ماما ممكن اجي في حضنك
لا
ماما خديني في حضنك
لا
ماما ممكن اجي في حضنك
لا
لا
لا
قولتلك لا
ويلا امشي من هنا
((ام زعلانة من ابنها الطفل الصغير فرفضته بمنتهي القسوة))
هل ممكن توصل الوحشة بحد كبير او صغير انه يشحت حضن من حد؟
بتوصل
بتوصل لانه يتمني لو الشجرة اللي في الشارع بصتله بعين رأفة وخدته في حضنها
بتوصل لانه يحضن الدنيا بعنيه
يدور فيها علي حد يستقبل اشارات الوحشة اللي ملياه يملي بيها حضنه ووحدته
سمكة القرش اللي زمان كنا بنشوفها في عالم البحار
ماشية في المية و جنبها لازق فيها ابنها الصغير
الحيوانات عموما بتحن علي ولادها
معرفش ان كان حصل ان في حيوان حاول يقتل ضناه مثلا او يأذيه او يأذي مشاعره
حضن لله
مش هيضر ضناك
كبير كان او صغير
لو كبير متقولش خلاص كبر معادش محتاجه
لو كبير هيبقي مشتاقله بس خايف تتهمه بالضعف وانك معرفتش تربي راجل كبير
لو شفت الدمعة في عين ابنك
خليه يبكي في حضنك متقولوش الراجل مبيبكيش ..
كفاية انه بيحس و في قلبه لسه في رحمة ..
سيبه يغسل همه بدمعته
دمعة الراجل غالية اوي غير الست و مش هتنزل منه الا لو جواه كتير
لو ابنك صغير او كبير
لازم تصدق انه مهما كبر بيفضل مستنيك في يوم تيجي تاخده في حضنك
بس مبيجيش اليوم دا علي بالك ابدا
لو شفت ابنك بيتألم قدامك نتيجة لغلطة عملها
هتجري عليه تخفف ألمه؟
ولا هتقف مكانك تأنبه
ازاي مسمعش نصيحتك؟
ايه اللي خلي الناس تقول الراجل ميبكيش؟
مش مخلوق زيه زي المرأة ؟
مش بيحس وعنده آلام و مشاعر؟
الرسول صلي الله عليه وسلم كان بيبكي في مواقف كتيرة
الصحابة رضوان الله عليهم كانوا بردة بيبكوا في مواقف بعينها
مين اللي فرض علي الزمن دا يبقي القسوة فيه كده ؟
ادوهم حضن لله
بدل ما بيدوروا عليه برة
وترجعوا انتو تبكوا بدل الدموع دم
علي الحضن اللي استخسرتوه في ضناكم
ولقاه عند غيركم
وسقاه مرارة وذل
ولا عمره هينساهم
حضن لله
يرحمكم الله
هناك 14 تعليقًا:
السلام عليكم ورحمة الله ،،
بقالي كتير مش بعلق في مدونات ،، وحسيت ان دي مدونة طازة شوية وقاسية شوية .. مش المدونة كلها طبعا قصدي العنوان ده تحديدا
هو احيانا بتعتبر القسوة دي طريقة تربية،، ودي من وجهة نظر كثير من الآباء متهيألي انامعهم في جزء من الموضوع ،، المفروض يبقا في حزم بس ما توصلش للقسوة ،، انا ممكن ابقا حازم مع ابني عشان يبقا راجل ،، بس لما اقسى عليه واكسر قلبه ،، يبقا انا الخسران وخسرت ابني معايا ..
