فالله خير حافظا وهو ارحم الراحمين

اسوء التجارب اللي مرت عليا في حياتي .. او واحدة من شديدي السوء والسواد

الحمد لله علي كل حال

هحكي حصل ايه علشان انا حاسة اني شايلة حمل من افكار و هواجس وحاجات كتيرة حتي مش عارفة انطقها 

يوم زي اي يوم اجازة .. في البيت ومفيهوش غيري و كنت لسه بفكر اني عايزة انزل اروح اعمل البطاقة اللي مأجلاها بقالها كتير .. 

جرس الباب رن مرة 

مش هرد 

رن تاني رنة طويلة  واصلا جرس الباب عندنا قمة في الازعاج و سخيف جداااا

مش هرد 

النهاردة كام 1 يمكن بتاع النور يمكن الايجار يمكن حد عايز حاجة 

انا طبيعي مبردش وكمان غالبا شكلي لوحدي في البيت - الباب مقفول 

وصوت الجرس عمال يرن كتير و جرسات طويلة اوي

افتكرت ابويا نزل ونسي المفاتيح 

قمت علشان افتح و بتاكد انه ابويا 

بصيت في العين السحرية لقيت اتنين رجالة

واحد شكله عادي لابس قميص اسود او كحلي - حاجة غامقة علي اد ما شايفة الاضاءة وحشة بالنهار

وواحد تاني لابس تي شيرت فاتح او بيجامة مش مفسره علشان مكانش واضح

اللي بقميص بنضارة دهبي و شكله بتاع 50 تقريبا و واقف علي جنب الباب و شايفه البروفايل بتاعه و ايده علي الجرس مش بيفصل

والتاني بيبص من الشباك اللي جنب الباب و بعدين خبط علي الباب من فوق 

انا كل دا ومش مطلعه صوت ومش منورة اي حاجة مفيش اي فرق يعرفوه بيه ان حد جوه او بيبيص من العين السحرية 

اللي خبط خبط فوق اوي في الباب -استغربت بيعمل كده ليه 

وبيخبط بالراحة اصلا !!!!!

مفهمتش وبما اني لسه صاحية اعدت اجمع مين دول

تكونش العربية جرالها حاجة ؟ طيب ما انا ببص علي الشارع مسمعتش اي صوت غريب تحت

يكونوا عايزين ابويا ؟ طيب مهو الناس عارفة انه مش موجود بالنهار في الشغل

يكونوا غلطانين في العنوان ؟؟ طيب مهو الرذالة دي ليه عمال يدوس علي الجرس بالغباء دا ليه

والتاني اللي بدقن اللي واقف علي جنب بيمسح علي العدسة بتاعت العين السحرية .. 

يمكن فاكر انه هيشوف فرق .. 

بس انا باصه فمش هتفرق والبيت مضلم مش هيبان ضوء ولا سمع صوتي وانا بقرب من الباب علشان التاني مش عايز يبطل رن علي الجرس

و فجاءة لقيت اللي بدق دا بياخد حاجة من جيبه ولا من ايده التانية  

مش باين حاجة حديدة طويلة او سكينة طويلة

و بيحطها ناحية الكالون بتاع الباب

لحظة وقف بيا فيها الزمن 

دا فاضلة دقيقة

نص دقيقة

كام ثانية 

ثانية و يبقوا قدامي 

الزمن وقف بيا 

حتي صوتي اتحشر معرفتش اطلع صوت 

قلتله ايوة  في ايه

اد ما قدرت انطق واد ما طلعلي صوت 

كل دا في لحظة وانا بقول فيها حاجات كتيرة 

يعني انا نهايتي بيني وبينها باب خشب

يعني انا هيجرالي حاجة دلوقتي واكيد مش حاجة كويسة

مهما بلغ خوفهم ولا يكونوا بس حرامية مش هيسيبوا حد شافهم و مش هيبسيبوني لاسباب كتيرة تانية 

يعني كده ولا كده ضايعة 

كل دا دار في بالي و قلت يارب لو مكتوبلي اموت

 اموت مستورة يارب 

متفضحنيش بأذاهم

اللحظة اللي قلت فيها ايوة في ايه بصوت عالي دي كنت بعدت عن الباب وانا بقولها

اللي بدقن دا كان نزل لما رجعت ابص من العين السحرية 

و التاني اللي بنضارة اتعدل بدل ما كان واقف جنب الباب بقي في وشه وبعد خطوتين

كل دا حصل في ثانية

قال هي دي شقة محمد صلاح 

وانا في وسط كل اسود افكار ممكن تخطر علي بال حد قولتله حاجة زي اللي عايز يسال علي حد يبقي بيحاول يكسر الباب .. مش فاكرة والله قلت ايه بس حاجة زي كده

