الظلـــــم

الظلم

حرم الله الظلم علي نفسه

بس في ناس في الارض ظالمة و كتير مش قليلين

ليه الناس بتظلم بعضها

دا حتي في الاب اللي بيظلم ابنه والام اللي بتظلم بنتها و العكس

دي الموديلات الجديدة اللي نازلة السوق .. اصبح كله بيظلم كله و مش يهمه الا مصلحته و بس

او حتي مش نفسه دا ساعات بيظلم لمجرد انه متخيل ان دا التصرف الصح لغيره مش بس ليه

انا عارفة ان ربنا مش بيسيبه و عارفة ان المظلوم له دعوة مستجابة وعارفة ان الله يجبر المظلوم و يقصم له الظالم

بس بردة ليه الظلم

هو اللي بيظلم دا مش بيحس بحاجة كده.. بتعدي عليه عادي يعني ...

مفيش حاجة بتوجعه ولا بيحس انه ظالم او حتي انه عمل حاجة غير اللي المفروض تتعمل..........

بيتهيالي اول واحد ظلم نفسه ابليس لما فضل كرامته في المعصية عن الطاعه والسجود لمن خلق من طين

وعلشان كده اللي بيجي من وراه بيكون من اتباعه

انا بيتهيالي المفروض اللي بيظلم حد دا بيكون وقع عليه هو نفسه ظلم فالتبعيه بيقول وليه انا كمان مظلمش غيري لما غيري ظلمني

بس طبعا مش كل الناس بتعمل كده .. الحمد لله انهم مش كلهم والا بقت مأساه بكل المقاييس

مع ان اللي اتظلم وداق وجع الظلم المفروض ميظلمش غيره .. بس بنقول لمين!!

انا ف رأيي باه اسوء انواع الظلم اللي بيظلم روحه بظلم اهله واقرب الناس اليه ... :(

الزوج اللي يظلم زوجته .. طب ليه اتجوزها اصلا لما هو مش قادر يتقي الله فيها

فكرتوني بحاجة صحيح... مش هما لما بيجوا يكتبوا الكتاب بيقولي انهم استخاروا الله ...طب ناس كتيرة باه مش بتستخير ولا تعرف صلاة الاستخارة دي بتتصلي ازاي...هل وقتها تبقي الجوازة مش صحيحة ؟؟ ,,,,,,, دي حاجة برة الموضوع بس افتكرتها وعايزة عليها اجابة:(

المهم يعني مش يوم لما اتجوزها اتجوزها بمزاجه وبرضاه ؟؟ طب ليه بيدوس عليها بعد كده .. ليه ممكن يضربها وممكن يطردها وليه حتي بتوصل ساعات انه بيعذبها

تصدقوا انه من اوله تعذيب فعلا حتي بالنظرة او الكلمة قبل التعذيب البدني .. هما مش دول اللي كانوا من شوية اسعد اتنين و الحياة مفيش احلي من كده

الي متجوزة من 35 سنة نسخة قديمة يعني بس تصدقوا لو قولت ان اللي متجوزة من سنة بالظبط هو هو اللي حصل مع القديمة اتكرر ف النسخة الجديدة ولو انهم ملهمش علاقة ببعض اساسا و مش دول وبس دا كتير كده واللي بيسكت مش بيتكلم اكتر

طيب ليه؟؟؟ هما الرجالة يعني كربون من بعض ... استحاله .. يبقي ليه بيتعاملوا ف نفس المواقف بنفس الطريقة مهما اختلف سنهم و ظروفهم و عقلياتهم

هي دي حاجة ليها علاقة بهرمونات مثلا ؟؟ مهي مش تربية ولا بيئة علشان علي اختلاف مستويات ناس كتيرة متزوجين كتير منهم بالشكل دا و حالات الطلاق ف ازدياد مستمر مع النسخ الجديدة .. والنسخ القديمة من زمان رضيت و قالي حسبنا الله ونعم الوكيل و قعدت تربي ف ولادها وقالت امر الله و اهي جوازة والسلام او يمكن علشان وجود اولاد قالوا بلاها الطلاق دا

مع اني بصراحة افضل الطلاق ف ظرف زي دا عن ما طف يشوف امه بتتهان او ابوه بيتغلط فيه من امه ؟؟

ليه البيوت بقت كلها ظلم كده

حتي الابناء بيظلموا بعض علي مستوي الاخوات و يا سلام باه لو فيها ورث وفلوس هنتفرج علي اسوء مسرحية ممكن مخرج يخرجها ... ولا هيفرق معاهم لا دم ولا اخوة ولا غيره...

