اخيرا وحدث

حدث في شهر مايو 2009 :

كتبت مشروع العمر لرحايا العمر ..فيني منه؟!!

سبحان الله اللي بيأذن بالميعاد في التوقيت اللي يحدده ويقضي بيه امره سبحانه وتعالي ويقول له كن بيكون ..

حدث في 29.12.2009

مشوار بقاله يمكن قرب علي سنتين دلوقتي ..

مع اني وصلت للمكان دا نفسه ولا ميت مرة في الفترة دي و قلبي معلق جدا بالمكان دا ..

بس هو زي ما قلت لما المدة طالت اسبوع وشهر وسنة و زادت اوي للسنة التانية ..

بقيت محرجة من المكان ..

من الحيطان ..

من السلالم اللي طلعتها ونزلتها مرات ومرات ..

من الممر اللي قبل الباب ..

من الرصيف اللي قدام المكان اللي بقف فيه

من الباب اللي بيطلعني للدنيا برة

اخرج منه مرة معيطة

و مرات فرحانة

ومرات جري علشان متأخرة

و مرات بضحكة صافية من قلب وقف يودعك حقيقي بابتسامة مستحيل يبقالها معني الاانها طالعة بجد من قلب حبك ..

ومرات خرجت متنرفزة و ببرطم و لما بعدت شوية عن الباب ابتسمت وقلت "ولو .. بردة بحب هنا ومحفور العنوان دا في قلبي" ..

مرات ضحكنا

ومرات لعبنا

ومرات ومرات صوتي علي في المكان حب وخوف علي اللي فيه ..

شاف المكان دا دموع كبار وصغار ..

قلب صغير صافي بريء وحيد

وقلب كبير كان زمان بريء ومبقاش ..

الكبير اتلوث قبل ما يدخل هنا ولما دخل صفي وحس باللون الابيض اوي

والصغير اتلوث بعد ما دخل ويود لويخرج برة هنا ويبقي حاجة تانية

اربع حيطان شافت كتير .. من فرح وحزن و ضحك و زعيق .. من علم وعمل .. من خوف من وعلي .. تجارب من الصغير للكبير والكبير اتاريه بيتعلم من عالم الصغار اكمنه ميعرفش ان في كده في الدنيا بيحصل ... كله دا كان وضاااااااااااع و نفسي كان يرجع والقلب قبل العين بكوا عليه لما ضاع واختفي

مرات اقول كفاية بعد و ارجع ..

بس بعدت كتير و خايفة ارجع الاقي الباب مقفول و ملوش مفتاح

مقصرة ؟؟

جداااااااا وفوق الوصف

وكنت ممكن اعمل حاجات كتيرة جدااااااا ومعملتهاش

خذلتهم ؟

جدااااااااااا

وكنت مرعوبة من نظرة عتاب في عين حد منهم ولو في نبرة صوت في مكالمة ..

فاتحججت بالنمر اللي اتغيرت و المشاغل والدنيا و اللي فيها ..

كنت بضحك علي روحي واقول مهو خلاص المكان اتقفل من ناحيتي

مينفعش ارجع اكيد :(

الحمد لله رب العالمين ..

الحمد لله ان ربنا بيخليني اعاند نفسي في هواها واقولها مش مهم انتي تقولي ..

الحمد لله ان انزل في قلبي شجاعة المحاولة .. ولو فشلت

هروح يعني هروح

واللي يحصل يحصل..

لو الباب اتقفل في وشي

يبقي خلاص اسمي حاولت

و ربنا اراد الخير اكيد

و محدش عارف الحكمة في اختياره ايه

بس لعله خير !!

لو الباب اتفتح ؟؟

ياااااااه ..

مع اني لو سرحت في الخيال اجيب تخيلات كتيرة وكبيرة ..

بس مش هعرف اوصف حالي لو الباب اتفتح في وشي تاني مهما تخيلت من حاجات حلوة!!

نزلت الكوبري والاشارة يمين اشتغلت .. خلاص باه .. لازم دلوقتي .. هحاول .. يمكن :(

المكان اللي قدام الباب !!!

يا خسارة مشغول

قدام شوية ؟؟

اه موجود

وحشني الرصيف واللي عليه

وحشتني البوابة بالتلات سلالم الصغيرين

وبرغم اني بقي عندي فوبيا من اي ارتفاعات طالعة او نازلة ..

السلالم دي غير اي سلالم ..

القلب بينبض بسرعة رهيبة من الخوف من اللي هيجي بعد السلالم

ياااااااااااه

اجمل واطيب واحلي حاجة حصلتلي من شهور طويلة جداااااااااااا

ابتسامة وفرحة وضحكة من القلب وكلمة " اهلا" من جوة جوة القلب طالعة من بعد البوابة

دا لسه الباب مفتوح متقفلش

دا انا لسه ينفع ادخل

دا انا لسه ينفع اجي هنا

واتفتح الباب وابتسامة جمييييييييييييييلة اوي شافتها عنيا

والله والله والله وحشتوني

مقدرتش اقولها بلساني كاول كلمة بس كانت مالية قلبي والله وحشتوني

الحيطان والبوابة

مكتب البواب

الباب الالوميتال اللي لسه بيعلق وهو بيفتح

السرير المتطبق اللي بيطلع بليل علشان عم احمد لما يجي ينام ويسد البوابة محدش يعرف يدخل

وحشتني حتي اللوحة اللي علي مكتب المدير اللي بتقول أستاذ .... مدير ال.....

