و في ليلة بعد طلبه فتحته و اتفرجت عليه...
اللي طالع عليا هو في كده ؟ .
سألت "مرايتي" هو في كده فعلا؟؟
في حد كده؟
في اخ بيحب اخوه كده؟
ي واحد يستاهل انها تعمله كده؟
مع ازدياد نوبة البكاء اللي طغت علي كل كلام .. رد "مرايتي " وقال في كده اكيد .. في بس يمكن مش بنشوفه احنا. في الاخ اللي بالشكل دا برغم كل شيء لسه بيعرف يحن علي لحمه ودمه و بيضحي علشان اخوه
أثر فيا الفيلم اوي اول مرة .. او يمكن شفته في وقت كنت بشوف الناس كلها بتجري وراء مصلحتها وبس والاخ مش بيسال علي اخوه ولا بيهتم بيه!! بس وجعني الفيلم ..
"ميكانو" اسم الفيلم .. فكرني الاسم لما كنت بفك واركب قطع الميكانو زمان واللي لسه لحد دلوقتي بتستهويني الحكاية دي بس بطبقها علي صغير مع الصغار..
من شدة الرطوبة والحر .. طار النوم .. و صدفة لقيت الفيلم ..
مقدرتش حتي افكر اغير القناة وانا عارفة المرة اللي فاتت جرالي منه ايه .. فضلت ابص عليه و اقول يمكن المرة دي افهم حاجة بشكل مختلف ومتأثرش بيه كده .. بس واضح ان مفيش فايدة ..
صحيح الاخ انفجر في اخوه و قاله عملتلك و سيبت علشانك و سهرت جنبك و ضحيت بعمري علشانك ..
وصحيح اني كرهت الاخ دا لحظتها علشان مرحمش ضعف اخوه المريض ..
بس معدتش دقايق الا الدموع سالت بدون اي قصد علشان افتكرت انه بردة لو في لحظة غضب ويأس حس العمر جري بيه كده و معملش لنفسه اي حاجة .. فهو في فالحقيقة عمل لأخوه كل حاجة يقدر يعملها .. يعني عايز اللي يقوله متخافش عمرك مراحش هدر .. انت عيشت حياتك وليك هدف كان اقوي من حلمك وانت صغير .. عيشت روحك متعلقة بروح من لحمك ودمك .. كبرته وسهرت عليه .. راعيته و كنت اول حد يفتح عينه عليك .. كنت السند وقت الشدة ووقت الفرح .. كنت عايزة اقوله اشكرلي الاب والام اللي ربوا علي كده ... اللي وحدوا ولادهم .. اللي زرعوا الحب في قلوب ولادهم و خلوهم يخافوا علي بعض اوي كده .. حتي لو كان المريض الاخ الكبير مش الصغير .. كان الصغير بردة هيراعيه . .مهو الدم واحد والنبع اللي شربوا منه واحد ..
صعب عليا الاخ المرة دي كمان .. بس اشفقت علي الاخ المريض جداا من المرض .. يا تري لو اخوه زي الاخوات اللي في الزمن دا .. كان يمكن رماه في مصحة ولا حتي في الشارع و عاش حياته واحتسبه في عداد الاموات و قطع صفحته من حياته خالص!!
افتكرت كم الآباء و الامهات اللي بيرموهم ولادهم في دور المسنين ولا بردة في الشوارع علشان ياخدوا الاربع حيطان اللي كانوا حامينهم !! مش بردة لو كانوا زرعوا في ولادهم خير كانوا لقوا خير؟؟
بس في اللي زرع في ولاده خير وحصد شر .. اصله مش هو الوحيد اللي كان بيزرع ولاده!! كان حواليه اللي بيحط سموم في الارض الطيبة .. فطبيعي النبت الطارح يبقي شكله حلو بس مسمم .. ربنا يعافينا
استغربت حب البنت للاخ المريض وتعلقها بيه بالطريقة دي .. يمكن لانها مرت بتجربة مع زوج مش انسان فلما لقت الانسان و حست بطهارته و نقائه تمسكت بيه حتي لو كان ارتباط مؤقت؟
مش دا هيخليها تعيش اليوم بيومه؟
مش مريحة عيشة اليوم بيومه دي
يا تري بتبات تفكر بكرة هيجراله ايه ولا هتعمل هي ايه ان شافها في مرة وهو مش عارفها و قرر انه ميخترهاش؟
قاسية اوي الفكرة دي
لو بيحبها دلوقتي
مش يمكن لما يكون قادر علي الاختيار و مش هو دا الخيار الوحيد قدامه .. مش ممكن ساعتها يرفضها؟
مش يمكن الظروف تضطره لكده حتي لو هو مش عايز!!
حيرتني البنت و حيرني الاخ الكبير ........... هو في كده؟؟؟؟
صعب عليا الاخ المريض .. اشفقت علي امثاله في الدنيا اللي ملهمش حد زي اخوه يراعيهم
بصراحة مش عارفة مين فيهم صعب عليا اكتر من التاني لما شفت الفيلم للمرة التانية
نهايته مفتوحة .. يمكن اخوه الكبير يفكر في نفسه و يدور علي حياته الخاصة !!