اتلجلج و قال بابتسامه كسر باب ايه الظاهر العنوان غلط و انا كنت بمد ايدي اقفل سلسلة الباب من فوق والترباس مش عايز يقفل 

جريت علي الشباك اشوف شكلهم ولا لو نزلوا اقول للناس ولا حتي اتاكد من اني مكنتش بحلم 

ملقيتهمش الظاهر خرجوا من الباب علي الناحية لتانية 

من ضمن تلت ولا نص ساعة جرسات .. عيشت 5 دقايق ولا اسود من كده

معرفتش اعمل ايه ولا اقول لمين ايه 

بصيت علي الشارع من ورا الشباك لقيته عادي 

في الناس اللي بتبقي فيه عادي و هادي و الدنيا رايقة في الشارع 

محدش سمع حاجة 

محدش شاف حاجة 

وقف بيا الزمن شوية مكنتش عارفة افكر اتصرف ازاي دلوقتي .. اكلم مين اقول ايه

التليفون رن بنت خالي حكيتلها اللي حصل و كل اللي قولتله ان في حد حاول يفتح الباب ..

 علشان متتخضش وعلشان اقنع نفسي ان الموضوع وقف لحد كده .. 

صليت الضحي و قعدت  ساكنة شوية و افتكرت ان ربنا نجاني من حاجة في علمه هو وحده كان هيجرا منها ايه 

صليت ركعتين لله و قعدت استني .. 

مش عايزة اكلم امي اخضها ومش عارفة اكلم ابويا اقوله ايه 

كان في 2 رجالة حاولوا يفتحوا الباب؟؟ 

انتهيت لاني هسكت واستني لحد ما يرجع 

بعد ساعة ولا اكتر الجرس رن بس انا حاطه السلسلة 

و كنت حاسة كان مفيش حاجة و نجحت اني اقتنع انه كان بيتهيألي اللي حصل 

بصيت في العين السحرية لقيته ابويا 

بفتح الباب مش عايز يتفتح

شديته جامد مش عايز يتفتح

قولت لبابا زقه جامد من برة 

زقه كذا مرة مش عايز يتفتح

وبعدين اتفتح

قالي في ايه قافلة الباب كده ليه

كل العضلات والمفاصل اللي فيا سابت بقيت بحكي وانا بقاومي اني منهارش مش عارفة من الموقف ولا من اني كنت افتكرت اني نسيت واقتنعت ان مفيش حاجة ولا علشان كنت مستنية حد يجي يقولي مالك 

حكيتله وانا مش قادرة اخد نفسي من كتر ما انا متوترة و مش قادرة امسك نفسي من الدوخة علي الخوف 

مش فاكرة حصل ايه بعدها 

بس رجعت قعدت 

الخبر اتسرب 

امي عرفت

اخويا عرف

وجه

قال لازم نبلغ البوليس 

النجار كان بيصلح الباب

اكتشفوا ان الباب اصلا كان اتكسر و اتفتح

يعني الحاجة الوحيدة اللي انقذتني في اللحظة اللي بصيت فيها من العين السحرية عليهم 

ان السوستة اللي في الكالون علقت 

ستر الله الحافظ

فتحوا الباب ولا خدش ولا اي حاجة باينة ان الباب دا اتلعب فيه 

وكان فعلا اتفتح

و كان بيخبط من فوق علشان يخلع الجزء اللي جوه و تنهار مقاومة الباب و دا حصل فعلا

النص اللي فوق من الباب دخل جوه و حاولت ازقه علشان اقفل الباب كويس مكانش راضي وانا بحط السلسلة و هما واقفين برة الباب

هو بس ستر ربنا اللي حفظ 

المعلومات الجديدة خلتني بعد ما كنت هادية و بقيت كويسة و بقول خلاص حصل خير مفيش حاجة 

معرفتش ليه بفكر لو مكانتش السوستة دي علقت 

هما اصلا كانوا خلاص فتحوا الباب 

لو مكنتش قلت يمكن بابا اللي بيخبط كتير ونسي مفاتيحه 

كانوا دخلوا وانا نايمة 

لو كان صوتي فضل متحاش ومعرفتش انطق واقولهم في ايه 

كان زماني اكيد في عداد الاموات والله اعلم وان كنت افضل اموت عن انهم يعملوا اي حاجة تانية 