كان علي الباب واحد من كتير ليهم في قلبي مكانه

يمكن من اشقي من فيهم

طيب و ابن حلال

بس مجنون وعصبي

ياه هو فاتت سنين كتيرة كده

دا انت بسم الله ما شاء الله

الله اكبر

بقيت راجل يا هيثم

كبرت

و بقيت شاب كبير

دا انت كنت زمان "سفروت" وصغنن

زرزور صحيح و لما جنونتك بتطلع مبتشوفش قدامك

بس عارفة ان قلبك ابيض من جوة

يااما اتخانقنا وزعقنا و غلسنا علي بعض

قفشت عليا و عندت عليك

بس من ورا القلب والله يا هيثم

مشفتش من الدنيا دي الا وشها الوحش

جيت الدنيا دي بذنب متعرفهوش

بتتعاقب عليه ولسه متعرفهوش

كبرت يا ولد وبقيت راجل

مبقاش ينفع اقولك ولد خلاص

هي السنين عدت اوي كده ؟؟

فرحة وملت القلب بجد بجد محستهاش من كتير اوي ويمكن محستهاش الا معاكم

فرحة وملت وشه وهو بيقولي "كنتي فيييييييين وحشتينا اوي"

واسئلة في العيون

وعيون بتهرب من اجاباتها

بس القلوب اتجمعت علي فرحة اللقاء

بجد فرحت اوي من قلبي

جيت المكان وانا شايله في قلبي هم وظلم ووجع يوم عدي زيه كتير بس بقي دايما بيجي

وراح كل وجع قدام اول ابتسامة شافتها عنيا

الصغير كبر

والكبير شاب

ساعة ونص ولا اكتر مروا كانهم ثانية

هو سنتين يفرقوا كل الفرق دا

ما شاء الله

كبرتوا كلكم

الله يحفظكم يا رب

وحشني بجد ليل المكان

نهاره مكانلوش ذكريات كويسة اوي يعني كانت دايما بالنهار لان في مشاكل مينفعش تتحل الا بالنهار!!

الليل هنا اللي كان فيه كل الاشكال وذكريات .. كانت ليالي سنين

دا انا كنت نسيت كل دا

بجد نسيت اني عشت فرحتك ودموعك

يوم ما عمل حادثة و دخلت المستشفي وركبولك مسامير

يوم ما وقفت اتحايل علي اللي هنا علشانك وعلشان غيرك و اترجاهم بلاش ضرب

يوم ما دموعي نزلت ورا دموعك وانت بتحكي مين زعلك في المدرسة علشان ملكش حد يجي معاك المدرسة

يوم ما قعدنا نعك سوا علشان نعمل فطار في رمضان والوقت سرقنا و باظت الخطة اللي كنت عملاها بس كنا فرحانين سوا

يوم ما رحنا السندباد و فضلنا نلعب ونضحك و اديتني هديتك وقلتلي تذكار لحسن يجي يوم وتنسيني

يوم ما طلعت اول طرحة لمشروع المشروم وكان شكله عجيب و حلفتلك والله لاكله بس علشان انت اللي زرعته

يوم ما القلب اتفتح علي اللي شايله و فضفضت باللي الدنيا عاملاه فيك ولا انت عارف سببه ايه

يوم ما جالك فصل من المدرسة لشقاوتك

يوم ما رجعت من خناقة متعور وقلبي اتخلع من الخوف عليك و من البلطجية اللي عوروك :(

يوم ما صابح علينا امتحان وجاي تقولي " الا هو هانز دا يطلع مين ؟؟ دا الطباخة اللي كانت بتصوت في الاول؟؟" :)

يوم ما المشرف الصغنن قالي متزعليش منهم دول بيحبوكي والله وبيستنوكي وبيزعلوا لما تكوني زعلانة

يوم ما زهقتوني وحسيتني تقيلة علي قلبكم من شقاوتكم وقلت من ورا قلبي مش جاية تاني

يوم ما كتبتولي في الورقة نعم نعم نعم نعم في استفتاء حصلت فيه علي 100% تأييد ومعاهم حبة شقاوة ودلع بحب فوق البيعة

فكرتوني بالورق دا لسه في المحفظة :) :)

والله وحشتوني

لسه في القلب ليكم كتيييييييييييير اوي

والله اسعدتوني فوق ما اقدر اوصف و كنتو خير لي في طريقي

كنت بعرف اتنفس اكسجين نضيف بس معاكم .. بجد بس وانا معاكم

سبحان الله

مجرد ضحكة من القلب شالت تعب ووجع وهم فشلت معاه محاولات كتيرة

بجد انتو دعوة صالحة ربنا رزقني بيكم و بغباوتي بعدت ومحستش بالنعمة دي الا لما ضاعت

والله انتو خير ونعمة بس اللي يحس بيها ومعاها .. يارب احفظهم من كل سوء وفرح قلوبهم وعوضهم يارب بالخير داايما

انتو احسن من احسن احسن احسن حد برة في الدنيا بجد بجد

بس لو ركبولكم عواميد نور علي الطريق

والله هتبقوا احسن واحسن

انتو خير والله محدش حاسس بيه

اشكركم واحمد الله اني اعرفكم

والله نعمة من ربنا

والله يسامحه اللي يلفظها او ميحسش بيها وانا اولهم

فسامحوني مكانش غصب عني

سامحوني كنت مغيبة

سامحوني .. يمكن ربنا يكتبلي خيركم ويرضي عني

متزعلوش مني مكانش قصدي والله

وبحب كل حاجة فيكم

بجد ربنا يحميكم

--------------------------------------------------------------

--------------------------------------------------------------

بكلم نفسي بما في نفسي ..

