بسم الله الرحمن الرحيم
" وقل للمؤمنات يغضضن من ابصارهن ويحفظن فروجهن ولا يبدين زينتهن الا ما ظهر منها وليضربن بخمرهن على جيوبهن ولايبدين زينتهن الا لبعولتهن او آبائهن اوآباء بعولتهن او ابنائهن او آبناء بعولتهن او اخوانهن او بني اخوانهن او بني اخواتهن او نسائهن او ما ملكت ايمانهن او التابعين غير اولي الاربة من الرجال او الطفل الذين لم يظهروا على عورات النساء ولا يضربن برجلهن ليعلم ما يخفين من زينتهن وتوبوا الى الله جميعا ايها المؤمنون لعلكم تفلحون "
(آية 31 من سورة النور)
الامر اللي في الاية دي موجه للمؤمنات
سبحان الله ربنا خص به المؤمنات لعلمه سبحانه ان اللي هتطيعه و تنفذه اوامره لابد تكون مؤمنة مش مجرد مسلمة ولو انها لو كانت مسلمة له فعلا اكيد هتبقي مؤمنة
ياخدنا الكلام دا لمين هي المؤمنة ؟
مين من نساء المسلمات تقدر تقول علي نفسها انها مؤمنة ؟
مين عنداها الجرأة انها تزكي نفسها امام خالقها؟
من هي المؤمنة ؟
ذكر الله في القرآن الكريم العديد من الصفات التي خص الله بها ذكر المؤمنات ومش دا اللي عايزة اقول عليه
الأيه السابق ذكرها دي المفروض انها تفرض الحجاب علي المرأة المسلمة او بمعني ادق علي الفتاة البالغة .. أيا كان سنها ايه وقت بلوغها !!
مش هتكلم اصلا عن اللي ميتقالش عليها محجبة في الزمن دا و اللي لابسه قطعة من القماش مغطية جزء من شعرها مع تعرية الجزء الاكبر من الرقبة والاذن و ما يليهما !!
انا هتكلم علي اللي محجبة
اللي كاشفة وجهها وكف ايدها و مغطية ما دون ذلك بثياب فضفاضة لا تصف ولا تشف
وعن اللي منتقبة و مغطية كل حاجة فيها عدا عينها سعيا لانها تكون بتعلي مرتبتها بادائها طاعة افضل
هتكلم عن نفسي بس علشان يكفيني ذنوبي اللي ربنا وحده اعلم بيها
افتكرت بما اننا في رمضان اني اتحجبت فيه من سنين طويلة اوي رقم كبير بس كان في مارس اول رمضان
حاسة اني في مصيبة قدام ربنا
الحجاب بيغطينا ولا احنا اللي بنغطي عليه؟
رغم السنوات الطويلة اوي دي يمكن لو اخلصت مع نفسي قدام ربنا ويمكن لو اتطلعت علي صحائفي مكونش نلت حظا من اداء الطاعة دي الا يوم او حتي أقل الا برحمة الله
شغلاني النقطة اوي
يمكن من اللي بشوفه
انا متأكده عن نفسي اني برحمة ربنا بس ممكن يقبل اوقات من الطاعة دي
و اني موصلتش لدرجة اني احسب نفسي علي خير عند الله
بس بنتوسل لله لعله يقبلنا علي عيوبنا ويبدل سيئاتنا حسنات
ايه الحكمة من تغطية الشعر ان مكانش ستر باقي الجسد قبل تغطية الشعر؟
ليه لما انوي اعمل طاعة لربنا معملهاش بما يرضي الله و ابقي بكمل بيها طاعاتي يمكن تبقي هي دي اللي فيهم ؟
ليه معرفش اصون لساني عن الغيبة والنميمة وعن اذية مشاعر الاخرين قدامهم و من وراهم ؟
ليه اللي ظاهرها بيقول انها بتسعي لنيل درجة اعلي عند الله بيكون تصرفاتها مؤذية لغيرها؟
ليه مش نضاف؟
من النضافة ...
