هم .... لا ....أنت

لم يرضوا

ولا يرضوا

ولن يرضوا

بس مضطر تسمعهم

مضطر تعيش وسطهم

مضطر اه

بس مش صعب الاستغناء عنهم

الصعب صحيح وبجد

الاستغناء عنك ليهم

لا تستغني عنك ابدا

هتلف تلف وترجع تاني تدور عليك

فخلي بالك منك

***

Rules

*******

No Comment

كان واجب ..

اذا حصل ومسحت 2009 من ذاكرتي لانها اكتر سنة عشت فيها الم جسدي ومازال .. بس الحمد لله نعمة من ربنا .. كنا فين وبقينا فين .. كده رضا اوي الحمد لله

اذا حصل ومسحت النص التاني من 2008 من حياتي بدون ابداء اسباب

ارجع للنص الاولاني من 2008 .. كنت مبسوطة اني بدرس و بحس باحاسيس بنت حلال اوي وانا بتعلم حاجة جديدة .. احساس ان العقل بينور و بيتشال من عليه التراب و الهم والغم .. رب زدني علما وفهما وادراكا .. نعمة والله العلم دا

كنت بدور علي نموذج سيرة ذاتية علي الايميل عندي في الرسائل المرسلة قلت يمكن كنت عملت حاجة زمان فيما مضي .. بس ملقيتش .. لقيت ايميلات كنت بعتاها لناس من سنين طويلة و قعدت اضحك علي الكلام اللي كنت كتباه .. ساعات كان شكوي وساعات حاجات مضحكة وساعات بقول لا بجد عبيطة عبيطة ومازلت مفيش فاااااااايدة باه عيب كده .. ربنا يهديني

تصفحا كده لتدوينات السنة اللي فاتت .. في حاجات كتيرة منهم لقيتني بقول " ايه دا هو انا كنت بقول الكلام دا فعلا؟" وفي منهم اللي عيشني لحظات حلوة في منها المبكي خصوصا كل ما يتعلق بامنيتي التي لم يرد الله ان تتحقق حتي يومي هذا بزيارة بيت الله الحرام و حكاياتي مع الامنية دي .. رجعتني لمشاعر جميلة اوي وذكريات طيبة .. قادر ربنا علي كل شيء

اللي ضحكني مني جداااا تدوينة اسمها حل الواجب ومن يوليو 2008 الي 01.01.2010 حصل كتير اوي اكيد ..

الواجب ساعتها كان اذكر 6 اسرار قد لا يكتشفها من يقابلك لاول مرة !!

ال 6 حاجات اللي كنت كتبتهم وقتها لسه زي ما هما ان مكانوش زادوا .. مفيش فااااااااااايدة مني

بس اللي ناوية اتخلص منه بشكل جاد ان شاء الله وربنا يقويني علي نفسي بجد فيه اني ابطل اقول كل حاجة ..

هيجري ايه في الدنيا لو الناس بطلت تتدخل في شئون غيرها؟؟

انا مش عايزة اتكلم في موضوع معين .. خلصنا باه مش لازم الزن

لا هو مش دا اللي اقصده

اقصد يعني فرضا اني مش عاجبه حد معين في فكري ولا تصرفاتي ولا شكلي حتي ولو ان دي خلقه ربنا مينفعش فيها اعتراضات .. بس يعني طالما مش مرتاح للي قدامك .. بتتعامل معاه ليه طيب ؟؟ .. مش قالوا زمان شيل دا من دا .....

انتي يا

2010

بصي

انتي لسه بتخبطي علي الباب صحيح

ومش باين منك لسه خير ولا شر

بس مع بعض التفاؤل

والكثير من حسن الظن بالله

بصي باه

مش هيتدخل الا اللي مسموحله يتدخل

هشوفلي حاجة عليها القيمة تنفع اتعلمها

بس الرسالة الكابوس دي لازم تخلص الاول باه علشان عيب كده

ربنا يرزقني بصحبة صالحة وناس كويسة

عدت سنة ونص وانا بلا قيمة في الحياة

مزادش عليا خير بس زدت سوءا علي سوء

والمهزلة دي لازم تقف باه علشان كفاية كده

قبل ما تخلصي يا 2009 ...

نصحني زميل اني اضحك في برواز الشركة علشان الصورة تطلع حلوة ..

هو التعبير تعبيري بس هو دا اللي كان يقصده .. "كوني منافقة و صاحبة للكل تبقي علي راس الكل" .. وبما انها في نظري نصيحة فاشلة قولا وفعلا و نتيجتها سودة ان شاء الله علي قائلها وفاعلها و بما اني عشت عاملة وقفلت 8 سنوات من العمل الجاد واحسب اني عملت حاجة في العمل او علي الاقل اديت اكتر ما اخدت بكتير اوي .. وفي نفس المكان اللي هو بقاله فيه سنة ونص .. مازلت مؤمنة بأنه لن يصح الا الصحيح وتغور المصلحة اللي تتعمل وهي متغطية بنفاق .. والحلال بس هو اللي بيدوم

وبما انها نصيحة غير مقبولة وبما ان التيار الايام دي مع اصحاب مثل هذه الافكار والمعتقدات ..

وأنتي بتبتدي يا 2010

ياااااا رب يرزقني بوظيفة مضطرش فيها اتعامل مع شخص لا احترمه لاسباب وظيفية او اخلاقية

هي دعوة واسعة شويتين الايام دي بس اكيد لسه في حد كده ... الله المستعان

يا رب ارزقني بفضيلة او قيمة مش فيا وارزقني اتعلم حاجة انتفع و انفع بيها ورجعلي خير انعمت بيه عليا وضيعته بجهلي بقيمته ..

يا رب ميباتش حد في الدنيا محتاج ايد تطبطب عليه الا ويحس بيها .. كبير او صغير

ساعات كتيرة بنكابر اننا مش محتاجين الطبطبة دي .. بس الحقيقة اننا كل اما كابرنا اكتر .. كل ما كنا محتاجنلها اكتر من غيرنا

الله المستعان و لعله خير :)