وبسجل لحظة اغلي من اي كلمة اتقالت هنا

اغلي لانها الابقي ان شاء الله

وبردة بكلم نفسي...

Laws of Power

سوق العمل متوحش بطريقة بشعة بجد

غابة و صحيح البقاء فيها للأقوي والأمكر والأدهي و كمان فيها مكان للأغبي والأضعف واللي عايز يبقي تحت رجل الاولانيين

احد الخبراء في سوق العمل ...

رشح لي كتاب The 48 Laws of Power

لكاتبيه Robert Green & Josst Elffers

الكتاب في آراء كتيرة عليه عالنت ما بين مؤيد ومعارض و محلل

وفي مواقع كتيرة عارضة للقوانين ال 48 اللي عرضها الكتاب باستفاضة عن طريق عرض القانون و اعطاء امثلة مدللة عليه كما اشار اليها الكاتب

صاااااااااااااااادم بالنسبة لي بنسبة 70%

علي اعتباري ببدأ عامي التاسع في العمل في مجال منفتح علي العالم غصب عنه و بتعامل مع اشكال وجنسيات وادمغة مختلفة .. يعني اسمي شوية اعرف .. حتي كمتفرج علي السوق مش مشارك فيه !!

بس اللي قرأته كأجزاء من الكتاب صادم لي ...

بيتكلم علي "كيف تمسك بزمام القوة" و تكتسبها ازاي و ايه اللي ممكن تعمله لاتقاء شر المالك لزمام القوة

حاجات كتيرة اوي عرضها الكاتب بالأمثلة ... بصراحة بعد ما قريت شوية في التحليلات اللي اتكتبت عليه .. مفكرتش غير في اد ايه الدنيا دي غابة بجد .. علشان تعيش فيها لازم تكون ماكر بدرجة كبيرة جدااااااا و علشان تكون ماكر ومالك زمام القوة لازم يكون في حد مغفل وضعيف سمحلك انك تكون كده ..

انت مين فيهم .. دي المشكلة

القوي .. بيدوس علي حاجات كتيرة اوي مهمة في طريقة

الضعيف بيتداس عليه و علي حاجات بالنسبة لي مهمة بس بالنسبة لغيره لا تسوي شيء

مش قادرة اتخيل حد بيطبق فعلا ال48 قانون دول ويبقوا كلهم فيه .. مش متخيلة حد انسان مهما بلغ من قوة و قدرة علي حسن التصرف والدهاء والحكمة والعقل و كل الصفات اللي تجيب نجاح ومال .. يبقي انسان لسه .. اكيد هيتحول لشيء تاني غير انساني

العمل مفيهوش مشاعر .. هدوس علي نفسي وهوافق عن 75% اقتناع .. بس مش قصدي مشاعر حب وصداقة وكده .. اقصد مشاعر طيبة عموما تخلي جو العمل هادي وفيه سلام مش حقد وغل و حسد و اسافين و مؤامرات ...... حدث ولا حرج يعني

الاكيد في الموضوع دا ان في بشر بيطبقوا كام قاعدة مع بعض ... دا فهمته وشفته بعيني ..وحتي انا قد اكون بنفذ كام واحدة منهم بدون قصد نوعا ما .. بس مشكلتي اني مش متخيلة بني ادم واحد يقدر يجمع ال48 قانون في شخصه ويطبقهم ببراعة كما شرحهم الكاتب

• Law 1 Never Outshine the Master
• Law 2 Never put too Much Trust in Friends, Learn how to use Enemies
• Law 3 Conceal your Intentions
• Law 4 Always Say Less than Necessary
• Law 5 So Much Depends on Reputation. Guard it with your Life
• Law 6 Court Attention at all Cost
• Law 7 Get others to do the Work for you, but Always Take the Credit
• Law 8 Make other People come to you, use Bait if Necessary
• Law 9 Win through your Actions, Never through Argument
• Law 10 Infection: Avoid the Unhappy and Unlucky
• Law 11 Learn to Keep People Dependent on You
• Law 12 Use Selective Honesty and Generosity to Disarm your Victim
• Law 13 When Asking for Help, Appeal to People's Self-Interest, Never to their Mercy or Gratitude
• Law 14 Pose as a Friend, Work as a Spy
• Law 15 Crush your Enemy Totally
• Law 16 Use Absence to Increase Respect and Honor
• Law 17 Keep Others in Suspended Terror: Cultivate an Air of Unpredictability
• Law 18 Do Not Build Fortresses to Protect Yourself. Isolation is Dangerous
• Law 19 Know Who You're Dealing with. Do Not Offend the Wrong Person
• Law 20 Do Not Commit to Anyone
• Law 21 Play a Sucker to Catch a Sucker. Seem Dumber than your Mark
• Law 22 Use the Surrender Tactic: Transform Weakness into Power
• Law 23 Concentrate Your Forces
• Law 24 Play the Perfect Courtier
• Law 25 Re-Create Yourself
• Law 26 Keep Your Hands Clean
• Law 27 Play on People's Need to Believe to Create a Cultlike Following
• Law 28 Enter Action with Boldness
• Law 29 Plan All the Way to the End
• Law 30 Make your Accomplishments Seem Effortless
• Law 31 Control the Options: Get Others to Play with the Cards you Deal
• Law 32 Play to People's Fantasies
• Law 33 Discover Each Man's Thumbscrew
• Law 34 Be Royal in your Own Fashion: Act like a King to be treated like one
• Law 35 Master the Art of Timing
• Law 36 Disdain Things you cannot have: Ignoring them is the best Revenge
• Law 37 Create Compelling Spectacles
• Law 38 Think as you like but Behave like others
• Law 39 Stir up Waters to Catch Fish
• Law 40 Despise the Free Lunch
• Law 41 Avoid Stepping into a Great Man's Shoes
• Law 42 Strike the Shepherd and the Sheep will Scatter
• Law 43 Work on the Hearts and Minds of Others
• Law 44 Disarm and Infuriate with the Mirror Effect
• Law 45 Preach the Need for Change, but Never Reform too much at Once
• Law 46 Never appear Perfect
• Law 47 Do not go Past the Mark you Aimed for; In Victory, Learn when to Stop
• Law 48 Assume Formlessness
• 
  