الابناء بيظلموا ابائهم ساعات كتيرة و ربنا امرنا الا ننهرهم والا نقول لهم أف بس السؤال ليه منعملش اللي عكس دا ونشوف الاباء بيعملوا ايه ظلم ف اولادهم و بيخلوهم يطلعوا نبت ظلم شرب الظلم عمره و عليه دلوقتي يحدد يا يكون ظالم كناتج طبيعي للظلم اللي شربه طول عمره يا يطلع جدع و يلاقي طريقه ف سكة تانية و ساعتها يبقي ربنا انقذه من مصير سيء ربنا يعافينا منه ..

يعني النسبة 50% و 50% ولو ان النسبة انه يظلم بيتهيالي اكبر خصوصا لو الجرعات كانت مكثفة علي مدار السنين الا من رحم ربي

هو بيتهيالي موضوع زي بقية الابتلائات اللي ف الدنيا وربنا بينعم بيها علي الناس فمن صبر و شكر فله الاجر ومن اعترض و تذمر فلا يلومن الا نفسه والله اعلم

كفاية كده الموضوع دا حله عند الله و هو المستعان ..

ياربي انا تعبت دلني

عايزة احكي ف اي حاجة علشان مفكرش ف اي حاجة تانية بس مش عارفة احكي ايه .. الدنيا فيها حجات كتيرة تتقال او يتحكي عليها بس انا كل اما اروح ف ناحية بدماغي الاقي فيها حاجة متعجبنيش

والله ما انا عارفة باه .. هو انا يعني اللي غلط علي طول الخط ولا العيب فين

لو انا غلطانة او لو انا صح اعمل ايه

العيب فين باه انا تعبت وانا بدور الصح فين
الصح اللي عارفاه و كنت فاكرة روحي كده وصلت لحل مع نفسي .. طلعهولي غلط .. واللي فاكره غلط ولا حتي مش مناسب لي طلعوه صح وحتي لو هما صح وانا غلط بس انا مش ممكن اكون ف كل حاجة غلط كده

ما ربنا خلقنا جوانا الصح والغلط والخير والشر .. ولو سيبت الغلط يطلع مني والشر اكيد هيطلع ف مرة علي الاقل خير او حاجة صح

انا مش عارفة اعمل ايه باه .. اغير ايه علشان ارتاح .. كنت عادي زي اي حد شوية راضية عن روحي و كتير لا بس عارفة امتي ببقي بعمل حاجة غلط وامتي بعمل الصح .. دلوقتي طلعت كلي غلط ولا حتي يمكن الغلط بقي صح كمان

يااااااارب دلني اعمل ايه انا تعبت

تعبت حتي من التفكير ف اني عايزة اعرف

يا ربي تولي امري ودلني اروح فين ولمين يدلني غيرك

يا تري يا بكرة!!

هو انا لو عرفت بكرة فيه ايه هرتاح؟؟

ساعات الواحد بيتمني يعرف بكرة فيه ايه علشان يرتاح من قلق في موضوع معين و مستني يشوف بكرة دا شايله ايه معاه
ببقي عايزة اعرف الموضوع دا هينتهي علي ايه
لو قلت كده هبقي دخلت ف مشكلة علي اساس " لو علمتم الغيب لاخترتم الواقع" ؟؟!!!
مش معترضة انا ..

كل الحكاية اني قلقانة ..