الراجل زي المرأة اه ليه مشاعر وأحاسيس وبتفيض بيه ،، بس حكمة ربنا ان جعل الفطرة ان يكون اكثر منها تحملا،، يعني مش اي حاجة كده تخليه يبدأ يعيط ويقول يا رتني وما رتنيش ،، هو المشكلة يمكن ان في آباء كتير بتبالغ وبيعتبر نفسه على حق في الموضوع ده وزي ما في آباء بتبالغ في أبناء بتبالغ بنفس القدر وبيعتبر اقل تصرف حازم قسوة من والده أو والدته ،، بس الأب والأم الي بيعملو كده مش بيبقا قاصد ومتعمد يقهر ابنه ،، هو طبعا يتمناله الافضل في الدنيا ويتمنى انه تكون الدنياكله ملك ايديه وبيعمل كل ده عشان ابنه يتعلم ،، يبقا الغاية موجودة والوسيلة هي الي غلط ،، ياااريت الناس تحن على بعض زي ما قلتي وياريت نعدي لبعض شوية يمكن الموضوع يخف شوية ،، بس للاسف ده كله من غلب الناس ،، في وقتنا ده كل واحد طالع عينه في حاجة وما بيصدق يفش غله في اي حد حتى لو كان ابنه
معلش عى الاطالة ،،، ربنا يهدينا ويهدي المسلمين
التوقيع / اونـكل The White Knight
كلمات جميلة ولكن من يعى وينفذ
السلام عليكم ورحمة الله وركاته
اللى يعرفك ... لازم يفهم ان الكلام ده مايجيش غير من اليس والله يا بنتى ممكن جداا عصبية الواحد تخلى ابنه او بنته يهربوا حتى من الكلام معاه .. او احيانا اى حد منهم يحب يتكلم فى موضوع تلاقى الاب بيسبق ومايديش حد فيهم فرصه بجد حاجه بتخلى الاب يعد شويه يندم و يجى بعدها يحاول يصحح غلطه لكن مين يسمع .... يارب قدرنا على ان نكون حنين على ابنائنا بس الطبع غلاب للاسف .
عمك مدحت
تصدقى بالله
لسه النهارده واحدة صاحبتى بتقولى
ماتخلينا نحن على بعض
مافهمتش فى الاول
قالت لى احنا تعبانين
ومحتاجين حنان
نعوض بيه
الحاجات اللى بنشوفها من الناس التانية
رجعت من الشغل
لقيت كلامك الجميل
جزاك الله خيرا
اونـكل The White Knight
:) حلوة المفاجات دي
وعليكم السلام ورحمة الله وبركاته
قاسي؟؟
العنوان مش قاسي يا دكتور .. العنوان دا نبتة قساوة بس مش هو القسوة ابدا
انا معاك في ان الحزم مش هو القسوة
تبقي حازم مع ابنك علشان تقوي ظهره و تسنده لحد ما يبقي عارف يقف لوحده و يواجه الدنيا بقرفها و مشاكلها .. موافقة
بس دي مش طريقة تربية
و اكاد احلفلك اني مشفتش حد طلع سوي من تربية بالشكل دا .. دايما جواه حاجات مش سوية من اول الافكار و الاحساسيس لحد التصرفات و الاسوء الله اعلم بيه
تصرفات الآباء مع الابناء و العكس .. كلها رد فعل لخبرات سابقة .. يا اب اتربي هو كده اصلا .. فبقت معتقداته ان التربية بالطريقة دي هي التربية الصح .. يا يكون الاب اتربي سايب في سايب و داق مرارة الفشل في حياته فحاول يظبط حياة ولاده فقلب مفاهيمه 180 درجة .. انا اعرف ناس كده فعلا .. وبيتهيألي انهم مش ناجحين حتي وان بان ظاهريا انهم فلحوا في خطتهم!!