القانون الأوّل : لا تشرق أكثر من القائد

القانون الثاني : لا تضع كثير من الثقة في الأصدقاء ، تعلّم كيف تستغلّ الأعداء

القانون الثالث : بيّت نواياك

القانون الرابع : دائما قل أقلّ من الضروري

القانون الخامس : الكثير يعتمد على السمعة ، أحرسها بكامل حياتك

القانون السادس : أطلب الإنتباه بأي ثمن

القانون السابع : دع الآخرين يقومون بعمل لك ، ولكن دائما أطلب العائد

القانون الثامن : إجعل الآخرين يأتون إليك ، إستعمل الإغراء إذا لزم الأمر

القانون التاسع : إنتصر من خلال فعلك ، وليس من خلال نقاشك

القانون العاشر : العدوى : تجنّب غير السعيد ، وغير المحظوظ

القانون الحادي عشر : تعلّم إبقاء الآخرين يعتمدون عليك

القانون الثاني عشر : إستخدم الصدق والكرم لتعطّل ضحيتك

القانون الثالث عشر : عند طلب المساعدة ، احتكم إلى اهتمامات الآخر ، وليس إلى رأفته وعرفانه

القانون الرابع عشر : قف كصديق ، إعمل كجاسوس

القانون الخامس عشر : حطّم عدوّك تماما

القانون السادس عشر : إستخدم الغياب لزيادة الإحترام والسمعة

القانون السابع عشر : حافظ على بقاء الآخرين في رعب متوقّع ، إزرع جوّا من عدم التوقّع

القانون الثامن عشر : لا تصنع قلعة لتحمي نفسك ، العزلة خطيرة جدّا

القانون التاسع عشر : إعرف مع من تتعامل ، لا تؤذي الشخص الخاطئ

القانون العشرين : لا تعترف إلى أيّ أحد

القانون الحادي والعشرين : إلعب كمغفّل لتمسك بمغفّل ، إبدو كغبي أكثر من مظهرك

القانون الثاني والعشرين : إستخدم تكتيك الإستسلام ، حوّل الضعف إلى قوّة

القانون الثالث والعشرين : ركّز قواك

القانون الرابع والعشرين : إلعب دور الملك

القانون الخامس والعشرين : أعد صناعة نفسك

القانون السادس والعشرين : أبقي أياديك نظيفة

القانون السابع والعشرين : تصرّف كما يحب النّاس أن يصدقّوا لتخلق معجبين

القانون الثامن والعشرين : أدخل المواقف بإقدام

القانون التاسع والعشرين : أكمل الطريق للنهاية

القانون الثلاثين : إجعل إنجازك هيّنا

القانون الحادي والثلاثين : تحكّم بالخيارات ، إجعل الآخرين يتصرفّون حسب الأوراق التي تلعب بها

القانون الثاني والثلاثين : تصرّف بحسب خيال الآخرين

القانون الثالث والثلاثين : أكتشف اليد التي توجع كلّ شخص

القانون الرابع والثلاثين : تصرّف كملك لتعامل كملك

القانون الخامس والثلاثين : تحكّم في فنّ الوقت

القانون السادس والثلاثين : إحتقر الأشياء التي لاتملكها ، تجاهلها هو أفضل انتقام

القانون السابع والثلاثين : إصنع لنفسك نظّارة

القانون الثامن والثلاثين : فكّر كما تحب ، لكن تصرّف كما يحب الآخرين

القانون التاسع والثلاثين : حرّك الماء لتصطاد السمك

القانون الأربعين : إحتقر الغداء الجاهز

القانون الحادي والأربعين : تجنّب الدخول في حذاء الرجال العظماء

القانون الثاني والأربعين : إضرب الراعي ، تتفرّق الرعيّة

القانون الثالث والأربعين : إعمل في قلوب وعقول الآخرين

القانون الرابع والأربعين : عطّل واغضب من مفعول المرآة

القانون الخامس والأربعين :أ وعد بالتغيير ، ولكن لا تجدّد الكثير مرّة واحدة

القانون السادس والأربعين : لا تظهر بمظهر الكامل

القانون السابع والأربعين : لا تذهب اكثر من هدفك الذي حدّدته ، عند النصر تعلّم متى تقف ؟

القانون الثامن والأربعين : تظاهر بعدم الشكل

الخلاصة يعني :

الناس ضحكوا علي لما قلتلهم اني عايزة اشتغل في مكان في سلام من غير ضغائن ولا مشاعر سلبية تجاه حد

قالولي

انتي "حالمة" ..