اللي نزل عليا قعدت اقول الحمد لله ان ماما مش هنا 

الحمد لله ان انا اللي جرالي كده مش ماما 

ستر ربنا انها مش بايته هنا 

ستر ربنا انها برة 

ستر ربنا انه نزل عليا بله و برود في النص لدرجة اني دخلت غليت لبن و فتحت التليفزيون ولحد ما ابويا رجع

ستر ربنا ان اللي حصل دا كان يوم سبت ولو اني مستغربة 

حد بالغباوة دي 

الناس اجازة السبت طبيعي 

حد يدخل يسرق الساعة 10 ونص الصبح ؟؟؟؟؟؟؟

بس بنت خالي قالتلي انهم قالوا حاجة زي كده في البيت بيتك انهم بيفضلوا يدخلوا يسرقوا من 9 ل 11

ستر ربنا في حاجة اغرب

الشقة اللي جنبنا فاضية من سنين و بعفشها 

الشقة اللي قدامها حاليا مفيهاش ناس و لسه يادوب مجددين فيها عفش البيت من اصغر لاكبر حاجة جديدة 

احنا في الدور الاول

كل الجرسات دي محدش سمع

كل دا محدش طلع السلم جايز بس محدش سمع لا فوق ولا تحت ؟؟

حياتي اتعلقت بسوستة الكالون اللي علقت في الباب فمتفتحش علشان كده الراجل حاول يزقها بحاجة حديد 

وهي لحظة كنت انا اللي هبقي في وشه 

ستر ربنا

كلمنا البوليس كويس

بسال اخويا كلمت حد تعرفه يعني 

قالي لا طلبت النجدة من الموبيل

فضل يستني شوية في البلكونة و نزل و طلع سال حد شاف حاجة .. مفيش 

شوية وقال انا ماشي عيشوا انتو باه 

فضلت مستنية من 2 ل 5 بعد صلاة العصر .. مفيش حد جه ...

البوليس 

النجدة

اللي بيغيثوا الملهوف

الغلبان اللي يستنجد بالشرطة 

مفيش

محدش جه ولا سال

و اتوجه كل اللوم والعتاب لي 

ليه مستغستيش بالناس برة ؟؟

ليه مصوتيش

ليه متصلتيش بحد ؟ 

ليه وليه وليه 

انا مكنتش ملحقتش افكر 

ولو فكرت حاولت امنع عنهم انهم يتخضوا وهما برة  .. 

اصلا مكنتش اعرف انهم فتحوا الباب فعلا  وكل دا

مكنتش اعرف ان صوت الجرس دا كان غلوشة علي اللي بيعملوه

مكنتش اعرف ان في شقة اتسرقت الاسبوع اللي فات من الشارع اللي ورانا 

عمارتنا فيها رئيس محكمة و لواء مخابرات سابق و دكاترة و ظباط جيش و شرطة !!!!!

دا احنا الدور الاول ايه البجاحة دي في عز النهار كده ؟؟؟؟؟؟؟؟

المصيبة اللي بجد من كل دول ان الصورة مش عايزة تروح من بالي

شريط عمال يعيد نفسه قدام عنيا 

مش عارفة انام 

بليل بعد ما بابا نام 

قمت احط السلسلة  لقيته هو قافل القفل اللي كان معلق معرفتش استعمله 

وقبل ما اخرج شغلت الراديو جنب الباب

استغفرت ربنا و حمدته

 و مرعوبة من فكرة ان دا حصلي علشان يحصلي انا بالذات 

علشان ربنا عايز يقولي حاجة مش عارفة افهمها 

الفكرة دي مجنناني

مش عايزة اشوف صورتهم في عنيا وانا مغمضة وانا مفتحة 

من عارفة انسي ولا عارفة افكر في حاجة تنسيني الصورة دي 

مش مركزة في اي حاجة و مش عارفة اعمل في نفسي ايه 

بالاكيد مكنتش هبقي مستعدة اموت علشان خايفة من ذنوبي

ممكن يرجعوا تاني و الفكرة دي هبلتني من كتر مهي مسيطرة علي دماغي 

محضر متعملش

محدش فاضي يعمله 

وفي الاخر تعليق اني انا اللي غلطانه لاني المفروض انا اللي اروح اعمل محضر علشان انا اللي شفت الناس دي 

انا مش عارفة اكتب اللي حساه بكل مرارته و الخوف اللي ماليه بس ربنا ما يوريها لحد 

مكنتش عايزة احكي حاجة بس مقدرتش 

مش قادرة اقول الكلام دا لحد

الاحساس وحش اوي خصوصا لحد عاش احساس قريب منه قبل كده