السادة الاخوة الوافدين مرتادي مصر .. عرب باه ولا غير .. ستات ولا رجالة
معلش مضطرة اقول مرتادي مصر .. زي ما بيقولولها علي مرتادي البارات والحانات في الروايات!!
لنفس السبب...
مهي البلد مش للعربدة و بس
في بشر في البلد دي عايشين علي فكرة - مصريين و غير مصريين-
بيشتغلوا و يطلع عينهم علشان لقمة العيش
وعلشان العجلة اللي بيولولوا عليها بقالهم داخلين في السنة التانية علي التوالي .. اذ فجاة ضميرهم صحي من النوم ويلا بينا نبني .. مش موضوعنا .. ليهم يوم دول
الموضوع انه حرام تبقي الناس صاحية من فجر ربنا و نازلة رايحة اشغالها و السادة البهوات مرتادي المحروسة موقفين الشوارع اللي عند الكباريهات والملاهي الليلية و خلافه علشان حضراتهم لما يطلعوا سكرانين مترنحين هما واللي مرافقينهم في ليلتهم اللي خلصت والعداد قلب - يلاقوا الشوفير مستنيهم علشان يكملوا في حتة تانية .. بجد دي قلة ادب
البلد دي مش مفتوحة لكده
مش الناس تموت و تتسحل وتتهان وتتعذب و تتقلع عنيها و يتوقف حالهم علشان اللي معاه فلوس يجي يوقف حال اللي لسه حالهم بيزوك و ماشي لسه ...
الكلام دا كله ينطبق يوميا من فجر ربنا لحد 8 ونص صباحا بطول كورنيش النيل في القاهرة المحروسة و اخص بالذكر طبعا النيل من ناحية الجيزة و العجوزة حيث يكثر المرتادون و مرافقيهم ( سيبنالهم الليل بطوله لحد شروق الشمس 6 ونص صباحا.. اصل ورانا عجلة بدري.. ومفيش فايدة)
ارحمونا يرحمكم الله
سيبونا ننضفها
وهتنضف بإذن الله
و اهلا وسهلا بكل الضيوف الكرام .. اللي اتربوا علي انهم يحترموا البلد اللي داخلين يقيموا فيها او يزوروها .. ولا مرحبا بمرتادي مصر المذكورين بعاليه!!!
اكرام الضيف واجب
بس الضيف مش المؤذي
المحترم اللي يعرف يحافظ علي مشاعر المضيف و أهل بيته
اه وعلي فكرة
دا ملوش ادني علاقة لا بسلفيين ولا اخوان و لا اي دقن ولا جلابية معدية
مجبتش سيرة الدين
جبت سيرة التربية والاخلاق اللي هما عامودين اساسيين في الدين
السياحة و بلاويها لا تخصني
يخصني حقي كمواطنة مصرية بدفع ضرايب في هذا البلد و حقي علي كل ضيف داخل بلدي انه يحترم مشاعرنا و يحترمنا و يحترم ان في ناس عايزة تروح اشغالها و هما بيوقفوا الطرق و يؤذوا مشاعرنا ان البلد فيها دا بيحصل في مقابل الشهداء اللي بيضحوا بنفسهم و الابطال المصابين بيستمروا في محاربة الفساد و الظلم
لا تظلمونا بافعالكم
و مرحبا بالضيوف "الكرام " وكفي!!
ليست هناك تعليقات:
إرسال تعليق