السلام عليكم
كان بودي احكي ف حدوتة تانية بس سمعت انا تريقة علي الكتكوت :(
هتخليني أأجل الحدوتة التانية لحد ما انسي:)
والله فكرة حلوة جــــــــــــــــــــــداااا
هي لسه وليدة اللحظة دي بس حلوة و ان شاء الله تبقي كويسة
هي حلوة علي الاقل بالنسبة لي
خاطرة او تجربة كده مع اسم الله الجبار
الاول اجيب المعني و بعدها اقولكم حكايتي مع الاسم ايه
اجاب الشيخ صالح بن عثيمين عن معني اسم الله الجبار بالتالي:-
الجبار له ثلاث معان:
الأول: جبر القوة، فهو – سبحانه وتعالى- الجبار الذي يقهر الجبابرة ويغلبهم بجبروته وعظمته، فكل جبار وإن عظم فهو تحت قهر الله – عز وجل- وجبروته وفي يده وقبضته.
الثاني: جبر الرحمة، فإنه سبحانه يجبر الضعيف بالغنى والقوة، ويجبر الكسير بالسلامة، ويجبر المنكسرة قلوبهم بإزالة كسرها، وإحلال الفرج والطمأنينة فيها، وما يحصل لهم من الثواب والعاقبة الحميدة إذا صبروا على ذلك من أجله.
الثالث: جبر العلو فإنه سبحانه فوق خلقه عال عليهم، وهو مع علوه عليهم قريب منهم يسمع أقوالهم، ويرى أفعالهم، ويعلم ما توسوس به نفوسهم.
انا باه حكايتي مع المعني التاني دا
ولو قعدت اكتب واكتب واكتب عمري ما هعرف اوصف حلاوة اسم الله الجبار و فضله عليا بحق الاسم دا
نبتديها من الاول خالص .. من حوالي 3 ولا 4 سنين مرة في رمضان في برنامج كنوز علي قناة اقرا كان عمرو خالد بيتكلم عن اسم الله الجبار .. سبحان من نزل السكينة علي قلبي بالاسم دا مع ان المتعارف عليه يعني اكتر المعني الاول و مش ناس كتيرة تعرف المعني التاني دا
المهم عمرو خالد يومها قال كلمة دخلت قلبي و عقلي وملت عليا كل وجداني :" الله جبار يجبر المنكسرين و يقصم الظالمين " يعني لازم الظالم يقصمه الله حتي يرد ويجبر كسر المنكسرين
سبحانك يا جبار ما اعظمك
المهم من لحظتها دي طلعت بدعاء لم يفارقني في اي لحظة انكسار و دايما دايما بقوله و بقوله لاي حد اعرفه لاني علي يقين اووي انها دعوة لا ترد باذن الله والله والله عن تجارب كتيرة مش تجربة واحدة
<<<< اللهم يا جابر المنكسرين .. اللهم اجبر كسري ... اللهم اجبرني يا جبار >>>>
حتي وانا بكتبه دلوقتي يعلم ربنا احساسي بالدعاء دا ايه و بكرم ربي الكريم عليا بفضله و استجابته للدعاء دا
سبحانك يا جبار ما في مرة دعوت الله بهذا الدعاء في وقت ضيق و ضلمة بالنسبة لي و كنت مظلومة الا و ربنا بعتلي اللي يمسح دمعتي و يطيب بخاطري و كتيييييييييييير اوي بحس ربنا بيطبطب عليا بحاجة بتحصلي استجابة للدعاء دا
بحسها وبعرفها علشان عارفة ان الله سميع مجيب يجيب دعوة الداعي اذا دعاه و انا وقتها بكون بدعيه باسم عظيم و بساله جبر كسري
يااااااااااااااااااااااااه والله اد ايه استجابة الدعاء ليها حلاوة
الحمد لله رب العالمين
حواديتي مع اسم الله الجبار لا تعد كتيييييييير اوي اوي اوي سبحانك يا ربي
مش عايزة اطول عليكم بس من كترهم مش عارفة احكيلكم انهي فيهم