عماله اقول يا ربي اللهم رضني بعد القضاء

اللهم رضني بقضائك وبعده

و بقول اللهم اجعلني ممن يحسنون الظن به و اجعل ظني دايما خيرا


بقاله يجي اسبوع ولا اكتر مكتوبة و مش عارفة صح ابعتها ولا لا

يمكن ببكي علي حالي

المرض والموت

حاجتين قاسيين جدا علي الانسان خصوصا لو في حد عزيز والله وحتي لو مش عزيز بردة الواحد قلبه بيوجعه و بيتأثر بيهم اوي
بس بردة في حاجة غبية اوي بتحصل في الاوقات دي

لو رحت تزور مريض وعنده زائرين تانيين يووووووه باه تنقلب القعدة من عيادة مريض لجلسه نم و كل اتنين علي جنب مع ان الزيارة دي اساسا هدفها المفروض يكون ابتغاء وجه الله و اتباع لسنة المصطفي صلي الله عليه وسلم بس بنقول لمين

والاسوء باه في العزاء ... بتتقلب لنفس الحكاية مهو احنا مبقيناش بنشوف بعض الا يا اما في افراح يا اما في مآتم .. والمهم كلنا عارفين كده ودي الجملة اللي بتتقال من الكل تقريبا يمكن بنعاتب انفسنا اننا مش بنتجمع الا في المناسبات دي يا مفرحة اوي يا موجعه اوي

لا حول ولا قوة الا بالله
في بعض الساعات ان مكانش كلها مش بتلاقي وقت تروح تزور فيه حد عزيز عليك انما بتجبر علي انك تلاقي وقت في الوقت اللي يكون فيه الشخص دا اما مريض اوي وفي المستشفي او خارج منها او يكون قد فارق الدنيا بما فيها

ليه يعني بقينا كده .. وانا منهم علي فكرة ان مكنتش اول واحدة في الصف دا.. مع الالم والاسف خيبة مني انا عارفة ... ربنا يعافينا منها

لما بروح العزاء بقعد في ركن كده و بحاول بعد السلامات اقعد اركز مع القرآن بس في معظم الاحيان يمكن الجو و شكل الناس وهما في السواد بينقل الحزن لي ( في حالة اني معرفش اللي توفاه الله يعني او رايحة تقضية واجب .. انا بصراحة عندي اروح العزاء دي حاجة مهمة اوي بحس اني بربي نفسي حتي لو معرفش اللي هناك اوي او ناس معرفة من بعيد ورايحة مع امي لمجرد اني بوصلها بس)

اه بربي نفسي ... علشان تتوجع و تحس ان الاجل هيجي ف اي لحظة .. وياريت بتعظ باه و احس .... وقتها طبعا بحس .. بتنزل دموع من عيني ايوة بتنزل و كتير جدا ... و بتزيد كل اما بشوف الناس حوليا بيعملوا ايه في العزاء دا

يعني جايين من كل مكان علشان تقوموا بالواجب و تاخدوا ثواب و تقفوا جنب الاهل والاحباب,,, بتسيبوا كل دا و تقعدوا ترغوا ف اي كلام,,, لا والاسوء اللي بيقعد يرغي و يضحك ... طب يراعوا اهل المتوفي يعني علي الاقل

انا باه ببقي في ملكوت تاني ... كل اما بركز مع القرآن و ابعد بذهني وتفكيري عن اللي حوليا كل ما بيصعب عليا نفسي زيادة

كلنا هنموت اه .. الموت حق و علينا هيعدي لا مفر منه

لو مت دلوقتي ... النهاردة الثلاثاء .. هيتم دفني والصلاة عليا و العزاء بليل وانا أسال في قبري والناس في العزاء... مين فيهم بيدعيلي في العزاء دا .. مش هكون محتاجة الدعاء دا ... مين هيفتكر في القعدة دي يدعيلي ... هو في حد هيفتكر لي حاجة كويسة في الدنيا دي عملتها ... هو انا اصلا عملت حاجة كويسة علشان الناس تفتكرني بيها .. مهو لو عملت اكيد هيفتكروا.. بس اضمنها منين يعني .. الناس بتنسي.. و هتنسي .. هيروحوا يعزوا و يسيبوا الهدف من العزاء و ينزلوا رغي .. طب دا انتو اهلي اللي عاشرتوني في الدنيا .. خلاص كده نسيتوني .. لو حد افتكرني هيفتكرني اد ايه وبايه و لايه.. ياربي يعني اجي الدنيا وامشي من غير ما اعمل فيها حاجة ولا حد يفتكر ان في حد باسمي دا عاش في الدنيا ...

