خطوة واحدة
هي خطوة واحدة بتفصل بين حاجة وحاجة
خطيت خطوة فوق الرصيف في لحظة ،
وقفت حياتي للاسبوع التالت اهو - حياتي العملية والحركية علي الاقل
خطوة واحدة بتفصل في حياة الانسان
و خطوات كتيرة اوي عدت علينا ولسه هتعدي غيرها طول ما فينا نفس طالع نازل
في اكيد خطوات بتحصل لورا ومش شرط تأخر
ممكن ارجع خطوة ورا يمكن اصلح حاجة اتعملت غلط
او افكر في حاجة حصلت علشان معملهاش تاني
بس المشكلة ان اللي بيرجع خطوة لورا علشان يصلح حاجة
لازم يدير ظهره للي قدام علشان يبص علي اللي ورا !!
وكلها خطوات
وكلامي ليس ذو اي مغزي
وكلامي ليس ذو اي مغزي
هناك 25 تعليقًا:
خطوة بتعمل فرق كبير...
بس ده مش شئ سئ على فكره...
يعني الحياة ماشية...سواء تمت هذه الخطوة او لم تتم..
و كل خطوة..بتعني طريق جديد يتفتح...
طريق آخر يتسكر..
نافذه بتسمح للضوء..
و أخرى تتيح الرؤية...
و أخرى يسدل ستارها...
كله مكتوب...
و كلنا بنعمل على خطواتنا...
مش عارف ليه...لكن..
عايزك كده تبتسمي و تقولي الحمدلله و انتي بتعنيها..حاسس هتكون خطوة ايجابيه :)..
تحياتي
ازيك ياليس
عامله ايه حبيبتي
واحشاني جدا والله
ياتري رجلك عامله ايه دلوقتي
يارب تكوني بخير
بس انتي مقولتيش اللي حصل ده حصل ازي
شفاكي الله وعفاكي
ابقي طمنيني عليكي
سلام عليكم
نورتى الدنيا .. والحمد لله اللى جات على كده وزى ما بنقول قضا اخف من قضا
بس انا مع موناليزا بقوله شد حيلك ياسيف عشان بنتى تتسند عليك وهيه ماشيه الف سلامه يا اغلى البنات ولو اتكلمنا فى موضوع الخطوات اللى بياخدها الانسان فى حياته انتى عارفه عمك هيصدعك وانتى مش ناقصه .. دعواتك.
مدحت
جميلة كلماتك
إزاى بس ملهاش معزى
دى كلها حكم
تسلم إيدك
سلام عليكم
يا أم مريم دول الغاليين عندنا عمرنا ما نزعل منهم الطيبين ربنا ان شاء الله هيكرمهم ونفرح بيهم وكل اللى ليه حق عندهم هايخدها منهم وان كانوا بصراحه محدش يقدر يوقول ان حد ليه عندهم حاجه ربنا يكرمهم ويحميهم ويرجع سيف بالسلامه وبنتى الغاليه رجلها تخف والله حسدوها على ايه ؟؟ على طيبة قلبها وحبها لكل الناس .
لا يا عمو مدحت انا زعلانه منهم الاثنين بجد
انا غلبت اتصل عليهم ما بيردوش كمان
دي مش اصول ابدا
موناليزا
ادعيله ربنا يشفيه ويعفو عنه
انا مش معترضة علي حاجة والله الحمد لله
اللي فيا ملوش علاقة بالمرض ولا الالم :)
مبعرفش ارسمها الا لو من قلبي ولو مش منه عمرها ما هتترسم
تسلمي ويسلم سؤالك دايما يا طيبة :)
------------
راشد
كلامك يستاهل يتحط مكان اللي كتبته
كله مكتوب و ما كتبه الله كله خير ان شاء الله
عايزني ابتسم علشان انت ما شاء الله ربنا مديلك قدر من التسامح اغبطك عليه :) والحمد لله والله انا بحمد ربنا من قلبي علشان ربنا كرمني كتير وانا مستهلش و هو وحده يعلم السر وما خفي
ربنا يصلح احوالنا جميعا يارب .. قول آمين
------------------------
حواء
ازيك وازي فاطمة و اسرتك كلها والمذاكرة
ربنا يعينك و تفرحينا باخبار حلوة ان شاء الله قريب
دا انا رغيت في الكسر دا عند جنة كتير هبقي اجيبلك اللينك تتفرجي :)
بس الحمد لله رب العالمين
النهاردة اول مرة اقف علي رجلي نوعا ما وانا متسندة و اول مرة اوصل لبرة اوضتي من 17 يوم اهو
الحمد لله رب العالمين
ههههههههه بس زي ما انتي عارفة مش بستر يعني فمرة اتزحلقت و مرة درفة الدولاب وقعت عليا و العصاية الندلة اللي بتسند عليها مرات بتخوني واجي اتسند عليها الاقيها طايرة مني :)
يعني عندي شوية مواقف وطرائف في ال3 اسابيع دول
بس قاعدة بشتغل بردة طول النهار عادي جدا
الحمد لله علي كل حال
تسلمي ويسلم سؤالك دايما
----------------------------
ربنا يكرمك يا عمي و يجازيك عني خير .. كلكم يعني :)
واشكرلي طنط كتير علي سؤالها كتر الف خيركم
----------------------------
سعادة محمد السعيد :)
الله يسلمك يارب
والله ما شاء الله عليك يا محمد مجرد تعليقك بيشع سعادة
بارك الله فيك
-----------------------------
ام العيال
انتي لسه هتتكلمي
انتي علي اول عربية تقابلها وتعالي علي قلمين عدل ...