بس يعني اتنصفت حبة في اخر القعدة لما اتقال ان العمل الواحد وفريق العمل الواحد تحديدا بيلزمه يعني فيه كل انواع الشخصيات ومن ضمنهم الواهم اللي زي حالاتي !!

الحمد لله يعني اهو الواحد لقاله شماعة يعلق عليها وهمه!!

أعلم علم اليقين اني غلطانة في ملايين الافكار اللي جوايا و ملايين التصرفات اللي بتنتج عن هذه الافكار

بس بردة اكيد في نسبة صح في اي حاجة منهم ولو 1%

ولو دا النجاح ودا الصح

فانا ممكن اتنحي عن طلبه

وابقي زي موظف الحكومة (العمالة الزائدة)

رايح فين؟؟

رايح الشغل

جاي منين ؟؟

جاي من الشغل

عملت ايه في الشغل؟؟؟

هو اصلااااااااااااااا في شغل؟؟؟؟

كل عام وانتم بخير

هنيالكم وعقبالنا يا رب

حمد الله علي سلامة الحجاج

المسلمين

المقبولين

مغفوري الذنوب بإذن الله :)

وعلي رأسهم اخ عزيز وابو شاب نونو حبيب لقلبي ،

الباشمهندس ابو حازم صاحب مدونة هكذا علمني سيدنا محمد صلي الله عليه وسلم

واخ أخر طيب وابن حلال طهر فؤادك

علي الاقل دول اللي الواحد اتطمن انهم رجعوا الحمد لله بالسلامة

يارب يتقبل منهم

وينولهالنا يا رب يارب يارب حجة قبل الموت يا رب

ويعيد علينا الايام دي و الطاعات دي و الخير اللي يتحس بالقلب في ايام بجد كلها بركة وسلام .. سبحان الله

اللهم تقبل طاعات المسلمين جميعا

يوم وقفة عرفات من التليفزيون و له رهبة و سلام .. سبحان الله

امال اللي شهدوه هناك كان احساسهم ايه ؟؟

السؤال دا للحجيج اللي راحوا ورجعوا

بالتفصيل الممل وبكل اللي حصل باه

مليش دعوة :)

انتم الاتنين كرماء كفاية ان شاء الله و هتنولوني مرادي :)

حمد الله علي سلامتكم جميعا

*******

وظهر اخيرا الباشمهندس صاحب مدونة The eng

حمد الله علي سلامتك يا حاج

و عقبالنا يارب

دعوة و نارها

بريد الجمعة نشر قصة بعنوان "الوحش" 

القصة اتنشرت من 3 سنين 

عن ابناء ذاقوا المرار والهوان والذل من ابوهم 

حتي لما ماتت امهم  لم يتقبل استلام جثمانها لدفنها

اتمرمطوا واتذلوا و شافوا صنوف من العذاب

و سافر يعمل عمرة و غاب و غاب

اعتبروه مات واتقفلت الصفحة و رسمي اصبح في عداد الموتي 

ورثوا ثروته وعاشوا

الولاد والبنات اللي اتربوا علي الذل والهوان و اتمرمطوا كبروا

بقي لكل واحد منهم بيته 

فضلت بنت واحدة عاشت لوحدها بعد ما تفرقوا اخواتها

مرة من المرات اتكعبلت في راجل عجوز بيمسح سلالم بيت

مريض هزيل ذليل لا يجد قوت يومه ولا دواء يدواي امراضه الكتيرة

لقته ابوهم

اللي ياما ذلهم وعذبهم و قهرهم ولاد وبنات

ابوهم اللي ميحملوش داخلهم ليه الا كل كره و غل

ابوهم اللي رباهم علي الاهانة 

ابوهم الكابوس اللي افتكروا يوم اعلان وفاته رسميا انهم اخيرا صحيوا منه

لقته قدامهم 

مريض 

ذليل

فاقد الذاكرة 

تفاصيل القصة بعد ما لقوه اولاده مهينة للطرفين

الانتقام تملك منهم 

يكرموه ليه وهو اهانهم عمرهم كله

يداووه ليه وهو من رفض حتي دفن امهم 

يعطفوا عليه ليه وهو من لا يحملون في قلوبهم له الا كل ذكري سيئة من ذل واهانة وهوان 

