة مختلفة .. في اللي بعرف هما مين لو علق او حتي لو معلقش وفي اللي اعتقد بيدخل يقرأ بدون ما يسيب تعليق..  بس المرة دي عايزة اللي يدخل يحققلي طلبي اللي هقوله كمان شوية 

(( رجاء خاص - ان امكن ))

عندي كام سؤال بالنسبة لي مهمين و شغالين بالي من فترة .. واعتقد جه وقتهم .. 

1-  لأي مدي ممكن يتدخل التدوين في الحياة ؟؟ بمعني انا بدوّن ، بفضفض كتير جدا و كتير جدا جدا جدا بكره اني اظهرت ضعفي في الازمات اللي مرت بيا السنة اللي فاتت للناس و انها متاحة قدام الكل و علي الرغم من اني متأكده اني لم اذكر حاجة اخجل من ذكرها قدام اي حد الا الضعف البشري - ان كنت ممكن اسميه كده            

  (( صح ولا غلط ))

2- لأي مدي ممكن اتدخل برأيي في تدوينة غيري؟؟ بمعني اني بتعامل اكتر باحساسي ناحية اللي بقرأه .. في مدونين و مدونات بحس كلامهم قريب لي مش مزعج حتي وان اختلفنا في الرأي .. يمكن اقدر اقول رايي مرة و مرات كتيرة لا .. في اختلافات في الرأي بتفسد للود قضية .. بتحصل و حصلت معايا في اكتر من حادثة          

   (( صح ولا غلط ))

3- من منطلق قول البعض .. لو مش عاجبك الكلام متجيش هنا تاني .. مش هقول من رأي منكم منكرا فليغيره .. بس يعني طالما الكلام اتنشر قدام الكل يبقي الأخر يتقبل الرأي والرأي الأخر  حتي وان لم يكن علي هواه  .. مش موضوع ان عجبك الكلام اقراه معجبكش متورنيش وشك هنا !!   طيب ما تقفلوها علي اعضاء بعينهم  طالما رأي الأخر مش مقبول ..                         

   ((صح ولا غلط ))

نيجي باه للأسئلة المتعلقة بالمدونة  دي وتحديدا في المواضيع اللي فيها علم ينفع (اي حاجة غير شخصية ولاني معتقدش في اي فائدة عائدة علي اي حد من اللي بكتبه عن حياتي ) 

بس للحق يعني .. انا المستفيد الوحيد في الموضوعات الشخصية لاني بسمع كلام طيب من ناس محترمة احسبها علي خير ولا ازكي علي الله احد .. يعني في اللي منهم بيشاركني بكلمة او بطبطبة ولا نصيحة ... واكيد فرقوا معايا كتير جدا جدا جدا

اه منك يا دنيا

تحتوي علي بعض الموضوعات المنقولة - تم ذكر انها منقوله 

تحتوي علي سلسلة من 6 تدوينات تحت عنوان بفكرني - محاولة لجمع سنن صحيحة تايه مننا في زحمة الدنيا .. في سابعة في السكة بس هتتوقف علي رد الفعل علي التدوينة دي

تحتوي علي بعض التدوينات كتبت كرد فعل لتدوينات مدونين اخرين سواء مدح او ذم

تحتوي علي نقد بعض الظواهر في المجتمع من وجهة نظر شخصية بحته 

تحتوي علي بعض ذكريات وأمال وآلام واحلام ورجاء ودعاء و فرح وحزن و نجاح وفشل و غيرها كتير في صورة تدوينات اعتبرها شخصية و لا اعتقد انها افادت حد

((   المحتوي الاخير دا طاغي علي معظم تدوينات مدونة "اه منك يا دنيا"  ))

السؤال المهم :

هل حصل ان حد انتفع باي حاجة مذكورة في المدونة دي ؟؟

هل المدونة دي في رايك شاهد لي ولا شاهد علي ؟؟  

هل بتحكم علي الموضوع بصورة منفصلة عن باقي موضوعات المدونة ولا بتربط علي المواضيع علي اعتبار ان الكاتب واحد -هي هي نفس الدماغ اللي بتكتب ؟؟

كل الهدف من الكلام دا كله اعرف انا صح ولا غلط !!

لوفي نصيحة أيا كانت بخصوص ايه عند حد لي .. احب اسمعها من منطلق ( رحم الله امرء اهدي الي عيوبي) وهي كتيرة اوي انا عارفة .. الله يعافيني ويكفيني شر نفسي

اي حد من الزائرين الكرام هيتفضل يجاوبني علي اي حاجة ذكرتها في التدوينة دي هيكون خدمني خدمة كبيرة اوي و ساعدني في حاجة  محتاجة احط ايدي عليها واعرفها..

ومش هزعل حتي لو انتهي الامر لقفل المدونة ولو انها عزيزة عليا اوي .. بكل حلوها ومرها .. فرحها و ألمها - ساعتها هرحمكم مني وهبقي اشوفها انا لوحدي :) :)

السلام عليكم ورحمة الله وبركاته