علي العموم يا ستي الله يسلمك علي سؤالك
بس كنتي التمسي لاخيك المسلم عذر واحد من ال70
بلاش انا
انا وحشة و قليلة الذوق
بس سيف لا
انتي عارفة انه مش بيتكلم
وعارفة انه عنده ميكروب في الدم و في العناية المركزة من اخر جلسة كيماوي
وعارفة انه ممنوع عنه اي اجهزة بتطلع اشعة
وفين وفين لما بعرف اتطمن عليه
و لما بتجيله فرصة بيطمنك قبل ما يطمني وانتي عارفة
ربنا يعفو عنه ويشفيه
اما انا فانتي متعرفيش كام مكالمة تليفون بتدخل ويتنج مع التانية و مبقتش بعرف مين اتكلم امتي ومن كتر التليفونات التليفون بتاعي حرن و ساعات مش بيطلع صوت بينور ويطفي بس لما بيكون مهنج
مش عذر يمكن بس اللي وراها الله اعلم بيه
وتسلمي علي سؤالك دايما
انتي الكبيرة بردة
وكله باقي عند الله :)
أليس الحبيبة ..
والله لكى وحشة بجد وسلامتك الف سلامة ياحبيبتى ..
وكلامك خاصة الجمل الاخيرة منه علا بيسيطر على الانسان فى مواقف كتير فى حياته ..
انه بيبقى عايز يرجع خطوة لورا علشان يصلح شئ ..
وساعات يتمنى لو يرجع الزمن بيه لحظة لتغيير كل شئ ..
الحمدلله انك رديتي ع التعليقات و طمنتينا...
الحمدلله الذي لا يكره على مكروه سواه..
اهو البني ادم ف ايديه ايه غير يستعين بربنا...
يا الله...
اليس انا التمستلكم كل الاعذار
بس انا مش محتاجه انى اسأل عليكم انتى وسيف عشان تعرفوا انا قلقانه عليكم
وانتى عارفه كده كويس
ولا مش عارفه الله اعلم
اتصلت عليكى كذا مره على التليفون ومن قبل ال 17 يوم الى انتى تعبانه فيهم
وسيبتلك على الاميل ميت اوف لاين
وسيف شرحه
انتى بتدخلي النت وبتدخلي مدونتك وبتكتبي بوستات وبتردي على الناس
سيف بيدخل المدونه هنا
اظن اقل واجب انتم عارفين انتم الاثنين انى بابقى قاعده دماغي يودي ويجيب
خصوصا انا عارفه ان سيف اخر مره كلمنا كانت حالته مش مستقره
وفجأه تنقطع اخبارك واخباره
ليا حق ازعل ولا لا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لما انا ابقى عماله افكر فيكم وانتم مش سالين عني ؟؟؟
عموما يا ستي الف سلامه عليكى انا ما اعرفش اي حاجه عن موضوع رجلك ده الا حالا دلوقتي لما قريت ردك على حواء
وبرضه انتى وحشه وسيف وحش
انا مجاليش الا مكالمة واحدة و معرفش اتصلتي بسيف ولا لا
بس انا حكيت اللي حصل بما يرضي الله
انتي عارفة ان ال messenger عندي بايظ و مش بيوصل كلام ولو مش مصدقة
ممكن تسأل المدونة الدكتورة جنة اهي بتشوف مني نفس الحكاية و شلته ونزلته كذا مرة ومفيش فايدة . فعملته اوفلاين علشان محدش يقولي اني فاتحة ومبردش
اللي حصل انه مجاليش منك اي اوفلاين والله وانتي علي طول اوفلاين و طبعا معرفش انك بعتي لسيف
واصلا هو مدخلش هنا بقاله يجي 3 اسابيع و لا كلمني علي النت خالص الفترة اللي فاتت علشان زي ما قلت ممنوع عنه الاجهزة كلها حتي الموبيل
انا قلتلك لو علي قولي قليلة الذوق زي ما تحبي
بس سيف لا و مينفعش تقولي عليه كده حتي لو بيدخل و بيكلم الناس ودا محصلش
انا وحشة دي مش محتاجة تأكيد
بس سيف مش وحش ولا عمره هيكون وانتي عارفة انه عمره ما اتاخر في السؤال عليكي او علي اسرتك بس هو مش قادر يتكلم
بس علي العموم متزعليش
يا بخت من بات مظلوم ولا باتش ظالم
لجين
نورتينا زي العادة :)
عارفة
ساعات الواحد بيبقي عايز يرجع ورا علشان بس يتأكد انه كان صح لما عملها
بس كله مقدر ومكتوب و كل مسير لما خلق له
---------------------
راشد
جبت المفيد
الله المستعان :)
خطوات
------
مش قادر أتكلم
لكن ربنا يعينا على خطواتنا خصوصا الصعب منها
طيب يعنى وصلتك مكالمه اهو
وعارفه انى اميلك بايظ يعنى اكيد انا اتفلقت من الكلام عليه
برضه وحشين
بس سلامتك يا وحشه يا ام رجل مكسوره
مجاهد
مش مرتحالك .. مالك ؟؟!!