مبقيناش نضاف لا من برة ولا من جوة
ليه دايما دايما بنسيب للأخر غير المسلم مساحة براح جداااااااا يلاقي عندنا اللي ينتقدنا فيه ويعيب علينا تصرفاتنا
ليه محدش بيراعي مشاعر غيره ؟
هي مش هي هي اللي بتحاول القرب ل "هو" سبحانه وتعالي ؟
مش هي نفسها اللي لسانها بينطق بالتسبيح و التهليل و بتطلب الخير دايما؟
ليه هي دي متدورش علي هي زي ما "هو" سبحانه عايزها ووصفها ؟
عن نفسي غلبت في نفسي بس مش كل الناس زيي
الناس الكويسين كتير أكيد .. بس مين هي اللي يقصدها وتنطبق عليها الصفات بدون ما صفة تقع ولا تتبدل ؟؟؟
كل ابن آدم خطاء
اه
بس لو مش هي هيكون فيها كل الصفات دي علشان تستحق لقب مؤمنة
مين اللي فازت بيه؟
في زمن فات ؟
ولا في زمن جاي؟
الله اعلم
**********
جايز امبارح مكنتش مركزة
بس المعني اللي قصدته يشبه قول رسول الله صلي الله عليه وسلم في الصيام
"من لم يدع قول الزور والعمل به فليس لله حاجة أن يدع طعامه وشرابه" رواه البخاري والترمذي وأبو داود وابن ماجه وأحمد
زيها بالظبط كده في رأيي واعتقد والله اعلي واعلم اني مش غلطانة
ان اللي متعرفش تحافظ علي فرض ما بتعمله و تعمله بما يرضي الله يبقي قلته احسن !! او علي الاقل متعملوش الا وهي في نيتها محاولة الالتزام به
هتخنق نفسها ليه و تغطي شعرها وهي محققتش اي التزام ناحية الغطاء دا؟
مهو بقي غطاء فعلا
تخيلنا ان بيه هتبقي متصانة
واللي حصل انها اهانته هي شر اهانة
وبسببها اللي ميسواش عاب فيه
ويبقي السؤال
...
يا تري يا ربي قبلت كام لحظة من سنين العمر اللي عدت هدر؟؟؟
هناك 16 تعليقًا:
السلام عليكم
بجد بوست تمام
ربنا يكرمنا جميعا بحجاب صح
مش للشعر والجسد بس
لكل الجوارح كمان
ربنا يتقبل صيامك إن شاء الله
السلام عليكم
موضوع رائع
دمت بكل الخير
السلام عليكم
موضوع رائع
دمت بكل الخير
ماشاء الله
نعمه من الله ان جعل لك نفس لوامه
وربنا يهدى جميع المسلمات لخيرهن ورضا الله عنهن
جزاكم الله خيرا
موضوع رائع
والحمد لله على نعمة الهداية ونعمة الاسلام
تحياتي ورمضان كريم
ومازلت أتعلم
ازيك يارب تكوني بخير
ربنا يتقبل منا ومنكم ويرزقنا الاخلاص جميعا ان شاء الله
اللؤلؤة
جزاك الله خيرا علي حسن ظنك و شرفتنا بالزيارة
الفراغ
ازي حضرتك ان شاء الله تكوني في احسن حالك
اكيد كل ما رزقنا به نعم من الله .. بس انا مش عارفة اعبر عن المعني اللي اقصده اوي
الله المستعان علي كل حال وربنا يتقبل صالح الاعمال يارب ويعز المسلمين جميعا
بارك الله فيكم جميعا وبارك لكم في اعماركم وارزاقكم واهلكم والمسلمين
ضكتور جدا
الله يجازيك خيرا يا دكتور ويعيننا واياكم علي طلب الطاعة
كل سنة وانت طيب واسرتك والمسلمين بخير ان شاء الله
طب "هي" أوك ..
