عايزة احكي ف اي حاجة علشان مفكرش ف اي حاجة تانية بس مش عارفة احكي ايه .. الدنيا فيها حجات كتيرة تتقال او يتحكي عليها بس انا كل اما اروح ف ناحية بدماغي الاقي فيها حاجة متعجبنيش
والله ما انا عارفة باه .. هو انا يعني اللي غلط علي طول الخط ولا العيب فين
لو انا غلطانة او لو انا صح اعمل ايه
العيب فين باه انا تعبت وانا بدور الصح فين
الصح اللي عارفاه و كنت فاكرة روحي كده وصلت لحل مع نفسي .. طلعهولي غلط .. واللي فاكره غلط ولا حتي مش مناسب لي طلعوه صح وحتي لو هما صح وانا غلط بس انا مش ممكن اكون ف كل حاجة غلط كده
ما ربنا خلقنا جوانا الصح والغلط والخير والشر .. ولو سيبت الغلط يطلع مني والشر اكيد هيطلع ف مرة علي الاقل خير او حاجة صح
انا مش عارفة اعمل ايه باه .. اغير ايه علشان ارتاح .. كنت عادي زي اي حد شوية راضية عن روحي و كتير لا بس عارفة امتي ببقي بعمل حاجة غلط وامتي بعمل الصح .. دلوقتي طلعت كلي غلط ولا حتي يمكن الغلط بقي صح كمان
يااااااارب دلني اعمل ايه انا تعبت
تعبت حتي من التفكير ف اني عايزة اعرف
يا ربي تولي امري ودلني اروح فين ولمين يدلني غيرك
هناك 10 تعليقات:
طول ما انتى قريبه من ربنا اكيد ربنا هيقف جنبك ومش هيتخلى عنك ابدا.....وان شاء الله يدلك على طريق الصواب
تحياتى شفقة
يااااااااارب
نورتي شفقة
ربنا يعزك
معاكي حق محدش ممكن يدلك علي الصح غير ربنا صلي استخاره وهو يكتبلك اللي فيه الخير !!!!! هو ايه الموضوع بالضبط علشان نعرف نفيدك لو عندنا حل , والسلام ختام
معلش يا احمد هي كانت خنقة كده و مناقشة ملهاش لازمة مع كام حد كده مختلفين عني و من كتر ما اتكرر نفس الكلام حسيت اني تايهه وطلع مني الكلمتين دول
انا كنت بفكر امسحه بعدها بس قلت اسيبه هو زي اللي قبله كلها حجات عدت عليا واخدت مني و محدش عارف بكرة في ايه
بس ربك مفيش اكرم منه بعد ما كتبتها حصلتلي حاجة مسحت دموعي و بدلتها فرحة ف قلبي بدل الدمعه اللي علي خدي
سبحانه جابر المنكسرين
مش انا قلت الله الجبار مفيش مرة نقوله اجبرنا الا و تلاقي اللي يطبط عليك بامره سبحانه وتعالي
كفاية دوشة مني لحد كده
وتسلم علي زيارتك
اه بخصوص الاستخارة
الموضوع اللي قبل دا علي الحاجة اللي حاسة حنيتها بالحيرة بصلي عليها استخارة من شهر ونص تقريبا كل يوم وساعات مرتين و مين عارف
ربنا يكرم باللي فيه الخير ويرضينا بيه:)
اليس افتكرى دايما ان الدنيا دار اختبار وليست دار قرار وتذكرى الاية الكريمة
(الذين امنوا وتطمئن قلوبهم بذكر الله الا بذكر الله تطمئن القلوب )
وربنا يوفقك الى ما فية الخير
اخوكى صميدة
ونعم بالله
صدق الله العظيم
بارك الله فيك يا باشمهندس
هو اصلا ملناش غير ربنا نلجأ له سبحانه وهو فعلا زي ما قال في كتابه العزيز " الا بذكر الله تطمئن القلوب "
اللهم اجعلنا من الذاكرين الله كثيرا والذاكرات
نورتنا :)
الحيرة دى دايما الناس اللى بتحاسب نفسها هى اللى بتقع فيها
صلى وادعى ربنا هتلاقى نفسك بقيتى اهدى
أبي ،، محاسبة النفس دي حاجة اكبر مني بكتير اوي انا يادوب لو فكرت ف تصرف عملته و ضميري وجعني علي ليه عملت كده ممكن يقلب يومي كله هم وغم لحد ما ربنا ينعم عليا بالنسيان
بيتهيالي محاسبة النفس دي حاجة تانية انا موصلتلهاش ابدا
الله المستعان هو وحده اعلم بينا و قادر يهدي حالنا لما فيه رضاه :)
نورتينا
بصي يا اختي الفاضلة
اولا حضرتك بعد قرايتي للموضوع الغريب ده
تهت شخصياومش عارف أتلم على نفسي من ساعتها
المهم يعني بعد لملمة اللي بعترتيه ده قدرت أحدد موقف معين
واختار رأي ارد عليكي بيه في المدونة هنا
أولا متهيألي اني قلتلك قبل كده
ربنا سبحاته وتعالا لم يعطنا سلاحين هما العقل والقلب
عشان نقول مش عارفين الصح ولا الغلط
حتى الرسول صلى الله عليه وسلم قال
(( الحلال بين والحرام بين ))
هو فعلا في ساعات كتير الواحد بيتوه
ده يرجع في المقام الأول أنه ضيع حق ربه
وبعد عنه
ده ابسط حاجة صلاة الاستخارة
احنا لما نبقا عايزين نشتغل في البورصة
وعايزين نضمن الربح بأعلى فرصة
بنروح نسأل مستشارين مختصين في المجال ده وبنعتمد على خبرتهم
تخيلي في حالة البشر دي متاح لهم يستفيدوا من علم الله
ويستروا جهلهم انهم يستيخروا الله
يبقا رحمة ربي واسعة ومش فاضل غير أني استغلها
واستغل اللي ربنا سهلهولي من علم
واحدد الصح والغلط على هذا الاساس
الصح اللي يرضي ربي ويقربني منه
والغلط الي يغضب ربي ويبعدني عنه
يبقا أمامك قاعدة واساس معين وانتي هتبني عليه أهو
وبعدين حساب النفس مهم جدا
خاصة لو كان بشكل منتظم بيوضح الأخطاء اللي وقعتي فيها قبل كده ويمنع وقوعها تاني
ثانيا خليكي واثقة في نفسك أكتر من كده
عشان تعرفي تكملي في الدنيا مش أي كلمة تستحق تهزك
لو عارفة أنك صح ومش بتغضبي ربنا يبقا تثبتي
وما تستنيش رأي حد
ولو حسيتي مجرد احساس بسيط انك غلط
استخيري ربك
واسألي القريبين منك واستفيدي بخبرة الناس
وبرضك في الأخرة حكمي عقلك وقلبك
دول نعم ربنا لينا عشان نعرف نكمل في الحياة
اشكرك على الموضوع ولو انه توهني:D
بس يلا حصل خير
التوقيع THE WHITE KNIGHT
ازيك قبل اى حاجة
ممكن نتكلم شوية مع بعض
0126109506
ياسر
إرسال تعليق