الجزء الاخير من حياة هذا الرجل سطرت في بريد جمعة 20/11/2009 علي يد بنته

القصة مليانة انتقام

انتقامه منهم بصورة ما في تربيتهم علي الاهانة و الذل 

انتقامهم منه لما ذلوه ذل بشع مقتدرش تكمل قراءة الكلام من بشاعة الوصف

الاب هانت عليه شريكة عمره 

الاب هانت عليه بناته وهان عليه اولاده

الاب ذهب ولم يعد 

ساب في قلوبهم كره و حقد و رغبة بشعة في الانتقام منه كانت بتكبر كل لحظة في قلوبهم 

ولما قالوا مات 

نسيوه بس فضل الكره والرغبة في الانتقام

انا متأكده ان الابناء دول ولا واحد ولا واحدة فيهم قادر يعيش حياة طبيعية عادية

هو وصلهم لكده صحيح

بس الابشع تصرفهم معاه

رجل مسن مريض ذليل 

مش لاقي لا دوا ولا اكل ولا لبس 

عايش متهان

فاقد الذاكرة 

اخدوه بيتهم

مكانش عندهم لقمة يدوهاله حتي لوجه الله ؟

اخدوه ليه ؟

علشان ينتقموا منه؟

التفاصيل بشعة بجد

لعل الله اراد له دفع ثمن فعله في اولاده بردهم له الذل والهوان وهو لا حول له ولا قوة .. الله اعلي واعلم

مكانوش قادرين يسامحوا ليه؟

متعلموش يسامحوا؟ 

ميعرفوا يعني ايه يسامحوا

القلب اللي ملاه الظلم من غير ايمان 

لازم يظلم و يطغي

الرادع الوحيد

الاحساس ان في

 الله

الجبار

المنتقم

العدل

حي 

لا يموت

متصل بالقصة دي 

حكاية بنت عادية زي بنات كتيرة

اتربت في بيت عادي زي بيوت كتيرة من اسرة متوسطة الحال

كانت بتوه شوية و ترجع شوية 

بتعمل غلطات وبتعمل شوية نجاحات

بس كان دايما الجدار بينها وبين ابوها بيزيد

مع كل هفوة 

مع كل غلطة 

بيعلي الجدار

مع كل قلم بتتضربه علي وشها

مع كل ركله بيخبطها برجله في اي حتة في جسمها

مع كل اهانة باللسان او بالفعل

الجدار بيعلي ويعلي

والبنت بتتوه 

مش بتلاقي اللي يسندها

و المشاكل بينهم بتزيد وتكتر

ولما بتحاول تصلح غلطها

مش بتلاقي غفران 

ولا كلمة ترحمها من احساسها انهم مش عايزينها 

جربت تموت نفسها

بس ربنا اراد لها النجاة

طلبت الموت ايام وشهور وسنين

يمكن تخلص من الحياة ومن فيها

في لحظة رن التليفون

"حصل حادثة

القطر

ابوكي

الشنطة

حرامي"

مات الاب

مات اللي ظالمها

مات وسابلها احساس واحد مش بيفارقها

"انا اللي قتلت ابويا"

"انا اللي كنت بدعي عليه"

"انا اللي قلت يارب خده علشان ظالم"

"انا السبب في موتك يا ابويا"

القصتين اشترك فيهم الاب في ظلم اولاده .. جايز التفاصيل مبهمة لناس كتيرة .. بس النتيجة واحدة 

الظالم مات 

الاب مات

السند مات

مات استجابة لدعوة حد من اولاده ؟؟ 

الله اعلم

اللي قاسي اوي في القصتين ..

 ان الظلم يوصلنا لرغبة بشعة تملي القلب في الانتقام من الظالم ... 

 قريب او غريب .. ظالم و طاغي 

اللي قاسي اوي في الدنيا .. ان اللي يسمع القصتين دول و غيرهم كتير ممكن يقف لحظة كده قدام مراية نفسه

ويقول " يا تري في حد انا دعيت عليه من قلبي  انه يصيبه سوء نتيجة عمله؟؟"

اللي يوجع اكتر باه

 لو كان الحد دا قريب

 مش غريب

يوجع اوي 

 لدرجة تخليك تقول

 " يا رب مهما كان عمل وبيعمل وهيعمل سامحه و لا تأخذه بظلمه .. اهديه ولا تعامله بما هو أهل له وان اعطيتني القدرة علي احتمال الظلم فاعطني القوة علي قتل غضبي ورغبة الانتقام جوايا وان اضعفني الظلم فقويني افتكر رحمته وعفوك عن المسيئ منا" 

كام حد يقدر يقول الدعاء دا وهو مظلوم ؟؟

مين عنده القدرة علي مسامحة الظالم ؟؟ 

مين قادر يعفو عن من غدر به؟؟

مين يقدر يدعي لمن ظلمه بدل ما يدعي عليه ؟؟

ايا كانت النهاية 

و مهما بلغ الظلم 

بيتهيألي نار الانتقام  بتحرق صاحبها قبل ما توصل علشان تحرق اللي عايز تنتقم منه 

قال الله تعالى: لاَّ يُحِبُّ اللّهُ الْجَهْرَ بِالسُّوَءِ مِنَ الْقَوْلِ إِلاَّ مَن ظُلِمَ.. (148) سورة النساء

قال ابن كثير في تفسيره: قال ابن أبي طلحة، عن ابن عباس في الآية يقول: لا يحب الله أن يدعو أحد على أحد إلا أن يكون مظلوماً فإنه قد أرخص له أن يدعو على من ظلمه وذلك قوله: إلا من ظلم. وإن صبر فهو خير له.

قد قال رسول الله صلى الله عليه وسلم: لا يزال يستجاب للعبد ما لم يدع بإثم أو قطيعة.رواه مسلم.