كلنا بنقول يا ريت الناس تحن علي بعضها يا ريت
ليك حق ان الكل تعبان و يمكن بيطلع غلبه في غيره .. بس عيشة ايه دي اللي محدش عارف لا يرتاح ولا يريح غيره ؟؟ مش ممكن يكون ربنا اراد لنا الحياة في الارض علشان تبقي شكل حياتنا كده .. اكيد في حاجات غلط راكبة فوق بعضها وصلتنا للحالة دي
اطالة ايه بس دا انت نورتني و المفاجاة اسعدتني جدااااااااااااا :)
يارب يهدينا ويهدي المسلمين
يارب يارب
------------------------------------
موناليزا
اصل الكلام ببلاش يا اختي .. هيبقي لا فعل ولا كلام :(
الله يهدي حالنا يارب
نورتي يا اختي العزيزة وان شاء الله تكوني بخير :)
------------------------------------
عم مدحت
وعليكم السلام ورحمة الله وبركاته
اهو اللي حضرتك بتحكيه دا نقطة في بحر غلطات من الطرفين
وكل طرف منهم بيعند علي روحه وعلي التاني
ونفضل كده
مش لاييقين كرسي يقعدوا عليه الاتنين يتفاهموا
و تركب ترسبات علي ترسبات اقدم منها و هكذا
لحد ما يتبني جدار رهيب من الصمت
وصدقني مفيش حاجة مهما حصلت بتأثر في الجدار دا خلاص .. بيبقي فات اوان اي حاجة تكسر الجدار دا
يارب الناس كلها تحن علي بعضها .. بس تكون حنية حقيقة مش علشان مصلحة ولا علشان تكسب بيها علي حساب غيرها
يارب
------------------------------------
لقد خلقنا الله احرارا
لا اله الا الله سيدنا محمدا رسول الله صلي الله عليه وسلم :)
سلميلي علي صاحبتك دي الله يعزكم يارب
عارفة
مجرد انك قعدتي سمعتي منها الكلمتين دول
دي في حد ذاتها حنية منك عليها وعلي نفسك
بردة الواحد لما يحس انه انسان لسه بتفرق اوي في نفسيته
جزاكي الله خيرا علي حسن المعاملة :)
ودايما يارب نحس بالغير علشان نلاقي اللي يحس بينا
نورتي يا استاذة :)
السلام عليكم ورحمة الله وبركاتة ،،
ماشاء الله بجد كلمات جميلة ورقيقة
وربنا يجزيكى خير عليهاباذن الله
وفعلا الواحد بحتاج الحنان فى اى وقت من الصغير والكبير والله لان فعلا مهم جداااااااااااا
السلام عليكم ورحمة الله
والله ربنا يستر من جدار الصمت اللى بتقولى عليه ده خايف يكون البناء تم ابدأ فيه بندم أنى اقنعته بالالتحاق بالدراسه فى القاهره ربنا يستر .
طهر فؤادك
ربنا يكرمك يا رب ..جزانا الله واياكم والمسلمين خيرا
كتر خيرك .. متنسناش باه :)
علي خير يارب:) وربنا يتقبل ان شاء الله
عم مدحت
ايا كان اللي حصل حصل خلاص
بس متسيبهوش يعلي زيادة
واتكلم معاهم بس مش وانت لابس عباية الاب الناصح
البسها وانت لابس عباية فيها ود و حنية و خوف عليهم
واللي ميلينش النهاردة بكرة يلين
و الحنية بتزيل الجفا
ربنا يباركلك فيهم
السلام عليكم ورحمة الله وبركاته ،،
الجزء التاني :) :)
بالنسبة لموضوع القسوة والحزم مع الأبناء،، بتقولي محدش بيطلع سوي منها ،، وانا معاكي الكلام ده لما يبقا الأب واخد الفكرة نفسها صح بس بيطبقها غلط بس لازم يبقا في حزم وشوية قسوة لازم الابن يتربى ان الدنيا نفسها الي عايشها مش هينفعه فيها الحنية والحلاوة الي بتقولي عليها دي ،، احنا دلوقتي أمام واقع مرير ولازم نتعامل معاه ممكن اعلم ابني واربيه على الصح وازاي تكون ردة فعله على المواقف المختلف ،، يعني امتى يستعمل الحزم وقليل م القسوة وامتى ما يستعملش غير السياسة والحنية عشان يسلك في الدنيا الغريبة دي ،، ثم انتو كده جايين على الآباء كتير ، كل الي يكتب يقول الاباء مش عارفين يربو ومش عارفين يوجهو أولادهم للطريق الصح مع ان كلنا مشتركين في نفس الغلطة