ربنا يعينك ويقويك
خليك اسم علي مسمي باه:)
-----------------------
دي اخت ام رجل مسلوخة كده ؟
دي لسه الدور الجاي ان شاء الله
هبقي اعزمكو تتفرجوا بدل دي مهي كوتيمي كده :(
سلام عليكم
ام مريم ازيك بجد خناقك وحشنا عاوز ااقولك على حاجه مش دفاع عن اليس او سيف ابدااا بس هيه الحقيقه انا فعلا بكون مشغول عليهم جداا وكذا مره كلمتها على الميل ومردتش عشان كده بقولك ومن غير مجامله والله كل حرف كتبته ليكى صحيح وبلاش شغل الحموات ده من اولاها سلامى للاستاذ رضا وباقى العيله الكريمه .
مدحت
تب حد يشوفلي حتة استخبي فيها من الكسفة دي
يا تلموا من بعضكم باه و تسلفوني messenger بس سلفة لا ترد :)
اعمل فيه ايه بس :(
فعلا
كلها خطوات
سلام عليكم
بس اوعى انتى او اى حد هنا يتريق بجد الكمبيوتر اللى نعايا ده عزيز عليه ويمكن غريب ان الانسان يرتبط بآله لكن اللى حصل و مش هقول على امكانيته المهم ان اشتريته سنه 1996 ومرتبط بيه ....... حسدته طلعت رساله ( send Error Roport ) والله زى ما بقولك والميل شغال وكل حاده ميه ميه وهبعت الرساله ويارب توصل واشوف حكاية التقرير ده ربنا ستر سلميلى على حبيبى الغالى .
مدحت
منور يا دكتور عمرو :)
----------------
انا اخر حد ممكن يفتح بقه في الارتباط بالاشياء علشان انا بقدر اوي الارتباطات دي و بحس انك لما بتحب حاجة بتحسها هي كمان بتحبك
ربنا يديله الصحة
ربنا يخفف الام سيف ويشفيه يارب ويقومك بالسلامة ياحبيبتى
وتفرحوا سوا قريب ان شاء الله
الحمد لله على كل حال
أرجو أن تكونى بخير
حصلتك ..لاننا اصحاب فمش معقول اسيبك لوحدك
النهاردة خطوة برضه تقريبا كده كسرت صباع رجلى الكبير ..ومش عايزة اروح اعمل لا اشعة ولا حاجة
المهم يارب تكونى بقيتى كويسة
انا الحمد لله بخير وماهى الا صباع ارجو ان يكون قد ازال عنى بعضا من ذنوبى
طمنينى عليكى
تحياتى
موناليزا
ربنا يتقبل منكم ومنا يارب هو وحده الشافي ان شاء الله
معلش الانترنت كام مقطوع من البيت :)
تسلمي يارب علي سؤالك و كلامك الطيب :)
-----------------------------
جنة
الف الف الف سلامة
شفاكِ الله و عافاكِ و كفاكِ كل سوء ان شاء الله
متخلية شعورك طبعا بس الحمد لله رب العالمين انها مكانتش اسوء من كده
معلش لعله خير ان شاء الله
انا نزلت المكتب بس النهاردة اول يوم :) عندي تلال شغل مينفعش يتعمل من البيت ... الحمد لله رب العالمين
ربنا يعافيكِ انتي و سيف و المسلمين اجمعين يارب العالمين.
إرسال تعليق