ساعات ربنا يبعتلك حاجة خير تعملها في دنيتك .. بتفرح بيها علشان بتحس انها يمكن حاجة تتكتبلك في صحيفة اعمالك .. بس اااااااه باه لو ضاعت منك ولا لو ضعيتها انت .. بتحس بجرح في القلب لا يداويه الزمن .. مهو اكيد ربنا حرمني من الخير دا لعيب فيا او لذنب برتكبه .. بس ربنا بنا رؤوف رحيم.. يمكن شايلي حاجة تانية اعملها خير والله اعلم ... يمكن و يمكن بس مين يرحمني من الاحساس اني ممكن اكون فرطت في خير ربنا بعتهولي ينفعني ف اخرتي .. ياربي دلني او رجعهولي انا محتجاله وانت عارف وعالم بحالي

ساعات القلب بيكون حساس اوي لظروف معينة و اي كلمة طيبة بتخليه يبكي شوقا و حبا لله .. وساعات بيحط عليه التراب والذنوب و بيبقي قاسي و بيكون عايز غسيل و مكوه .. ساعات كتير بروح ادور علي حاجة اوجع بيها نفسي علشان محسش اني ببعد عن اني اكون بحس كده و بشوف ايه اللي ممكن يوجعني ... مش وحشة بس بردة مش كويسة ... انسان بيخطيء و بيصيب

جايز اشوفها حاجة وحشة وغيري يشوفني محبكاها .. و جايز اشوفها عادي و هي مصيبة .. ياربي لا تكلني الي نفسي طرفة عين .. انت عارف يا ربي اني بتوه ف نفسي و طريقي عليا صعب .. زيي زي غيري بس يمكن غيري عارف طريقه و شايفه .. انا بكرة عندي مش عارفة اشوفه ولو تخيلته بتوجع لما يجي و يطلع مش زي ما شفته ... نسيب بكرة لبكرة احسن وخلينا نحسن الظن بالله ان بكرة دا اكيد احسن من اليوم ان شاء الله

اقرب حاجة للي بقوله كنت قصيدة ليس الغريب ... يااااااااااه اوقات تبكيني وبتوجع من كل حرف فيها و ساعات بسمعها عادي جدا.. بس في الاوقات اللي ببكي فيها بحس اني عايزة اي حاجة تنقذني من الاحساس اللي بيوصفه ساعتها من كله من مرض الموت للطبيب اللي لا يداوي بامر الله للمغسل للكفن اللي يستر الجسد الذي لا حول له ولا قوة ومن قبلهم للروح وهي خارجة بامر الله للحمل علي النعش للصلاة علي المتوفي ياااااااه كلها حجات بتوجع اوي ربنا يعافينا و يجعلها يسيرة علينا وعلي كل من يهابها يارب .. وانزلوني الي قبري

خلاص كده حدوتة الدنيا خلصت و هتيجي اللي اصعب منها .. مراحل كلها اصعب من بعضها ... يارب سترك ولطفك بينا يارب
اللهم ثبتنا عند السؤال ياربي .. يارب الهمني الثبات .. اللهم يا مقلب القلوب والابصار ثبت قلوبنا علي دينك واسترنا فوق الارض وتحت الارض و يوم العرض عليك

مراحل واحدة ورا التانية .... صعبة والله صعبه حتي الكتابة عن اللي بعد كده الله العليم باللي فيها .. ياربي لطفك بعبادك يارب