طيب اقروا مني دي و احكموا انتو :)
بلاش حاجة شخصية اوي يعني خليها شوية علي المستوي العملي
من سنتين كده في شغلي كنت في ضيقة و احساس بالظلم فظييع واستمريت في الحكاية دي يجي شهرين كنت وقتها ابتديت اول تيرم في الماجستير و بطبيعه الحال يعني انا علمي في الدراسة دي قليل جداااااااااا انا خريجة ألسن - قسم انجليزي وبعمل ماجستير في الزراعة :) حتي الخبرة اللي اخدتها من شغلي في جزء معين من الدراسة انما بدرس حجات تقريبا كلها معرفش عنها اي حاجة وخصوصا كمان اني كنت ادبي ... المهم علشان مطولش عليكم عدت فترة ال 3 شهور الاولي و امتحنت الميد تيرم و طلعت نتيجته ومن بعدها جاتلي فترة الضيق اللي بحكي عليها دي و استمرت لمدة ال 3 شهور لحد ما جه وقت امتحان الفاينل و امتحنت و كنا داخلين علي رمضان وقتها من سنتين
وكنت باستمرار بدعي ربنا ان كان لي حق انا مظلومة فيه يردلي حقي او يرضيني انا راضية باي حاجة ربنا يعملها ومش هعترض لاني حاسة ان محدش بياخد اكتر من اللي مكتوبله وان كل افعال ربنا فينا خير لو مكانتش خير لي هتبقي خير لحد تاني
المهم يشاء ربنا ان النتيجة تطلع والاقي اني طلعت الاولي علي ناس دا شغلهم و خبرتهم فيها قوية اوي ما شاء الله عليهم يوم ما كلمني الدكتور علشان يقولي مبروك حسيت كان نسمة هوا باردة عدت علي قلبي و مكنتش مصدقة علشان مش فعلي دا ... دا فضل ربنا ومشيئته مش عملي فعلا ... انا مكنتش مصدقة بس افتكرت الدعاء و حسيت ان ربنا بيطبطب عليا وبيقولي ان كان ليكي حق ف حتة تانية خدي دا انا جبرت بخاطرك في الحاجة دي ودي كبيرة اوي ... ( مش عايزين نق ولا حسد هه علشان الموقف دا اتكرر بفضل الله ومنه وكرمه :) قولوا ما شاء الله لا قوة الا بالله )
المهم من الحكاية دي دخلت علي حكاية تانية فيها جبر خاطر من الله الجبار بردة بس حاسة اني دوشتكم يمكن احكيلها مرة تانية :)
كفاية كده المرة دي بس عايزة اقول كلمة اخيرة
لو يوم حسيت انك محتاجله روحله مع اننا محتاجينله دايما دايما بس في اوقات بنكون احساسنا بالاحتياج لله اكبر
اوعي تتردد انك تلجأ لله الواحد الاحد الجبار :)
الله يجبر بخاطركم جميعا و بخاطر المسلمين في كل مكان :)
هناك 3 تعليقات:
السلام عليكم ورحمة الله وبركاته
حياكم الله وبياكم أخوانى وأخواتى
وجعل الجنة مثواى ومثواكم
وسدد الله على طيق الحق خطاى وخطاكم
جزاكى الله خيرا اختى اليس على الموضوع الجميل اوى دا واسمحيلى أعلق عليه وأضيف حاجات بسيطة أهى فرصة الواحد يتكلم شوية هو كمان :
قال ابن القيم فى نونيته :
وكذلك الجبار من أوصافه**** *والجبر فى أوصافه قسمـــــان
جبر الضعيف وكل قلب قد غدا***** ذا كســرة فالجبر منه دان
والثانى جبر القهر بالعز الذى***** لا ينبغى لسواه من إنسان
وله مسمى ثالث وهو العلو***** فليس يدنو منه من إنســــان
من قولهم جبارة للنخلة الـ **** عليا التى فاتت لكل بنـــــــــان
دعاء الله باسمه (الجبار) .