قليلون من سمعوا قول لقمان لابنه :
" كذب من قال : إن الشر يطفئ الشر، فإن كان صادقاً فليوقد نار إلى جنب نار، فلينظر هل تطفئ أحداهما الأخرى ؟ وإلا فإن الخير يطفئ الشر ، كما يطفئ الماء النار"

وروى مسلم وغيره عن أم سلمة قالت : قال رسول الله صلى الله عليه وسلم :( لا تدعوا على أنفسكم إلا بخير؛ فإن الملائكة يؤمنون على ما تقولون) . قال تعالى: { وَإِنْ تَعْفُوا وَتَصْفَحُوا وَتَغْفِرُوا فَإِنَّ اللَّهَ غَفُورٌ رَحِيمٌ } [التغابن: 14]. وقال تعالى: {وَلْيَعْفُوا وَلْيَصْفَحُوا أَلا تُحِبُّونَ أَنْ يَغْفِرَ اللَّهُ لَكُمْ وَاللَّهُ غَفُورٌ رَحِيمٌ } [النور: 22]. ويقول النبي صلى الله عليه وسلم: (من كظم غيظًا وهو قادر على أن يُنْفِذَهُ دعاه الله -عز وجل- على رُءُوس الخلائق حتى يخيِّره الله من الحور ما شاء). [أبو داود والترمذي وابن ماجه]. يقول تعالى: {ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ} [فصلت: 34]. قال عمر بن عبدالعزيز رحمه الله : " إنك إن تلقى الله ومظلمتك كما هي ، خير لك من أن تلقاه وقد اقتصصتها " ولا املك بعد الكلام دا  الا ان اقول  الله يسامح كل من ظلم ويرزقنا نعمة العفو  ويرفع عنا الظلم كله ويهدي الظالم لنفسه ويرحمنا برحمته حسبنا الله ونعم الوكيل

لو بس ..

لو يعرف الظالم بيعمل ايه ظلمه في المظلوم ..

لو يعرف الظالم هيتعمل فيه ايه لظلمه ..

لو يؤمن المظلوم ان دعوته ليس بينها وبين الله حجاب..

لو يعتقد المظلوم في ان حقه راجعله ولو مش في الدنيا دي ..

لو ربنا اراد له يقدر يرفع ايده ليه ويقوله يارب انت الحق رد الحق ..

اكيد كل الموازين هتختلف كتير ..

اللي تحت دي كنت نسيتها 

بفكرني بيها

علشان الدنيا متسواش 

بس الظلم مر اوي

ورحمة ربنا قريبة ان شاء الله

***

يمكن ببكي علي حالي   10 يونيو, 2008

المرض والموت

حاجتين قاسيين جدا علي الانسان خصوصا لو في حد عزيز والله وحتي لو مش عزيز بردة الواحد قلبه بيوجعه و بيتأثر بيهم اوي
بس بردة في حاجة غبية اوي بتحصل في الاوقات دي

لو رحت تزور مريض وعنده زائرين تانيين يووووووه باه تنقلب القعدة من عيادة مريض لجلسه نم و كل اتنين علي جنب مع ان الزيارة دي اساسا هدفها المفروض يكون ابتغاء وجه الله و اتباع لسنة المصطفي صلي الله عليه وسلم بس بنقول لمين

والاسوء باه في العزاء ... بتتقلب لنفس الحكاية مهو احنا مبقيناش بنشوف بعض الا يا اما في افراح يا اما في مآتم .. والمهم كلنا عارفين كده ودي الجملة اللي بتتقال من الكل تقريبا يمكن بنعاتب انفسنا اننا مش بنتجمع الا في المناسبات دي يا مفرحة اوي يا موجعه اوي

لا حول ولا قوة الا بالله
في بعض الساعات ان مكانش كلها مش بتلاقي وقت تروح تزور فيه حد عزيز عليك انما بتجبر علي انك تلاقي وقت في الوقت اللي يكون فيه الشخص دا اما مريض اوي وفي المستشفي او خارج منها او يكون قد فارق الدنيا بما فيها 

ليه يعني بقينا كده .. وانا منهم علي فكرة ان مكنتش اول واحدة في الصف دا.. مع الالم والاسف خيبة مني انا عارفة ... ربنا يعافينا منها

لما بروح العزاء بقعد في ركن كده و بحاول بعد السلامات اقعد اركز مع القرآن بس في معظم الاحيان يمكن الجو و شكل الناس وهما في السواد بينقل الحزن لي ( في حالة اني معرفش اللي توفاه الله يعني او رايحة تقضية واجب .. انا بصراحة عندي اروح العزاء دي حاجة مهمة اوي بحس اني بربي نفسي حتي لو معرفش اللي هناك اوي او ناس معرفة من بعيد ورايحة مع امي لمجرد اني بوصلها بس)

اه بربي نفسي ... علشان تتوجع و تحس ان الاجل هيجي ف اي لحظة .. وياريت بتعظ باه و احس .... وقتها طبعا بحس .. بتنزل دموع من عيني ايوة بتنزل و كتير جدا ... و بتزيد كل اما بشوف الناس حوليا بيعملوا ايه في العزاء دا