وخصوصا الأبناء، يعني انا مثلا كابن المفروض ان في قيم ومبادئ اتربيت عليها والي يخليني ما احيدش عنها في المقام الأول تربية أهلي ليا ومراقبتي لربي سبحانه وتعالى
بس الحقيقة ان مراقبتنا للمولى عز وجل مش بتبقا دايما معانا ومش هزكي نفسي ولا هزكي حد ،، لازم ابقا عارف اني لما اغلط هواجه موقف حازم من والدي موقف يخليني مكررش الغلط مرتين ،، مش الاب ييبقا حنين وممشي الحكاية سبهللة وانا اعيش حياتي بمزاجي
ثم احنا خبرتنا ايه كل الي بنتعلمه بنتعلمه منهم في المقام الأول ،، وللمرة التانية بكرر لو اخدنا بعين الاعتبار ان سواء قسوة أهلي او حنيتهم عليا
بيبقا بغرض مصلحتي أولا واخيرا وحطي مليون خط تحت مصلحتي دي
مفيش اب بيكره ابنه ومفيش اب مش عايز ابنه يبقا احسن منه الف مرة
ومفيش اب بيقسو على ابنه بدافع النفسنه والغل والكلام الفاضي ده
انا لو قسيت على ابني هقسو عشان أعلمه
يبقا نقطة من أول السطر ،، ونساعد آباءنا ومنبقاش احنا والزمن عليهم
وانا كابن مضطرش والدي انه يعاملني بالقسوة الي بتقولي عليها ومضطرهوش ياخد مني موقف ،، ولو الاتنين اتحدو الاب والابن هيطلع متربي تربية سليمة وصالحة
ويقدر يواجه مجتمعه كشخص ناجح وبناء وعامل من عوامل نجاح المجتمع ده،،،
بس فعلا وعن رؤية شخصية من الي بشوفه حواليا
كل الفرافير الي طالعين فاكر ان ابوه هو سبب عقدته واي كان الي هو فيه ويعلق على الوالدين كل اغلاطه،،
لو طلع الولد مش متربي نقول العيب من الأهل،، ولو طلع متربي نقول ابن حلال مصفي
يبقا هما الي بيصقلو الأول واحنا علينا نتبع خطواتهم لغاية ما نبقا على دراية بالي حوالينا
وده طبعا مش مبرر للي بيعمله بعض الاباء وحطي الف خط تحت بعض دي من القسوة الزيادة مع عيالهم الي بتطلعهم معقدين وكارهين عيشتهم المبرر الصح اني اشوف ابني وطموحه واساعده عليه بتوجيه مني وخبرتي
اطلت تاني ،،،
بس الموضوع عجبني بصراحة ،، تسلم ايدك الي كتبته
وما تتعوديش على كده بقا :)
التوقيع / أونكل The White Knight
اونـكل The White Knight
وعليكم السلام ورحمة الله وبركاته
ايه الهنا اللي احنا فيه دا :) مفاجأتين في اسبوع واحد :)
اولا ربنا يحفظلك والديك ويخليك ليهم ولأحبائك يارب :)
بص باه يا دكتور .. انا مش هختلف معاك في اي حاجة علشان انا عارفة انك مش بتقول كلام انشائي كده و السلام .. وبسم الله ما شاء الله لاقوة الا بالله اللي انت بتقول عليه دا هو ما انت عليه ربنا يحفظلك والديك
بس للاسف مفيش منه كتير في الدنيا دي والا كانوا طلعوا جيل محترم و عنده اخلاق .. شباب فعلا شايف ربنا في كل تصرفاته .. يخاف يعمل الحرام استحياءا من خالقه
العيب مش في اب وام .. بس علشان هما الاصل في النشأة قلت ان القسوة من الصغر بدون وجه حق حراااااااااااام
لما مياخدش حنية من ابوه و امه وهو صغير هياخدها من مين لما يكبرويقدر يعبر عن احتياجه لها؟؟ اظنك متخيل الاجابة وعارف انها حقيقية
من مرارة الموقف كتبت اللي قلته و كل اما اقراه بلاقي في نفسي وجع منه حتي لو مش فيا اللي مكتوب بس في كتير موجوعين نفس الوجع دا
رؤية مصلحة الابن عبء علي الاب والام .. مسئولية بيحاولوا يتحملوها .. وعادي زيها زي اي حاجة في الدنيا عرضة للنجاح وللفشل ..
زي اللي بيحاول يجاوب في الامتحان علي كل الاسئلة اجباري اختياري ..
واللي بيجاوب علي اللي يعرفه بس
و اللي بيسيب الورقة فاضية
واللي بيكتب في الورقة كلام فاضي
و اللي بيسب ويشتم في اللي ألف الامتحان
و اللي بيكتب اغاني
و و و ...