قال الله تعالى ((( ولله الإسماء الحسنى فادعوه بها )))
***روى الترمذى وصححه الشيخ الألبانى من حديث عبد الله بن عباس –رضى الله عنه – أن رسول الله – صلى الله عليه وسلم- كان يقول بين السجدتين : [ اللهم اغفر لى وارحمنى واجبرنى واهدنى وارزقنى ]
قال ابن الأثير : واجبرنى أى : أغننى , من جَبَر الله مصيبته : أى ردّ عليه ما ذهب منه وعوضه , وأصله من جبر الكسر ...
***وعند الطبرانى وحسنه الألبانى من حديث أبى أمامة – رضى الله عنه – قال : ما صليت خلف رسول الله –صلى الله عليه وسلم – وأنا قريب منه إلا سمعته يقول فى دبر كل صلاة : [ اللهم اغفر لى ذنوبى وخطاياى كلها , اللهم انعشنى واجبرنى واهدنى لصالح الأعمال والأخلاق , فإنه لا يهدى لصالحها ولا يصرف سيئها إلا أنت ]
***وكان –صلى الله عليه وسلم – أيضا يعظم ربه بهذا الاسم فى الصلاة فى الركوع والسجود كما جاء فى حديث عوف بن مالك الأشجعى أنه كان يقول فى ركوعه : [ سبحان ذى الجبروتِ والملكوتِ والكبرياءِ والعظمة ]
الكلام اللى فات دا كله منقول أخوانى وأخواتى من موقع أخوات طريق الإسلام
وقرأت مرة على منتدى ان كان فيه اخت ليها جار بيؤذيهم اوى فواحدة صاحبتها نصحتها تدعو الله باسم الجبار
اختنا دى فضلت حوالى شهر لا تدعو الله إلا باسم الجبار وسبحان الذى يمهل ولا يهمل ما هى إلا أشهر قليلة وجارهم دا نقل لبيت تانى بعيد عنهم
كفاية كدة بأه اصل تعليقى هيبقى أكتر من كلام اليس نفسه وخايف تمنعنى من دخول المدونة تانى وبالتالى مش هلاقكى مكان أتكلم فيه ولو انى بروح عند صبرنى مدونتها أتكلم هناك بردو
ربنا يبارك فيهم يارب بيسبونى أقول اللى انا عاوزه
نفعنى الله واياكم بالقرأن الكريم وما فيه من الأيات والذكر الحكيم
السلام عليكم ورحمة الله وبركاته
EgyXQ8
الله يعزك يا ايجي :)
بجد اضافة جميلة ربنا يكرمك
وبعدين ارغي براحتك يا سيدي البيت بيتك واحنا اللي ضيوف مش كفاية انك مستحملني يعني وانا اللي برغي فعلا:$
الحكاية اللي قريتها علي المنتدي دي انا عيشت منها كتير اوي ربنا فضله واسع و صحيح يمهل ولا يهمل ابدا بس يبتلي الانسان ليري هل يصبر و يشكر ولا هيقول ليه يارب عملتلي كده
ربنا جميل و مفيش احن منه علينا مهما الناس حبتنا و قربت مننا بردة مفيش احن علينا منه سبحانه وتعالي
الله يديم بينا المعروف و ترغي عندي وعند خالتي :) دي هي الخير والبركة ؛)
ولو انها بتقولي ربنا ما يحرمك منه انا اعتبرتها يعني نيتها سليمة و بتقولي علي حد معين يعني فقلت وراها امين:) بس ان كانت تقصد الحاجة التانية دي هي حرة باه مش هتعرف تخلص مني هي عارفة:)
ربنا يديم بينا المعروف يارب
فعلا يا اليس الواحد ما يعرفش الخير فين ولا ربنا شايل لنا ايه
الواحد يدعي ربنا وربنا زي ما بيقولوا بيقطع من هنا ويوصل من هنا ده حقيقى .
وصدقنى انا دايما اقول لما اجي ادعي بحاجه معينه اقول يارب لو فيها اخير اكتبهالي ولو فيها شر ابعدنى عنها .
وطبعا سواء جت او ما جاتش بابقى راضيه جدا ومقتنعه ومتأكده ان ده الخير ليا . وان الحمد لله ربنا استجاب دعائي .
ويا ايجى انت ترغي فى اي مكان وتنور دايما يارب مدونتى ومدونة اليس .
إرسال تعليق