يعني جايين من كل مكان علشان تقوموا بالواجب و تاخدوا ثواب و تقفوا جنب الاهل والاحباب,,, بتسيبوا كل دا و تقعدوا ترغوا ف اي كلام,,, لا والاسوء اللي بيقعد يرغي و يضحك ... طب يراعوا اهل المتوفي يعني علي الاقل

انا باه ببقي في ملكوت تاني ... كل اما بركز مع القرآن و ابعد بذهني وتفكيري عن اللي حوليا كل ما بيصعب عليا نفسي زيادة 

كلنا هنموت اه .. الموت حق و علينا هيعدي لا مفر منه

لو مت دلوقتي ... النهاردة الثلاثاء .. هيتم دفني والصلاة عليا و العزاء بليل وانا أسال في قبري والناس في العزاء... مين فيهم بيدعيلي في العزاء دا .. مش هكون محتاجة الدعاء دا ... مين هيفتكر في القعدة دي يدعيلي ... هو في حد هيفتكر لي حاجة كويسة في الدنيا دي عملتها ... هو انا اصلا عملت حاجة كويسة علشان الناس تفتكرني بيها .. مهو لو عملت اكيد هيفتكروا.. بس اضمنها منين يعني .. الناس بتنسي.. و هتنسي .. هيروحوا يعزوا و يسيبوا الهدف من العزاء و ينزلوا رغي .. طب دا انتو اهلي اللي عاشرتوني في الدنيا .. خلاص كده نسيتوني .. لو حد افتكرني هيفتكرني اد ايه وبايه و لايه.. ياربي يعني اجي الدنيا وامشي من غير ما اعمل فيها حاجة ولا حد يفتكر ان في حد باسمي دا عاش في الدنيا ... 

ساعات ربنا يبعتلك حاجة خير تعملها في دنيتك .. بتفرح بيها علشان بتحس انها يمكن حاجة تتكتبلك في صحيفة اعمالك .. بس اااااااه باه لو ضاعت منك ولا لو ضعيتها انت .. بتحس بجرح في القلب لا يداويه الزمن .. مهو اكيد ربنا حرمني من الخير دا لعيب فيا او لذنب برتكبه .. بس ربنا بنا رؤوف رحيم.. يمكن شايلي حاجة تانية اعملها خير والله اعلم ... يمكن و يمكن بس مين يرحمني من الاحساس اني ممكن اكون فرطت في خير ربنا بعتهولي ينفعني ف اخرتي .. ياربي دلني او رجعهولي انا محتجاله وانت عارف وعالم بحالي 

ساعات القلب بيكون حساس اوي لظروف معينة و اي كلمة طيبة بتخليه يبكي شوقا و حبا لله .. وساعات بيحط عليه التراب والذنوب و بيبقي قاسي و بيكون عايز غسيل و مكوه .. ساعات كتير بروح ادور علي حاجة اوجع بيها نفسي علشان محسش اني ببعد عن اني اكون بحس كده و بشوف ايه اللي ممكن يوجعني ... مش وحشة بس بردة مش كويسة ... انسان بيخطيء و بيصيب 

جايز اشوفها حاجة وحشة وغيري يشوفني محبكاها .. و جايز اشوفها عادي و هي مصيبة .. ياربي لا تكلني الي نفسي طرفة عين .. انت عارف يا ربي اني بتوه ف نفسي و طريقي عليا صعب .. زيي زي غيري بس يمكن غيري عارف طريقه و شايفه .. انا بكرة عندي مش عارفة اشوفه ولو تخيلته بتوجع لما يجي و يطلع مش زي ما شفته ... نسيب بكرة لبكرة احسن وخلينا نحسن الظن بالله ان بكرة دا اكيد احسن من اليوم ان شاء الله

اقرب حاجة للي بقوله كنت قصيدة ليس الغريب ... يااااااااااه اوقات تبكيني وبتوجع من كل حرف فيها و ساعات بسمعها عادي جدا.. بس في الاوقات اللي ببكي فيها بحس اني عايزة اي حاجة تنقذني من الاحساس اللي بيوصفه ساعتها من كله من مرض الموت للطبيب اللي لا يداوي بامر الله للمغسل للكفن اللي يستر الجسد الذي لا حول له ولا قوة ومن قبلهم للروح وهي خارجة بامر الله للحمل علي النعش للصلاة علي المتوفي ياااااااه كلها حجات بتوجع اوي ربنا يعافينا و يجعلها يسيرة علينا وعلي كل من يهابها يارب .. وانزلوني الي قبري 

خلاص كده حدوتة الدنيا خلصت و هتيجي اللي اصعب منها .. مراحل كلها اصعب من بعضها ... يارب سترك ولطفك بينا يارب
اللهم ثبتنا عند السؤال ياربي .. يارب الهمني الثبات .. اللهم يا مقلب القلوب والابصار ثبت قلوبنا علي دينك واسترنا فوق الارض وتحت الارض و يوم العرض عليك

مراحل واحدة ورا التانية .... صعبة والله صعبه حتي الكتابة عن اللي بعد كده الله العليم باللي فيها .. ياربي لطفك بعبادك يارب

اللهم اجعل الدنيا في ايدينا ولا تجعلها في قلوبنا ... اللهم اخرجنا منها وانت راض عنا 
اللهم ارزقنا فعل الخيرات و حببها الي قلوبنا و اجعلنا ننفر من كل ما يغضبك ياربي

يارب اجبر بخاطرنا احنا ملناش غيرك