شوية برطمة

وافانا مندوبنا في الاراضي المقدسة ومن امام الحرم المكي ان الدنيا زحمة جداا زي ايام رمضان علشان السعوديين في اجازة تقريبا 

هي عملت عمرة  يوم الاثنين في الفجر وفات يوم و مع اخر ساعة من يوم الثلاثاء نوت تعمل عمرة توهب ثوابها لحد نفسه يروح ومش عارف 

الله يتقبل منها حسن نيتها ويجعلها مقبولة الطاعات ان شاء الله

يارب اقبلها منها و اديها الصحة والعافية 

وارزقنا نعمل اي حاجة ترضيك عنا

ارزقنا اننا نرضيك يا رزاق

--------------------------------------------

موضوع انفلونزا الخنازير دا مش مريح  بالمرة

ربنا يستر ويكفينا كل سوء 

--------------------------------------------

ثبت بالادلة العملية ان قسوة القلب مرض عضال ملوش دواء حتي وان اتوهم صاحبه انه بيحس وبيتأثر

-------------------------------------------

في قصة سمعتها من فترة في اذاعة القرآن الكريم  عن شاب وقف امام الرسول صلي الله عليه وسلم فسأله عن يسر حاله و تجارته وانه من اصل طيب .. يعني باختصار ابن ناس و كويس .. ليه لم يتزوج حتي الأن ؟!! وحصل بينهم حوار قال فيه الرسول صلي الله عليه وسلم ان اللي يملك مقومات الزواج ولم يتزوج فهو آثم !!مش قادرة افتكر اسم الشاب و حاولت ادور عالنت علي القصة دي مش لقيتها 

لو حد يعرف مكانها او حاجة عنها يا ريت يدلني ويبقي جزاه الله خيرا ان شاء الله 

----------------------------------------

محصلتش مع حد مرة انه بص علي حاجة في حد تاني وانكرها علي نفسه انها تكون فيه  .. من غير ما يلفظ الانكار دا او حتي يكون في نفسه بيعيب علي صاحبها .. بس مجرد ان الحاجة دي مكانتش عاجباه .. و تعدي الايام و تجيله نفس الحاجة و يفتكر انه في يوم من ايامه بص للحاجة دي انها مش اد كده وقتها او حتي مجرد انها مكانتش عاجباه في الأخر .. و بعد حين يلاقي نفسه  مصاب بيها هي هي ان مكانش اسوء منها !!

مش عارفة بس يعني هو كده يبقي أثم ارتكبه ؟ حتي لو لم يلفظ به؟ ولا صدفه؟ معتقدش ابدا انها صدفة .. بس انا اعرف ان الواحد ميعيبش علي حاجة ف حد علشان ممكن تجيله نفس الحاجة اللي عيب فيها .. بس دا لو عيب

انما لو بس جاله خاطر ان في حاجة مش علي هواه ولا حتي هنعتبرها محادثة داخلية مكتومة ..يتحاسب عليها ويقع عليه اثمها؟!! الله اعلم 

----------------------------------------

العمر بيجري بسرعة 

اكيد مش هنعرف نلحقه

زمان كنا نقول لما ابقي مثلا 20  هعمل وهعمل

وتعدي ال 20 ومنفتكرش اننا كنت بصينا عليها انها بعيدة اوي كده

و غالبا ال 30 زيها  و ان كان في العمر بقية بيعدي بنفس الحال

نفضل نبص علي بكرة انه بعيدة ويا سلام لو عملنا فيه كذا وكذا 

ونلاقي النهاردة ملضوم ف بكرة غصب عنا و منعرفش نفك نفسنا منه علشان نلحق البكرة اللي كنا مستنيينه

----------------------------------

هو مكانش ينفع احنا كمان علي اعتبار اننا عمال مصر يعني اننا نروح لعمو أوباما نشتكيله انهم مرضيوش يدونا يوم بدل الجمعة اللي  اصدروا قرار وزاري مخصوص علشان يعتمد كأجازة رسمية في البلاد بمناسبة عيد العمال؟؟ !!

اشمعني يعني النواب الاقباط في مجلس الشعب يهددوا باللجوء لعمو دا  علشان قالولهم هنعدم الخنازير واعتبروها مكيدة ضد المربيين الاقباط من المسلمين اللي عايزين يقطعوا عيشهم ؟؟

واشمعني كمان كل من هب و دب و صحي من النوم اكتشف ان له أله وقرر يعلن عن عبوديته اللي بهائي واللي بوحي واللي دق مش عارفة ايه  .. يهدد يروح لعمو ؟؟

واشمعني احنا يعني ولا احنا من شر ما خلق... حاجة تقرف 

بجد مش لاقيه وصف الا انه استهبال و ناس بتصطاد في المياة العكرة

يا ريتهم بيتحاموا ف حاجة تسد

الا حيطة مايلة و عايزة اللي يسندها

ولا عزاء لحد .. اكمنه مولد وصاحبه غايب

الله يعافينا مما ابتلاهم

**تحديث : بخصوص انفلونزا الخنازير

دا عنوان موقع امريكي 

Centers for Disease Control and Prevention

http://www.cdc.gov/swineflu/

الموقع بيتم تحديثه كل شوية باخر اخبار المرض وفي معلومات كتيرة للي يحب يعرف عنه

الله يعافينا