اللهم اجعل الدنيا في ايدينا ولا تجعلها في قلوبنا ... اللهم اخرجنا منها وانت راض عنا
اللهم ارزقنا فعل الخيرات و حببها الي قلوبنا و اجعلنا ننفر من كل ما يغضبك ياربي

يارب اجبر بخاطرنا احنا ملناش غيرك

رب اني مغلوب فانتصر

رب إنــــــــــــي مغلــوب فـــــأنتصــــر

افتكرت الدعاء دا من يومين بالصدفة مع انه غايب عن بالي بقاله كام شهر معرفش ليه بس سبحان الله لما افتكرته من يومين استغربت اني افتكرته معرفش ليه

مكنتش عارفة انه بعد مرور يومين مش هيبقالي ونيس في يومي الا اني اردد الدعاء الذي استجيب لسيدنا نوح لعل الله يستجيب لي و يرد لي مظلمتي

سبحان الله ساعات يبقالك حق عند حد و يمكن تسيبه عن طيب خاطر مش سلبية منك عن الدفاع عن الحق دا والمطالبة بيه انما يمكن بتقول خلاص مش مهم طالما ربنا معوضني بحاجة تانية

وساعات احس الدنيا بتقولي مش انتي فالحة و عملتي جدعه ووافقتي تفرطي في حقك طب خدي دي كمان فوق راسك علي الله بس تفهمي ان اللي بيفرط مرة هيفضل يفرط علي طول

طب اعمل ايه بس ان كان المطالبة بالحق دا بيفتح عليا بدل جبهه واحدة تلاتة ولا اربعه في نفس الوقت ومنهم جبهه مستحيلة المواجهه وانا بكره المشاكل ولو المشاكل فلوس تبقي بجد مش مستاهله كلام فيها علشان الفلوس دي متسواش اصلا

نعمة من ربنا الحمد لله عليها

بس متبقاش هي اللي بتحركني علشان ايه يعني هو ربنا خلقها لينا علشان نستعملها و نحقق بيها حجات معينة تساعدنا ف حياتنا

انما تبقي هي اللي بتمشينا ولا اوطي راسي علشانها بتاع ايه يعني

مش عاملة فيها بطلة ولا حاجة

انا مش بحب اكون محتاجلها بس عمرها ما تمشيني لما اكون محتاجة ايه حتي وهي اللي هتمشيني هعملها باي باي و مش عايزة الحاجة دي ولا غيرها

ايه اللي قلب الكلام علي الفلوس .. يلا ما علينا اديني ببرطم شوية

بس بجد والله دي بتمشي ناس كتيرة اوي

عارفة انها بتمشي ناس كتير علشان لقمة العيش وفي ف رقبتهم مسئولية وبيت وولاد بس في ناس كتير بتمشي وراها

بيتهيالي لو مشينا ورا كل المشاكل اللي حصلت هتلاقي وراها الفلوس والطمع و ما شابه ذلك من حاجات ربنا يحفظنا منها

اخوات بيتخانقوا علي فلوس .. الناس بتقطع في بعضها علشان الفلوس دا حتي ياربي من غير ما يكونوا محتاجين الفلوس الزيادة

طمع بس و حب التملك ليه فلان معاه اكتر ولا عنده حاجة مش عندي

لا اله الا الله طب مهو اكيد يعني لما تيجيلي فلوس اكتر هيتاخد مني حاجة قصادها

بالعقل كده

ربنا عادل و كلنا عنده سواسيه والفرق الوحيد بين العبد والعبد الاخر هو التقوي واتفقنا اننا مش هناخد الا اد بعض

يبقي اللي بيجيله فلوس كتير بيروح قصادها حاجات بردة اكيد يعني

ازعل علي فواتها ليه باه

الدكتور بتاع الاسنان بتاعي الله يباركله احلي حاجة بتبسطني هناك في العيادة اني بقعد وهو بيشتغل وف وشي الحديث القدسي اللي فيه

"يا ابن ادم لا تخف من فوات الرزق ما دامت خزائني مملوءة ولا تخف من ذي سلطان ما دام سلطاني وملكي لا يزول

