امي دايما تقول ان جدتي (الله يرحمها ويرحم امواتنا واموات المسلمين ) ان الحنية مش بتتشحت
كتير بقعد افكر في الجملة دي
انا متاكده انها صحيحة بس اللي قال لكل فعل رد فعل مش نافع في المكان دا
لو كنت حنينه علي حد مش شرط الحد دا يكون حنين عليا
كتير اوي بتتقابل الحنية بمنتهي القسوة و العنف
و كمان مش نافع حكاية فاقد الشيء لا يعطيه
ممكن حد مشافش حنيه و جواه حنيه كبيرة و ساعات بتحصل بردة اللي بيشوف حنية كتير في حياته ساعات بتحوله لاحساس بالتبلد او اللامبالاه والدلع
كل دول طبعا شواذ بالقاعدة
بس اللي مش عارفة افهمه ليه الحال مقلوب
هو مش المفروض لما اعاملك كويس تعاملني كويس و لما اعاملك وحش يا اما تدور علي السبب ورا المعاملة دي يا اما تبتعد عن المعاملة دي طالما بتضايقك
ليه باه الي حاصل في الدنيا غير كده
ليه الناس شكل تعاملها كده
ليه دي شكلها كبييييييرة اوي و الكلام فيها عمره ما هيخلص ابدا
بس اكيد يعني وراها سبب معين
اكيد الانسان مهما كبر عمله بردة ليه حدود و في حجات كتيرة هتفضل عليها علامات استفهام كبيرة
السؤال دا شكلي عمري ما هعرف اجاوب عليه
ولا يمكن ربنا يبعتلي حد يجاوب عليه بدالي الله اعلم
اعرف حد مينفعش يتوصف الا انه كالصخرة الجافة ساعات بقول عليه حاجة والله اعلم بحاله يعني هو مش قاسي بقدر ما هو جاف جداااااا في التعامل او عملي زي ما بيقولوا
انا باه بقول عليه انه زي الصخرة اللي ربنا قال عليها في سورة البقرة " وان من الحجارة لما يتفجر منه الانهار و ان منها لما يشقق فيخرج منه الماء وان منها لما يهبط من خشيه الله وما الله بغافل عما تعملون" لما بدات اركز في الاية دي مرة علي مرة حسيت ان الشخص دا قريب لوصف الحجارة اللي مسيرها يجي عليها يوم و يخرج منها الماء
لما حد من برة ميعرفهوش اوي يعني بيقول عليه انه طيب ولا حنين ساعات وقتها بتيجي علي بالي الصورة دي انه يمكن يكون زي الصخرة دي اللي يمنك لو دورنا جواها اوي من جوة اوي هنلاقي مية والمية هتبقي بتساوي حنية و مشاعر والحجات دي
بس سبحان الله بردة اهو ربنا بيخلي الناس مع بعضها بتتأقلم علي بعضها
يعني اهي ماشية بستحملك وبتستحملني
وان زهقت ف يوم شوية برجع استحمل تاني وايه يعني مهو مفيش ليها بديل تاني يعني
واهي ماشية و نرجع نقولها اااااااااااااه منك يا دنيــــــــــــــــــــــــــــــا ادينا راضين ياربي كل قضائك خير
بالحنية ولا بالقسوة اهي ماشية الحمد لله :)
هناك تعليقان (2):
بتكتبى فى موضوع كبير يابنتى ( الحنيه )
مش عارف ارد عليكى ازاى فيه ولو رديت هايكون رد ملخبط لكن امرك لله واستحملى عمك .
الحنيه دى بترجع على ماتربى عليه الانسان
يمكن شخص يكون مظهره القسوه حتى على ابنه او بنته لكن جواه بركان حب ليهم
بيقسو عليهم عشان يكونوا احسن وبعد عقابهم يقفل على نفسه حزين .
لكن عارفه مافيش احن من ربنا علينا
عمك بيلخبط فى الكلام لكن أعمل ايه بتكتبى فى موضوعات عاوزه استاذ علم نفسك بس كتابات جميله واجمل مافيها انها بتخلى الواحد يقراها اكتر من مره .
ربنا يوفقك .
مش عارفة بصراحة حكاية علي ما اتربي دي ايه موقعها من الاعراب عندي
بس اللي اعرفه ان حتي لو بتقسوا في احيان بتكون حنين في احيان اخري
انما علي طول قاسي يبقي نموذج مختلف عن اللي حضرتك بتتكلم عليه
بس زي ما قلت انا في الاول حنيةولا قسوة اهو كده كده الايام بتتعاش والحمد لله علي كل حالك)
إرسال تعليق