اظن فاهمني
تخيل باه كام حد بيذاكر بذمة علشان يأهل نفسه لأي نوع من الاسئلة ممكن يتعرضلها
و اللي بيقول ساعتها هبقي افتكس اجابة
واللي مش هامة من اساسه و ممكن يكتب اي حاجة
واللي اصلا مش هيجاوب و زي ما تيجي تيجي
اهلنا بيشوفوا صعوبات في الحياة في ظل كل المساويء اللي بتزيد يوم بعد يوم .. اه مش هختلف معاك
بس من كبيرنا لصغيرنا بيشوف كتير ويمكن يشوف اكتر واسوء من اللي اهله شافوه
بس لما اعمل مصيبة ومقدرش اقول اني عملتها واتحمل عواقبها كلها بكل ما فيها لوحدي خوفا من اللوم واشياء اخري .. مش كل مرة هتبقي المصيبة قدر استطاعتي وقدرتي علي التحمل .. لو باب الوالدين مقفول في وش ابنهم .. هيروح لمين؟؟
لاول حد يلاقيه فاتح
ودايما النتيجة سيئة الا برحمة ربنا لما يريد يلطف بعباده
انا موافقة علي كلامك تقريبا كله
بس دي الصورة المثالية للموقف
والواقع فيه منها ساعات بس كتير اوي غيرها
انا مبقولش غير انه لو احتاجهم يلاقيهم
يكون عنده رصيد عندهم وعندهم رصيد عنده علشان لما يعوز حد منهم يسنده يقدر يوصل لحد عنده ويطلب منه المساندة :(
كتير دا يا دكتور؟؟؟
ربنا يباركلك يارب في حياتك وفي اهلك وفي كل احبائك ويفرحنا بيك يا رب :)
اسعدتني مشاركتك الاولي جدا و المفاجأة نفسها :)
و احرجتني التانية جداااااااا علشان عارفة انك صح بس اللي زيك كده قليل اوي
:) ابقي تعالي دايما .. حد يطول :)
ايه الكلام الحلو ده :)
ربنا يباركلك ويحفظك من كل شر
طيب انا كل الي عايزه طلب صغنون
ما تجوش على الآباء قوي كده ، يعني نحس احنا كمان بالمسؤولية شوية ،، يمكن حالنا يتعدل
ويمكن ساعتها نضطرهم بقا يحضونونا
ويبقا الاشكال كله اتحل
سعدت جدا اني شاركت في الموضوع ،، وسعدت اكتر بردك عليا
وتقوليلي مفاجأة،، اومال انا اقول ايه
ربنا يهدي الأولاد والآباء
:) :)
فير انف أهو
أونــكل / The White Knight
معلش انا طولت علي ما كتبت بس انت مقدر الظروف اكيد
وبعدين الجهاز دا علي وش انفجار
وبيكهرب :(
المهم يعني انا موافقاك
حبة مني علي حبه منه
الدنيا هتمشي
مفيش حد غلطان علي طول ومفيش حد صح علي طول
ربنا يهدينا جميعا يارب
واشوفك احسن دكاترة مصر ان شاء الله
انت والحبايب يعني :):)
ابقي تعالي متتأخرش علينا يا دوك :) تزيدنا شرف وبركة :)
ربنا يحفظك
مينفعش الاهل يفضلو مخبيين الحنيه بثوب الحزم كل الوقت الطفل بيحتاج لحنان كتير علشان يبقى عنده توازن وعلشان منبقاش في نظرهم ذكرى للقسوه بس لازم برضه نبقى ذكرى للحنان صعب الانسان لما يبكر ميفتكرش حضن واحد لأهله
البكاء لراجل مش عيب ده دليل انه ليه قلب بيحس وبيشعر مش حجر الحنان مطلوب للجميع كل انسان محتاج حضن يضمه ويطبطب عليه كبير كان او صغير ست او راجل فليه نكابر احنا بشر
انا البدر
كل اللي قلته موافقة عليه واحييك انك وصلت للرأي دا علشان مش كتير قادرين يفهموها كده
نورت
إرسال تعليق