خلقت لكل الاشياء كلها و خلقتك من اجلي ... "

الحديث كنت قرات مرة انه ضعيف

والله اعلم بس انا بحب الجزئية دي اوي فيه

مهو طبعا ربنا خزائنه مملوءة لا تفرغ ابدا سبحانه مالك الملك

وهو وحده الذي يمنح و يمنع

كتبت دا من يومين و حفظته معرفش ليه ممسحتوش زي غيره واعتبرت اني خرجت اللي جوايا و خلاص

بس بجد موضوع الفلوس دا غبي جداا و عندي حجات كتيرة مرتبطة بيه و معظمها مش حلوة بس كفاية كده :(

الحنــيــــــــــــــــــــــــــــة

امي دايما تقول ان جدتي (الله يرحمها ويرحم امواتنا واموات المسلمين ) ان الحنية مش بتتشحت

كتير بقعد افكر في الجملة دي

انا متاكده انها صحيحة بس اللي قال لكل فعل رد فعل مش نافع في المكان دا

لو كنت حنينه علي حد مش شرط الحد دا يكون حنين عليا

كتير اوي بتتقابل الحنية بمنتهي القسوة و العنف

و كمان مش نافع حكاية فاقد الشيء لا يعطيه

ممكن حد مشافش حنيه و جواه حنيه كبيرة و ساعات بتحصل بردة اللي بيشوف حنية كتير في حياته ساعات بتحوله لاحساس بالتبلد او اللامبالاه والدلع

كل دول طبعا شواذ بالقاعدة

بس اللي مش عارفة افهمه ليه الحال مقلوب

هو مش المفروض لما اعاملك كويس تعاملني كويس و لما اعاملك وحش يا اما تدور علي السبب ورا المعاملة دي يا اما تبتعد عن المعاملة دي طالما بتضايقك

ليه باه الي حاصل في الدنيا غير كده

ليه الناس شكل تعاملها كده

ليه دي شكلها كبييييييرة اوي و الكلام فيها عمره ما هيخلص ابدا
بس اكيد يعني وراها سبب معين

اكيد الانسان مهما كبر عمله بردة ليه حدود و في حجات كتيرة هتفضل عليها علامات استفهام كبيرة

السؤال دا شكلي عمري ما هعرف اجاوب عليه

ولا يمكن ربنا يبعتلي حد يجاوب عليه بدالي الله اعلم

اعرف حد مينفعش يتوصف الا انه كالصخرة الجافة ساعات بقول عليه حاجة والله اعلم بحاله يعني هو مش قاسي بقدر ما هو جاف جداااااا في التعامل او عملي زي ما بيقولوا
انا باه بقول عليه انه زي الصخرة اللي ربنا قال عليها في سورة البقرة " وان من الحجارة لما يتفجر منه الانهار و ان منها لما يشقق فيخرج منه الماء وان منها لما يهبط من خشيه الله وما الله بغافل عما تعملون" لما بدات اركز في الاية دي مرة علي مرة حسيت ان الشخص دا قريب لوصف الحجارة اللي مسيرها يجي عليها يوم و يخرج منها الماء

لما حد من برة ميعرفهوش اوي يعني بيقول عليه انه طيب ولا حنين ساعات وقتها بتيجي علي بالي الصورة دي انه يمكن يكون زي الصخرة دي اللي يمنك لو دورنا جواها اوي من جوة اوي هنلاقي مية والمية هتبقي بتساوي حنية و مشاعر والحجات دي

بس سبحان الله بردة اهو ربنا بيخلي الناس مع بعضها بتتأقلم علي بعضها

يعني اهي ماشية بستحملك وبتستحملني
وان زهقت ف يوم شوية برجع استحمل تاني وايه يعني مهو مفيش ليها بديل تاني يعني

واهي ماشية و نرجع نقولها اااااااااااااه منك يا دنيــــــــــــــــــــــــــــــا ادينا راضين ياربي كل قضائك خير

بالحنية ولا بالقسوة اهي ماشية الحمد لله :)