بس "هو" اللي هوه إيه ؟
السلام عليكم
جزاك الله خير...موضوع كبير...بس صراحة مش عارف ممكن اقول ايه
سلمي لي على سيف و العائلة الكريمة
تحياتي
البلياتشو
هي " اي مسلمة"
انما
"هو" الواحد الاحد ،، "الله"
فتبقي الحكاية :
هي في طاعة من طاعات فرضها عليها "هو" سبحانه وتعالي شكلها ايه ؟؟
تشرفنا بالزيارة
راشد
حمد الله علي سلامتك و شد حيلك عايزين A+ مش اقل منها ان شاء الله
قول لا اله الا الله محمدا رسول الله صلي الله عليه وسلم :)
السلام عليكم ورحمة الله وبركاته
سمعت حديث شريف أمس فى خطبة للشيخ محمد حسان .
قال رسول الله صلى الله عليه وسلم :
لأعلمن أقواما من أمتي يأتون يوم القيامة بحسنات أمثال جبال تهامة بيضا فيجعلها الله عز وجل هباء منثورا قال ثوبان يا رسول الله صفهم لنا جلهم لنا أن لا نكون منهم ونحن لا نعلم قال أما إنهم إخوانكم ومن جلدتكم ويأخذون من الليل كما تأخذون ولكنهم أقوام إذا خلوا بمحارم الله انتهكوها
الراوي: ثوبان المحدث: الألباني - المصدر: صحيح ابن ماجه - الصفحة أو الرقم: 3442
خلاصة الدرجة: صحيح
ربنا يعافينا يارب ويجعلنا من عباده الصالحين
واللهم أرزقنا خشيتك فى السر والعلانية
وإرزقنا اللهم خشيتك فى كل وقت وحين وأجعل اللهم أعمالنا كلها خالصة لوجهك الكريم
فهمني "اذا خلوا بمحارم الله انتهكوها"
هحاول ادور علي المعني بس انت كمان فهمني :(
أى يجعل الله أهون الناظرين إليه أعاذنا الله من هذا .
إذا كان أمام الناس إستحيى منهم من فعل أى ذنب ، ولكن عندما يختلى بنفسه ينسى أن الله رقيب عليه ويفعل من الذنوب ما يغضب الله عز وجل .
:(
زودت همي تلال من الهموم
الله يلطف بينا ويكفينا شرور انفسنا وسيئات اعمالنا
السلام عليكم ورحمة الله وبركاتة
جزاكى الله خيرا والمسلمين اختى اليس على الموضوع الجميل دة والاسلوب الراقى فى الحوار .... وربنا يثببتك يارب على طاعتة وحسن عبادتة اللهم امين والمسلمين .... وبقول ان الستر والججاب دة بيجعل المرأة زى اللؤلؤة المكنونة الى بيسعد المرء على امتلاكها فى مااحلة الله طبعا ... على النقيض المرأة المتبرجة وهقول تشبية صغير واختم انت يامسلم ياموحد بالله او اى شخص ممكن ياخد حلوة من الشارع كفانا الله واياكم مكشوفة عليها كل اصناف التلوث والحشرات ولا ياخد حلوة من مكان نظيف مأمن ايهما تختار يارجل ؟؟؟
دة بس مثل صغير ولله طبعا المثل الاعلى يبقى ربنا امر المرأة بالحجاب والرسول صلى الله علية وسلم وكمان مواصفات الحجاب يعنى كدة ملناش حجة ونقعد ندور على الحجاب الموضة والاسبانى والفرنسى ...الخ . كونى ملكة بحجابك وراجعوا نفسكوا يانساء المسلمين فى حجابكم....
طهر فؤادك
اشكرك علي التعليق بس عايزة اقولك ان الحجاب بالصورة اللي عليها دلوقتي من اشكال ملفتة للنظر بصورة كبيرة .. مبقاش ساتر بس فاضح ملفت من كتر الالوان والاشكال !!
تعالي اتفرج عليهم بس لو حد اثار واحدة منهم وخلاها تنفعل شوية و يظهر غضبها .. اجارك الله علي الاسلوب والفضايح
الله يسترنا جميعا يارب ويكفينا شر المستخبي
إرسال تعليق