يمكن الاخ المريض ميخترهاش مرة من المرات ويمكن يحب غيرها في ظروف تانية .. يمكن يختارها و يتجوزوا وتقوم هيا بدورها كزوجة و تقف جنبه في محنته !!
يمكن البنت تغير رأيها و تبعد و تفكر في انها مش هي دي العيشة اللي تتمني تعيشها !!
يمكن حاجات كتيرة تحصل .......
هناك 8 تعليقات:
أنا ماشفتش الفيلم
يمكن علشان كده فهمت موضوع الاخ لكن مش واضحة بالنسبة لى قوى حكاية البنت
لكن عجبنى قوى حكاية الاب والام اللى دورهم يخلوا الولاد يدوروا على بعض
لأن فى ناس بتعمل الحكاية دى عمدا
وبتجيب نتيجة كويسة مش بيسيبوها للصدفة حسب طباع الولاد
---------------------------
تسلمى ياحبيبتى على السؤال
انا كويسة الحمد لله
بس عملت عملة مش عارفة لسه نتيجتها
روحت الفيس بوك
فحاسة انى تايهة هناك ولسه مش مركزة
أنا كمان شفت الفيلم واتأثرت بيه جدا
وأجمل ما فيه من وجهة نظرى انه فيلم مصرى يستحق المشاهدة بعيدا عن اى اسفاف او بذائة او عدم احترام حياء الجمهور
شوفتى البطلة فى اخر الفيلم قررت ايه؟
قررت انه كل ما ينساها هى تدخل حياته من جديد وكأنها لأول مرة هو بيشوفها
اللى ضايقنى اوى موقف طليقها ايه اللى استفاده لما فضح انسان مريض فى شغله؟ وليه صاحبتها تقول حاجة زى كده
حقيقى الدنيا ملياااااانة حاجات كتير توجع القلب
حفيدة عرابي
لو قدرتي تشوفيه حتي اونلاين .. اعتقد انه ممكن يعجبك
هو في الفيلم مفيش اب وام .. بيبينلك ان الاب مات وهما صغيرين والام ماتت قبل ما يكون في مشكلة اصلا .. دا اللي خلاني اتخيل انهم ربوهم كويس و زرعوا فيهم يحبوا بعض اوي ويكونوا سند لبعض.. صحيح زي ما بتقولي في ناس كتيرة بتحاول تعمل كده مع ولادها بس مش كتير في الزمن دا بينجحوا
الحمد لله انك بخير.. كويس انك عارفة تتعاملي معاه .. انا كبيري اني بلعب عليه او مؤخرا بدأت اعرف من عليه حبة اخبار.. بالتوفيق ان شاء الله .. لما تغيبي تاني هبقي ابص عليكي هناك :) لقيتك بس محبتش ازعجك :)
موناليزا
من حيث انه يستحق فهو يستحق .. بصراحة هادي كده و مفيهوش حاجة تجرح .. هو يبكي بس .. قصته جميلة ومليانة معاني للي يفهم و يحس
البطلة قررت كده صحيح .. بس سابولنا النهاية مفتوحة .. يعني ممكن يحصل حاجة غير ما احنا متوقعين .. يمكن ميقعش عليها اختياره .. يمكن يختارها مرة واتنين و عشرة .. يمكن حاجات كتيرة اوي حلوة تحصلهم ويمكن حاجات وحشة تفرق بينهم !! مين عارف
موقف طليقها موقف الاسد المجروح اللي بيخبط في كل حاجة واي حاجة لانه اترفض.. لما هي رفضته حس بالاهانة وبما انه مش قادر يأذيها لانها لسه مش تحت ايده .. يبقي الاسهل يخرب اي حاجة بتحبها.. مخلوق زي دا مش ممكن هيفكر في اللي بتتكلمي عليه .. دا كل همه هيكون ازاي يخليهم يترموا تحت رجله يطلبوا رضاه!!! هو دا المريض فعلا .. مريض بسواد قلبه و انعدام ضميره
ربنا يكفينا شر الدنيا واوجاعها
كل سنة وانتن بخير يارب :)
ان شاء الله أحاول اشوفه
مادام عجبك اكيد فى حاجات حلوة
يعنى اهون عليك تشوفينى هناك ومش تكلمينى
هى دى عشرة البلوجر برده
ده انا اللى مصبرنى على هناك ومشجعنى استنى شوية الناس اللى انا عارفاها اصلا من البلوجر
لا استنى انا واحدة بعتتلى ابتسامة النهاردة
انت؟
انا قلت دى جت غلط
زى ماحد فى الشارع يقعد يقول ياجميل ياجميل وانا اعمل نفسى مش واخدة بالى:)
لا انا اتبعتلى وردة
تايهة حتى فى الهدايا
لو انت
والوردة دى مش جاية غلط زى ماتوقعت
اطلبى منى نبقى اصدقاء
وانا اوافق والحاجات دى:)
ضحكتيني لما شفت اول تعليق وكنت هرد عليكي اقولك والوردة فين بس محصلش نصيب
قلت حد خطف الوردة قبل ما توصل :)
مكانتش معاكسة كانت إلقاء سلام كده في صمت :)
هسيبلك حرية اختيار الاضافة سلبا او ايجابا .. براحتك خالص :)
كده أنا لازم أتفرج على الفيلم ده
بس لو شفته تقولي رأيك .. ضروري :)
إرسال تعليق